Read Car_Nicobarese T. MËTIV 28 Bible Online

T. MËTIV 28 - Car_Nicobarese bible

T. MËTIV 28

¹Hē kinheūṅtö ngam töhet sakāmö, hē minlīlö peuheū im raneh sakāmö tö sat sumkam; yihtöre Mariā ök aṅ Mektela, ök tahëng inrē Mariā, nö ngëichkö ök anūlö.

²Ngaich ök yöng kumyeūnö; pòn hĕng tak ök ma-ahānga ngam Mā Tēv yamônti nö ṙā-ang el halīöngö; ngaich yihtöre nö pilôngngö ök ihong, ngaich ūichngöre nö i kui ò.

³Sā mineūkö hanyālö anga-aṅ isoh nuk hilā ò;

⁴Ngaich kūö pinhe-eṅkūöre yik amahaṅti nö kichëyöre, ngaich nöng sā tö kapah tarik.

⁵Ngö ṙô pöri ök ma-ahānga tö yik kikānö, Uh yin pa-ekūö. Akahalōn chin tö yīö chöhö Yēsū Ök tö harātu.

⁶Öt ihih Ökuh; pò Ò nö ngaich nö choholre sā ṙô Ò.

⁷Ta-ih, ngëichkö chūök Ök Mā nö hulalhaka. Kuṙòh, kiröönngöre ka-eūyen; ve-eny nang yip haköptö Ò, Choholre Ök nö ngaich, nö ṙā-ang i yip tö kapah. Urēhĕkūö yīö Ök nö chuh Kelelī; in e yin min meukkūö Ò. Yĕh meuk; ngāichô chin tö yīö.

⁸Kiröönngöre cha-a ngaich nö ka-eūiyen, nö ṙāngö ök anūlö, holtö pinhe-eṅkūöre, yöng ṙānāmölōnre inrē. Ngaich fal, nö ahangkö yik haköptö Ò.

⁹Ngaich ilööṙen Yēsū nö asaha cha: nö ngö ṙô, Salām. Yihtöre cha-a ngaich, nö kēḵ kunröön Ò; ngaich sōntökūöre nö in Ò.

¹⁰Ngaich ngö ṙô Yēsū tö cha, Ui pa-ekūö, Kuṙòh ve-eny nang yip kahëm Chu, hòṅ cha nö chuh Kelelī; in e yip min nö meukkūö Chu.

¹¹Ṙòngmö el talöökö cha-a, rēvre ngaich yik amahaṅti yamihtöre nö im panam; ngaich ve-eny nang yik mākūö kūönṙô tö nuk töngaichngen.

¹²Ngaich hē cha nö hamūlöre, tö yik mā, ngaich ve-ekūöre. Pōiyen kahëti cha-a ngaich tö rupīö, nö i yik kumyung;

¹³Nö ngö ṙô, Ngö ṙô pöichö, Yih yik amòh haköptö Ò tö hatööm, ngaich ulāingö ök alaha Ò, i saha ih haṙòh.

¹⁴Ngaich yē öp mahayöng min nö hāngö e; ngaich ve-elkui yīö min īhö in Ò, hòṅ yīö öt chökngöre.

¹⁵Kēḵ nuk rupīö cha-a ngaich; ngaich nöng, asā inköptöre. Ngaich keuheūtngöre chūök ngam ṙô nö hāngö nö i yip Yahūti, söl ing töngamuh.

¹⁶Ngaich yik tö kahuk sīön tak mahaköp nö chuh Kelelī, ip rôngö, chūök ṙô Yēsū tö cha.

¹⁷Ngaich hē cha nö meūkan; sōntökūöre ngaich cha-a nö in Ò; rēvre yik tökatöngalōn.

¹⁸Yihtöre ngaich Yēsū nö in cha; ngaich ve-ekūö cha, nö ngö ṙô, Ṙòkhöre nun në chöngö nö kētu nö in Chu, el halīöngö, ing panam inrē.

¹⁹Lökten yin kuṙòh; vīten vē taṙòkhöre tarik nö mahaköp; vōkö cha i Mine-eny ngam Yöng, Kūön, Töhet Fanöinylö inrē.

²⁰Haköpten cha nö haköp nup taṙòkhöre tinölô yīö tö Chu. Yĕh meuk; örheūheu Chin holtöṙah yīö, söl ip manāngen ngih panam.