Read Car_Nicobarese MALAKI 2 Bible Online

MALAKI 2 - Car_Nicobarese bible

MALAKI 2

¹Ō yī-ö kūönṙô, chöngö ön ngih töngamuh nö in yīö.

²Ngaich yē yīö min öt hang, yē yīö min inrē öt ṙāten e nö ellōn yīö, öi ha-öiny ngam minë-eny chu, ṙô ngam Mā Tēv yip tömaṙôngö, ngaich chū-ö min tīntö ngam rinôichngö vah nö I kui yīö, rôichgö vah nup inkôlò tī yīö chin min inrē: hôṅ, rôichngö vah u chin ngaich ha-ehangṙen, pò yīö öt ṙāten e ellōn re.

³Yĕh meuk, vëkö ngam kūön meh chin min chööḵnyöten tö meh, māichkūö meh chin min inrē tö sôḵ, tö sôḵ nup tökētu tö yīö, ngaich yī-ö min kē-ĕyö kumngöre in e.

⁴Akahalōn yī-ö min ngaich tö chu tīntö ngih chöngö nö in yīö, hòṅ ngam kinlēḵngô chu nö in Lēvī, ṙô ngam Mā Tēv yip tömaṙôngö.

⁵In ò an ngam kinlēḵngô chu nö nômö lanāmö inrē; ngaich chū-ö kētö u in ò hòṅ ò nö pa-ekūö, ngaich pa-ekūö anga-aṅ tö chu, söklöre inrē nö ngāng alaha tö minë-eny chu.

⁶Elvāng ò an ngam kanô-en ngam chöngö, I minuh, ò inrē ngam töchiplen nö kôti: in chu anga-aṅ nö kiröönngöre im lanāmö chaniplen inrē nö ṙā-ang im tökööl.

⁷Pò minë minuh vē kūönṙô nö töhòṅ köp nö im inkaha, töhōtu cha-a inrē nö chöh ngam chöngö nö elvāng ò: Pòn anga-aṅ ma-ahangkūö ngam Mā Tēv yip tö maṙôngö.

⁸Ngaich pöri yī-ö kānngöre töm talöökö; pô-òv kūö yin ngaich tö tömaṙôngö nö kavē-ĕre nö im chöngö; ngaich yin hachōichgö ngam kinlēḵngô aṅ in Lēvī, ṙô ngam Mā Tēv yip tömaṙôngö.

⁹Lökten chin chū-ö inrē vīten yīö töng rö-övṙen töng yô-òv inrē I kūö tarik nö ṙòkhöre, sā yīö ngaich ötköp i minë talöökö chu, atöltuṙen pöri yī-ö tö tarik im chöngö.

¹⁰Röh öi ayī-ö ṙòkhöre höng hĕng tak yöng? Öt höng hĕng tak ang ngam Tēv nö vīlen hī? Kūöyòh öi ayī-ö kö michūḵṙen chanökhu inlahen i holre, hachōichngö ngam kinlēḵgô yik yöng hī?

¹¹Michūḵṙen chanökhu inlahen an Yūtā, ngaich lūölkaṙen ap sin-òkkūö nö in Israĕl in Yērusalem inrē; pò Yūtā nö hachōichngö hanëtö ngam Mā Tēv ngam hanāngenlōn ò, ngaich hapiöhtöre nö im kikānö aṅ i tahëng tēv.

¹²Rökiṙen an min ngam Mā Tēv nö ip tarik ngam töla-evṙen tö ngih nö in ò ngam tö aṅhen in ò inrē ngam samapṙô, nö löknyö ël nup inrūkui Yāköp, in u inrē ngam kamëtö tökētu nö im Mā Tēv yip tömaṙôgö.

¹³Ngaich hēk yī-ö la-evṙen tö e: hanyāti an ngam tahāklö ngam Mā Tēv tö makmat yīö, I pineūinyö, holtö saniklö unhômö, ngaich yī-ö öt ngöhöre chumkūöṙen im tökētu, öt rēhĕn öi kē-ĕ e eltī re holtö lanöökö kuilōn re.

¹⁴Sönngenre yī-ö ngö ṙô, Kūöyòh lökten! Pò ngam Mā Tēv nö mameuk hôi meh tö ngam pīhö meh öm ayal, ngam chūök meh ulāitö chanökhuṙen inlahare, pòrô anga-aṅ nö hol meh, pīhö ngam kinlēḵngô meh inrē.

¹⁵Ngaich rö-ö hòng anga-aṅ nö vī töng hĕng, pòrô anga-aṅ nö īnu tö chööḵṙen aṅ im ma-alaha? Ngaich kūöyòh lökten nö hĕng? Chöh kulöl anga-aṅ tölöök. Lökten haṙēmngenre tö ngam ma-alaha meh, un halöngtuṙen nö hĕng tak mu-ulāihöt chanökhuṙen inlaha nö lā-al ngam pīhö inyālö ò.

¹⁶Tön öt kuchīkölōn chin i ṙinā — ang, ṙô ngam Mā Tēv, ngam Tēv Israĕl, in ò inrē ngam mahachām tö kui hilāre tö chanökhuṙen, ṙô ngam Mā Tēv yip tömaṙôngö: lökten haṙēmngenre tö ngam ma-alaha meh, öi uh ulāihöt chanökhuṙen inlahare.

¹⁷Ngaich yin hacheikö ngam Mā Tēv tö nup ṙô yīö. Ngaich sön yī-ö ngö ṙô, Isuh öi hacheiken ò? In e yī-ö ngö ṙô, Ṙòkhöre yip töla-evṙen tö tötlöök nö tölöök nö i kūö ngam Mā Tēv, ngaich yī-ö kuchīkölōn in cha; hēk isuh ap Tēv inkaha fālen?