Read Car_Nicobarese T. MËTIV 5 Bible Online

T. MËTIV 5 - Car_Nicobarese bible

T. MËTIV 5

¹Yônlö Yēsū nö i kui ök ṙôngö, tö matre nö meuk më tömaṙôngö, ngaich yihtöre yik makaköp nö in Ò, tösaha Ò nö ūichngöre.

²Ngaich kaknyöre Anga-aṅ nö haköpten cha, nö ngö ṙô;

³Tökôlò yin vē töyāichö ellōn; pòn pūlngö cha ngam halīöngö.

⁴Tökôlò yin vē töhaṙīvölōn; pò cha min nö haṙāmölōn.

⁵Tökôlò yin vē yāich, pò cha min nö tö-amīnuvö töng panam.

⁶Tökôlò yin vē tökapahare, ane inrē töhaṙëhenômö tö kanô-en; pò cha min tööḵngen.

⁷Tökôlò yin vē tö-aheūkölōn; pò cha min nö teūngen tö neūkölōn.

⁸Tökôlò yin vē töhëtö ellōn; pò cha min nö meuk ngam Tēv.

⁹Tökôlò yin vē mahalām; pò cha min nö kūön ngam Tēv invëka.

¹⁰Tökôlòyin vē tö ngaichngen ötinkôlò, töpòkūö ngam kanô-en; pòn pūlngö cha ngam halīöngö.

¹¹Tökôlò yin yī-ö, yē vē tarik min nö sumrōngngökūö yīö, öthakôlò yīö ane yē cha nö ṙōlkangen ṙô tö nup tötlöök, nö in yīö, nöng sūöcha, töpòkūö Chu.

¹²Ṙāmölōn yī-ö, öi pōyen ṙanāmölōn; tön pōyen nup raneushö yīö, el halīöngö. Cha-a yin töng ngatī tī nö öthakôlò yik pròfĕt, yik mu-urēhĕkūö yīö.

¹³“Yī-ö yin sāl ngih panam; yē ngam sāl pöri nö chuhu kumchik, isuh lökten öng min nö haṙeihu? Öt hēngö kanôlò an; höng tökavāli pöri, nö elkahôiṙen, ngaich rööntukui tö tarik.

¹⁴Yī-ö yin hanātö ngih panam. Panam mi-i kui rôngö töthanyunngen.

¹⁵Rö-ö yin vē tarik nö tōttökūö ëāṅvö, ngaich ṙā-ati nö elkatòh kuvôkö; i kui ap tösökhak pöri; ngaich angū-ö nö hanātömat yip taṙòkhöre me-el pati.

¹⁶Hökngen ngam ëāṅvöre yin nö yang nö i kūö tarik; hòṅ cha nö meuk nup tölöök la-en yīö, ngaich ha-öiny ngam Yöng yīö, ngam el halīöngö.

¹⁷Uich yamih tö lōn yīö, Öich pumyāingö ngam chöngö, në ṙô yik pròfĕt inrē. Rö-ö Chin yamih, piyāingö u; mahateungngen u pöri.

¹⁸Tökô-ò ṙô Chin tö yīö, Hanöng saha chanuhu ngam halīöngö, ngih panam inrē; öt hĕng hang milôhò min chamuh, nö ṙā-ang im chöngö; hanöng saha kinheūṅten u.

¹⁹Lökten yē ngòh töfalālötī nö hĕng hanga nö i në törahëchyen chöngö, ngaich ngatī ṙô nö haköptö tarik min; ngaich tökūöṅ-nö invëka min anga-aṅ nö im pūlngö ngam halīöngö. Ngòh kamëken u pöri min, ngaich haköphöti nö in u; ngaich min nö töpōyö invëka, nö im pūlngö ngam halīöngö.

²⁰“Ngö ṙô Chin tö yīö, Yē ngam kanô-en yīö min tö öt mötlö tö ngam kanô-en yip kamūich, yip Feresī inrē; öt kô yī-ö min kuhēthötre im pūlngö ngam halīöngö.

²¹Ngaich yin hang ök ṙô töngö, i yik mā misī, ‘Uh man fël tarik. Ngòh famël tarik kihngen min nö im kinṙôka.

²²Ngö ṙô pöri Chu-ö tö yīö, Ngòh lamā-alkūö holre, nöng öt löknyu chööḵnyi, kihngen min nö im kinṙôka. Ngòh tötlamëkôre tö holre, ngaich kihngen min nö i yip mā kamhôṅka. Ngòh ramūttö ötkanôlò, ngaich kihngen min nö i kūö tameūyö el chūök ötinkôlò.

²³Lökten yē meh kētö nup tökētu vö tö meh, el ngam mīs ngam Tēv; ngaich yē meh in e fē-ĕlre tö ngam hol meh nö rahëchyen löknyö kumnyahlōn nö in meh;

²⁴Ṙāngö ngam kahëtöre me-eṅ, i kūö ngam mīs, ngaich kiröönngöre me-eṅ; urĕh halāmö höö tö ngam hol meh; ngaich möl pömchö yihtöre, kētö ngam kahëtöre.

²⁵Halāmö höönan ka-eūyen, tö ngam tökunyahaṅelmat tö meh, yē nāṅ ṙòngmö el talöökö, hòṅ ngam tökunyahaṅelmat tö meh, nö öt kēten meh ip kamhôṅka; ngaich ngam kamhôṅka min inrē nö öt kēten meh nö ip tösökhaka; ngaich öt kalonghötvö me-eṅ el kinlōngö.

²⁶Tökô-ò ṙô Chin tö meh, Rö-ö man min kuyi-inyre, ṙā-ang in e, hanöng saha tī meh, kētö ap manā-aṅ pësa.

²⁷Ngaich yin hang ök ṙô töngö, i yik mā misi, Uh man asĕha.

²⁸Ngö ṙô pöri Chū-ö tö yīö, tö ngòh ngamëchkö ngòh kikānö nö hòṅ lōnu tö ò; ngaich nö ma-asĕhken ò ang-aṅ nö ellōnre.

²⁹Yē ngam lahāmö, mat meh, nö löknguṙentītö meh; peôknyö e, ngaich kavalngö e, nö ṙā-ang in meh. Kôlò man min, yĕn höng hĕnghang ap tūmö alaha meh nö tötkôlò; ngaich öt keuheūthötre ngam alaha meh, nö kavalhötvö nö el chūök ötinkôlò.

³⁰Yē ngam lahāmö kël meh, nö löknguṙen tī tö meh, rökngö e, ngaich kavalngö e, nö ṙā-ang in meh. Kôlò man min yĕn höng hĕng ap tūmö alaha meh nö tötkôlò: ngaich öt keuheūthöre ngam alaha meh, nö kahaltötvö nö el chūök ötinkôlò.

³¹Ngö ök inrē ṙô, Ngòh ṙāmā-ang pīhöre, hökngen ò nö kē-ĕkūö ngam kikānö tö ap tökūchö inrēvngö.’

³²Ngö ṙô pöri chū-ö tö yīö, Ngòh ṙamā-ang pīhöre nö öt kūö chinô-òṅ, ngaich vīten ngam kikānö nö tö-asĕhka. Ngòh töpīhövö min töm kikānö, yē ò nö ngaich nö ṙā-ayö, ngaich nöng ma-asĕhha.

³³Ngaich yin hang ök ṙô töngö, i yik mā misī, ‘Uh man öt hateung ṙôre; hateung tö nup ṙôre pöri, kilēḵngôre im Tēv.

³⁴Ngö ṙô pöri Chū-ö tö yīö, Ui chūöku ṙô; un rĕhĕn nö im halīöngö, tön kantēra ngam Tēv an angū-ö;

³⁵Un rēhĕn nö im panam tön ranöönöröön Ò an angū-ö; un rēhĕn nö i Yērūsalem, tön panam ngam yöng Rācha an angū-ö.

³⁶Un rēhĕn nö elkuire ṙô; tön rö-ö man kô hĕng milöichö vahī tö keūyö tö-isöh, töhuring inrē.

³⁷Hökngen nup ṙô yīö pöri, nöng töhôṅ, nöng törö-ö. Nup tömööḵngöre tö u, ngaich ṙamā-ang im tötlöök.

³⁸Hang ök töngö yin ngaich, Mat ṙënngen tö mat; kanap ṙënngen tö kanap.

³⁹Ngö ṙô pöri Chu-ö, tö yīö, Un mihôiṅ tö tötlöök. Ngòh famtāk ngam lahāmö arëkūö meh, havöötö ngam lā tahëng inrē in ò.

⁴⁰Yĕn tarīkuvö töhòṅ chuh im kinṙôka, nö hòṅ kēḵngö ngam inyut meh; kē-ĕkūö ò me-eṅ inrē tö ngam vanön meh.

⁴¹Ngòh lamīpö meh, öm hĕng maël rô-òlkūö kiröönngöre; hol ò me-eṅ kiröönngöre nët maël rô-òlkūö.

⁴²Kē-ĕ kūö ngam mahavëkökūöre man; um havöngö kūöre inrē öm im töhòṅ haṙūöng nö in meh.

⁴³Hang ök töngö yin ngaich, Hāngenlōn man tö holre; kunyahaṅelmat tö tökunyahaṅ elmat töre.

⁴⁴Ngö ṙô pöri Chu-ö tö yīö, Hāngenlōn yin tö yip tökunyahaṅelmat töre; hakôlò yip tötlamëkôre tö yīö; vë-elkūi yip tötkôlòtī tö yīö, ane inrē yip töt mahakôlò yīö;

⁴⁵Hòṅ yīö öi kūön ngam Yöngre el halīöngö; tön vītö ngam tavūöire An nö meutlö nö i kui tötlöök inrē; tīntö kumṙah inrē nö i kui tötmichūṙen, i kui tömichūṙen inrē.

⁴⁶Yē yīö öi höng hāngenlōn tö yip töhāngenlōn tö yīö, asuh öp öre raneushö yīö? Röh aich vē mahamūl ṙāi kinëhet chehen nö ngatī?

⁴⁷Yē yīö höng salām hol re, asuh ap tömööḵngöre tī yīö tö tahëng? Röh aich vē tahëng mihëṅṙö tarik nö ngatī?

⁴⁸Lökten yin yēḵ, yī-ö öi öthāṅten, sā ngam Yöng yīö el halīöngönö töthāṅten.