Read Car_Nicobarese T. MËTIV 26 Bible Online

T. MËTIV 26 - Car_Nicobarese bible

T. MËTIV 26

¹Ngaich hē Yēsū nö keuheūtö ṙô tö u; ngaich ngö ṙô Anga-aṅ tö yik haköptöre.

²Akahalōn yin töp paska nö nët töre sumkam; ngaich ngòh Kūön Tarik min nö kētu nö haṙātu.

³Ngaich hamūlöre yik mākūö kūönṙô, tö yik mākūö yik tarik inrē, nö el patī ök mākūö kūönṙô, tö Kaifas invëka.

⁴Ngaich cha-a nö ve-ekūöre, pòn hòṅ hachīlö Yēsū nö kēḵ An ngaich fëlngen Ò.

⁵Ngö ṙô pöri cha-a, Un hē öp paratīn; hòn öt taṙōlṙen yip tarik.

⁶Ngaich hē Yēsū nö i Petenī, nö el patī Sīmōn, ök tö yeūnyu;

⁷Ngaich hĕng tak ök kikānö yamihtöre, nö kumtö ök ihong pilöng tö aṅtö tötahūsa tavi-i; ngaich ṙöhtö e nö i kui Ò, hē Ò nö ūichhak nö nyā.

⁸Hē yik mahaköp pöri nö meūkö e, ngaich kunyahaṅlōn cha-a, nö ngö ṙô, Kūö yòh ön nö mëchi?

⁹Inyīhiyi an öre nö pōyen ṙāi, ngaich kò-òren nö kētu nö i vē yāich.

¹⁰Akahalōn pöri Yēsū tö e; ngaich ngö ṙô; Kūöyòh öi uyëken ngam kikānö? Tö ò nö tö löökö tī nö in Chu.

¹¹Tö-örheuheu yin yī-ö holtuṙah tö vē yāich; rö-ö pöri Chu-ö örheūheu in yīö.

¹²Ṙöhtö ngam tavī-i an ngam kikānö, nö i alaha Chu, nö inlēnkö lināpngö Chu.

¹³Tökô-ò ṙô Chin tö yīö, I Chūök ngih tölöök inhānga min nö ahangka, i në taṙòkhöre panam, in e min inrē, ngih tī ngòh kikānö nö ṙô, inköpkölōn tö ò.

¹⁴Hē e, hĕng taka aṅ i yik tö nëtsīön, ök tö Yūta Iskaryôt invëka, nö chuh i yik mākūö kūönṙô;

¹⁵Ngaich ngö ṙô, I ṙôken tī öyih, kē-ĕkūö chu, hòṅ chu kēten Ò in yīö? Ngaich cha-a nö kalah lumngan tö lūöi anāi rupīö, ngaich kē-ĕkūö ò.

¹⁶Hētentö e anga-aṅ ngaich nö lukkö ṙētakre nö kēten Ò nö in cha.

¹⁷Im ranehtökūö sakāmö ngam tötaföhlöng ròtī, ngaich yihtöre yik mahaköp nö in Yēsū; nö ngö ṙô, Isuh lōn Ömeh, tö ih halēnken Meh nyā ngih paska?

¹⁸Ngaich ngö ṙô Anga-aṅ, Kuṙòh, chuh im panam, ip umuh tarik; ngö ṙô tö ò, Ngö ṙô ap Mahaköphöti. Röhta ön ngih ṙētak Chu. Hòṅ i patī meh Chin holtö vē mahaköp i ngih paska.

¹⁹Ngaich yik mahaköp nö teūngen tö tinölôre tö Yēsū; halēnken ngam paska cha-a ngaich.

²⁰Im harap, ūichhaka ngaich Anga-aṅ nö nyā, nö holtö yik tö nët sīön taka mahaköp.

²¹Ngaich ngö ṙô Anga-aṅ, hē cha nö nyā, Tökô-ò ṙô Chin tö yīö, Hĕng tak öp min tö yīö, kamëḵngen Chu.

²²Ngaich cha-a nö pōi miṙivlōn, kö kaknyöre ngaich nö ngö ṙô tö Ò, Mā; chu-ö chu?

²³Ngaich ngö ṙô Anga-aṅ, nö sap ṙô cha, Öp kamsumlötīre nö hol tī Chu, nö el ngih pingāṅl anga-aṅ min kamëḵngen Chu.

²⁴Ngaich Ön ngòh Kūön Tarik nö kiröönngöre, nöng sā kinūichngö Ò; tötkôlò öp tarik, öp tölökngu tī tö ngòh Kūön Tarik nö kē-ĕ-yö. Löök öp öre misī, yĕn öt fötnyu öp tarik anga-aṅ.

²⁵Ngaich ngö ṙô ök kamëḵngen Ò, ang Yūta, Rappī; chu-ö chu? Ngaich ngö ṙô Anga-aṅ tö ò, Me-eṅ mana.

²⁶Ngaich hē cha nö nyā kēḵ ròtī ang Yēsū; hakôlò e ngaich, ngaich fôkö e; ngaich ngö ṙô Anga-aṅ, nö kē-ĕkūö yik mahaköp, Euṅh nya-aṅ e; alaha Chu an.

²⁷Kēḵtam Anga-aṅ tök kulah, ngaich ha-öiny ngam Tēv; ngaich ngö ṙô, nö kē-ĕkūö cha,

²⁸Ṙòkhörekūö yin ôkö e; tön mahām Chu an nö kinlēḵngô, tö kitaktu töpòkūö tömaṙôngö, nö inṙē-ĕl tökööl.

²⁹Ngö ṙô Chin tö yīö, Hö-ö Chin hòṅ òk aṅ ṙòng vāin, töngamuhangen, hanöng saha öp sakāmö, hē Chu min ôkö e, nö tufömngöre. Holtentö yīö, i ngam pūlngö ngam Yöng Chu.

³⁰Keuheūhë ṙô cha-a nö tikökṙôre, ngaich kunyī-inyre nö ip Rôngö Òliv.

³¹Ngaich ngö ṙô Yēsū tö cha, Ṙòkhöre yin min ṙāngen Chu i ngih hatööm; pòn ngö kinūichngö, Fël öp yōmpököre Chin min; ngaich min nup pököre nö parātiyö.

³²Unôichrit inchohlö chu pöri Chu-ö min chuh Kelelī.

³³Ngaich ngö ṙô ang Pītör, Yĕn ṙòkhöre min nö ṙāngen Meh, öthētu chū-ö ṙāngen Meh.

³⁴Ngaich ngö ṙô Yēsū tö ò, Tökô-ò ṙô Chin tö meh, Lūöi heuh man min mahngen Chu, urēhĕkūö ṙô hayöm i ngih hatööm.

³⁵Ngaich ngö ṙô Pītör tö Ò, Yē chu öre pòrô kapah, anòngngen Meh; sön öich öthōḵ mahngen Meh. Ngati ṙô inrē yik mahaköp nö ṙòkhöre.

³⁶Yihtöre ngaich Yēsū nö holten cha, nö el öp panô-òṅ Ketsēmenī; ngaich ngö ṙô tö yik haköptöre. Ūichngöre yin ihih, i saha Chu sin chuh mu-aṅ, ve-ekūötēv.

³⁷Ngaich ngô-òṅ Pītör Anga-aṅ, nö holre, tö nak tö nët tak kūön Sepetī inrē; kētöre ngaich Anga-aṅ nö haṙivlōn takô, kihngen ellōn inrē.

³⁸Ngaich ngö ṙô Anga-aṅ tö cha, Hòṅ kapah Chin tö ṙôkö miṙivlōnre. Ngöhören yin ihih: aṅhaṅti inrē hol Chu.

³⁹Rĕh rô-òlkūö Anga-aṅ nö kiröönngöre, fātngökūöre ngaich nö el tumlat; ngaich ve-ekūötēv; nö ngö ṙô, Kayöngö; yē e nö kô, hökngen ngih kulah yēḵ nö chööḵngen Chu. Ngaich pöri yēḵ, un sā lōn Chu, sā lōn Meh pöri.

⁴⁰Yihtöre Anga-aṅ nö i yik mahaköp, ngaich kôtökūö tö cha nö haṙòh, ngaich ngö ṙô Anga-aṅ tö Pītör, Sitih, öt kô öi hĕng köṅnyṙô rô-òten aṅhaṅti hol Chu?

⁴¹Aṅhaṅti, ve-ekūötēv inrē, hòṅ yīö öt yihtöre im kinlaha. Hōḵ takô ön ngòh ma-alaha; öt kalēḵ pöri ngih alaha.

⁴²Hēk Anga-aṅ, im innët heuh, nö kiröönngöre; ngaich ve-ekūötēv, nö ngö ṙô, Kayöngö; yē ngih nö öt kô nö chööḵngö, nö öt ôkö tö Chu; höng sā lōn Meh yēḵ ngaich.

⁴³Hēk Anga-aṅ nö yihtöre, ngaich kôtökūö tö cha nöng haṙòh, pò cha nö öt manlaklen mat.

⁴⁴Ṙā-ang Anga-aṅ tö cha nö hēk, ngaich kiröönngöre, nö ve-ekūötēv im linūöi heuh, nöng hēngre ṙô.

⁴⁵Ngaich yihtöre Anga-aṅ nö i yik mahaköp, ngaich ngö ṙô tö cha, Iṙūhö mat yin ngaich haṙòh heūheure. Yĕh meuk; ngam ṙētak nö röhta; ngaich Ön ngòh Kūön Tarik nö kē-ĕyö nö eltī tököölö fālen.

⁴⁶Choholre; ta-a, töi ngaich; röhta ön nö ngaich ngòh kamëḵngen Chu,

⁴⁷Ṙònghöichṙô Anga-aṅ, yih ngaich Yūta, ök tö hĕng tak aṅ i yik tö nët sīön; nö hol tö yik tömaṙôngö tarik, tö sanëtu, tinkungu inrē; ṙamā-ang i yik mākūö kūönṙô, i yik mākūö yik tarik inrē.

⁴⁸Ngaich ök kamëḵngen Ò nö kē-ĕkūö cha tö minkahngö, nö ngö ṙô, Öp ahāmkūö chu min ngaich nö Anga-aṅ; kēḵ An.

⁴⁹Hachiptöre anga-aṅ nö in Yēsū; ngaich ngö ṙô, Salām; Rappī; ngaich hāmkūö Ò.

⁵⁰Ngaich ngö ṙô Yēsū tö ò, Hol Chu; kētöre man ngaich, töp löktöröönö meh yih. Ngaich yihtöre cha-a, ngaich kētötīre nö in Yēsū, ngaich kēḵ An.

⁵¹Ngaich hĕng tak tö cha, yik mi-in Yēsū, mahanyāṅklö këlre, ngaich hōknyö sanët; ngaich fang ök mahalanṙen mākūö kūönṙô, ngaich tökngö nang tī tö ò.

⁵²Ngö ṙô pöri Yēsū tö ò, Hayulhöt ngam sanët man hēk, el chūökre; tön ṙòkhöre yin vē kamëkö sanët, nö palā-aiṙen tökūö sanët.

⁵³Öt kô ṙöng Öich, tö lōn meh, Öich ve-ekūö ngam Yöngre; ngaich kô-òren Anga-aṅ nö pōyen tahīntö nö in Chu, tö tö nët sīön köṅny ma-aṅhānga.

⁵⁴Sitih kinheūṅtngö ṙô ṙöng öng min ngam töhet līpöre, tö e nö töhòṅ ngatī?

⁵⁵Hē e, Yēsū nö ngö ṙô tö yik tömaṙôngö, Sāre öyih la-al tötūmu, öi sanëtu, tinkūngu inrē öi kē-ĕ Chu? Örhĕnghang sumkam Chin el ngam töhet chūök haköphöti; ngaich rö-ö yī-ö kē-ĕ Chu.

⁵⁶Ṙòkhöre pöri në nö yih, nö kinheūṅtngö ṙô nup līpöre yik pròfĕt. Ngaich yik mahaköp nö ṙòkngöre nö ṙāngen Ò; ngaich falngöre.

⁵⁷Ngaich yik kamëḵeṅ Yēsū nö kēkngen Ò nö i patī Kaifas, ök mākūö kūönṙô; i chūök yik kamūich, yik mā inrē nö hamūlöre.

⁵⁸Tömkörit Ò ang Pītör nöng marôvat, nö tölngö i patī ök mākūö kūönṙô ngaich kuhēthötre. Ūichngöre ngaich nö i yik tösökhak, nö ngëichkö öp manāngen.

⁵⁹Hē e, yik mākūö kūönṙô, tö yik kamhôṅka inrē, nö chöh samūöichkö fālen Yēsū; pòn hòṅ kumpahan.

⁶⁰Ngaich cha-a nö öt kôtökūö; pòrô nö maṙôngö yik samūöicha nö yih.

⁶¹Unôichngöre pöri, nö nët tak nak yamih; ngaich ngö ṙô, Ngö ṙô Ön ngòh tarik, Kô-òren Chin tiṙōlngö ngih töhet chūök ngam Tēv, ngaich mānlö e, höng lūöi sumkam.

⁶²Ngaich ök mākūö kūönṙô nö söklöre, ngaich ngö ṙô tö Ò, Höng öt ṙô-òvö Ömeh? Asuh ön në ṙô vē vamënyö fālen Meh?

⁶³Höng öt ṙô-òvö pöri Yēsū. Ngaich ök mākūö kūönṙô nö ngö ṙô tö Ò, I ngam tö aṅ Tēv, ṙô Chin tö Meh, hòn Meh ve-eny nang ih, yē Meh Öm Me-eṅ Kristū, Öm Kūön ngam Tēv,

⁶⁴Ngaich ngö ṙô Yēsū tö ò, Ngaich man yih ṙô-òvö. Ngö ṙô Chin tö yīö. Töngamuhöten yin min meuk ngòh Kūön Tarik, nö ūichhaka nö lahāmö ngam minhôiṅyö, ngaich yih nö i kui taṙul ngam halīöngö.

⁶⁵Ngaich tikaichngö hilāre ök mākūö kūön ṙô; nö ngö ṙô, Öt lēkôre Ana, Iṙôktöre lōn öi, tö vamë-eny? Yĕh meuk; hang ngam ötlinëkô yin ngaich, Sitih lōn öyih?

⁶⁶Ngaich ngö ṙô cha-a, Tö hòṅ kapah An.

⁶⁷Kösngö elmat Ò cha-a ngaich fohan inrē. Rēvre yik famtākkūö Ò tö eltīre, nö ngö ṙô,

⁶⁸Ve-eny nang ih Man, Me-eṅ Kristū, Achīö ap famôhò Meh.

⁶⁹Hē e, Pītör nö ūichhaka, nö el kahôyö, i rittui patī; ngaich hĕng tak ök mahalanṙen kikānö yamihtöre nö in ò; ngaich ngö ṙô, Me-eṅ man inrē hol Yēsū, ngam aṅ Kelelī.

⁷⁰Mahangre pöri anga-aṅ, nö i kūö cha nö ṙòkhöre, nö ngö ṙô, Rö-ö chin akahalōn tö ṙô meh.

⁷¹Ngaich hē ò nö kunyi-inyre nö i kūö talöökö tahëng tak hēk ök kikānö mahalanṙen, mameūkan; ngaich ngö ṙô tö cha, yik mu-umuh, Ngòh ön inrē tarik hol Yēsū, aṅ Nāsaret.

⁷²Hēk anga-aṅ nö mahangre, nö chūökuṙô, nö ngö ṙô, Rö-ö chin akahakūö tö ngam tarik.

⁷³Rĕh rô-òten yik samökhaka nö yihtöre, ngaich ngö ṙô tö Pītör, Kô man me-eṅ inrē, aṅ in cha; hameuktu man tö ngam ëlôre.

⁷⁴Kētöre anga-aṅ nö rūttökuire, chūökuṙô inrē; nö ngö ṙô, Öt akahakūö chin tö ngam tarik.

⁷⁵Ilööṙen ngaich hayöm nö takeūk. Fēḵĕlre ngaich Pītör tö ṙô Yēsū, nö ngö ṙô, Urēhĕkūö ṙô hayöm, lūöi heuh min me-eṅ mahngen Chu. Kunyi-inyre ngaich anga-aṅ; ngaich peuiny miṙivlōnre.