Read Car_Nicobarese T. MËTIV 13 Bible Online

T. MËTIV 13 - Car_Nicobarese bible

T. MËTIV 13

¹Hē e Ang Yēsū nö kunyī-inyre nö ṙā-ang ël ök patī ngaich ūichngöre nö i kūö mai,

²Hamūlöre ngaich yik tömaṙôngö tarik, nö in Ò; lökten Ò nö yôklö nö el kupòk, ngaich ūichngöre. Höng sökhaka yik tömaṙôngö nö i kuyāyö.

³Ngaich Anga-aṅ nö inchōḵovṙô nö ve-ekūö cha, nö ngö ṙô Yĕh meuk ngam tameūich nö kiröönngöre-nö teūich.

⁴Ngaich hē ò nö teūich, rēvre nuk kulöl famuk taseū talöökö; ngaich yihtöre nuk chehechōn nö nyāngö u.

⁵Fuk el tö-ihōngu nuk tahëng, i chūök tökūöṅnen tumlat, iṙūö sīöplö anū-ö, pòn öt aṙū-uti tumlat.

⁶Ngaich hē ngam tavūöi nö meutlö, ngehngö ngaich anū-ö; ngaich nyangngö; pò u nö öt ṙēhĕvö.

⁷Fuk el töchökhuvö nuk tahëng; ngaich sīöplö nuk töchökhukūö, ngaich harāingökui u.

⁸Fuk el tölöök tumlat nuk tahëng; ngaich ṙônguvö, rēvre tö hēngòng ṙòng, rēvre tö tafūöl anāi ṙòng.

⁹Ngòh tö elnānguvö, hökngen ò yēḵ nö hang.

¹⁰Yihtöre ngaich yik mahaköp, ngaich ngö ṙô tö Ò Kūöyòh Öm inchōḵovṙô ve-ekūö cha?

¹¹Ngaich ngö ṙô Anga-an, nö sapṙô cha, Yī-ö yin tökē-ĕvkūö, pòi hōtu akahalōn tö nup ötmikahkūö sin, aṅ im pūlngö ngam halīöngö; rö-ö an nö kine-eṅkūö cha.

¹²Ngòh tö īnuvö, ngaich kē-ĕvkūö min anga-aṅ; ngaich pōyen aṅ in min. Ngòh töt īnu pöri, ngaich kē-ĕyö nö ṙā-ang in ò min, öp mi-in Ò.

¹³Lökten Chin inchōḵovṙô ve-ekūö cha; pò cha nöng meuk, rö-ö nö meuk, hang yin, rö-ö nö hang, öt rēhĕn nö akahalōn.

¹⁴In cha an ngam ṙô ngam pròfĕt Isayā, nö teungen; ngam töngö; I hināngö yin min hang; öt akaha-elnang pöri. I mineūkö yin min meuk, öt akaha elmat pöri.

¹⁵Pò vē tarik nö kufëilöre ellōn; ṙahata elnang cha-a inrē nö hang meuichngö matre yin inrē; pòn sōḵ nö akaha elmat nö meuk, sōḵ nö hangö elnang inrē; sōḵ nö akaha el lōn inrē, ngaich havöötökūöre, ngaich halanken Chū-ö?

¹⁶Tökôlò nun minë mat yīö, pò u nö meuk; minë nang yīö inrē, pò u nö hang.

¹⁷Tökò-ô ṙô Chin tö yīö, Maṙôngö yik misī pròfĕt, tölöök tarik inrē, tö hòṅ meuknë maheuṅk yīö, ngaich rö-ö nö meūkö u; tö hòṅ hang në ahang yīö, ngaich rö-ö nö hāngö u.

¹⁸Hangihtöre yin yī-ö tö ngih inchōḵoṙô, inlahen ngam tameūich.

¹⁹Yĕn hĕng tak öp hamang ngam ṙô ngam pūlngö, ngaich rö-ö nö akaha-elnang tö e; ngach yihtöre ngam tötlöök nö kēkngö nup töngaich nö teūichtu nö ellōn ò. Anga-aṅ an töteūichtuvö nö i taseū talöökö.

²⁰Anga-aṅ ön ngòh inrē töteūichtu nö el tö-ihōngu ngòh hamang ngam ṙô,ngaich iṙūö kē-ĕ e, nö ṙāmölōn.

²¹Rö-övö pöri nö ṙēhĕvö nö inre; ngaich köp nöng rahëchtaṙen; hē el kanihngen pöri, hēk ötinkôlò, tökūö ngam ṙô; ngaich iṙūö ṙāngenre anga-aṅ.

²²Anga-aṅ ön ngòh töteūichtu nö el töchökhukūö hamang ngam ṙô; ngaich nup pinṙūtkö ngih panam inchīlö tö kanôlò inrē, nö harāingökui ngam ṙô; ngaich öt ṙônguvö anga-aṅ.

²³Anga-aṅ ön ngòh töteūichtu nö el tölöök tumlat, hamang ngam ṙô, ngaich akaha-elnang tö e, töṙôngu takô; rēvre tö tafūöl anāi ṙòng, rēvre tö lūöi anāi ṙòng.

²⁴Ngih inrē tahëng inchōḵoṙô Ò tö cha; Sā öp töhĕng tak an tarik, ngam pūlngö ngam halīöngö, öp tameūich tö tölöök kulöl nö el panô-ôṅre.

²⁵Hē mat tarik pöri nö haṙòh, yihtöre ngam tökunyahaṅelmat tö ò, ngaich teūichtö nup tötkôlò kulöl inrē, nö i nup sāiny; ngaich kiröönngöre.

²⁶Hē maneuinylö rōi pöri, ngaich ṙônguvö; möl minë tötkôlò chōn inrē nö meūkö.

²⁷Ngaich yik mahalanṙen ngam töpanô-òṅvö, nö yihtöre, nö ngö ṙô, Mā; röh Öm teūichtö tölöök kulöl el ngam panô-òṅre? Ṙama-ang yih ön në aṅ e pökeh, tötkôlò chōn?

²⁸Ngaich ngö ṙô anga-aṅ tö cha, Hĕng taka öp tökunya-haṅelmat tötī-iv tö u. Ngaich yik mahalanṙen nö ngö ṙô tö ò. Hōḵ öm pökeh, tö ih kiröönngöre, öi hamūlö u?

²⁹Ngö ṙô pöri anga-aṅ, Rö-ö; pò yīö min amahaiṙen teuklöretī tö nup sāiny, yē yīö hamūl nun tötkôlò chōn.

³⁰Hökngen u nöng kö sīöpönyöre, hanöng saha öp kanöinyòng u. Hē öp kanöinyòng min chū-ö ngö ṙô tö yip mahamūl, Hamūl nup tötkôlò chōn urĕh; nyëkö u, ngaich föngngö u. Hamūl nup sāiny pöri el ap sök chu.

³¹Ngih inrē tahëng inchōḵ-o-ṙô Ò tö cha, Sā öp kun kulöl an ngam pūlngö ngam halīöngö; öp tö kē-ĕ töp tarik, ngaich teūichtu nö el panô-òṅ.

³²Öp manā-aṅgkūö ṙôngòng në taṙòkhöre kulöl, yĕ e pöri nö teūichtu, ngaich tö kiröng kūö nup kun chōn ngaich pōyö nö chōn; ngaich nup chehechōn nö kiteūtöre nö i rōi ò.

³³Ngih ön tahëng inchōḵṙô Ò tö cha: Sā tö-aföhlöng an ròtī ngam pūlngö ngam halīöngö; öp tö kē-ĕ töp kikānö öp tölūöi nyanum atra tökahultukui, hanöng saha fanöhlö e nö keuheūtlöre.

³⁴Ṙòkhöre nun në nö inchōḵoṙô Yēsū, nö i yik tömaṙôngö; öt ve-ekūö cha Anga-aṅ nö öt inchōḵovṙô;

³⁵Hòn kinheūṅtngen ngam ṙô ngam pròfĕt, töngö, Kaknyöre Chin min tö inchōḵoṙô; ṙôtö nup töhayunngöre Chin min, hēten tö ranehlö ngih panam.

³⁶Ṙā-ang Anga-aṅ tö yik tömaṙôngö; ngaich kuhēthötre nö el patī. Ngaich yihtöre yik haköptö Ò nö in Ò nö ngö ṙô, Mikahtö elnang ih Man tö ngam inchōḵoṙô, inlahen nup tötkôlò chōn el panô-òṅ.

³⁷Ngaich ngö ṙô Anga-aṅ tö cha, Ngòh Kūön Tarik Ön tameūichtö tölöök kulöl;

³⁸Ngih panam ön panô-òn; acha-a yip kūön ngam pūlngö tölöök kulöl; kūön ngam sī-ö, nup tötkôlò chōn;

³⁹Ngam sī-ö an tökunyahaṅelmat, tameūich tö u; ngam kanöinyòng, manāngen ngih panam; yip ma-aṅhanga yip mahamūl.

⁴⁰Sā në tötkôlò chōn nö hamūlö, ngaich föngi; ngatī mīnö ip manāngen ngih panam.

⁴¹Tīntö yip ma-aṅ-hāngare min ngòh Kūön Tarik; ngaich cha-a min nö hamūl ngaich kēḵngö u nö ṙā-ang im pūlngö Ò, nup töpô-òvkūö, yip tarik inrē tötlöökö la-en; ngaich kavalhötvö cha-a min nö i kūö öp töhūkūö tameūyö.

⁴²In e cha-a min nöng peuiny, kap kui kanapre inrē.

⁴³Ngaich min yip tölöök tarik nö sā yanāngö ngam tavūöi, nö im pūlngö ngam Yöng cha. Ngòh tö elnānguvö, hökngen ò yēk nö hang.

⁴⁴Sā töhayūni an humlum nö el panô-òṅ, ngam pūlngö ngam halīöngö; öp kanôtökūö öp tarik ngaich hayūni nö hēk; ngaich kiröönngöre anga-aṅ nö ṙāmölōn, ngaich inyihngö nup chehenre, ngaich havah ngam panô-òṅ.

⁴⁵Hēk, ngam pūlngö ngam halīöngö nö sā öp mi-inyih tarik, öp chamöh töpōiṙāi tasehe tölöök.

⁴⁶Ngaich hēngö kanôtökūö töp töpōiṙāi takô; kiröönngöre ngaich anga-aṅ, nö inyihngö nup taṙòkhöre chehenre; ngaich havaha e.

⁴⁷Hēk, ngam pūlngö ngam halīöngö nö sā inhāṅl, öp tösūki nö el mai; ngaich keuheūttöre mihëṅṙö aṅ;

⁴⁸Ngaich yē e nö tööḵlö, ngaich tūökhöt e cha-a, nö i kuyāyö. Ūichngöre ngaich, nö hamūl nup tölöök nö el chūökre; kavāli pöri nup tötkôlò.

⁴⁹Ngatī an min ip manāgen ngih panam. Yihtöre min yip ma-aṅhānga; ngaich haköhngen yip tötlöök, tö yip tölöök;

⁵⁰Ngaich kavalngen cha nö i kūö öp töhūkūö tameūyö. In e min cha-a nöng peuiny, kap kui kanapre inrē.

⁵¹Akaha elnang öi tö u nö ṙòkhöre?”

⁵²Hôṅ; ngö ṙô cha-a, nö sapṙô Ò. Ngaich ngö ṙô Anga-aṅ tö cha; Ṙòkhöre yip kamūich, yip tö haköptu nö im pūlngö ngam halīöngö; nö sā öp tarik töpati-ivö, kamënyö chehenre tö tufömngöre, höteh inrē.

⁵³Keuheūthëṙô Yēsū tö në inchōḵoṙô, ngaich kiröönngöre nö ṙā-ang u muh.

⁵⁴Ngaich yihtöre nö ik panamre; ngaich haköpten cha Anga-aṅ, nö el chūök vine-eṅkūötēv cha. Ngaich cha-a nö pingangkūö; ngaich ngö ṙô, Aṅ yih öng ngih mikah ngòh tarik? Ngam minhôiṅyö inrē la-en?

⁵⁵Röh Ang nö kūön ök vāmī chōn? Röh ap yöng Ò kikānö, nö Marīa invëka? Ngaich kahëm Ò hēḵ Yāköp, Yôsĕf, Sīmōn, Yūtā inrē?

⁵⁶Röh yip kanānö Ò nö ṙòkhöre nö in hī? Aṅ yih ön në nö ṙòkhöre ing tarik?” Ngaich cha-a nö sōḵ nö hang ṙô Ò.

⁵⁷Ngaich ngö ṙô Yēsū tö cha, Tö-eū-eu ön ngòh pròfĕt; höng i panamre pöri nö rö-ö, i patīre inrē.

⁵⁸Öt pōyen la-en Ang-aṅ inrē tö minhôiṅyö, nö umuh, kūö cha nö öt ṙātö ellōnre.