Read Car_Nicobarese T. MËTIV 4 Bible Online

T. MËTIV 4 - Car_Nicobarese bible

T. MËTIV 4

¹Ngaich Yēsū nö hachōkoi tö ngam Töhet Fanöinylö, nö elinchōnngö, nö kalaha tö ngam sī-ö.

²Ngaich hē Ò nö keuheūten nö fën anāi sumkam, fën anāi mitööm, nö ahik; unôich Anga-aṅ nö kapahare.

³Ngaich yihtöre ngam kamlah, ngaich ngö ṙô tö Ò, “Yē Meh Öm Kūön ngam Tēv, tölṙô në ihong Man yēḵ, nö vīngöre nö ròti.”

⁴Ngö ṙô pöri Anga-aṅ nö sap ṙô ò “Ngö kinūichngö an, Rö-ö ön ngòh tarik, nöng lökten ròti nö aṅ; lökten i nup ṙô ngam Tēv pöri, nup lamöknyö elvāng Ò”

⁵Ngaich ngam sī-ö nö kēngen Ò nö im töhet panam; ngaich asöklen Ò anga-aṅ nö i kui ngam töhet chūök vine-ëṅkūötēv; ngaich ngö ṙô tö Ò,

⁶Yē Meh Öm Kūön ngam Tēv, asuktöre Man yēḵ; tön ngö kinūichngö an, “Tölṙô yip ma-ahāngare An mīnö nö mameukken Meh; hòṅ Meh öt amahaiṙen sōngtöre kunröön i ihong.”

⁷Ngaich Yēsū nö ngö ṙö tö ò, Hēk an nö ngö kinūichngö, “Uh man kalah ngam Mā Tēv meh.”

⁸Hēk ngam sī-ö nö kēḵngen Ò nö i kui ök tömarô-òlkui rôngö; ngaich hameukhömat Ò tö në pūlngö ngih panam, nup kanôlò u inrē;

⁹Ngaich ngö ṙô anga-aṅ tö Ò, “Keuheūttöre tī chin min tö në, öich kē-ĕkūö Meh, yē Mēh afukngöre, Öm salāmö, chu.”

¹⁰Ngaich ngö ṙô Yēsū tö ò, “Sātan kē-ĕngre man; tön ngö kinūichngö an, Ve-ekūö ngam Mā Tēv man; höng Anga-aṅ lahök la-en meh inrē.”

¹¹Ngaich ngam sī-ö nö ṙāngen Ò ngaich yihtöre yip ma-ahānga nö meukṙen Ò.

¹²Hē Yēsū nö hāngö Yôhan nö kē-ĕ, ngaich chuh Kelelī Anga-aṅ.

¹³Ṙā-ang tö Nāsaret; ngaich yihtöre nö iyöng Kafarnahum, ap mi-i kūö mai, i kūöngö Sepulön, Naftali inrē.

¹⁴Kinheūtngen ngam rô ngam pròfĕt anū-ö, ang Isayā, töngö,

¹⁵Ngam panam Sepulön, panam Naftali inrē, lā kūö mai, lamuh tö Yôtön, Keleli yip tahëng mihëṅṙö;

¹⁶Meuk yöng hanātö yip tarik, amūichhak nö el singūlö; i yip amūichhaka inrē nö el nyat kinpaha, ngam hanātö nö yih.”

¹⁷Hēten tö e, Yēsū nö rĕhtenre nö mikahaten, nö ngö ṙô, “Havöötö ellōnre yin; tön röhta an ngam pūlngö ngam halīöngö.”

¹⁸Hē Yēsū nö lök kūö mai nö i Kelelī, nët tak maheuṅk Anga-aṅ tö nak kahëmre, Sīmōn, ök tö Pītörö invëka, Antaru ök kahëm ò inrē; kavalngö inhāṅl nö el mai; pò cha nö yōm kinë-eṅ kāḵ.

¹⁹Ngaich ngö ṙô Anga-aṅ tö cha, “Tā-a, tömrit Chu nan, töich vīten nā kamëḵ tarik.”

²⁰Ilööṙen cha-a ngaich nö ṙāngö nuk inhāṅlre; ngaich tömrit Ò.

²¹Iṙuhöröön Anga-aṅ nö kiröönngöre; ngaich nët tak maheuṅk tö nak kahëmre nö hēḵ, Yāköp ök kūön Sepeti, Yôhan inrē ök kahëm ò; el kupòk cha-a nö holtö ök yöngre Sepeti, nö ngattit nuk inhāṅlre.

²²Ngaich havëken cha Anga-aṅ. Ilööṙen cha-a ngaich nö ṙāngö ök kupòk, tök yöng cha inrē; ngaich tömrit Ò.

²³Keuheūt chahuhure Ang-Yēsū nö i Keleli, el chūök vine-eṅkūötēv cha, nö haköphöti, ane inrē mumkahten tö ngam tölöök inhangkö ngam pūlngö; halanken töṙōlkangen vah i yik tarik inrē.

²⁴Ngaich ngam vinënyö Ò nö söl i Siria; ngaich cha-a nö kētö yik tövāhavö, nö in Ò, yik töṙōlkangen vah ane inrē kanihngen, tö-aṅhavin tö sī-ö, tökatūöilöng elkui, mahangë-ere, tölum inrē, Ngaich halanken cha Anga-aṅ.

²⁵Ngaich maṙôngö yik tarik tamömrit Ò, ṙāmā-ang Keleli, Tekapòlis, Yērūsalem, Yūta, ane inrē ṙamā-ang lāmuh tö Yôtön.