Read Car_Nicobarese T. MËTIV 11 Bible Online

T. MËTIV 11 - Car_Nicobarese bible

T. MËTIV 11

¹Keuheuthëṙô Ang Yēsū nö tölṙô yik tönëtsīön tak mahaköp; kiröönngöre ngaich Anga-aṅ nö haköphöti, mumkahaten inrē nö i nup panam cha.

²Ngaich hē Yôhan nö el kinlōngö, nö hang nuk la-en Kristū, tīnngö mahaköp ngaich anga-aṅ, nö hatönö Yēsū; nö ngö ṙô,-

³“Me-eṅ Öm yamih? Tahëngtöre taka ṙöng öp ahökkö ih?

⁴Ngaich Yēsū nö ngö ṙô, nö sapṙô cha, “Kuṙòh; ve-eny nang Yôhan tö nup ahang yīö, maheuṅk yīö inrē.

⁵Teūngen yin vē tötmeuk tö matre; kiröönngöre inrē vē tökaròk; lööken vē töyeūnyuvö; hang vē töthang; hachohlöngö vē tökapah; mumkahtuṙen vē yāich, tö ngih tölöök inhānga.

⁶Tökôlò ön ngòh tötsamökngöre töpòkūö Chu.”

⁷Ngaich hē cha nö ngaich; kaknyöre ngaich Yēsū nö i yik tömaṙôngö tö inlahen Yôhan, nö ngöṙô “Asuh ök hatīönkö yīö el-inchōn, öi kiröönngöre? Tafūyu ökuh, tökalöka tökūö kuföt?

⁸Asuh ṙöng ök hatīönkö yīö öi kiröönngöre? Tarik tö hilātö tötanyīka? Yĕh meuk, vē tötanyīka hilā, nö iyöng el patī rācha.

⁹Asuh pöri lökten yīö kiröönngöre? Hatīönkö pròfĕt? Hôṅ; ngö ṙô Chin tö yīö, mööḵlö tö pròfĕt.

¹⁰Anga-aṅ an töngö kinūichngö, Yĕh meuk; tīntö ma-ahānga Chin, nö urēhĕkūö Meh, ngam mahalēnkö talöökö Meh min nö urĕh.

¹¹Tökô-ò ṙô Chin tö yīö, I vē töfötnyu tö kikānö, öt hĕng tak tö pōyö tö Yôhan ap Vamôk. Ap manā-angkūö ṙôngòng pöri nö im pūlngö ngam halīöngö, nö pōyö tö ò.

¹²Hētentö sakāmö Yôhan ap Vamôk, söl ing töngamuh, ngam pūlngö ngam halīöngö nö kīlö; ngaich yik kamil nö teūngen tö e.

¹³Pòn ṙòkhöre yip pròfĕt, ngam chöngö inrē, nö ṙôtö ngam pūlngö tölngö in Yôhan.

¹⁴Yē yīö öre hōḵen ò, Ēlaicha an anga-aṅ, ngam yamih.

¹⁵Ngòh tö-elnānguvö, hökngen ò yēḵ nö hang.

¹⁶Sā yòh tī Öichvöh min, asātö ngih tūmö? Sā yip nyīö an, amūichhaka nö elpanam, yip mahavëkö holre; nö ngö ṙô.-

¹⁷‘Föö in yih īhö; ngaich yī-ö rö-ö kiṙīöm. Harāmöre īhö; ngaich yī-ö rö-ö kōköre.

¹⁸Pò Yôhan nö yih, öt nyā, öt rēhĕn nö òk; ngaich ngö ṙô yī-ö.’ Sī-u aṅ in an.

¹⁹Yih ngòh Kūön Tarik, nö nya-aṅvkūö, òk inrē; ngaich ngö ṙô cha-a, ‘Yĕh meuk; ngòh tarik töpōivat, a mòk vāin inrē. Hol mahamūl ṙāi kinëhöt chehen, tököölö fālen inrē.’ Hameuktu pöri ap mikah nö ip la-en yip mahaköp.”

²⁰Kaknyöre Anga-aṅ nö vëkö nup panam, i chūök nuk minhôiṅyö la-en Ò nö ngaichngen; pò cha nö öhavöötö ellōnre.

²¹“Tötkôlò man me-eṅ, Kòrasīn; tötkôlò man me-eṅ, Petsĕitā; pò nuk minhôinyö la-en nö ngaichngen öre nö i Tūrös, Sītōn inrē, nuk töngaichngen nö in yīö; ngaich öre cha-a nö ha-ëheten nö havöötö ellōnre, nö inyuttö sāk, sītumu kui inrē.

²²Ngö ṙô Chin tö yīö, Höichngen yin min yī-ö, tö Tūrös, Sītōn inrē, ip sakāmö kinṙôka.

²³Me-eṅ inrē, kafarnahum; hapōilöng öm min el halīöngö? Chuh lataṙeū man min, el chūök tökapah; pò nuk minhôinyö öre la-en, nö ngaichngen nö i Sôtòm, nuk töngaichngen nö in meh; ṙòngmö ngöh öre angū-ö nö söl ing töngamuh.

²⁴Ngö ṙô Chin tö yīö, Höichngen man min me-eṅ, tö Sôtòm, ip sakāmö kinrôka.”

²⁵Hē e Ang Yēsū nö ngö ṙô, Ō Kayöngö, Mā ngam halīöngö, panam inrē; ha-öinyö Meh Chin, pò Meh hayunngö në i vē tö-akaha, töhuveū-en inrē; ngaich hameuktö u i vē tëṅnö.

²⁶Hôṅ; Kayöngö; pòn ngatī angū-ö nö lōn Meh.

²⁷Kētu nun në taṙòkhöre nö in Chu, tö ngam Yöng Chu. Öt hĕng tak tö-akahakūö takô töm Kūön, höng ngam Yöng; öt rēhĕn nö hĕng tak tö-akahakūö takô töm Yöng, höng ngam Kūön, ane höng ngòh töhameukhumat, lōn ngam Kūön.

²⁸Ta-ih, yihtöre yin in Chu, yī-ö taṙòkhöre töchei, yī-ö inrē tölangan tö kumre; töich kētö haneuheu yīö.

²⁹Keunlöre yin töm kaneun Chu; haköp inrē öi in Chu; tön töṙēm Chin, töyāichö ellōn inrē; ngaich kôtökūö yī-ö mīnö tö haneūheu nômöre.

³⁰Pòn kaneūnen ngam kaneun Chu; höh inrē ngam kineūnö Chu.