Read Car_Nicobarese T. MËTIV 24 Bible Online

T. MËTIV 24 - Car_Nicobarese bible

T. MËTIV 24

¹Kunyi-inyre Ang Yēsū, nö ṙā-ang ël ngam töhet chūök, ngaich kiröönngöre. Ngaich yihtöre yik mahaköp nö in Ò, ngaich hameukhömat Ò tö vinī-i ngam töhet chūök.

²Ngö ṙô pöri Anga-aṅ tö cha, Röh öi meuk në nö ṙòkhöre? Tökô-ò ṙô Chin tö yīö, Öt hĕng hang min ihong tö: ṙā-ayö nö hachaphen höö, öp tötsuktu min.

³Ngaich hē Ò nö ūichngöre, nö i kui ap Rôngö Òliv; ngaich ulāikenre yik mahaköp nö yihtöre nö in Ò, ngaich ngö ṙô. Ve-eny nang ih Man, ĕhē ön min anu-ö? Asuh öp min inrē minkahngö yanihih Meh, öp manāngen ngih panam inrē?

⁴Ngaich ngö ṙô Yēsū, nö sap ṙô cha. Haṙēmngenre yin, hòṅ yīö öt halō-oikūö tö tarik.

⁵Tön maṙôngö yip min yamih nö i Mine-eny Chu, nö ngö ṙô. Chu-ö chin Kristū: ngaich maṙôngö halō-ongkūö.

⁶Hang kinyūngö yin min, ineūkö kinyūngö inrē. Uh yī-ö pa-ekūö; tön tö hòṅ yih nup anu-ö; ölta pöri öp manāngen.

⁷Pò vē tarik mīnö nö lā-al höö, pūlngö inrē nö la-al höö. Yöng inyāichö öp min, kumyeūnö inrē, nö ṙōl kang chūök.

⁸Anu-ö nun ranehtökūö chanökö.

⁹Hē e min cha-a nö kēten yīö nö im ötinkôlò; fëlö yīö min inrē. Surīkhu yin min tö taṙòkhöre tarik töpòkūö Mine-eny Chu.

¹⁰Ngaich maṙôngö min yip ṙamāngenre; ngaich kö kēten höö min, kö surīkhen höö inrē,

¹¹Maṙôngö yip min töminyôiny-aṅ pròfĕt; ngaich maṙôngö halō-ongkūö min.

¹²Ngaich kūö ṙanūölen öt lanöökö, öp hanāngenlōn yip tömaṙôngö min nö ufovngöre.

¹³Ngòh tö köp pöri nö söl ip manāngen, hayöökaṙen min anga-aṅ.

¹⁴Ahangka min ngih tölöök inhangkö ngam pūlngö, i në taṙòkhöre panam, inmeukhömat taṙòkhöre tarik; ngaich möl min öp manāngen nö yih.

¹⁵Hē yīö mīnö meuk öp yöng ötkanôlò, ngam ṙô ök pròfĕt Taniĕl, söklöre im töhet chūök; (hökngen ngam vame-eṅkūö e nö akahalōn;)

¹⁶Ngaich hökngen yip mi-i Yūta nö afalngöre nö i kui rôngö;

¹⁷Hökngen öp mī-i kui patī, nö un yônti nö kē-ĕrö chehenre nö el patī;

¹⁸Hökngen öp me-el panô-òṅ nö un havantöre nö kē-ĕrö kinṙumre.

¹⁹Aōla! Yip puyōsö, yip tö tëṅnö kūön inrē i nup sakāmö anu-ö.

²⁰Ve-ekūötēv pöri yī-ö, hòṅ ngam fanalngö yīö, nö öt hē el kumṙah: un rēhĕn nö el töhet sakāmö.

²¹Tön yöng ötkanôlò öp min, öt töngati-ivö, hēten tö ranehlö ngih panam, söl ing töngamuh; öt rēhĕn nö môkö.

²²Yē nup sakāmö anu-ö öre nö öt hacheuḵeuyö, öt hĕng tak öre tö ötkô-òngvah. Kūö yip tökatöllöng pöri, anu-ö nö hacheu-euyö.

²³Ngaich yĕn tarīku min tö ngö ṙô min tö yīö, Yĕh meuk, ngòāng yih Kristū! Hēk, Umu-aṅ! ui ṙātö ellōnre.

²⁴Tön maṙôngö yip min töminyôiny Kristū, töminyôiny pròfĕt inrē; pōyen hameukti yip min tö minkahngö, pinngangkūö inrē, pòn hòṅ halō-ongkūö yip tökatöllöng tö ngam Tēv, yĕn kô.

²⁵Yĕh meuk, mu-urĕhnyôre Chin ve-eny nang yīö.

²⁶Lökten yē cha min nö ngö ṙô tö yīö Yĕh meuk, el-inchōnngö Apa! Ui kiröönngöre. Yĕh meuk, el nup latuhēt Ap urôhò! Ui ṙātö ellōnre.

²⁷Pòn sā ngam hanyālö nö löklö lā chuhöt, ngaich meūkö nö lā sūng; ngati min ngam yanihih ngòh Kūön Tarik.

²⁸I chūök ngam tökapah, in e minë matēṙö nö hamūlöre.

²⁹Ilööṙen pöri unôich rit ngam kanihngen nup sakāmö sangulkötimat min ngam tavūöi; öt yāngömat inrē ngam chingëṅt; suktöre min inrē min taneūsömat, nö ṙā-ang el halīöngö; minë kanôlò ngam halīöngö min inrē nö kayīna.

³⁰Ngaich möl nö meūkö minkahngö ngòh Kūön Tarik, nö el halīöngö; ngaich ṙòkhöre min vē aṅ ngih panam nö kōköre; ngaich cha-a min nö meuk yanihih ngòh Kūön Tarik nö el taṙul ngam halīöngö, holtö chöngö, kanôlò inrē.

³¹Ngaich tīnngö yip ma-aṅhāngare min Anga-aṅ, nö holtö töpōitô fanöö; ngaich cha-a min nö hamūl yip tökatöllöng tö Ò, ṙā-ang i nup töfën lā-a kuföt, löktökūö ngam manā-angkūö ngam halīöngö söl im tahëng.

³²Haköp ngam inchōḵoṙô yin im anychīr chōn. Yē ngam pak ò nö ayal, ngaich sīöpnyöre rōi anga-aṅ; akahalōn yī-ö ngaich tö ranöhta öp sikehngö.

³³Ngatī yī-ö inrē, yē yīö meūkö u, akahalōn tö Ò nö röhta, nö i kūö inkūp.

³⁴Tökô-ò ṙô Chin tö yīö, ölngö chanuhu ön ngih min tūmö, tö yanihih u min.

³⁵Chuhngöre ngam halīöngö, ngih panam inrē; öt chanuhuvṙen pöri në ṙô Chu.

³⁶Öt hĕng tak pöri tö-akahalōn töp sakāmö angū-ö, ṙētak inrē; öt rēhĕn yip ma-ahānga el halīöngö; öt rēhĕn ngam Kūön; höng ngam Yöng.

³⁷Pòn sā nuk sakāmö hē Nō-a, ngatī mīnö ip yanihih ngòh Kūön Tarik.

³⁸Sā nuk sakāmö urēhĕkūö ök ṙanööingö; nya-aṅvkūö cha-a, òk inrē; hapīhö, kē-ĕyö inrē nö im inpīhö, hanöng saha yanôklö Nō-a nö el ök chōng.

³⁹Ngaich cha-a nö öt chumkūöṙen tö yanihih ngam ṙanööingö, ngam kumheūṅtngen cha, nö ṙòkhöre; ngati mīnö ip yanihih ngòh Kūön Tarik.

⁴⁰Hē e, nët tak min nap tarik el panô-òṅ; hĕng taka öp tökē-ĕ, hĕng taka öp tö ṙā-ayö

⁴¹Nët tak nap kikānö min kumṙīöt; hĕng taka öp tökē-ĕ, hĕng taka öp tö ṙa-ai-yö.

⁴²Lökten aṅhaṅti tön öt akahalōn yin tö sakāmö hē yanihih ngam Mā yīö.

⁴³Akahalōn pöri yī-ö tö ngih, yē ngam töpatī-ivö nö akahlōn tö ṙētak yanihih öp mu-ulāiyö; ngaich höngöre anga-aṅ, ngaich öt halöngngen öp patīre nö tiṙōli,

⁴⁴Lökten yin lēntöhechṙen; pòn ip hē yīö öt lōnu, ngòh Kūön Tarik nö yih.

⁴⁵Achīö öp öre tökô-en, tö-akaha inrē, mahalanṙen, öp mahayōm nup aṅ patī öp yöngṙenre, ngaich ha-aṅlen cha ip ṙētak?

⁴⁶Tökôlò an anga-aṅ mahalanṙen, ngam tökôti nö ngatī nö la-evṙen, hē yanihih öp yöngṙenre.

⁴⁷Tökô-ò ṙô Chin tö yīö, tö öp yöngṙen ò min nö vīten ò nö hayōm nup taṙòkhöre chehen.

⁴⁸Yē ò pöri nö tötlöök nö mahalanṙen, ngaich ngö ṙô nö ellōnre, Aṅhāṅtö yihihre öp mā chu;

⁴⁹Kētöre ngaich anga-aṅ nö foh yip, holre mahalanṙen; nya-aṅvkūö, ka-eūt inrē nö hiyōi;

⁵⁰Ngaich yih min ngam mā ò ip sakāmö hē ò nö öt hönga, ip ṙētak inrē hē ò nö öt akahalōn.

⁵¹Ngaich chökhutī min nö fohan; hanôltu inrē nö i yip mahanyatkö elmat. In e min nöng peuiny, kap kui kanapre inrē.