Read Car_Nicobarese T. MËTIV 25 Bible Online

T. MËTIV 25 - Car_Nicobarese bible

T. MËTIV 25

¹Sā yip tö söm tak an rēlö, ngam pūlngö ngam halīöngö; yip kamëḵ ëāṅvöre, ngaich kiröönngöre nö höngkūö öp töhapihö.

²Taneui tak tö cha, yip tötakaha; taneui tak, yip tö-akaha.

³Pò yip tötakaha, hē cha nö kēḵ nup aṅāvöre, nö öt kēkö mak u, nö in re.

⁴Kēkö mak ëāṅvöre pöri yip tö-akaha, nö el pilön.

⁵Ngaich kūö ngam töhapihö nö hāṅtö yīhih, haṙòhlö cha-a ngaich, ngaich haṙòh.

⁶Im chūöl hatööm ök ṙô hamūḵa, tö ngö ṙô, Yĕh meuk ngam töhapihö; kunyī-inyre yin, höngkūö ò.

⁷Choholre ngaich yip rēlö nö ṙòkhöre; ngaich halēn ëāṅvöre.

⁸Ngaich ngö ṙô yip tötakaha tö yip tö-akaha, Kētö mak ëāṅvö ih yin; tön hòṅ nyangngö nun nö ëāṅvöh ih.

⁹Ngö ṙô yip tö-akaha nö sap ṙô cha, Hö-ö; öt kô-òrekūö in min tö yīö. Kuṙòh, lahëḵ yin chuh i yip mi-inyih, öi havah mak ëāṅvöre.

¹⁰Ṙòngmö kiröönngöre cha-a nö havah, yih ngaich ngam töhapihö; ngaich yip tölēnen nö kuhēthötre nö hol ò, im nāhaṅl inpihö.

¹¹Öpikūö ngaich ngam inkūp. Unôichngöre yip tahëng rēlö nö yih; ngaich ngö ṙô, Mā, Mā; löpnyökūö ih.

¹²Ngö ṙô pöri anga-aṅ, nö sap ṙô cha, Tökô-ò ṙô chin tö yīö, Rö-ö chin akahakūö tö yīö.

¹³Lökten yin aṅhāṅti; tön öt akahalōn yin tö sakāmö, öt rēhĕn tö ṙētak yanihih ngòh Kūön Tarik.

¹⁴Sā öp tarik an ngam pūlngö ngam halīöngö, chamuh tahëng panam; have-eti tö yip mahalanṙenre.

¹⁵Hĕng tak öp tötaneui kinlaha kine-eṅkūö tö rupīö; nët öp tahëng; hĕng öp tahëng; kö i tölngö mikah cha. Kiröönngöre anga-aṅ ngaich, nö im kinröönngöre.

¹⁶Ilööṙen ngam tö taneui kinlaha kine-eṅkūö tö rupīö, nö kiröönngöre, ngaich inyih; ngaich taneui kinlaha taneūngen tö rupīö.

¹⁷Ngatī inrē ngam tönëtö kahëḵ, ngaich nëtö taneūngen.

¹⁸Ngam tö hēngö kahëḵ pöri kiröönngöre, ngaich ulngö e nö el tumlat, hayunngö ngam rupīö ngam māre.

¹⁹Marô-angen, ngaich möl nö yih ngam mā yip mahalanṙen; ngaich kaheuk ṙôken nup chehen in cha.

²⁰Yihtöre ngam tö taneui kinlaha kahëḵ tö rupīö; ngaich kētö nup tahëng tö taneui kinlaha; ngaich ngö ṙô, Mā; taneūyö kinlaha kahëtö man in chu. Yĕh meuk, taneūyö kinlaha taneūngen chin, tö tahëng.

²¹Ngaich ngö ṙô ngam mā tö ò, Töteūngen man; tö-akaha, tökô-en mahalanṙen. Ngaich man kô-en i tö rahëchyen; hamālöng man ngaich tö chu, i në töpōyen chehen. Hanôltöre man ngaich i ṙanāmölōn ngam mā meh.

²²Ngaich yihtöre öp tönëtö kinlaha kahëḵ; ngaich ngö ṙô, Mā, nëtö kinlaha kahëtö man in chu. Yĕh meuk nëtö kinlaha taneūngen chin, tö tahëng.

²³Ngaich ngö ṙô ngam mā tö ò, Töteūngen man; tö-akaha, tökô-en i törahëchyen; hamālöng man ngaich tö chu, i në töpōyen chehen. Hanôltöre man ngaich, i ṙanāmölōn ngam mā meh.

²⁴Yihtöre inrē öp töhēngö kinlaha kahëḵ; ngaich ngö ṙô, Mā; akahalōn chin tö meh, tö kësen öm tarik; kēḵ ṙòng töttaheūichre man; hamūl nup töt pirātre inrē.

²⁵Ngaich pa-ekūö chu-ö tö meh; kiröönngöre ngaich, ngaich hayunngö në rupīö meh el tumlat. Euṅh; kēḵ minë chehenre man.

²⁶Ngaich ngö ṙô öp mā, nö sap ṙô ò, Me-eṅ tötlöök, tö ṙahata mahalanṙen; akahalōn man tö chu, kēḵ ṙòng töt taheūichre, hamūl töt pirātre inrē.

²⁷Ngaich öre me-eṅ lökten, chaphöt nup rupīö chu el chūök rupīö; ngaich yē chu yih, ngaich kô-òren öich teūngen tö u, nö holtö ṙāi inṙūöngköre.

²⁸Lökten yin kēḵngö minë rupīö. Kētö u im tösömö aṅ-in.

²⁹Pòn ṙòkhöre vē tö īnu nö kē-evkūö min; ngaich pōyen aṅ-in. Ṙā-ang im töt īnu pöri, nö kē-ĕ-yö nup mi-in ò.

³⁰Kavalnyö ngam tötkôlò yin mahalanṙen, elkahôyö, nö el sinngūlö, i chūök pameuiny, kamap kui kanapre inrē.

³¹Hē ngòh Kūön Tarik min nö yih nö im kanôlòre, ṙòkhöre min yip ma-ahānga nö hol ò; ūichlöre Anga-aṅ ngaich, nö el kantēra kanôlò.

³²I kūö Ò min nö hamūlö vē taṙòkhöre tarik; ngaich kö haköhngen cha min Anga-aṅ, sā tī ngòh yōm pököre nö haköhngen u tö höö.

³³Rēvre nup lahāmö tö tī Ò: latavē nup inrē.

³⁴Ngaich ngö ṙô min ngam Rācha tö cha yip lahāmö Ò, Ta-ih, yī-ö tö kôlò tö tī ngam Yöng Chu; amīnu tö ngam pūlngö tö halēnkaṙen tö pòkūö yīö, hētentö ranehlö ngih panam.

³⁵Pò Chu ha-aṅlöng tö yīö, hē Chu kapahare; kētu òk Chu-ö tö yīö, hē Chu haṙëhe nômö; hachūöklöng Chu-ö tö yīö, hē Chu öt lööṙu yih;

³⁶Kafānö Chu-ö tö yīö, hē Chu öt hilāṙū; chöhka Chu-ö tö yīö, hē Chu vahavö; yihka tö yīö, hē Chu el kinlōngö.

³⁷Ngaich ngö ṙô min yip tölöök, nö sap ṙô Ò, Mā; ĕhē öi īhö meūkö Meh kapahare, ngaich ha-aṅlen Meh; hēk haṙëhe nômö, ngaich kētö òk Meh?

³⁸Ĕhē öi īhö meūkö Meh ötlööṙu yih, ngaich hachūöklen Meh; hēk öt hilāṙu, ngaich kafānö Meh?

³⁹Ĕhē öi īhö meūkö Meh vahavö, hēk el kinlōngö, ngaich yihken Meh?

⁴⁰Ngaich ngö ṙô min ngam Rācha nö sap ṙô cha, Tökô-ò ṙô Chin tö yīö, I tum heuh tī yīö i vē kahëm Chu, vē yāich takô; ngaich mi-in Chu tī yī-ö.

⁴¹Ngaich ngö ṙô min Anga-aṅ tö cha, yip latavē Ò, kē-ĕngre yin, ṙā-ang in Chu, yī-ö tötkôlò, el ngam tötnyangngö tameūyö, tö halēnkaṙen tö pòkūö ngam sī-ö, yip ma-ahānga ò inrē.

⁴²Pò Chu öt ha-aṅlöng tö yīö, hē Chu kapahare; öt kētu òk Chu-ö tö yīö, hē Chu haṙëhe nômö;

⁴³Öt hachūöklöng Chu-ö tö yīö, hē Chu öt lööṙu yih, öt kafānö Chu-ö tö yīö, hē Chu öt hilāṙu; öt chöhka Chu-ö tö yīö, hē Chu vahavö el kinlōngö inrē.

⁴⁴Ngaich ngö Ṙô min cha-a nö sap ṙô Ò, Mā ĕhē öi īhö meūkö Meh kapahare, haṙëhe nômö, öt lööṙu yih, öt hilāṙu, vahavö, el kinlōngö inrē, ngaich rö-ö öi meukṙen Meh?

⁴⁵Ngaich ngö ṙô min Anga-aṅ, nö sap ṙô cha, Itum heuh yīö öt ngatī i vē yāich takô, ngaich törö-ö yī-ö ti-iv in Chu.

⁴⁶Chuh el ngam tö örheūheu yip cha-a ötinkôlò; im nômö pöri tö örheūheu-aṅ yip tölöök.