Read Car_Nicobarese T. MËTIV 17 Bible Online

T. MËTIV 17 - Car_Nicobarese bible

T. MËTIV 17

¹Unôichrit tö tafūöl sumkam, Ang Yēsū nö ngò-òṅ hēḵ Pītör. Yāköp, Yôhan ök kahëm Yāköp, nö hol Ò; ngaich hayônlen cha nö i kui ök tömarô-òlkui rôngö.

²Ngaich haṙī-ingre mineūkö Anga-aṅ nö i kūö cha; sā yanāngö mat tavūöi, ök kūö Ò; sā in soho hanāṅtö nuk hilā Ò.

³Ngaich ilööṙen nö meūkö tö cha nā Môsös, nāṅ Ēlaicha, nö ve-ekūö Ò.

⁴Ngaich ngö ṙô Pītör tö Yēsū, Kuchīken in ihih; yē Meh hōḵ, ngaich lūöyö vahī chu-ö kô-òren tö inrūkui; hĕng inrūkui Meh, hĕng Môsös, hĕng Ēlaicha inrē.

⁵Ṙònghöichṙô Anga-aṅ, ngaich kahultukui cha-a tök töyang taṙul; ngaich ngö ök ṙô, lamöktö el ök taṙul, Hanāngenlōn Chu Ön ngòh; nö Kūön Chu; in Ò Chin ṙāmölōn takô. Hang ṙô Ò yin.

⁶Ngaich hē yik mahaköp nö hāngö e, fātngökūöre ngaich cha-a, nö pa-ekūö takô.

⁷Ngaich yihtöre Ang Yēsū, ngaich lūölken cha, nö ngö ṙô Choholre; un pa-ekūö.

⁸Ngaich môklökūöre cha-a, ngaich öt maheūṅku, höng Yēsū nöng hĕng tit tak.

⁹Ngaich yē cha nö yônti, nö ṙā-ang kui ngam rôngö; ngaich sōḵten cha Yēsū, nö ngö ṙô, Un vahënyu nang tö ngam tömeūkö, hanöngsaha ngòh Kūön Tarik nö choholre, nö ṙā-ang yip tö kapah.

¹⁰Ngaich hatönan yik haköptö Ò, nö ngö ṙô, Sitih öp Ēlaicha nö mū-urĕhtö yihih, tö ṙô yip kamūich?

¹¹Ngaich ngö ṙô Ang-aṅ, nö sapṙô cha, Kô òp Ēlaicha nö yih nö urĕh; ngaich halēnken taṙòkhöre.

¹²Ngö ṙô pöri Chu-ö tö yīö tö Ēlaicha nö ngaich nö yih; ngaich cha-a nö öt akahakūö tö ò; ngaich nöng i kanahanglōnre tī tö ò. Ngati Ön min inrē ngòh Kūön Tārik nö kihngen, tötī cha.

¹³Ngaich akahalōn yik mahaköp, tö Ò nö ṙôten Yôhan ök Vamök.

¹⁴Ngaich hē cha nö yihtöre nö i yik tömaṙôngö; ngaich hĕng tak ök tarik yamihtöre nö in Ò; simngöre, nö ngö ṙô,

¹⁵Mā; aheūkölōn tö ngòh kūön chu; tön hangīhīre ön, nö pōihangen. Ṙōl heuh ön nö fuk kūö tameūyö; ṙōl heuh nö fuk el mak.

¹⁶Ngaich kēten ò chu-ö in më haköptö Meh; ngaich öt kô cha-a nö halanken ò.

¹⁷Ngaich ngö ṙô Ang Yēsū, Ō tötakaha, töminôṙô tūmö; i rô-òten Öich min in yīó? I rô-òtö manöiyö Öich min in yīö? Kēten ò ihih, in chu.”

¹⁸Ngaich Yēsū nö vëken ò; ngaich kunyi-inyre ök sī-ö, nö ṙā-ang in ò. Hētentö e ngaich, ök nyīö nö lööken.

¹⁹Yihtöre ngaich yik mahaköp nö in Yēsū; ngaich ulāikenre nö ngö ṙô, Kūöyòh öi īhö öt kô ahōngen ò?

²⁰Ngaich ngö ṙô Anga-aṅ tö cha, Kūö ngam kun mikahre yin. Tökô-ò ṙô Chin tö yīö, Yē öp mikah yīö öre, nöng sā ṙôngòng kun kulöl, ngaich kô-òren yī-ö ngö ṙô tö ngih rôngö, Kē-ĕngre; chuh umu-aṅ; ngaich kô-òren angū-ö nö kē-ĕngre; ngaich öthēngö, öt kanô-òṅ yī-ö.

²¹Rö-ö pöri angū-ö töngatī nö kunyī-inyre; höng lökten vine-eṅkūötēv, inhīkö inrē.

²²Ṙòngmö i Kelelī cha-a, ngaich Yēsū nö ngö ṙô tö cha, kētu ön min ngòh Kūön Tarik, nö eltī tarik;

²³Ngaich cha-a min nö fëlngen Ò; ngaich im linūöi sumkam min anga-aṅ nö choholre. Ngaich pōyen miṙīvlōn cha-a.

²⁴Ngaich hē cha nö yihtöre nö i Kafarnahum; ngaich yik kamëḵ rupīö ngam töhet chūök, nö yihtöre nö in Pītör; nö ngö ṙô, Röh Ap mahaköpten yīö nö ti-ivötö rupīö?

²⁵Ngaich ngö ṙô anga-aṅ, Hôṅ. Chalô anga-aṅ nö el patī; ngaich urĕhnyô Yēsū nö ve-ekūö ò, nö ngö ṙô, Sitih lōn öm me-eṅ, Sīmōn. In chīö aich vē rāchakūö panam nö kēḵ ṙāi kinëhöt chehen, ṙāi tum tak inrē? I yip kūönre? i yip tahëng ṙöng?

²⁶Ngaich ngö ṙô anga-aṅ, I yip tahëng. Ngaich Yēsū nö ngö ṙô tö ò, Lökten yin vē kūön nö öt ti-ivö.

²⁷Ngaich pöri, hòṅ hī öt pô-òvkūö tö cha, Kuṙòh, kiröönngöre man; chuh el mai, sumngö vòkre pömchö; ngaich kēḵ öp kāḵ mu-urĕhlö; tuvāḵnyö elvāng ò; ngaich hĕng tāk min öp rupīö kanôtökūö meh, Kē-ĕ e me-eṅ; ngaich kētö e in cha, tī hānyöre.