Read Car_Nicobarese T. MËTIV 21 Bible Online

T. MËTIV 21 - Car_Nicobarese bible

T. MËTIV 21

¹Hē cha nö röhta nö i Yerūsalem, sölta ngaich nö i Petfēkē, i kui ap rung Òliv; ngaich nët tak tahīnngö Yēsū tömahaköp.

²Ngö ṙô tö cha, Kuṙòh, kuhēthötre nan im tuhēt, ngam i kūö nāṅ. Iṙūö kôtökūö nan min töp köttö, tö kapòkhaka, hĕng nòng ap kūön ò in ò. Luhlen ò, ngaich kēten u in Chu.

³Ngaich yĕn hĕng tak tö ṙô-òv tö nāṅ, ngö ṙô panchö, Hòṅ īnu ap Mā tö u. Ilööṙen min anga-aṅ nö tīntö u.

⁴Ngaich angū-ö, pòn kinheūṅtngen ök tö ngö ṙô pròfĕt

⁵Ve-eny nang ap kikānö kūön Sīyôn. Yĕn meuk, ngam Rācha meh nö yihtöre nö in meh; yāichtöhechṙen, i uk köttö, i uk kūön köttö inrē.

⁶Kiröönngöre ngaich nak mahaköp, ngaich teūngen tö tinölôre tö Yēsū.

⁷Ngaich kum tök köttö, tök kūön ò inrē. Ngaich afahlö nuk hilāre cha-a nö i uk u. Ūichlöre ngaich Anga-aṅ.

⁸Maṙôngö yik inrē tarik mahaṙĕhtö hilāre nö el talöökö; rēvre inrē yik ṙamaltö rōi chōn, ngaich haṙĕhtö u nö el talöökö.

⁹Ngaich yik tömaṙôngö, yik mu-urēhĕkūö Ò, yik tamömrit Ò inrē, nö pōitô nö ngö ṙô, Hōsanna i ngam Kūön Tāvit. Tökôlò An ngam yamih nö i Mine-eny ngam Mā; Hōsanna latulöng.

¹⁰Ngaich hē Ò nö yih nö i Yerūsalem, hĕng pumnāmö ngaich ngam panam nö taṙōllöngṙen; ngaich ngö ṙô. Achīö ang ngòh?

¹¹Ngaich yik tömaṙôngö nö ngö ṙô, Ngòh pròfĕt Ön, Yēsū, ṙamā-ang Nāseret i Kelelī.

¹²Kuhēthötre ngaich Yēsū nö el ngam töhet chūök ngam Tēv; ngaich ahōngen cha yik mi-inyih, mahavah inrē, nö el ngam töhet chūök; kuringngö nuk mīs yik mahaṙīkö rupīö inrē, tö nuk anūchö yik mi-inyihkö nyö-öṅ.

¹³Ngaich ngö ṙô Anga-aṅ tö cha, Ngö kinūichngö an, Patī vine-eṅkūötēv invëka, an min ngam patī Chu; ngaich pöri yī-ö vītö e nö chūök mu-ulāiyö.

¹⁴Ngaich yihtöre yik tötmeuk, tökaròk inrē, nö in Ò, nö el ngam töhet chūök, ngaich halanken cha Anga-aṅ.

¹⁵Hē yik mākūö kūönṙô pöri, tö yik kamūich inrē, nö meuk nuk pinngangkūö tī Yēsū yik nyīö inrē nö pōitô nö el ngam töhet chūök, nö ngö ṙô, Hōsanna i ngam Kūön Tāvit; kunyahaṅlōn cha-a.

¹⁶Ngaich ngö ṙô tö Ò, Hang ṙô vē nyīö, Ömeh? Ngaich ngö ṙô Yēsū tö cha, Hôṅ; öt ve-ekūö ngih öi yī-ö, Löknyö elvāng tëṅnö, nööinyö man tö töteung.

¹⁷Ṙā-ang Anga-aṅ tö cha, ngaich kunyī-inyre nö ṙā-ang el ök panam; nö chuh Petenī; ngaich haṙòh in e.

¹⁸Ngaich im peuheū, hē Ò nö havantöre nö im panam, kapahare Anga-aṅ; ngaich meuk ök tahĕng māṅ anychīr chōn i taseū talöökö; ngaich yihtöre nö in ò; ngaich öt kanôtukūö tö ṙòng ò, höng rōi.

¹⁹Ngaich ngö ṙô Anga-aṅ tö ò, Uh man yēḵ ṙôngu, töngamuhöten, örheūheu inrē. Ngaich irūö nyangngö ök anychīr chōn.

²⁰Ngaich hēk yik mahaköp nö meūkan; ngaich pingangkūö cha-a; ngaich ngö ṙô, Sitih ang ngam anychīr chōn nö iṙūö nyangngö?

²¹Ngaich ngö ṙô Yēsū tö cha, Tökô-ò ṙô Chin tö yīö, Yē yīö öi mikahavö, öi öt katöngalōn, ngaich yī-ö min öt höng la-evṙen tö tösā ngam tö ngaich nö im anychīr chōn; yē yīö pöri min ngö ṙô tö ngih rôngö, Ateuklöng man yēḵ, ngaich sūḵtöre el mai; ngaich ngatī angū-ö nö kô-òren.

²²Nup taṙòkhöre havëkö yīö im vine-ekūötēv, ṙātö ellōnre, ngaich teūngen yī-ö min.

²³Ngaich hē Ò nö kuhēthötre nö el ök töhet chūök; ngaich yik mākūö kūönṙô, tö yik mākūö yik tarik inrē, nö yihtöre nö in Ò, hē Ò nö haköphöti; ngaich ngö ṙô, Asuh ap chöngö Meh, la-evṙen tö në? Achīö ap kamëḵ-eṅkūö Meh tö chöngö?

²⁴Ngaich ngö ṙô Yēsū, nö sapṙô cha, Hĕng öp ṙô Chu Chu-ö inrē, hatönö yīö, Yē yīö min ve-eny nang Chu, ngaich ngati Chu-ö min ve-eny nang yīö tö chöngö Chu, la-evṙen tö në.

²⁵Aṅ yih ök vinôkö tī Yôhan? Aṅ el halīöngö? Aṅ i tarik ṙöng?” Ngaich cha-a nö ve-ekūöre, nö ngö ṙô, Yē hī ngö ṙô, Aṅ el halīöngö; ngaich ngö ṙô min anga-aṅ tö hī, Kūöyòh pöri öi öt ṙātö ellōnre in Ò?

²⁶Yē hī pöri min ngö ṙô, Aṅ i tarik; pa-ekūö ayī-ö tö vē tömaṙôngö, pò cha nö ṙòkhöre lōn tö Yôhan nö pròfĕt.

²⁷Ngaich ngö ṙô cha-a, nö sapṙô Yēsū “Öt akahalōn in. Ngaich ngö ṙô Anga-aṅ tö cha inrē, Öt rēhĕn Chin Chu-ö hòṅ ve-eny nang yīö töp chöngö Chu, la-evṙen tö në.

²⁸Sitih lōn öi yī-ö? Hĕng taka ök tarik tö nët tak kūön tö kikōnyö. Yihtöre anga-aṅ nö ik maṙöinylö, ngaich ngö ṙô, Kakūönö; kuṙòh, la-evṙen man töngamuh el öp panô-òṅ vāin.

²⁹Ngaich ngö ṙô anga-aṅ, nö sapṙô ò, Sōḵ chin. Unôichngöre pöri anga-aṅ nö havöötö ellōnre; ngaich kiröönngöre.

³⁰Yihtöre anga-aṅ nö ik manāngö, ngaich nöng ngatī ṙô. Ngaich ngö ṙô anga-aṅ, nö sapṙô ò, Mā; kiröönngöre chin. Ngaich rö-ö nö kiröönngöre.

³¹Öp yòh öp tö mināṅ tö nët tak töteūngen tö lōn ngam yöng? Ngaich ngö ṙô cha-a, Ngam maṙöinylö. Ngaich ngö ṙô Yēsū tö cha, Tökô-ò ṙô Chin tö yīö, tö vē mahamūl ṙāi kinëhöt chehen, vē tötkôlò kikānö inrē, nö urĕh tö yīö, nö kuhēthötre nö im pūlngö ngam Tēv.

³²Pò Yôhan nö yih nö in yīö, nö im talöökö tölöök; ngaich rö-ö yī-ö ṙātö ellōnre in ò. Ngaich pöri vē mahamūl ṙāi kinëhöt chehen, tö vē tötkôlò kikānö inrē, nö ṙātö ellōnre nö in ò. Ngaich yī-ö, hē yīö meūkö e, öt rēhĕn havöötö ellōnre unôich; hòṅ yīö ṙātö ellōnre in ò.

³³Hangihtöre yin tö ngaich tahëng inchōḵoṙô. Hĕng taka ök tarik töpati-ivö, ök vamī panô-òṅ vāin; ngaich kalonglö e; ngaich ultö kinrān vāin nö ël e; ngaich mānlö tökiröng patī; ngaich hökiṙen angū-ö nö i yik yōm panô-òṅ; ngaich chuh tahëng panam anga-aṅ.

³⁴Ngaich hē kanöinyòng u, tīnngö mahalanṙenre anga-aṅ nö i yik yōm panô-òṅ, nö kēḵ nuk kintölö ò.

³⁵Ngaich yik yōm panô-òṅ nö kēḵ yik mahalanṙen ò; hĕng tak ök tö fōhoh, fëli öt tahëng, kulëhe ök tahëng.

³⁶Hēk anga-aṅ nö tīnngö tahëng mahalanṙen, tömööḵlö tö yik mu-urĕh; ngaich cha-a nöng ngati tī tö cha.

³⁷Unôichngöre anga-aṅ nö tīnngö ök kūönre, nö in cha; nö ngö ṙô; Milēḵṙen yip min tö ngòh kūön chu.

³⁸Ngaich hē yik yōm panô-òṅ nö meuk ök kūön ò; ngaich ngö ṙô cha-a tö höö, Ngòh ön tö-amīnu; ta-a, töi fëlan, ngaich kēḵ ngih amin ò.

³⁹Ngaich kēḵ an cha-a; ngaich kavalnyen ò, nö la-uk; ngaich fëlan.

⁴⁰Sitih tī öp min tö panô-òṅvö tö yip yōm panô-òṅ, yē öp hē ò nö yih.

⁴¹Ngaich ngö ṙô cha-a tö Ò, Ip tölngö ötkanôlò tīre öp min nö fëlngö yip tötkôlò tarik; ngaich hökngen ngam panô-òṅ nö i yip tahëng yōm panô-òṅ, yip kamë-eṅkūö ò min tö ṙòng ip hēre.

⁴²Ngaich ngö ṙô Yēsū tö cha, Öt ve-ekūö aṅ mat nup töhet līpöre öi, Ngam ihong sahōḵo yip mamānö, ngaich anga-aṅ nö vītu nö yöngkūö sinkeukngö. Aṅ i ngam Mā an angū-ö; ngaich pingangkūö në mat hī

⁴³Lökten Chin ngö ṙô tö yīö. Kē-ĕyö an min ngam pūlngö ngam Tēv, nö ṙā-ang in yīö; ngaich kētu min nö i yip tahëng tarik, yip kamëtö ṙòng.

⁴⁴Ngòh tösuktöre nö i kui ngòh ihong, laköl min anga-aṅ, nö panyeny. Öp tö fukkui pöri min tö ò, nöng pirāti, sā pitung.

⁴⁵Ngaich hē yik mākūö kūönṙô, yik Feresī inrē, nö hang minë inchōḵoṙô Ò; ngaich akahalōn cha-a tö Ò nö ṙôten cha.

⁴⁶Ngaich hē cha nö hòṅ kēḵ an, pa-ekūö cha-a tö yik tömaṙôngö, pò ò nö pròfĕt, tö lōn cha.