Read Car_Nicobarese T. MËTIV 23 Bible Online

T. MËTIV 23 - Car_Nicobarese bible

T. MËTIV 23

¹Ngaich Yēsū nö ve-ekūö yik tömaṙôngö, tö yik haköptö Ò inrē.

²Nö ngö ṙô, Ūichhaka yin vē kamūich vē Feresī inrē, nö el chūök Môsös.

³Lökten, ṙòkhöre nup ṙô cha nö tölṙô yīö, hang yī-ö, haköp inrē, Uh pöri yī-ö asīnken la-en cha; pò cha nöng ṙô-òv, öt kētöre pöri.

⁴Nyëklö tölangan yin kum, nup tötkaneūnen; ngaich hakeunlö u nö el ranôṙö tarik. Ngaich öt rēhĕn cha-a nö halöinykö u tö kuntīre.

⁵Ṙòkhöre pöri nup la-en cha, nöng inmeukhömat tarik. Pò cha nö pōitāk tī tö nup tökūichö i vanön kui cha; ṙūönyö tanāich hilāre inrē.

⁶Hāngenlōn inrē cha-a tö nup chūök mā, hē el nāhaṅl, nup chūök mā inrē, el chūök vine-eṅkūötēv.

⁷Hòṅ salāmö inrē nö elpanam; ngaich hōtö tarik nö ngö ṙô nö havëken cha, Rappī.

⁸Uh pöri yī-ö halöngtenre, Rappī ngö invëka; tön hĕng tak An ngam mahaköpten yīö; ṙòkhöre yī-ö öi holre.

⁹Ui yöngrevö ṙô tö tarik, ing panam; tön hĕng tak An ngam Yöng yīö, ngam el halīöngö.

¹⁰Ui rēhĕn halöngtenre, Mahaköphöti ngö invëka; tön hĕng tak An ngam Mahaköpten yīö, Ang Kristū.

¹¹Ngòh töpōyö pöri nö in yīö, mahalanṙen yīö min anga-aṅ

¹²Ngòh mahapōilöre min, ngaich hayāichi; ngòh mahayāichngöre min, ngaich hapōilöngö.

¹³Tötkôlò yin yī-ö, kamūich, Feresī inrē, mahanyatkö elmat; pò yīö harahkūö tarik nö im pūlngö ngam halīöngö; pò yīö öt kuhēthötre, öt rēhĕn halöngten yip töhòṅ kuhēthötre.

¹⁴Tötkôlò yin yī-ö kamūich, Feresī inrē, mahanyatkö elmat; pò yīö kumheūṅtngö inlanen tafīösi kikānö; ngaich hanyatkö elmat yī-ö inrē, marôta ṙô ve-ekūötēv. Lökten yin min töpōyen ötkanôlò.

¹⁵Tötkôlò yin yī-ö kamūich, Feresī inrē, mahanyatköelmat; pò yīö havī mai panam inrē; öi vītö tarik nö sā yīö. Ngaich yē ò nö ngaich nö ngatī vinīten, ngaich nët höl sinṙaklökūö anga-aṅ nö kūön ngam chūök ötinkôlò, tö yīö.

¹⁶Tötkôlò yin yī-ö, tötmeuk mahachōkūö; yī-ö tö ngö ṙô, Ngòh töchūökuṙô töm töhet chūök, ngaich tötköp angū-ö. Ngòh töchūökuṙô pöri tö nup humlum i ngam töhet chūök, tököp angū-ö.

¹⁷Yī-ö tötakaha, tötmeuk inrē; öp yòh öp töpōyö? Ngam humlum? Ngam töhet chūök ṙöng, ngam ma-ahetlö ngam humlum?

¹⁸Ngö inrē, Ngòh töchūökuṙô tö ngam tahāklö, ngaich tötköp angū-ö: Ngòh töchūökuṙô pöri, tö ngam tökētu aṅ e, tö köp angū-ö.

¹⁹Yī-ö tötmeuk; öp yòh öp töpōyö? Ngam tökētu? Ngam tahāklö ṙöng, ngam ma-ahetlö ngam tökētu?

²⁰Lökten ngòh töchūökuṙô tö ngam tahāklö, chūökuṙô tö e, tö nup taṙòkhöre ël e inrē.

²¹Ngòh töchūökuṙô tö ngam töhet chūök, chūökuṙô tö e, ngam mi-iyöng ël e inrē.

²²Ngòh töchūökuṙô tö ngam kantēra ngam Tēv, ngam amūichhak inrē nö ël e.

²³Tötkôlò yin yī-ö kamūich, Feresī inrē, mahanyatkö elmat; pò yīö hĕng hata i tö söm, kētö töhahūsa, Anes kumin inrē; ngaich ṙāngö nup tölanganhu im chöngö, kinṙòklökui, neūkölōn, mikah inrē. Anū-ö öre tötṙanāngen nö la-en yīö; un ṙā-ai pöri minë tahëng.

²⁴Yī-ö tötmeuk mahachōkūö; mahanëm misôkö, ngeūktö ūṅt pöri.

²⁵Tötkôlò yin yī-ö kamūich, Feresī inrē, mahanyatköelmat; pò yīö söichlö uk chūök òk pingāṅl inrē; tööḵlö ël pöri anu-ö tö kinīlö, sinṙakngen inrē.

²⁶Me-eṅ tötmeuk Feresī; urĕh man söichlö ël ngam chūök òk, ngam pingāṅl inrē; hòṅ ngam uk e nö het inrē.

²⁷Tötkôlò yin yī-ö kamūich, Feresī inrē, mahanyatköelmat; pò yīö sā nup kuikupah, tö mi-isohnyu; nup tövāiyö mineūkö nö elkahôiyö; tööḵlö pöri tö tangëḵ tö kapah tarik, nup töng yô-òv inrē.

²⁸Ngatī yin yī-ö, elkahôiṙen lanöökö mineūkö tö tarik; tööḵlö ellōn pöri yī-ö tö inyatköelmat, kanöölö inrē.

²⁹Tötkôlò yin yī-ö kamūich, Feresī inrē, mahanyatkö elmat; pò yīö vīlö kui yik pròfĕt, ngaich hanyöṅt nup kuimitīlö yik tölöök tarik.

³⁰Ngaich ngö ṙô yī-ö, Yē hī öre ayī-ö, hē sakāmö yik yöngre; ngaich öt hōḵ öre ayī-ö, hamūltöre in cha, i finëlngö yik pròfĕt.

³¹Lökten yin yih ngaich, eūköre kūön cha, yik famëlngö yik pròfĕt.

³²Hateungngö fālen yik yöngre yin ngaich.

³³Yī-ö pēch, kūön sāṙen; sitih lökten öi min öt kô-òngvah el ngam chūök ötinkôlò?

³⁴Yĕh meuk; tīntö pròfĕt Chin in yīö, tö-akaha tarik kamūich inrē. Rēvre min tö cha yip töfëlö tö yīö, harātu inrē; rēvre min yip tö fōhoh, nö el chūök yīö ve-ekūötēv; ngaich ahōnyuvö nö ṙā-ang i ngih panam, hēk im tahëng panam.

³⁵Hòn i kui yīö nup taṙòkhöre tölöök mahām, tökitaktu nö ing panam, löktökūö ök mahām ök tölöök Apĕl, söl ik mahām Sakarīa, ök kūön Pērakia, ök fahëlngö yīö, ihôi ngam chūök töföngö tökētu, tö ngam patī ngam Tēv.

³⁶Tökô-ò ṙô Chin tö yīö, ṙòkhöre nun min në nö yihih kui ngih tūmö.

³⁷Ō Yerūsalem, Yerūsalem, famëlngö yik pròfĕt, kumleh kui cha inrē, yik tötīntu nö in meh! Ām heuh Öich ngaich hòṅ hamūl më kūön meh Öich sā yöng hayöm nö hamūl kūönre nö el këlre; ngaich yī-ö sōḵ.

³⁸Yĕh meuk; ṙā-ayö an ngam panam yīö nöng ötkôlò.

³⁹Ngö ṙô Chin tö yīö, Töngamuhangen yin min öt meukkūö Chu, hanöngsaha ṙô yīö min, ngö ṙô, Tökôlò An ngam yamih nö i Mine-eny ngam Mā Tēv.