Read Car_Nicobarese T. MËTIV 6 Bible Online

T. MËTIV 6 - Car_Nicobarese bible

T. MËTIV 6

¹Haṙēmngenre yin, ui kēken tölöök la-enre i kūö tarik, öi hòṅ meūkö tö cha. Öt raneushu yin min, yē yīö öi ngatī tötī ngam Yöng yīö el halīöngö.

²Lökten yē meh alōnhöti, um föökö fanöö nö urēhĕkūö meh, öm sā yip mahanyatkö elmat, nö el chūök vine-eṅkūötēv, ane inrē el talöökö pò cha nö hòṅ eū-eu tö tarik. Tökô-ò ṙô Chin tö yīö, Ngaich yip cha-a nö teūngen tö raneushöre.

³Yē meh pöri alōnhöti, un hökiṙen ngam lātavē kël meh, nö akahalōn tö la-en ngam lahāmö këlmeh;

⁴Hòṅ nup inlōnti tī meh nö töhayunkaṙen, Ngaich ngam Yöng meh, ngam mameuk nup töhayunkaṙen, nö reushen meh min.

⁵Hēk, yē yīö öi ve-ekūötēv, uh yin sā yip mahanyatkö elmat; tön hāngenlōn yip cha-a, nö sökhaka nö ve-ekūötēv, nö el chūök vine-eṅkūötēv i pak kūö talöökö inrē; pòn hòṅ meūkö cha-a tö tarik. Tökô-ò ṙô Chin tö yīö, ngaich yip cha-a nö teūngen tö raneushöre

⁶Yē meh pöri me-eṅ ve-ekūötēv, kuhēthötre latuhēt el ngam urôhòre, löphangtökūö inkūpre; ve-ekūö ngam Yöngre ngam töhayungöre. Reushen meh An min ngam Yöng meh, ngam mameuk töhayunkaṙen.

⁷Uh man hĕngre ṙô, yē meh ve-ekūötēv, öm sā yip tahëng mihëṅṙö tarik; tön hāngö ṙô yip cha-a, tö lōnre, yĕn maṙôngö ṙô.

⁸Uh yin sā cha; tön akahalōn An ngam Yöng yīö, tö nup lōn yīö, urēhĕkūö ṙô yīö, ve-ekūö Ò.

⁹Sā ngih ṙô yin lökten, ve-ekūötēv, “Kayöngö, aṅ el halīöngö; töhet an yēḵ ngam Minënyö Meh;

¹⁰Yih an yēḵ ngam pūlngö Meh; sā ngam lōn Meh nö ngaich nö el halīöngö, ngatī hökngen e yēḵ ing panam inrē.

¹¹Kētö nup tö-örheūheu nya-aṅkūö ih, tötaheui.

¹²Aṙē-ĕl tökööl ih, sā ih aṙē-ĕl tökööl vē tököölö fālen nö in ih.

¹³Uh öi kētu im kinlaha; ṙānyen ih pöri, ṙā-ang im tötlöök. Tön pūlngö Meh, chöngö Meh, kanôlò Meh örheūheu. Āmen?”

¹⁴Pò yīö,yē yīö aṙē-ĕl tarik tö nup tökööl cha, aṙēlöng min yī-ö inrē tö ngam Yöng yīö aṅ el halīöngö,

¹⁵Yē yīö pöri öt aṙē-ĕl tarik tö nup tökööl cha; öt aṙēlen yīö min ngam Yöng yīö, tö nup tökööl yīö.

¹⁶“Hēk, yē yīö ahik, ui sā yip mahanyatkö elmat, yip tö ūnökūö; tön harīkngökūöre yip cha-a; pòn hòṅ meūkö tö tarik. Tökô-ò ṙô Chin tö yīö, Ngaich yip cha-a nö teūngen tö raneushöre.

¹⁷Yē meh pöri me-eṅ ahik; hacham elkuire tö tavī-i söichlökūöre inrē;

¹⁸Hòṅ meh ötmeūkö tö tarik, öm ahik; höng ngam Yöng meh pöri, töhayunngöre, Ngam Yöng meh An min rameushen meh, ngam mameuk töhayunkaṙen.”

¹⁹“Uh yin hamūl kanôlòre i kuö ngih panam, i chūök yech, maneui inrē, nö kat; i chūök mu-ulaīyö nö filalhanga, nö ulāiyö.

²⁰Hamūl kanôlòre pöri yī-ö, el halīöngö, im tötchūök yech, öt rēhĕn nö chūök maneui nö kat; im töt chūök mu-ulāyö nö filalhanga nö ulāiyö.

²¹Pòn yē chūök nup kanôlò meh, in e min inrē ap ellōn meh.”

²²Ngam mat an ëāṅvö ngam alaha; lökten yē ngam mat meh nö löök, ngaich keuheūtngöre hanātö ngam alaha meh min;

²³Yē ngam mat meh pöri, nö ötkôlò, ngaich keuheūtngöre sinngūlö ngam alaha meh min.

²⁴Öt tarīkuvö tökô nö nët tak lahök la-en tö yöngṙenre; pò ò lohten min nö hĕng tak sūrīkhö, ngaich hāngenlōn tö ngam tahëng; hēk hĕng kang chūök min anga-aṅ nö haköpngöre, ngaich öt chumkūöṙen tö ngam tahëng. Rö-ö yin kô hĕnghöre lök la-en ngam Tēv, kanôlò ngih panam inrē.

²⁵Lökten Chin ngö ṙô tö yīö, Uh yin piṙūtkö nômöre tö ap nya-aṅ yīö min, hēk tö ap òk yīö min. Ui piṙūtkö ngam alaha inrē, tö ap kinṙum e min. Röh öng ngam nômö nö mööḵlö tö nyā-aṅ kūö? Röh öng ngam alaha nö mööḵlö tö hilā?

²⁶Yĕh meuk minë chehechōn lātulöng, tö u nö öt teūich, öt rēhĕn nö uvòh, ötrēhĕn nö hamūl nö el urôhòre. Ngaich ngam Yöng yīö el halīöngö nö ha-aṅhaṅl u.

²⁷Röh öi yī-ö mööḵlö tö u? Achīö ap öre pumṙūta, tökô nö ṙūötö rô-òtö nômöre?

²⁸Pòyòh öi yī-ö piṙūtkö hilā? Ngëichkö në pūl elkahôyö sitih sanīöpö ön. Öt maharëtnyöelmatre nun; öt rēhĕn nö kumpāt.

²⁹Ngö ṙô Chin tö yīö, tö Sòlòmön nö pòrô nö i nuk kanôlòre, ngaich rö-ö nö ngatī hinlāṙö nö sā u.

³⁰Yē ngam Tēv nö ngatī lanöökö tī tö në chōn ngam elkahôyö, në töng tötaheui, ngaich inmeui tameūyö huṙöich; röh Ang öre nö mööḵlö tī tö hilā yīö, Ō yī-ö tökūöṅnen mikah?

³¹Lökten yin, ui piṙūta öi ngö ṙô, Asuh ap min òk hī? Hēk, Asuh ap min hilā hī?’

³²Höng chahöh vē tahëng mihëṅṙö tarik nun anū-ö. Tö-akahalōn An ngam Yöng yīö el halīöngö, tö u nö töt ṙanāngen nö in yīö.

³³Urĕh pöri yī-ö chöh ngam pūlngö ngam Tēv, ngam lanöökö Ò inrē; ngaich ṙūötu ṙôken min anū-ö nö in yīö.

³⁴Uh yin lökten piṙūtkö öp huṙöich. Pumṙūtkenre an angū-ö huṙöich. Tökô-ònglōn nun në sakāmö, tö ötkanôlòre.