Read Car_Nicobarese T. MËTIV 8 Bible Online

T. MËTIV 8 - Car_Nicobarese bible

T. MËTIV 8

¹Hē Yēsū nö peūtöre, nö ṙā-ang kui rôngö, marôngö yik tarik ngaich nö tömrit Ò.

²Ngaich hĕng tak ök töyeūyu maheuṅk Ò, yamihtöre nö in Ò, afukngöre, nö ngö ṙô, “Mā; yē Meh lōnuvö, ngaich kô-òren Öm löökentī tö chu.”

³Hateuthöiny Anga-aṅ tö këlre, ngaich lūölken ò; nö ngö ṙô, “Hōḵ chin; lööken man yēḵ ngaich.” Ilööṙen nuk yeūnyö ò ngaich, nö lööken.

⁴Ngaich Yēsū nö ngö ṙô tö ò, “Uh tal man ve-eny nang tarik; kuṙòh, kiröönngöre pöri, hameuktöre ip kūönṙô; kētö nup tökētuvö hachöngten Môsös: nö minkahngö nö in cha.

⁵Hē Ò ngaich nö kuhēthötre nö i Kafarnahum, hĕng taka ök yöngṙen kumyung, yamihtöre nö in Ò, nö ve-ekūö Ò, nö ngö ṙô.

⁶“Mā; hulalhaka ap kūön alaha chu, i patī; lum ap, halöinyöre takô.”

⁷Ngaich ngö ṙô Anga-aṅ, Yih Chin min, ngaich halanken ò.”

⁸Ngaich ök yögṙen kunyung nö sapṙô ò, nö ngö ṙô, “Mā; rö-ö chin kô, yihihvö tö Meh, el ap patī chu. Höng ṙô-òvö Man yēḵ tö ṙô; ngaich lööken min ap kūö alaha chu.

⁹Höng tarik chin chūö elkatòh chöngö, aṅhaṅv elkatòh chū-ö inrē tö kumyung. Kô-òren chu-ö ngö ṙô tö ngòh, ‘Kuṙòh; ngaich kiröönngöre anga-aṅ. ‘Ta-ih ngö tö ngam tahëng taka; ngaich yihtöre anga-aṅ. ‘La-evṙen, ngö tö ngam mahalanṙen chu; ngaich la-evṙen anga-aṅ tö e.”

¹⁰Hē Yēsū nö hāṅngö e, uṙeh ngaich Anga-aṅ; ngaich ngö ṙô tö yik tamömritre, “Tökô-ò ṙô Chin tö yīö, Öt kanôtuvökūö Chin tö töngatī mikah; hö-ö, öt i Israël.

¹¹Ngö ṙô Chin tö yīö, Maṙôngö yip min yamih, löktö lā chuhöt, lā sūng inrē; ngaich ūichngöre nö hol Aprahām, Isāk, Yāköp inrē, nö im pūlngö ngam halīöngö;

¹²Ngaich pöri vē kūön ngam pūlngö min nö kavāliyö, el ngam sinngūlö elkahôyö. In e min nöng peuiny, kap kui kanapre inrē.”

¹³Ngaich ngö ṙô Yēsū tök yöngṙen kumyung, “Kuṙòh ngaich man; sā lōn meh ngaich ṙātö ellōnre, ngatī an yēḵ nö ngaich nö in meh.” Ngaich ök kūön alaha ò nö lööken, hē e.

¹⁴Hē Yēsū nö kuhēthötre nö el patī Pītör ngaich meuk ök yöngpīhö ò, nö hulalhaka nö vūöi.

¹⁵Ngaich kēḵ kël ò Anga-aṅ; ngaich ṙāngen ò ök anūöyö. Choholre ngaich anga-aṅ, ngaich meukṙen Ò.

¹⁶Haraptöre ngam harap, ngaich cha-a nö kētö yik tömaṙôngö tö-īnu tö sī-ö, nö in Ò. Ngaich höng ṙô-òvö Anga-aṅ nö ahōngö yik sī-ö; ngaich löökentī tö yik taṙòkhöre tövahavö;

¹⁷Hòn kinheūṅtngen ṙô ngam pròfĕt, Isāya; töngö ṙô, “Kēḵ ötkumlēk hī Anga-aṅ; keun nup invah hī inrē.”

¹⁸Ngaich hē Yēsū nö meuk yik tömaṙôngö nö havīlen Ò, ngaich hōtö chinuhu tahëng lā Anga-aṅ.

¹⁹Ngaich hĕng taka ök kamūich yamihtöre, ngaich ngö ṙô tö Ò, ‘Mahaköphöti; hòṅ in Meh chin, ip töng kū-ö Meh kiröönngöre.’

²⁰Ngaich Yēsū nö ngö ṙô tö ò, “Kilmīṙu nun në am aṅ el-inchōn; chūöku në chehechōn nö haṙòh; rö-ö pöri ngòh Kūön Tarik nö chūöku ṙanôlngö kui.”

²¹Ngaich ngö ṙô tahëng tak mahaköp tö Ò, “Mā, hökngen chu sin urĕh, lāpngö ap yöngre.”

²²Ngö ṙô pöri Yēsū tö ò, “Tömrit Chu man; hökngen yip tökapah nö lāpngö yip kupahre.”

²³Ngaich hē Yēsū nö yôklö nö el kupòk, tömkörit Ò yik mahaköp nö in Ò.

²⁴Ngaich ök yöng chanôchö ngam mai; tööḵlö ngaich ngamkupòk tö mak. Höng haṙòh pöri Anga-aṅ.

²⁵Yihtöre cha-a ngaich nö in Ò, ngaich kilangken Ò, nö ngö ṙô, “Mā; hayööken hī; ötkôlò in.”

²⁶Ngaich ngö ṙô Anga-aṅ tö cha, “Kūöyòh öi pa-ekūö, Ō yī-ö tökūöṅnö mikah?” Choholre Anga-aṅ, ngaich vëkö ngam kuföt, ngam mai inrē; ngaich kalūöng takô.

²⁷Ngaich yik tarik nö pingangkūö; ngaich ngö ṙô. “Tösitih ang ngòh tarik, tö ngam kuföt, ngam mai inrē, nö uroh nö hang chöngö Ò?”

²⁸Ngaich hē ò nö havāngngöre nö im tahëng lā, kaha ngam panam Katarēn; nët tak nak mameukkūö Ò, tö-īnu tö tötlöök sī-ö; kumnyī-inyre, nö ṙā-ang kui kupah; tölngö tötainy; lökngen tarik nö öt lök im talöökö angū-ö.

²⁹Ngaich hūḵ-a cha-a nö ngö ṙô, “Asuh ap lōn Meh in ai? Me-eṅ kūön ngam Tēv, Yih Öm ihih öthakôlò ai, urēhĕkūö ngam ṙētak?”

³⁰Marôvat nuk ha-un töpōyen töha-ôkö.

³¹Ngaich ve-ekūö Ò yik tötlöök sī-ö, nö ngö ṙô, “Tinngen ih i nup ha-un; yē Meh hòṅ ahōngen ih.”

³²Ngaich ngö ṙô Anga-aṅ tö cha, “Kuṙòh.” Ngaich meutnyi cha-a; ngaich meuthöt nö i nuk ha-un; ngaich ṙòkhöre nuk ha-un nö faltöre nö i kui panam, ngaich fuk el mai, ngaich kapah.

³³Falngöre ngaich yik maha-ôkö u; ngaich chuh ik panam; ngaich keuheūtnyöre ṙô nö ve-eny inlahen nak tö-īnu inrē, tö tötlöök sī-ö.

³⁴Ngaich ṙòkhöre yik aṅ ngam panam nö kunyī-inyre,nö höngkūö Yēsū; ngaich ve-ekūö Ò cha-a, nö hōten Ò nö kiröönngöre, nö ṙā-ang kūö ngam panam cha.