Read Car_Nicobarese T. MËTIV 12 Bible Online

T. MËTIV 12 - Car_Nicobarese bible

T. MËTIV 12

¹Hē e Ang Yēsū nö kiröönngöre, hē el töhet sakāmö, nö lök el panô-òṅ sāiny. Kapahare yik haköptö Ò; kētöre nö köich ṙòng sāiny, ngaich nyā.

²Hē yik, Feresī pöri, nö meukö e, ngaich ngö ṙô tö Ò, Yĕh meuk; më haköptö Meh nö la-evṙen tö ngam tötkô nö la-en, hē el töhet sakāmö.”

³Ngö ṙô pöri Anga-aṅ tö cha, “Öt ve-ekūö inlahen Tāvit öi yī-ö, hē ò nö kapahare, tö yik hol ò inrē?

⁴Tö inlahen ò nö kuhēthötre nö el patī ngam Tēv, ngaich nyā töhet ròtī, nuk tötkô nö nya-aṅ tö ò; öt rēhĕn nö kô yik hol ò; pòn höng nya-aṅkūö kūönṙô?

⁵Hēk, öt ve-ekūö ngam chöngö öi yi-ö, tö yip kūönṙô, hē el töhet sakāmö, nö öt haköp ngam töhet sakāmö, nö el ngam töhet chūök; ngaich rö-ö nö tö fālūṙen?

⁶Ngö ṙô Chin tö yīö, Hĕng taka öp ihih; tömööḵlö tö ngam tö het chūök.

⁷Yē yīö öre akahalōn tö manah ngih, ‘Hōtö neūkölōn Chin; rö-ö nö tökētuvö; ngaich öre yī-ö öi öthakôlò vē tötfālūṙen.

⁸Pò ngòh Kūön Tarik nö mākūö ngam töhet sakāmö.”

⁹Kiröönngöre Anga-aṅ nö ṙā-ang umuh, ngaich chuh el chūök vine-eṅkūötēv cha.

¹⁰Ngaich hĕng tak ök tarik maheuṅk Ò, tölūmö kël. Ngaich cha-a nö hatönan, nö ngö ṙô, “Kô-òren öi halanken tövahavö, hē el töhet sakāmö?” Pò cha nö hòṅ vëken Ò.

¹¹Ngaich ngö ṙô Anga-aṅ tö cha, “Chīöp öre tarik in yīö tö hĕng nòng pököre, öp töt kamëḵ an, tūöklen ò inrē, yē ò nö suktöre nö el mak, hē el töhet sakāmö?

¹²Mööḵlö ön ngòh tarik tö pököre; lökten in kô-òren la-evṙen tö tölöök, hē el töhet sakāmö.”

¹³Ngaich ngö ṙô Anga-aṅ tö ngam tarik, “Hateutnyöngam këlre man.” Hateutnyö e ngaich anga-aṅ; ngaich lööken angū-ö, nö sā ngam tahëng.

¹⁴Kiröönngöre yik Feresī ngaich ve-ekūöre tö inlahen tīre nö fëlan.

¹⁵Akahalōn pöri Ang Yēsū tö e; ngaich kē-ĕngre nö ṙā-ang in e. Maṙôngö yik tamömrit Ò; ngaich halanken cha Anga-aṅ, nö ṙòkhöre.

¹⁶Ngaich sōten cha Anga-aṅ nö eūken Ò;

¹⁷Hòn keuheūtiṙen ngam ṙô ngam pròfĕt, Isayā, nö ngö ṙô;

¹⁸Yĕh meuk ngam mahalanṙen Chu, ngam katöllö Chu, hanāngenlōn Chu; in Ò Chin ṙāmölōn takô. I kui Ò. Tī Chin min tö ngam töhet Faöinylöre; ngaich Anga-aṅ mīnö nö ve-eny kanô-en, i yip tahëg mihëṅṙö tarik.

¹⁹Hö-ö Öp min nö lā-alkūö, öt rēhĕn nö hūḵa; öt hĕng tak min hamang ṙô Ò, nö el talöökö.

²⁰Öt ohngö tī Öp min tö tökaṙöp tafūyu; öt rēhĕn nö nyangngö tī tö tötafūna lul tameūyö; hanöng saha tī Ò nö kētö kanô-en nö im minhôiṅyö.

²¹Ap Minënyö Ò, öp min maheūṅkkö yip tahëng mihëṅṙö tarik.”

²²Ngaich hĕng tak ök tökētu nö in Ò, tö-īnu tö sī-ö, tötmeuk tötkô nö ṙô-òv inrē. Ngaich halanken ò Anga-aṅ; ṙô-òvö ngaich ngam tarik, meuk inrē.

²³Ngaich ṙòkhöre yik tömaṙôngö nö pingangkūö, ngaich ngö ṙô,-Änga-aṅ Ang ngòh Kūön Tāvit?”

²⁴Ngö ṙô pöri yik Feresī, hē cha nö hāngö e, “Ahōngö sī-ö Ön ngòh tarik, lökten Pĕ-el-sipūl, ngam mākūö sī-ö,”

²⁵Akaha lōn Ang Yesū tö ellōn cha, ngaich ngö ṙô tö cha, “Ngih pūlngö maharēvöre nö lā-alre; ngaich öt köp min angū-ö.

²⁶Yē ngam Sātān nö ahōngö Sātān, harēvöre ngaich, nö lā-alre: ngaich siti kanô-òṅ nö köp ngam pūlngö ò?

²⁷Yē Chu lökten Pĕ-elsipūl ahōngö sī-ö, lökten chīö tī yip kūön yīö nö ahōngö sī-ö? Lökten yip min nö cha-a, kamhòkken yīö.

²⁸Yē Chu pöri lökten i ngam Töhet Fanöinylö ngam Tēv tī ahōngö sī-ö, ngaich yih ngam pūlngö ngam Tēv nö in yīö.

²⁹Hēk, siti kanô-òṅ ang ngòh töhĕng tak nö kuhēthötre nö el patī öp tökalēk tarik, nö kēḵ nup chehen ò, yē ò nö öt urĕh nö nyëk ngam tökalēk, Ngaich möl anga-aṅ nö kēḵ nup aṅ patī ò.

³⁰Lā-al Chu ön ngòh töt mi-in Chu; ngòh töt mahamūltöre nö in Chu, pumrāthanga.

³¹Lökten Chin ngö ṙô tö yīö, Aṙēlöng nup min tökööl, ötlinëkô inrē, i tarik; öt aṙēlöng pöri, nup ötlinëkô tö ngam Töhet Fanöinylö.

³²Aṙēlöngö min ngòh töchōchö ṙô nö i ngòh Kūön Tarik; ngòh töchōchö ṙô pöri, nö i ngam Töhet Fanöinylö, öt aṙēlöng, öt rēhĕn nö i ngih panam, öt rēhĕn nö im töyihivö panam.

³³Tökôlò an yēḵ ngam chōn, tö lōn yīö, ngaich kôlò ṙòng anga-aṅ. Hēk, tötkôlò an yēḵ ngam chōn tö lōn yīö, ngaich tötkôlö ṙòng anga-aṅ. Pò ngòh chōn nö i ṙòngre inkaha.

³⁴Yī-ö kūön pēch! Siti kanô-òṅ öi löökö ṙô, yē yīö tötlöök? Pòn i ṙôken nup aṅ ellōn, ngam elvāng nö ṙô-òv.

³⁵Ngòh tölöök tarik kē-ĕny tölöök chehen, aṅ i nup tölöök chehenre Ngòh tötlöök tarik kē-ĕny tötlöök chehen, aṅ i nup tötlöök chehenre.

³⁶Ngö ṙô Chin tö yiö, Ṙòkhöre nup töng minôn nö ṙô, nup ṙô tarik min; ngaich cha-a min ip sakāmö kinṙôka, nö sāpö u.

³⁷Pòn i nup ṙô meh min, öm aṙēlöngö; i nup ṙô meh min, öm öthakôlöngṙô.

³⁸Ngaich rēvre yik kamūich, yik Feresi inrē, töngö ṙô tö Ò, Mahaköphöti; hòṅ meuk minkahngö in, aṅ in Meh.

³⁹Ngaich ngö ṙô Anga-aṅ tö cha, Vē tötlöök, ma-asĕhha tūmö inrē, chöh minkahngö; öt kinë-evkūö pöri töminkahngö, höng ngam minkahngö ngam pròfĕt Yôna.

⁴⁰Pòn sā Yôna misī nö lūöi sumkam, lūöi mitööm inrē nö ellōn ök tökiröng kāḵ; ngatī min ngòh Kūön Tarik nö lūöi sumkam lūöi mitööm inrē, nö lataṙeū tö tumlat.

⁴¹Söklöre yip min aṅ Ninēvē ip tūmö; ngaich öthakôlò e. Pò cha nö ngaich nö havöötö ellōnre, i ṙô Yôna nö ahānga; hĕng taka ön ngòh ihih, tömööḵlö tö Yôna.

⁴²Choholre min ap rāni aṅ lālòhngö, ip sakāmö kinṙôka, nö hol ngih tūmö, ngaich öthakôlò e min. Pò ò nö ṙā-ang-kūö ngih panam, nö yih, nö hang mikah Sòlòmön; hĕng taka ön ngòh ihih, tömööḵlö tö Sòlòmön.

⁴³Yē ngam tötlöök sī-ö nö ngaich nö ṙāngö ngam tarik; ngaich kiröönngöre anga-aṅ nö lök i tötmākūvö, chöh chūök haneūṅheuṅre, ngaich ötkôtökūö.

⁴⁴Ngaich ngö ṙô anga-aṅ, Hòṅ havantöre chin hēk, el ap patī ṙahāngö chu? Chalô anga-aṅ; ngaich kôtökūö tö e nö öt aṅhaṅvö, fôhòh, hanyöṅtö inrē.

⁴⁵Kiröönngöre ngaich anga-aṅ, ngaich sat tak ngahôṅ tö holre tö sī-ö, tö mööḵlö ötlanöökö tö ò. Kuhēthötre cha-a, ngaich iyöng umuh; ngaich ngam mana-aṅ lāinyngen ngam tarik, nö höichngen tö ngam mu-urĕh, ngatī, an min inrē, i ngih tötlöök tūmö.

⁴⁶Ṙònghöichṙô Anga-aṅ nö i yik tömaṙôngö, ngaich höng sökhaka ök yöng Ò kikānö, tö yik kahëm Ò inrē, nö lā uk; lukkenre nö hòṅ ve-ekūö Ò.

⁴⁷Ngaich hĕng taka ök tögö ṙô tö Ò, Yĕh meuk ngam Yöng Meh kikānö, më kahëm Meh inrē, nöng sökha nö la-uk; lukkenre nö hòṅ ve-ekūö Meh.

⁴⁸Ngö ṙô pöri Anga-aṅ nö sapṙô ök vame-eny nangre, Achīö ap Yöng Chu kikānö, yip kahëm Chu inrē?

⁴⁹Ngaich hateutnyö këlre Anga-aṅ, nö kū-ötö yik kahöptöre; ngaich ngö ṙô, Yĕh meuk ngam Yöng Chu kikānö, më kahëm Chu inrē.

⁵⁰Pòn kahëm Chu, kanānö Chu, yöng Chu inrē kikānö, ngòh töla-evṙen min tö lōn ngam Yöng Chu el halīö-ngö.