Read Car_Nicobarese T. MËTIV 22 Bible Online

T. MËTIV 22 - Car_Nicobarese bible

T. MËTIV 22

¹Hēk Ang Yēsū nö sapṙô, nö ngö ṙô tö cha, nö inchōḵovṙô,

²Sā öp tö hĕng tak an rācha, ngam pūlngö ngam halīöngö, öp maha-aṅhaṅl hē inpīhö öp kūön ò.

³Ngaich tīnngö yip mahalanṙenre nö havëtö yip tö ngöönka nö im nāhaṅl inpīhö; ngaich sōḵ cha-a nö yih.

⁴Hēk anga-aṅ nö tīnngö yip tahëng mahalanṙenre, nö ngö ṙô, Ve-eny nang cha yip töngöönka, Yĕh meuk; ngaich chin lēnen tī tö nup nya-aṅkūö. Ngaich chin ṙatnyö likeun nuā, tö alahavö inrē. Ṙòkhöre nun nö ngaich nö lēnen. Ta-a, yihtöre ing nāhaṅl inpīhö.

⁵Ngaich pöri cha-a nöng öt chumkūöṙen tö e; ngaich kiröönngöre cha-a nö i la-enre, hĕng taka chamuh el nôköre, hĕng taka chamuh i nup i nyihköre.

⁶Ngaich yip tahëng nö kēḵ yip mahalanṙen ò, ngaich kēkö alaha cha, nö sumrōngngökūö cha, ngaich fëlngen cha.

⁷Līn ngaich ngam rācha; ngaich tīnngö yip kumyungre nö fëlngö yip famël; föngngö öp panam cha inrē.

⁸Ngaich ngö ṙô anga-aṅ tö yip mahalanṙenre, Lēnen ön ngih nāhaṅl inpīhö nö ngaich; ngaich pöri cha-a yip töngöönka nö ötkô.

⁹Lökten yin kuṙòh; chuh el nup famangngö ël höö talöökö. I tum tak kanôtökūö yīö pöchö, tölṙô cha nö yihtöre nö ing nāhaṅl inpīhö.

¹⁰Ngaich yip mahalanṙen nö kiröönngöre nö el nup tö kiröng talöökö; ngaich ṙòkhöre hamūl tö yip kanôtökūöre, hĕnghöre tötlöök tölöök inrē. Ngaich ngam chūök inpīhö nö tööḵlö tö yip yamih.

¹¹Hē ngam rācha pöri nö kuhēthötre nö ngëichkö yip yamih, hĕng tak maheuṅk anga-aṅ tö tarik, ök töthilā tö hīlā yamih nö im inpīhö.

¹²Ngaich ngö ṙô anga-aṅ tö ò, Kahōlö; sitih lökta öm me-eṅ ihih, öm öt hīlā tö hilā yamih nö im inpīhö?

¹³Ngaich anga-aṅ nöng öt ṙô-òv. Ngaich ngam rācha nö ngö ṙô tö yip mameukṙenre, Nyëk kël ò kalröön ò inrē. Kavalnyen ò el sinngūlö, in e an min nö peuiny, kap kui kanapre inrē.

¹⁴Pòn maṙôngö yip töhavëka; haroh tum tak pöri yip tökatöllöng.

¹⁵Kiröönngöre ngaich yik Feresī, ngaich ve-ekūöre tötīre, nö tingööpan i nup ṙô Ò.

¹⁶Ngaich tīnngö yik mahaköp nö in re cha-a, nö holtö yik aṅ in Hērôt, ngaich ngö ṙô cha-a, Mahaköphöti; akahalōn in tö Meh tökô-en, im kanô-en Man inrē haköptö talöökö ngam Tēv Öt hĕng tak chumkūöṙen inrē; pò Meh öt ngëichkökūö tarik.

¹⁷Ve-eny nang ih Man, lökten, Sitih lōn Ömeh? Töhuveū ön ngam kinë-eṅkūö Kaisör, tö ṙāi ṙētö tarik? Rö-ö ṙöng?

¹⁸Akahalōn pöri Yēsū tö ötlanöökö cha; ngaich ngö ṙô, Kūöyòh öi kalaha Chu, yī-ö mahanyatkö elmat?

¹⁹Hameukhömat Chu ta-ih, töp rupīö ṙāi ṙētö tarik, Ngaich cha-a nö hĕng tāk kahëti nö in Ò.

²⁰Ngaich ngö ṙô Anga-aṅ tö cha, Insā-a chīö öng ngih? Ngam kinūichö inrē?

²¹Ngaich ngö ṙô cha-a tö Ò, Insā-a Kaisör. Ngaich ngö ṙô Anga-aṅ tö cha, Kē-ĕkūö Kaisör, tö nup aṅ in Kaisör, kē-ĕkūö ngam Tēv, tö nup aṅ im Tēv.

²²Ngaich hē cha nö hāngö e, uṙeh cha-a ngaich, ngaich kiröönngöre nö ṙāngen Ò.

²³Im hē e angū-ö sakāmö, yik Satukī nö yihtöre, nö in Ò, yik törö-övṙô tö invanlö tökapah, ngaich cha-a nö hatönan, nö ngö ṙô.

²⁴Mahaköphöti; ngö ṙô ök Môsös. Yē ngòh tarik nö kapah nöng öt kūönu, ngaich öp kahëm ò nö pīhötö ngam pīhö ò nö hakūöntö kūön ök mëmre.

²⁵Sat tak yik umuh, mëmre kahëmre; ngaich pīhöv ök maṙöinylö, ngaich kapah, nöng öt kūönu; ngaich ṙāngö ök pīhöre nö ik kahëmre.

²⁶Ngatī inrē, ök innëtö tök linūöyö, söl ik sinātö.

²⁷Unôichngöre ök kikānö nö kapah inrē.

²⁸Lökten, ip invanlö tökapah min, pīhö chīö ök min tö më tö sat tak; tön ṙòkhöre cha-a nö pīhövö tö ò?

²⁹Ngaich ngö ṙô Yēsū, nö sapṙô cha, Vaich yin, pò yīö öt akahalōn tö ṙô nup töhet līpöre öt rēhĕn tö minhôiṅyö ngam Tēv.

³⁰Pòn ip invanlö tökapah min, cha-a nö öt pīhöre, höng sā yip ma-ahānga pöri el halīöngö.

³¹I inlahen ngam invanlö tökapah pöri, öt ve-ekūö ngam ṙô ngam Tēv öi, tö ngih tö ngö,

³²Chu-ö Chin Tēv Aprahām, Tēv Isāk, Tēv Yāköp inrē. Rö-ö an ngam Tēv nö Tēv yip tökapah, tön Tēv yip tö aṅ.

³³Ngaich hē yik tömaṙôngö nö hāngö e; ngaich pingangkūö cha-a tö ṙô Ò nö haköphöti.

³⁴Ngaich hē më Feresī nö hang yik Satukī nö tahai ṙô tö Ò, hamūlöre cha-a ngaich.

³⁵Ngaich hĕng tak ök aṅ in cha, yōm chöngö, kalahan nö hatönan; nö ngö ṙô.

³⁶Mahaköphöti; ap yòh ap töpōyö chöngö i në chöngö?

³⁷Ngaich ngö ṙô Anga-aṅ tö ò, Hāngenlōn man tö ngam Mā Tēvre, holtö ellōnre, holtö nômöre holtö kuilōnre inrē.

³⁸Angū-ö an töpōyö, raneh inrē nö chöngö.

³⁹Sā e an ngam innëtö, Hāngenlōn man tö holre, sāre töre.

⁴⁰Inë tö nët chöngö; nö kilölhaka nö ṙòkhöre në chöngö, tö nup ṙô yik pròfĕt inrē.

⁴¹Hē yik Feresī nö ṙòngmö mūlhaka; ngaich hatönö cha Yēsū, nö ngö ṙô,

⁴²Sitih lōn öi yī-ö tö Kristū? Kūön chīö Angah? Ngaich ngö ṙô cha-a tö Ò, Kūön Tāvit.

⁴³Ngaich ngö ṙô Anga-aṅ tö cha, Sitih pöri Tāvit nö ngö ṙô, nö hachōḵnyu ṙô töm Töhet Fanöinylö; Mā, nö ngö tö Ò;

⁴⁴Nö sā ngih, Ngö ṙô An ngam Mā tö ngam Mā chu, Ūichngöre Man lahāmö Chu; hanöngsaha tī Chu, ṙātö yip tökunyahaṅelmat tö Meh, nö ranöönö röön Meh.

⁴⁵Yē Tāvit nö Mā ngö tö Ò, sitih Ang nö kūön ò?

⁴⁶Ngaich öt hĕng tak tökô nö sapṙô Ò; ngaich hēngen tö e angū-ö sakāmö, nö öt hĕng tak mahatönan.