Read Car_Nicobarese MALAKI 3 Bible Online

MALAKI 3 - Car_Nicobarese bible

MALAKI 3

¹Yĕh meuk, tīntö ma-ahānga chin, ngaich anga-aṅ min nö urĕh tö chu nö halēnkö talöökö; ngaich ngam Mā, ngam chahöh yīö, nöng lūk min nö yih nö el ngam töhet chūök ò; ngam ma-ahangkö ngam kinlēḵngô inrē, ngam chūök kumchiklōn inrē, ngam chūök kumchiklōn yīö, yĕh meuk, yih ana, ṙô ngam Mā Tēv yip tömaṙôngö.

²Chīö pöri tökô min nö köp ip sakāmö yanihi ò? Achīö inrē min tösökhak hē ò nö meūkö? Pò ò nö sā tameūyö mahalöök, sā savòng samöch hilā inrē;

³Ūichhak min anga-aṅ nö sā mahalöök ane inrē maha-etlö rupīö, ngaich anga-aṅ min nö ahetlö yip kikōnyö kūön Lēvī, sā humlum rupīö inrē nö ahetlen cha; ngaich cha-a min inrē nö kētö tökētu nö im Mā Tēv nö i lanöökö.

⁴Ngaich möl min öp tökētu tö Yūtā Yērusalem inrē nö tölöök nö im Mā Tēv, nö sā i nuk hötṙeh sakāmö, sā nuk misī samyeūheu inrē.

⁵Ngaich yih chū-ö min haröhtöre in yīö im inkaha fālen; ngaich chū-ö min sā öp töveūten mameuk lā-al yip vamīngen, lā-al yip ma-asĕha, lā-al yip töminyôiny-aṅ nö chūökṙô; lā-al cha inrē yip mahakihten töhaṙāyö alaha nö I nup raneushö cha, tafīösi, kūönyōich, cha-a inrē yip mahavööngö kūö aṅ tahëng nö ṙā-ang im töchip, tö pa-ekūö inrē tö chu, ṙô ngam Mā Tēv yip tömaṙôngö.

⁶Pò chu öich Mā Tēv töthaṙīköre; lökten yin, Ō yī-ö kikōnyö kūön Yāköp, öi öt keuheūtngöre vah.

⁷Löktökūö nuk sākāmö yik muvöhngö yīö yī-ö öi kānngöre ṙā-ang i minë chöngö chu, ngaich rö-ö öi haköpö u. Havantöre yin in chuh ngaich havantöre chū-ö min in yīö ṙô ngam Mā Tēv yip tömaṙôngö. Ngö ṙô pöri yī-ö, Isuh öi min havantöre?

⁸Hòṅ ulāingen ngam Tēv ang min ngòh tarik? Ngaich sön yī-ö ulāingen chu. Ngö ṙô pöri yī-ö, Isuh öi ulāingen meh? I tö hĕng i tösöm tökētu inrē.

⁹Ngaich yin rôichiṙen im rinôichngen; pò yīö ulāingen chu, ulāingen chu, ulāigen vē pumnāmö tarik inrē.

¹⁰Keuheūtöre tī yin yĕh kētö tö hĕng i tösöm el ngam patī chūök inmūlngö, hòn nyā-aṅvkūö nö el ngam patī chu, aṅtī ten e hameukhö mat chu töngamuh, ṙô ngam Mā Tēv yip tömaṙôngö, yē chu min öt löpnyö kūö minë inkūp ngam halīöngö, öich hōngnyö inkôlò yīö, hòn öt kô-òre chūök min nö chūökṙen e.

¹¹Ngaich chū-ö min vëkö ök ngameūkhanga öich chööḵnyôten yīö, ngaich anga-aṅ min nö öt halëlngö nup ṙòng aṅ ngam tumlat yīö; öt rēhĕn min nup vāin yīö nö laròkköti ṙòng nö el panô-òṅ urēhĕkūö öp ṙētaka, ṙô ngam Mā Tēv yip tömaṙôngö.

¹²Ngaich ṙòkhöre ṙô min pumnāmö tarik nö kaheūkö yīö töṙāmölōn: pò yīö min panam chūök kumchikṙen, ṙô ngam Mā Tēv yip tömaṙôngö.

¹³Keung nup ṙô yī-ö lā-al chu, ṙô ngam Mā Tēv, Ngaich sön yī-ö ngö ṙô Isuh öi īhö ṙô-òv lā-alkūö meh?

¹⁴Ngö ṙô yin ngaich, Chanök alaha an ngam linökö la-en ngam Tēv: asuh ap inrē kanôlò hī öi haköp ngih chöngö ò, tö hī inrē kiröönngöre i kūö ngam Mā Tēv yip tömaṙôngö öi höng haṙīvölōn?

¹⁵Ngaich in yih töngamuh töṙāmölōn ngö ṙô tö ngòh mahakeūlenre; hôṅ, könghakṙen yin cha-a vē töla-evṙen tö tötlöök; hôṅ, kalah ngam Tēv cha-a, ngaich ṙānyuvö.

¹⁶Ngaich cha-a vē tö pa-ekūö tö ngam Mā Tēv nö kö vë-ekūöre: ngaich hangihtöre ngam Mā Tēv, nö hang, ngaich öp līpöre inköpkölōn nö kūichi nö I kūö ò, löö in cha yip tö pa-ekūö tö ngam Mā Tēv, yip pumṙūtkö minë-eny ò inrē.

¹⁷Ngaich chū-ö chu min cha-a, ṙô ngam Mā Tēv yip tömaṙôngö, ip sakāmö angū-ö hē chu vī, öp tötohtöre töpōi ṙāi chehen; ngaich chū-ö min ṙālen cha, sā ngòh tarik nö ṙālö öp kūön re öp lamök la-en ò.

¹⁸Ngaich yī-ö min havantöre i ngam tötlöök, ihôi ò ngam lamök la-en ngam Tēv tö ò ngam töt lamök la-en ò.