Read Car_Nicobarese T. MËTIV 16 Bible Online

T. MËTIV 16 - Car_Nicobarese bible

T. MËTIV 16

¹Yihtöre yik Feresī, yik Satukī inrē, ngaich kalahan; ve-ekūö Ò nö hameuktö minkahngö el halīöngö.

²Ngö ṙô Anga-aṅ, nö sapṙô, Yē e nö harap, ngaich ngö ṙô yī-ö, Löök ön min ngòh panam; pò ngam halīöngö nö ngāṅv.

³Chōich ön min ngòh panam, ngö ṙô yī-ö tö peuheū; pò ngam halīöngö nö ngāṅv, sah inrē. Akahalōn yin, akaha kūö ngam halīöngö; rö-ö pöri yī-ö kô akah minkahngö ṙētak.

⁴Tötlöök, ma-asĕhha tūmö, chöh minkahngö; öt kē-ĕvkūö pöri angū-ö tö minkahngö, höng ök minkahngö Yôna. Ṙā-ang Anga-aṅ tö cha, ngaich kiröönngöre.

⁵Yihtöre yik mahaköp nö im tahëng lā; ngaich vaichngö nö öt kēkö ròtī.

⁶Ngaich ngö ṙô Yēsū tö cha, Haṙēmngenre yin, tö nup tö-aföhlöng i yip Feresi, Satukī inrē.”

⁷Ngaich cha-a nö ve-ekūöre, nö ngö ṙô, Öt kēkö ròtī in,

⁸Ngaich akahalōn Yēsū tö e, ngaich ngö ṙô, Ō yī-ö tökūöṅnen mikah; kūö yòh öi ve-ekūöre, pò yīö öt īnu tö ròti?

⁹Öl öi akahalōn, öt rēhĕn hòng köpölōn tö nuk tö taneui ròtī, i yik tötaneui köṅny; ngaich ām kumvôkö chahap yī-ö?

¹⁰Öt rēhĕn tö nuk tö sat ròtī, i yik tö fën köṅny, ngaich ām kumvôkö chahap yī-ö?

¹¹Sitih öyih öt akahalōn tö Chu öt ṙô tö ṙôtī in yīö, Haṙēmngenre pöri, tö ngam tö-aföhlöng i yip Feresī, Satukī inrē.

¹²Ngaich möl cha-a nö akahalōn tö Ò nö öt hōten cha nö akahalōn tö Ò nö öt hōten cha nö haṙēmngenre i nup tö-aföhlöng ṙòti, tön i nup inköphöti aṅ i yik Feresī, Satukī inrē.

¹³Hē Yēsū nö yihtöre nö i kūöngö Kaisarī Filip, ngaich hatön yik haköptöre. Anga-aṅ nö ngö ṙô, Achīö Öich Chu-ö, Kūön Tarik, tö ṙô vē tarik?

¹⁴Ngaich ngö ṙô cha-a, Rēvre yip tö ngö ṙô, Yôhan öp Vamôk, rēvre tö Ēlaicha ngö; Yarimiā ngö yip tahëng; hēk yip tahëng tak. Aṅ i yik pròfĕt, ngö.

¹⁵Ngö ṙô Anga-aṅ töcha, Achīö Öich Chū-ö, tö ṙô yīö?

¹⁶Ngaich Simōn Pītör nö ngö ṙô, nö sap ṙô Ò, Me-eṅ Man Kristu, Kūön ngam tö aṅ Tēv.

¹⁷Ngaich ngö ṙô Yēsū tö’, Sīmōn kūön Yôna; tökôlò man me-eṅ; pòn öt alaha, öt mahām inrē. Mahameuktö e nö in meh; tön ngam Yöng Chu, el halīöngö.

¹⁸Ngö ṙô Chin inrē tö meh, tö meh öm Pītör; I kui ngòh ihong tī Chin min vīlö ngam māṅ Chu; ngaich minë inkūp ngam chūök tökapah nö öt kò min tö e.

¹⁹Kĕ-ĕkūö meh Chin tö në tinkīök ngam pūlngö ngam halīöngö; nup töng nyahëṅk meh ing panam nyëkiyö min nö el halīöngö; nup töng lahuhlö meh ing panam luhlöngö min nö el halīöngö.

²⁰Ngaich Anga-aṅ nö sōtö yik mahaköp nö vahënyu nang tö Ò nö Kristū.

²¹Hēten e Ang Yēsu nö hameukhömat yik mahaköp, tö Ò nö hòṅ chuh Yērūsalem, ngaich pōiyen kanihngnen nö i yik mā, fëliyö, ngaich choholre im linūöi sumkam.

²²Tūökngen Ò pöri Pītör, ngaich kētöre nö vëken Ò, nö ngö ṙô, Mā öt hōḵ Man; sòk nö öt ngatī nö in Meh.

²³Havöölökūöre pöri Anga-aṅ, ngaich ngö ṙô tö Pītör, Heūlngöre man, Sātan, insānngö Chu man; pò meh öt lōntö nup aṅ im Tēv, lōntö nup aṅ i tarik pöri.

²⁴Ngaich ngö ṙô Yēsū tö yik mahaköp, Yĕn tarikuvö töhòṅ tömkörit Chu, hökngen ò yēḵ nö hayëḵngenre, nö kēḵngam töhakālöre, nö tömrit Chu.

²⁵Ngòh tö hòṅ hayööken nômöre, löhöltī tö e; ngòh tö löhöl tī tö nômöre, töpòkūö Chu, teūngen tö e.

²⁶Asuh öp öre kanôlò ngòh tarik, yē ò nö teūngen töng panam, ngaich öt teūngen tö nômöre? Hēk, asuh öp öre tī ngòh tarik, nö ṙënngen ngam nômö ò?

²⁷Pò ngòh Kūön Tarik min nö yih, nö im kanôlò ngam Yöngre, nö holtö yip ma-aṅhāngare; ngaich kē-ĕkūö tarik min Anga-aṅ tö tö sā nup la-en cha.

²⁸Tökô-ò ṙô Chin tö yīö, Rēvre yip ihih samökhaka, yip töt kamlah kinpaha, hanöng saha mat cha nö meuṅk ngòh Kūön Tarik nö yih nö im pūlngöre.