Read Car_Nicobarese T. MËTIV 19 Bible Online

T. MËTIV 19 - Car_Nicobarese bible

T. MËTIV 19

¹Hē Yēsū nö keuheūtöṙô tö u; kiröönngöre ngaich Anga-aṅ nö ṙā-ang Kelelī ngaich yihtöre nö i kūöngö Yūta, lamuh tö Yôtön.

²Maṙôngö yik tarik tamömrit Ò; ngaich halanken cha Anga-aṅ nö umuh.

³Ngaich yihtöre nö in Ò yik Feresī, kalahan, nö ngö ṙô, Kô ang ngòh tarik nö ṙāngö pīhöre nöng keuheūttöre löknyö chööḵnyi?

⁴Ngaich ngö ṙô Anga-aṅ, nö sapṙô cha, Öt ve-ekūö e öyih tö ngam Vamīlen cha ik raneh nö kikōnyö kikānö tī inrē nö vīlen cha.

⁵Ngaich ngö ṙô Anga-aṅ, Angū-ö an lökten tarik, nö ṙāngö yöngre; ngaich haköpngöre nö im pīhöre, ngaich nët tak cha-a nö vīngöre nöng hēngö alaha.

⁶Ngaich cha-a nö öt ngöhören nö nët, höng hēngö alaha pöri. Lökten minā töhamūlö tö ngam Tēv, un harēvi tö tarik.

⁷Ngaich ngö ṙô cha-a tö Ò, Kūö yòh ök pöri Môsös nö hōtö kinūichngö ṙināngö, ngaich ṙā-aiyö ngam kikānö?

⁸Ngaich ngö ṙô Anga-aṅ tö cha, Kūö nganë-eṅ ellōn yīö ök Môsös nö halöngten yīö ṙāngö pihöre; rö-ö pöri angū-ö nö tö ngati, ik raneh.

⁹Ngö ṙô Chin tö yīö, Ngòh ṙamāngö pihöre min; nö öt kūö chinô-òṅ, ngaich pihö tö ngam tahëng, höng ma-asĕhha anga-aṅ. Ngam töpīhövö tö ngam töṙā-aiyö kikānö, ma-asĕhha anga-aṅ inrē.

¹⁰Ngaich ngö ṙô yik mahaköp tö Ò, Yē e nö ngatī inlahen nö im tarik tö ngam pīhö ò, ĕhten öre yĕn öt pīhöre.

¹¹Ngö ṙô pöri Anga-aṅ tö cha, Öt ṙòkhöre yin vē tarik nö kô nö kēḵ ngam ṙô angū-ö; höng yip tökē-ĕvkūö pöri tö e.

¹²Pòn kumkantöre yip inrē, yip töngatī finötnyö, nö ṙā-ang ellōn yöngre. Kumkantöre yip inrē, nö tövī-iyö tö tarik. Kumkantöre yip inrē, yip vamīngöre, töpòkūö ngam pūlngö ngam halīöngö. Ngòh tökô nö kē-ĕ e, hökngen ò yēḵ nö kē-ĕ e.

¹³Ngaich kētu yik kun nyīö nö in Ò; pòn hōtu Anga-aṅ nö ṙātö eltīre nö i kui cha, nö ve-elkui cha. Ngaich yik mahaköp nö vëken cha.

¹⁴Ngö ṙô pöri Yēsū; Höktö më kun nyīö nö yihtöre nö in Chu; uh yin nö sōtu; tön ngatī aṅkūö an ngam pūlngö ngam halīöngö.

¹⁵Ṙātö eltīre ngaich Anga-aṅ nö i kui cha; ngaich kiröönngöre.

¹⁶Ngaich hĕng tak ök yamihtöre nö in Yēsū, tö ngö ṙô, Mahaköphöti; asuh ap tölöök la-en chu, hòṅ chu nômuvö tö ngam tö örheūheu aṅ?

¹⁷Ngaich ngö ṙô Anga-aṅ tö ò. Kūöyòh öm hatönö Chu, tö inlahen tölöök? Humëng taka Ap tölöök. Yē meh pöri hòṅ kuhēthötre im nômö, haköp në man yēḵ chöngö.

¹⁸Ngaich ngö ṙô anga-aṅ, Nup yòh? Ngaich ngö ṙô Yēsū, Um fël tarik; um asĕhha; um ulāiyö; um sūöicha;

¹⁹Milēḵṙen tö nap yöngre; hāngenlōn man inrē tö holre, sā lōn meh töre.

²⁰Ngaich ngö ṙô ök ṙāl tarik tö Ò, Ngaich chin haköpö u nö ṙòkhöre. Asuh ap tö öltöre nö in chu?

²¹Ngaich ngö ṙô Yēsū tö ò, Yē meh hòṅ teungten; kuṙòh, kirööngöre man; inyihngö nup inlānenre, ngaich alōntö yāich; ngaich me-eṅ mīnö el halīöngö kanôlò; ngaich ta-a tömrit Chu inrē.

²²Hē ngam ṙāl tarik nö hang ṙô Ò, kiröönngöre ngaich anga-aṅ nö haṙīvölōn; pò ò nö töpōiyen inlānen.

²³Ngaich ngö ṙô Yēsū, tö yik haköptöre, Tökô-òṙô Chin tö yīö, Kihngen yin vē tökôlò tarik nö kuhēthötre nö im pūlngö ngam halīöngö.

²⁴Hēk Chin ngö ṙô tö yīö, Lööṙen ön ngòh ūṅt nö meuthöt nö lökhöt rit charum, tö ngòh tö kôlò tarik nö kuhēthötre nö im pūlngö ngam Tēv.

²⁵Hē yik mahaköp nö hāngö e; ngaich cha-a nö pōiyen pinngangkūö, nö ngö ṙô Achīö öp pökeh tökô nö hayöökaṙen?

²⁶Ngaich ngëichken cha Yēsū, nö ngö ṙô, “Tötkô an angū-ö nö i tarik; höng tökô pöri nup tö keuheūttöre nö im Tēv.

²⁷Ngaich Pītör nö ngö ṙô tö Ò, Yĕh meuk; ṙòkhöre ṙahāngö in īhö, ngaich tömrit Meh. Asuh papkeh min taneūngen ih?

²⁸Ngaich Yēsū nö ngö ṙô tö cha, Tökô-ò ṙô Chin tö yīö yī-ö tamömrit Chu, i tinfömlö taṙòkhöre, hē ngòh Kūön Tarik min nö ūichlöre nö el kantēra kanôlòre; ūichlöre min yī-ö inrē, ël nup tö nët sīön kantēra, kakòkken yip tö nët sīön miyöngö Israĕl.

²⁹Ngaich ṙòkhöre yip ṙamā-ang patīre, hanöng kisānöre, yöngre, kūönre, panamre, tö pòkūö Mine-eny Chu; hēngòng taneūngen min; ngaich amīnu tö ngam nômö tö örheūheu-aṅ.

³⁰Maṙôngö pöri min yip mu-unôich nö urĕh; yip mu-urĕh inrē nö unôich.