Read Car_Nicobarese T. MËTIV 27 Bible Online

T. MËTIV 27 - Car_Nicobarese bible

T. MËTIV 27

¹Hē minlīlö ngam peuheū, ṙòkhöre yik mākūö kūönṙô, yik mākūö tarik inrē, nö ve-ekūöre tö inlahen tīre tö Yēsū, nö kumpahangvah Ò.

²Nyëkan cha-a, ngaich kēḵngen Ò; kēten Ò nö ik mahayöng Pailĕt.

³Ngaich Yūta ök kamëḵngen Ò, nö hē ò meūkan nö öt hakôlòngṙô; ngaich haṙivlōn; ngaich havantö nuk tö lūöi anāi rupīö, nö i yik mākūö kūönṙô, yik mā inrē; nö ngö ṙô, Ngaich chin köölö fālen, pò chu kēḵngö ngòh tötfāluṙen tarik.

⁴Ngö ṙô pöri cha-a, Asuh öng angū-ö nö in ih? Kahngenre man me-eṅ tö e.

⁵Ngaich anga-aṅ nö kavalngö nuk rupīö nö ël ök töhet chūök; ngaich kiröönngöre, ngaich kiseutngöre.

⁶Ngaich yik mākūö kūönṙô nö chap nuk rupīö; ngaich ngö ṙô, Rö-ö nun nö kô nö chaplöngö nö ël öp chūök rupīö inlōnti; pò u nö ṙāi mahām.

⁷Keuheūthëṙen cha-a nö ve-ekūöre, ngaich havah ök panam vamī tanīöyö, nö chūök inulngö yip aṅ tahëng.

⁸Lökten öp nö panam Mahām invëka söl ing töngamuh.

⁹Ngaich keuheūtiṙen ngam ṙô ngam pròfĕt Yarimiā nö ngö ṙô, Ngaich cha-a nö kēḵ nup tö lūöi anāi rupīö, ṙāi ngam töhavaha, ngam haṙāi yip rēvre kūön Israĕl.

¹⁰Ngaich cha-a nö kēḵngö u, nö ṙāi öp panam vamī tanīöyö; sā ṙô ngam Mā Tēv nö halēnngen chu.

¹¹Sökhaka ngaich Yēsū nö i kūö ök mahayöng, ngaich hatönö Ò ök mahayöng nö ngö ṙô, Rāchakūö vē Yahūti Öm Me-eṅ? Ngaich Yēsū nö ngö ṙô tö ò. Huveū-eu ṙô man.

¹²Ngaich hē më mākūö kūönṙô më mā inrē, nö vënyö fālen Ò ngaich nöng öt ṙô-òvö Anga-aṅ.

¹³Ngaich ngö ṙô ang Pailĕt tö Ò, Hang ṙôken ṙô cha Ömeh, nö vënyö fālen Meh?

¹⁴Ngaich nöng öt sap ṙô ò Anga-aṅ; öt rēhĕn nöng hĕng höiny milôhò; ngaich ök mahayöng nö pōiyen pinngangkūo.

¹⁵Fehere ök mahayöng nö tö hĕng tak ṙahānyi tö tökē-ĕ; nö i më tömaṙôngö, hē el paratīn, tö öp töng lōn cha.

¹⁶Ngaich hĕng tak ök umuh, tö-eūnyu tökē-ĕ, Pārapas ök mine-eny ò.

¹⁷Ngaich hē cha nö hamūlöre, ngaich ngö ṙô Pailĕt tö cha, Achīö ap lōn yīö ṙahānyö chu? Pārapas? Yēsū ṙöng ngam tö Kristū invëka?

¹⁸Pò ò nö akahalōn tö cha nö kūö kumnyahelmatre nö kēten Ò.

¹⁹Ṙòngmö ūichhaka anga-aṅ nö el chūök kamhôṅka, ngaich ök pihö ò nö tīnhanga nö in ò, nö ngö ṙô, Uh man kanahnguṙen tö tīre ip tölöök tarik; tön heūvkūö Ò chin amòh, ngaich öich höng ötkuchīkö ellōn.

²⁰Ngaich yik mākūö kūönṙô, yik mā inrē, nö hōtö yik tarik nö havëken Pārapas; fëli pöri Yēsū.

²¹Ngaich ngö ṙô ök mahayöng tö cha, Öpyòh öp lōn yīö tö nā tö nët taka, ṙahānyö chu in yīö? Pārapas, ngö cha-a.

²²Ngaich ngö ṙô Pailĕt tö cha, Sitih tī öich min tö Yēsū, ngòh tö Kristū invëka? Ngaich ṙòkhöre ṙô cha-a, nö ngö ṙô, Harāten Ò.

²³Ngaich ngö ṙô Anga-aṅ, Kūö yòh? Asuh ap tötlöök la-en Ò? Höng iṙuhö ṙô cha-a, nö hūḵa, nö ngö ṙô, Harāten Ò.

²⁴Ngaich hē Pailĕt nö meūköre nö ötkô, pòn ngaich cha-a nö hòṅ tiṙōllenre, ngaich kēḵ mak anga-aṅ ngaich söich kuntīre nö i kūö më tö maṙôngö; nö ngö ṙô, Öt mikahav chin chu-ö i mahām ngòh tö löök tarik; kahngenre yin yī-ö tö e.

²⁵Ngaich ṙòkhöre ṙô yik tarik, nö ngö ṙô, Hökngen ap mahām Ò nö i kui ih, i kui yip kūön ih inrē.

²⁶Ṙānyen Pārapas ngaich anga-aṅ nö in cha, fohoh Yēsū pöri anga-aṅ, ngaich kēten Ò nö harātu.

²⁷Ngaich yik kūmyung nö kē-ĕ Yēsū nö chuh el patī mahayöng, ngaich hamūlöre nö in Ò yik tö hēngòng kumyung.

²⁸Luhngö nuk hilā Ò cha-a ngaich; ngaich kahumlen Ò tök laturë tö kiröng hilā.

²⁹Ngaich kupāt sapīöv Ò cha-a, tö töchökhukūö; ngaich sumpīövlöng nö i kui Ò. Kētu eltī Anga-aṅ tö tinkung, nö lahāmö. Simngöre cha-a ngaich nö i kūö Ò; ngaich hayëḵngen Ò nö ngö ṙô, Salām, Me-eṅ Rāchakūö Yahūti.

³⁰Kösngö elmat Ò cha-a ngaich; kētam tök tinkung, ngaich fohtö kui Ò.

³¹Ngaich hē cha nö keuheūten nö hayëḵngen Ò; ngaich luhngö ök laturë cha-a hilā; ngaich kahumlen Ò tö nuk hilā Ò; ngaich kēḵngen Ò nö haratu.

³²Ngaich hē cha nö kunyi-inyre, hĕng taka ök tarik kanôtökūö cha, aṅ Kuṙēnī, Sīmōn ök minënyö ò. Anga-aṅ lahīp cha, nö kiröönngöre nö in cha; pòn hōtu nö keun ök tö hakālö Ò.

³³Ngaich hē cha nö sölta nö ip chūök, Kòlkòta ap minënyö e, ngam tö ngö, Chūök kuikupah;

³⁴Kē-ĕkūö Ò cha-a ngaich tö vāin, katēhĕ tö tö-angu-uvö. Ngaich hē Ò nö kalaha e, ngaich sōḵ Anga-aṅ nö òk.

³⁵Keuheūthë tī cha-a nö harāten Ò, ngaich katölhökūöre cha-a tö nuk hilā Ò, kalah taneūngenre.

³⁶Ūichngöre ngaich, nöng hatīönken Ò.

³⁷Ngaich i kui Ò, ök vine-eny fālen fālen Ò nö kūchiyö, nö ngö, Rāchakūö vē Yahūti Ön ngòh.

³⁸Nët tak nak tötūmu tö harātu nö hol Ò; hĕng taka lahāmö, hĕng taka latavē.

³⁹Ngaich yik chamööḵöng nö ötlēkôre tö Ò;

⁴⁰Kichinykūöre, nö ngö ṙô, Me-eṅ tumṙōlngö ngam töhet chūök, ngaich lūöi sumkam tī Öm vī-il e; hayöökenre Man yēḵ; yē Meh Öm Kūön ngam Tēv, Yônti, ṙā-ang rōi ngam töhakālö.

⁴¹Ngati inrē yik mākūö kūönṙô, tö yik kamūich, yik mā inrē, nö hayëḵngen Ò, nö ngö ṙô,

⁴²Hayööken tahëng An; ötkô Anga-aṅ nö hayöökenre. Rāchakūö Yahūti An; hökngen Ò yēḵ nö yônti, nö ṙā-ang rōi ngam töhakālö; ngaich möl min ayī-ö ṙātö el lōnre in Ò.

⁴³Hayönglenre An nö im Tēv; hökngen Ò yēḵ nö ṙānyen Ò töngamuh, yē Ò nö hōten Ò; tön ngö ṙô An, Kūön ngam Tēv Chin Chu-ö,

⁴⁴Ngatī ṙô inrē nak tötūmu, töharātu nö hol Ò, nö sumrōngngökūö Ò.

⁴⁵Löktökūö im tö nët sīön köṅny ṙô ök sinngūlö nö i minë panam, söl im tö lūöi köṅny ṙô.

⁴⁶Ngaich im tö lūöi köṅny ṙô, Yēsū nö pōitô nö hūḵa nö ngö ṙô Ēli; Ēli lama sapaktani, ngam tö ngö, Tēv Chu, Tēv Chu, Kūön yòh Öm ṙāngen Chu?

⁴⁷Ngaich rēvre tö cha yik samökhak nö umuh, töngö ṙô, hē cha nö hāngö e, Havëken Ēlaicha Ön ngòh tarik.

⁴⁸Ngaich hĕng tak tö cha, ök tö-ilöören nö fal; ngaich hēngö kahë tö ṙòng ihong, ngaich kasumtö e nö ik tö hikīölhu vāin; ngaich lòktö e nö i kūö ök tafūyö, ngaich kē-ĕkūö Ò nö òk.

⁴⁹Ngaich yik tahëng nö ngö ṙô, Ngösin; töi ngëichken Ēlaicha, yĕn yihtöre nö hayööken Ò,

⁵⁰Ngaich pōitô Yēsū nö hūḵa, ngaich kēḵngö nômöre.

⁵¹Ngaich ök tananglö ël ök töhet chūök nö nët tit nö takaich, löktökūö latulöng, söl lataṙeū; kayīna ngaich ngam tumlat; larakköṅny inrē nuk ihong.

⁵²Löpnyörekūö nuk anūlö, ngaich maṙôngö nuk alaha yik töhet, yik tökapah, nö hachohlöngö;

⁵³Kunyī-inyre nö ṙā-ang el anūlö, unôichrit ngam invanlö Ò; ngaich kuhēthötre nö im töhet panam; ngaich meūkö tö tömaṙôngö.

⁵⁴Ngaich ök yöngṙen kumyung, yik hol ò inrē, nö aṅten Yēsū; hē cha nö meuk ök kumyeūnö, nuk töngaichngen inrē, ngaich pōyö pinhe-eṅkūö, ngö ṙô, Kô Ön ngòh, nö Kūön ngam Tēv.

⁵⁵Maṙôngö yik umuh kikānö, hatīönken Ò nö maṙôvat, yik tamömkörit Yēsū nö ṙā-ang Kelelī; ngaich meukṙen Ò.

⁵⁶Maṙiā ök aṅ Mektela in cha, Mariā inrē ök yöng nāṅ Yôsĕs, ök kikānö yöng nak kūön Sepetī inrē.

⁵⁷Haraptöre ngam harap, hĕng taka ök tökôlò tarik, aṅ Arimataya, Yôsĕf ök mine-eny ò, mahaköp ök anga-aṅ inrē nö in Yēsū.

⁵⁸Chuh in Pailĕt anga-aṅ nö havëkö ök alaha Yēsū. Ngaich Pailĕt nö hōtö kinëtö e nö in ò.

⁵⁹Ngaich Yôsĕf nö kēḵ ök alaha; ngaich haṙūngö e nö ël tölöök hilā.

⁶⁰Ṙātö e ngaich nö ël ök tufömngöre anūlö, ök tö hulhötvö nö i kaha ihong. Ngaich anga-aṅ nö pilöntö ök tökiröng ihong nö i kūö ök anūlö; ngaich kiröönngöre.

⁶¹Umuh ang Mariā ök aṅ Mektela, ök tahëng tak Mariā inrē, höng ūichhaka nö kamtö ök anūlö.

⁶²Im huṙöich, ngam mu-unôichrit ngam Inlēnken, hamūlöre yik mākūö kūönṙô tö yik Feresī, nö in Pailĕt;

⁶³Ngaich ngö ṙô, Mā, Köpölōn in tö ṙô ök mahachīl, i saha Ò nö ṙòngmö aṅ, nö ngö ṙô. Unôichrit tö lūöi sumkam Chin min hēk choholre.

⁶⁴Chöngu man yēḵ, lökten, töp anūlö nö haköpikūö, hanöngsaha ngam linūöi sumkam; hòṅ yip mahaköp nö in Ò nö öt yihtöre, nö ulāingen Ò; ngaich ngö ṙô min tö vē tarik, choholre Ap nö ngaich, nö ṙā-ang i yip tö kapah, ngaich ngam manā-aṅ min inchīlö nö höichngen tö ngam mu-urĕh.

⁶⁵Ngaich ngö ṙô Pailĕt tö cha, Kô-òren yin kēḵ amahaṅti; kuṙòh, kiröönngöre; ip tölngö kanô-òṅ yīö, haköpngökūö e.

⁶⁶Kiröönngöre cha-a ngaich, ngaich haköpngökūö ngam anūlö, hapanngökūö ngam ihong; ṙātö amahaṅti cha-a inrē.