Read Car_Nicobarese T. MËTIV 3 Bible Online

T. MËTIV 3 - Car_Nicobarese bible

T. MËTIV 3

¹Hē e, nö yihtöre ang Yôhan ök Vamôk mumkahten nö el-inchōn i Yūta; nö ngö ṙô,

²Havöötö ellōnre yin; tön röhta an ngam pūlnga ngam halīöngö.”

³Anga-aṅ an, ṙô, ngam pròfĕt Isayā, nöngö ṙô, “Ngam pööiny ṙô ap hamūḵa nö el-inchōn, Halēnkö talöökö ngam Mā Tēv yin; hachipkö nup kanröönö ò.”

⁴Sanôi ūṅt ök hilā Yôhan; uk inrē ök inmöpṙat ò. Mufākö nuk nya-aṅkūö ò, tö pachāka inrē aṅ el-inchōn.

⁵Ngaich chuh in ò nö ṙòkhöre yik aṅ Yērusalem, aṅ Yūta, ṙòkhöre inrē yik aṅ ranghö Yôtön.

⁶Vënyötököölre cha-a, ngaich vōkö tö ò nö ël ap tahël Yôtön.

⁷Ngaich hē Yôhan nö meuk yik tömaṙôngö aṅ i yik Feresī, aṅ i yik Satuki inrē, nö yihtöre nö hòṅ vōkö; ngaich ngö ṙô anga-aṅ tö cha, “Yī-ö kūön pēch; achīö ap hamôten yīö falgöre, tö ngam yamih lanīnö?

⁸Hökngen nup inlahen yīö yēḵ, nö hameuktö invöötö ellōn yīö.

⁹Uh yin ngölōn in re, Muvöhngu in īhö tö Aprahām; tön ngö ṙô Chin tö yīö, tö ngam Tēv nö kô-òren nö ha-aṅ aṅ i në ihong, nö kūön Aprahām.

¹⁰Ngaich an ngam hanīöng nö ṙātu nö i rööntö nup chōn ṙòkngöre nup chōn tötṙôngu tö tölöök nö kūöltu, ngaich kavalhötvö nö i kūö tameūyö.

¹¹Kô chin chū-ö, aṅtī tö mak vōkö yīö, nö invöötö ellōn. Ap mu-unôichrit chu pöri, tömööḵlö kanô-òṅ tö chu; ötrēhĕn chin kô, kēḵ nuk kunröpö Ò, Anga-aṅ min vamôkö yīö nö aṅtī tö ngam Töhet Fanöinylö, tameūiyö inrē.

¹²Eltī Ò ap haneui; ngaich Anga-aṅ min nö ahetlö el ap chūök sāiny. Ngaich hamūl nup sāiny nö el chūökre; föngngö nup uk nëlö pöri min Anga-aṅ, nö i kūö töt nyangngö tameūiyö.”

¹³Yihtöre ngaich Yēsū nö i Yôtön, in Yôhan, nö ṙā-ang Kelelī; nö hòṅ vōkö tö ò.

¹⁴Tahngen Ò pöri lang Yôhan, nö ngö ṙô. “Chu-ö chin öre töhòṅ vōkö tö Meh; ngaich yihtöre hòng Me-eṅ in chu?”

¹⁵Ngö ṙô pöri Yēsū nö sapṙô ò, “Hökngen Chu yēḵ; tön tö hōḵtu an angū-ö nö inteūngngö taṙòkhöre tölöök.” Ngaich halöngten Ò anga-aṅ.

¹⁶Hē kinheūṅten Ò nö vōkö, iṙūö yôklö ngaich Yēsū nö ṙā-ang el mak ngaich ngam halīöngö nö löpnyörekūö; ngaich meuk ngam Töhet Fanöinylö ngam Tēv Anga-aṅ, nö sā nyö-öṅ, nö yônti; ngaich teungtöre nö i kui Ò.

¹⁷Ngaich ök töngöṙô, lamöktö el halīöngö, “Hanāngenlōn Chu ön ngòh, nö Kūön Chu. In Ò Chin ṙāmölōn takô”