Read Car_Nicobarese T. MËTIV 9 Bible Online

T. MËTIV 9 - Car_Nicobarese bible

T. MËTIV 9

¹Yôklö Ang Yēsū nö el kupòk ngaich havāngngöre; yihtöre ngaich nö ik panamre.

²Ngaich hĕng tak ök tövahavö tölum, tökētu töcha nö in Ò, hulalhaka el chamam, ngaich meuk mikah cha Ang Yēsū, ngaich ngö ṙô tök tövahavö tölum, “Kakūönö; um pa-ekūö arēlöngö nup tökööl meh nö ngaich.”

³Rēvre yik kamūich töngö ṙô nö in re, “Ötlēkôre ön ngòh tarik.”

⁴Ngaich Yēsū nö akahalōn tö lōn cha; ngaich ngö ṙô,

⁵Öp yòh öp tölööṙen nö ṙô, ‘Aṙēlöngö nup tökööl meh nö ngaich; ngih ṙöng, ‘Choholre; kirööngöre?

⁶Hòṅ yīö pöri akahalōn tö ngòh kūön Tarik nö mihôiṅ nö aṙē-ĕl tökööl nö i ngih panam; (ngaich ngö rô Anga-aṅ tö ngam tövahavö tölum,) “Choholre, kēḵ ngam chamanre. Kuròh ngaich man, chuh patīre.”

⁷Choholre ngaich anga-aṅ; ngaich chuh patī re.

⁸Ngaich hē më tömaṙôngö nö meūkö e, ngaich pa-ekūö cha-a ngaich ha-öiny ngam Tēv, ngam kamëtö töngatī minhôiṅyö nö i tarik.

⁹Hē Yēsū nö lök in e, nö kiröönngöre, hĕng tak maheuṅk Anga-aṅ tö tarik, amūichhaka nö i chūök inmul ṙāi kinëhöt chehen; Mëtiv minënyö ök. Ngaichngö ṙô Anga-aṅ tö ò, “Tömrit Chu man.” Choholre ngaich anga-aṅ, nö tömrit Ò.

¹⁰Ngaich hē Ò nö ūichhak nö nyā nö el patī, maṙôngö yik mahamūl ṙāi kinëhöt chehen, tö köölö fālen inrē, yamih; ngaich ūichhak nö hol Yēsū, tö yik haköptö Ò inrē.

¹¹Ngaich hē yik Feresī nö meūkö e, ngö ṙô cha-a ngaich, tö yik haköptö Ò, “Kūöyòh Ang ngam mahaköpten yīö nö nyā nö holtö mahamūl ṙāi kinëhöt chehen, tököölö fālen inrē?

¹²Hē Yēsū nö hāngö e, ngö ṙô Anga-aṅ, “Rö-ö yin vē tölööken nö hòṅ lame-evṙen; höng vē tövahavö pöri.

¹³Kuṙòh, kiröönngöre yin, haköp manah ngih, ‘Hōtö neūkölōn Chin; rö-ö tö tökētuvö. Pò Chu ngaich yih, öt mahavëkö tölöök, tököölö fālen pöri nö havöötö ellōnre.”

¹⁴Yihtöre nö in Ò yik haköptö Yôhan; ngaich ngö ṙô, “Kūöyòh öi īhö, tö yip Feresi, ṙöpen ahik; höng öt ahik pöri më haköptö Meh?

¹⁵Ngaich ngö ṙô Yēsū tö cha, “Kô-òren aich vē hol ngam töhapīhö nö haṙivlōn, isaha ò nö in cha? Yih nup min sakāmö, hē ngam töhapīhö nö kē-ĕyö nö ṙā-ang in cha; ngaich möl cha-a min nö ahik.

¹⁶Öt tarīkūvö chamôktö tufömngöre hilā, nö im höteh hilā; pòn ṙūhöinyre ngam tötakaich, tökūö ngam töchōktu.

¹⁷Öt rēhĕn yin nö asëhöt tufömngöre vāin, nö el höteh uk; pòn takaichköny në uk, ngaich aṙösi nup vāin; ngaich ötkôlò në uk. Asëhöt tufömngöre pöri cha-a vāin, nö el tufömngöre uk; ngaich kö kôlòyöre anū-ö.”

¹⁸Ṙònghöichṙô Yēsū tö u nö in cha, hĕng tak ök mā yamihtöre, ngaich ve-ekūö Ò, nö ngö ṙô, “Kapah ap kūön chu kikānö, töngamuh. Yih pöri me-eṅ, tā-a, ṙātö eltīre in ò; ngaich aṅ min anga-aṅ.”

¹⁹Choholre ngaich Yēsū; ngaich tömrit ò, tö yik mahaköp inrē.

²⁰Ngaich hĕng tak ök kikānö, tönët sīön samyeūheu nö kunyahen, yihtöre nö i uk Ò, ngaich lūölkö taseū hilā Ò.

²¹Pòn ngö ṙô anga-aṅ töre, yē chu lūölkö hilā Ò, ngaich lööken min chū-ö.

²²Havöölökūöre pöri Yēsū, ngaich meūkan; ngaich ngö ṙô tö ò, “Kakūönö, um pa-e-kūö; ap mikah meh ap tölöökentī tö meh.” Ngaich lööken ngam kikānö, im hē e takô.

²³Ngaich hē Yēsū nö sölta nö i patī ök mā, ngaich meuk yik famöö, ṙënuṙô inrē yik tömaṙôngö.

²⁴Ngö ṙô Anga-aṅ tö cha, “Kē-ĕngre yin rö-ö an ngam nyīö nö kapah; höng haṙòh pöri.

²⁵Ngaich cha-a nö hayīölngen Ò. Hē më tömaṙôngö pöri nö tīnnyuvö; kuhēthötre ngaich Anga-aṅ, ngaich kēḵ kël ò; choholre ngaich ngam nyīö.

²⁶Ngaich ngam hināngö e nö keuhēutngöre chūök nö im panam.

²⁷Hē Yēsū nö ṙā-ang in e, ngaich nët tak nak tötmeuk tarik tamömkörit Ò; töng hamuḵa, nö ngö ṙô, “Aheukölōn tö ai, Me-eṅ Kūön Tāvit.”

²⁸Chalô Anga-aṅ nö el ök patī, yihtöre ngaich nak tötmeuk tarik nö in Ò; ngaich ngö ṙô Yēsū tö cha, “Ṙātö ellōnre an, tö Chu Öich kô-òren ngati la-en? Ngaich ngö ṙô cha-a tö Ò, “Hôṅ; Mā.”

²⁹Ngaich lūölkö mat cha Anga-aṅ, nö ngö ṙô, “Sā ap mikah nā, ngatī an yēḵ nö ngaich, nö in nā.”

³⁰Löpnyörekūö mat cha-a ngaich. Ngaich sōten cha Yēsū, nö eū-a; nö ngö ṙô, “Uh nan, hĕng tak aheūka elnang tö e.”

³¹Kiröönngöre pöri cha-a, ngaich ahangken Ò nö im panam,

³²Ngaich hē cha nö kunyī-inyre, hĕng tak ngaich ök tarik tötkô nö ṙô-òv, tökētu nö in Ò, tö-īnu tö sī-ö.

³³Ngaich hē ngam sī-ö nö ahōṙi, kô ngaich ngam tarik nö ṙô-òvö. Pingangkūö ngaich yik tömarôngö nö ngö ṙô, “Öt hĕng heuh in meuk töngati, i Israel.”

³⁴Ngö ṙô pöri yik Feresī, “Lökten ip mākūö sī-ö An, nö ahōngö sī-ö.”

³⁵Keuheūt chahuhure ngaich Yēsū, nö i nup elpanam, tuhēt inrē. Haköphöti nö el chuök vine-eṅkūötēv, ahangkö ngam tölöök inhangkö ngam pūlngö; halanken nup töṙōlkangen vah töṙōlkangen ötkumlēḵ alaha inrē,

³⁶Hē Ò pöri nö meuk yik tömaṙôngö, ngaich aṙē-ĕlōn Anga-aṅ tö cha; pò cha nö ötkôlò, parāta inrē, sā pököre töt yōmu.

³⁷Ngaich ngö ṙô Anga-aṅ, tö yik mahaköp, “Pōyen nun në sāiny; öt ṙōl tak pöri vē töla-evṙen.

³⁸Vë-ekūö ngam mākūö në sāiny yin; hòṅ Ò nö tīntö töla-evṙen nö i në sāiny Ò.”