Read Car_Nicobarese T. MËTIV 20 Bible Online

T. MËTIV 20 - Car_Nicobarese bible

T. MËTIV 20

¹Sā öp töhĕng tak an tarik, ngam pūlngö ngam halīöngö, öp tö patī-ivö, öp tö ka-euilökūö tö peuheū, nö kiröönngöre, nö ngöönkö tö la-evṙen nö el öp panô-òṅre.

²Ngaich hē ò nö hōtö yip töla-evṙen nö hĕng tāk rupīö i töhĕng sakāmö; ngaich tīnngen cha anga-aṅ nö el panô-òṅ.

³Im tö machūötör köṅny ṙô anga-aṅ nö kiröönngöre nö hēk; ngaich meuk yik tahëng, nöng sökhaka nö elpanam, nöng öt la-evṙen.

⁴Ngaich ngö ṙô anga-aṅ tö cha, Kuṙòh; kiröönngöre yin yī-ö inrē, el öp panô-òṅ chu; kē-ĕkūö yīö chin min, yē ṙôkhöl yīö. Ngaich kiröönngöre cha-a.

⁵Hēk anga-aṅ nö kiröönngöre, im tö nët sīön köṅny ṙô, im tö lūöi köṅny ṙô inrē; ngaich nöng ngatī.

⁶Im tö taneui köṅny ṙô anga-aṅ nö kiröönngöre nö hēk; ngaich kôtökūö tö yik tahëng taka, nöng sökhaka. Ngaich ngö ṙô anga-aṅ tö cha, Kūöyòh öi yī-ö höng sökhaka ihih, hĕng sumkam, höng öt la-evṙen?

⁷Ngaich ngö ṙô cha-a tö ò, Kūö tö rö-ö tarik ngamöönken ih. Ngaich ngö ṙô anga-aṅ tö cha, Kuṙòh; kiröönngöre yin yī-ö inrē, el öp panô-òṅ chu.

⁸Haraptöre ngaich ngam harap; ngaich ngö ṙô ngam tö panô-òṅvö, töp yōm chehenre, Havëtö yip töla-evṙen kē-ĕkūö cha tö raneushö cha, rĕhtö tīre i yip mu-unôich, unôich i yip mu-urĕh.

⁹Ngaich hē yik töngöönka ik tö taneui köṅny ṙô, nö yihtöre; kö kahĕng tāk taneūngen cha-a tö rupīö.

¹⁰Ngaich hē yik mu-urĕh nö yihtöre, ngaich mötlö taneūngen cha-a, tö lōnre. Ngaich pöri cha-a nöng ngatī, kö kahĕng tāk rupīö.

¹¹Ngaich hē cha nö kēḵ raneushöre, līn cha-a ngaich nö ik tö patī-ivö; ngaich ngö ṙô,

¹²Höng humeng köṅny ṙô rô-òten yin vē nö la-evṙen; ngaich nö haṙongtu nö in ih, tö meh, īhö töhĕng sumkam la-evṙen, öi el ngam tavūöi.

¹³Ngö ṙô pöri anga-aṅ, nö sapṙô ök tö hĕng tak aṅ in cha, Mah! Rö-ö chin miyëḵ tö meh. Röh öm töhōḵ tö töhĕng tāk rupīö in chu?

¹⁴Kēḵ ngam rupīöre man; kuṙòh ngaich kiröönngöre. Kanahanglōnre chin kē-ĕkūö ngòh mu-unôich, sā tī chu in meh.

¹⁵Ötkô ṙöng öich kahngenre, yē öp lōn chu, tö chehenre?

¹⁶Kunyahaṅelmat ṙöng öm, pò chu öt ma-iṅ tīre? Ngatī min vē mu-unôich nö urĕh; ngaich urĕh vē mu-unôich.

¹⁷Hē Yēsū nö hòṅ chuh Yerūsalem, ngòṅ yik tö nët sīön tak Anga-aṅ mahaköp, nö köhngen; ngaich el talöökö Anga-aṅ nö ngö ṙô tö cha,

¹⁸Yĕh meuk; chuh Yerūsalem in; ngaich kētu min ngòh Kūön Tarik nö i yip mākūö kūönṙô, i yip kamūich inrē; ngaich cha-a min nö hōḵngövah Ò nö kapah.

¹⁹Ngaich kēten Ò nö i yip tahëng mihëṅṙö tarik, nö hayëḵe, fohoh, harātu inrē. Im linūöi sumkam pöri min Anga-aṅ nö choholre.

²⁰Ngaich yihtöre nö in Ò, ök pīhö Sepiti, nö holtö nak kūönre, sōntökūöre nö ve-ekūö Ò, nö hēngö havëka nö in Ò.

²¹Ngaich ngö ṙô Anga-aṅ tö ò, Asuh ap lōn meh? Ngaich ngö ṙô anga-aṅ tö Ò, Chöngu Man yēḵ hòṅ nā kūön chu nö ūichhaka, hĕng tarik lahāmö Meh, hĕng taka latavē meh inrē, nö im pūlngö meh.

²²Ngö ṙô pöri Ang Yēsū, Rö-ö yin akahalōn töp havëköre. Kô-òren an òkkūö öp kulah, öp ahòkkūö Chu min? Vōkö inrē tö ngam vinôkö, vahōk Chu min? Ngaich ngö ṙô cha-a tö Ò, Kô-òren an.

²³Ngaich ngö ṙô Anga-aṅ tö cha, Òk kūö öp kulahnan min, öp ahòkkūö chu; vōkö inrē töp vinôkö, vahōk Chu; ngam inūichhak pöri lahāmö chu, latavē chu inrē rö-ö nö kahëḵtö Chu; höng kine-eṅkūö yip tö höngkaṙen tö ngam Yöng Chu.

²⁴Ngaich hē yik tö söm tak nö hāngö e, kunyahaṅlōn cha-a ngaich nö i nak tönët tak tö kahëmre.

²⁵Havëten cha pöri Yēsū nö in Ò, ngaich ngö ṙô. Akahalōn yin, tö yik mākūö vē tahëng mihëṅṙö nö hakeū chöngöre nö in cha: ngaich yik yöngṙen cha nö chönguvö nö in cha. Öt ngatī pöri min angū-ö nö in yīö.

²⁶Ngòh tö hòṅ pōiyö pöri nö in yīö, mameukṙen yīö min anga-aṅ;

²⁷Ngòh tö hòṅ urĕh nö in yīö, kūönkūö yīö min anga-aṅ.

²⁸Sā ngòh Kūön Tarik nö yih, rö-ö nö tö meūken, mameukṙen pöri ane inrē kamëtö nômöre, nö ṙāi tömaṙôngö.

²⁹Ngaich hē cha nö kunyi-inyre nö ṙā-ang Yerikō, maṙôngö yik tamömrit Ò.

³⁰Ngaich nët tak nak tötmeuk tarik i taseū talöökö nö ūichhaka, hūḵ-a cha-a nö ngö ṙô, hē cha nö hāngö Yēsū nö lök muh, Mā; aheūkölōn tö ai; Me-eṅ Kūön Tāvit.

³¹Ngaich vëken cha yik tömaṙôngö; pòn hōten cha nö ṙāngôre. Vaichtö ṙūönyôre pöri cha-a, nö ngö ṙô, Mā; aheūkölōn tö ai; Me-eṅ Kūön Tāvit.

³²Sökngöre ngaich Yēsū; ngaich havëten cha; ngaich ngö ṙô, Asuh ap lōn nā, la-en Chu in nāṅ?

³³Ngaich ngö ṙô cha-a tö Ò. Mā; hòṅ löpnyukūö nun në mat ai.

³⁴Ngaich aheukölōn Yēsū, ngaich lūölkö mat cha; ilööṙen cha-a nö meuk; ngaich tömrit Ò.