Read Car_Nicobarese T. MËTIV 18 Bible Online

T. MËTIV 18 - Car_Nicobarese bible

T. MËTIV 18

¹Hē e, yik mahaköp nö yihtöre nö in Yēsū, ngaich ngö ṙô, Achīö öp töpōyö nö im pūlngö ngam halīöngö?

²Hĕng tak havëti Anga-aṅ ngaich, tö kun nyīö, nö in Ò; ngaich asöklen ò nö ellōn cha.

³Ngaich ngö ṙô, Tökô-ò ṙô Chin tö yīö, yē yīö öt haṙī-ingre, öi vīngöre sā kun nyīö, öt kôhöt yī-ö min kuhēthötre im pūlngö ngam halīöngö.

⁴Lökten ngòh mahayāichngöre nö, sā ngòh kun nyīö, anga-aṅ töpōyö nö im pūlngö ngam halīöngö.

⁵Ngòh hamôḵòṅ töngati kun nyīö min, nö i Mine-eny Chu; hamòḵen Chu anga-aṅ.

⁶Ngòh töhĕng tak pòkūö pöri tö aṅ i vē kun kūöṅnö vē ṙamātö ellōnre nö in Chu, nö palā-aiṙen; lööken an öre nö urĕh sin, yē ò nö kapòktu likeun tö tökiröng ihong ngaich sūmi nö el mai.

⁷Öt kôlò ön ngih panam, kūö nup lökngen pinlāngen. Ötkô nun nö ötyih në lökngen pinlāngen; tötkôlò pöri öp tarik öp löktö u nö yih.

⁸Yē ngam kël meh, hēk ngam kalröön meh nö pô-òvkūö tö meh palā-aiṙen; rökngö e, kavalngö e nö ṙā-ang in meh, ĕhten man min, yē meh kuhēthötre im nômö, öm kurong, karòk inrē; tö meh, yē meh āṅngöre lā kël, hēk kalröön, nö kavalhötvö nö el ngam töt nyangngö kūö tameūiyö.

⁹Yē ngam mat meh nö pô-òvkūö tö meh palā-aiṙen, peôknyö e, kavalngö e nö ṙā-ang in meh, ĕhten man min yē meh kuhēthötre im nômö, öm höng hĕngtit mat; tö meh yē meh āṅngöre lā mat nö kavalhötvö nö el ngam tötnyangngökūö tameūyö.

¹⁰Uh yin hĕng tak hayëḵngen tö vē kun kūöṅnö; ngö ṙô Chin tö yīö, tö yip ma-ahānga cha, el halīöngö, nö örheūheu nö hatīönkökūö ngam Yöng Chu el halīöngö.

¹¹Yamih pöri ngòh Kūön Tarik nö hayööken töchatngen.

¹²Sitih lōn öi yī-ö? Yē öp tarik töhēngòng pököre, ngaich hĕng hang nòng tö u öp tö lō-ongkūö; röh ang nö ṙāngö nup tömachūötör anāi machūötör ngaich chuh kui rôngö, nö chöh ngam tö lō-ongkūö?

¹³Ngaich yē ò nö kôtökūö tö ò, Tökô-ò ṙô Chin tö yīö, Mötlö ṙanāmölōn an tö ò töre, nö i nup tömachūötöre anāi machūötör nup töt lō-ongkūö.

¹⁴Ngatī an nö ötlōn ngam Yöng chu el halīöngö, nö hĕng hang tak i vē kun kūönnö nö ötkôlò.

¹⁵Yē ngam hol meh nö köölö fālen nö in meh; kuṙòh, hameukhömat ò tö fālen ò, an höng nā-aṅnyöre. Ngaich yē ò nö hang ṙô meh, ngaich töteūngen me-eṅ tö ngam holre.

¹⁶Yē ò pöri nö öt hang ṙô meh; ngôṅ holre me-eṅ, hĕng tak, hēk nët holre me-eṅ, hòn i ṙô nap tö nët tak, hēk lūöi tak, mameuk, nup ṙô nö haköpi.

¹⁷Yē ò nö sōḵ nö hang ṙô cha, ve-eny e i ngam māṅ. Ngaich yē ò nö sōḵ nö hang ṙô ngam māṅ inrē; hökngen ò me-eṅ, nöng sā tahëng mihëṅṙö, mahamūl ṙāi kinëhöt chehen inrē.

¹⁸Tökô-ò ṙô Chin tö yīö. Nup nyahëk yīö min ing panam, nyëkiyö min nö el halīöngö; nup lahuhlö yīö min nö ing panam, lūhlöngö min nö el halīöngö.

¹⁹Hēk Chin ngö ṙô tö yīö, Yĕn nët tak tö yīö töhōḵ nö ing panam, tö nup töng havëkö cha min; kē-ĕvkūö min cha-a tö ngam Yöng Chu, ngam el halīöngö.

²⁰Pòn i chūök tö nët tak, hēk tö lūöi tak, nö hamūlöre nö i Mine-eny Chu; umuh Chu-ö ellōn cha.

²¹Yihtöre ang Pītör nö in Yēsū, ngaich ngö ṙô tö Ò, Mā; ām heuh öp hol chu öre, nö köölö fālen nö in chu, ngaich aṙēlen ò chu-ö? Tölngö tösat heuh hòng?

²²Ngaich Yēsū nö ngö ṙô tö ò, Rö-ö Chin ngö ṙô tö meh, Tölngö tö sat heuh; tölngö tö sat van sat anāi pöri.

²³Lökten an ngam pūlngö ngam halīöngö, nö sā öp rācha, öp kamheuk ṙôken chehenre nö i yip mahalanṙenre.

²⁴Ngaich hē ò nö rĕhtenre nö kaheuk, ngaich hĕng tak öp tökētu nö in ò öp tö söm köṅny kinlaha höteh tö rupīö nö in ò.

²⁵Ngaich pò ò nö öt huveū-en nö kē-ĕti, ngaich öp mā ò nö hōten ò nö inyihiyö, holtö pīhöre, kūönre, nup taṙòkhöre chehen ò inrē; ngaich kētu nö höteh.

²⁶Lökten ngam mahalanṙen nö afukngöre nö i kūö ò, nö ngö ṙô. Hamöitöre man yēḵ in chu sin; ngaich chin min keuheūtnyöre tī tö u.

²⁷Ngaich ngam mā ngam mahalanṙen nö aṙē-ĕlōn, ṙālen ò ngaich; aṙēlen ò inrē tö nuk höteh ò.

²⁸Ngaich pöri anga-aṅ mahalanṙen nö kiröönngöre; ngaich kôtökūö tök tahëng tak holre, tö hēngòng höteh tö rupīö nö in ò. Kēḵ an ngaich anga-aṅ, ngaich kiröich kilööp ò nö ngö ṙô, Kētö nup hötehre man.

²⁹Ngaich öp hol ò nö afukngöre, nö ve-ekūö ò, nö ngö ṙô, Hamöitöre man yēḵ in chu sin; ngaich chin min keuheūtnyöre tī tö u.

³⁰Ngaich sōḵ anga-aṅ, kiröönngöre pöri, ngaich kalonghötnen ò nö el kinlōngö, hanöngsaha tī ò nö kētö nup höteh.

³¹Ngaich hē yip hol ò nö meukö, e ngaich cha-a nö pōi miṙivlōn, yihtöre ngaich, nö ve-eny nang ngam Mā cha, tö nup tö ngaichngen.

³²Ngaich ngam mā ò nö havëten ò nö in ò; ngaich ngö ṙô tö ò; Me-eṅ tötlöök mahalanṙen; aṙēlen meh chin ngaich, tö nuk höteh meh; pò meh ve-ekūö chu.

³³Öt kô öm me-eṅ inrē, aṙē-ĕlōn tö ngam holre, sā chu chu-ö ngaich aṙē-ĕlōn tö meh?

³⁴Ngaich ngam mā nö līn; ngaich kēten ò nö i yip tötmahakôlò, hanöngsaha tī ò nö kētö nup höteh.

³⁵Ngatī tī an min ngam Yöng Chu el halīöngö, tö yīö; yē yīö öt löknyö ellōnre lōn, aṙē-ĕl holre.