Read Car_Nicobarese T. MĀKÖS 10 Bible Online

T. MĀKÖS 10 - Car_Nicobarese bible

T. MĀKÖS 10

¹Choholre ngaich Anga-aṅ nö ṙā-ang in e; ngaich yihtöre nö i kūöngö Yūta, lāmuh tö Yôtön inrē. Ngaich maṙôngö yik yamihtöre nö in Ò nö hēk; ngaich sāre Anga-aṅ, nö haköpten cha nö hēk.

²Ngaich yihtöre nö in Ò yik Feresī, ngaich ngö ṙô nö hatönan, nö kalahan, Kô-òren ang ngò tarik nö ṙāngö pihöre?

³Ngaich ngö ṙô Anga-aṅ, nö sap ṙô cha, Sitih chöngö ök Môsös tö yīö?

⁴Ngaich ngö ṙô cha-a, Hōtö kinūichngö ṙinā-ang ök Môsös, ngaich möl nö ṙā-ayö ngam kikānö.

⁵Ngö ṙô pöri Yēsū tö cha, Kūö nganëḵeṅ ellōn yīö ök nö kūichtö ngih chöngö nö in yīö.

⁶I ranehlö në tövīlöngö pöri, ngam Tēv nö vīlen cha nö kikōnyö, kikānö inrē.

⁷Angū-ö an min, lökten ngòh tarik nö ṙāngö yöngre; ngaich haköpngöre nö im pihöre;

⁸Ngaich nëtre taka cha-a nö tö hēngö alaha. Ngaich rö-övö nö tö nët cha-a, töng hĕng pöri.

⁹Lökten un harēviṙen tö tarik, vē hamūl ngam Tēv.

¹⁰Ngaich el patī, yik mahaköp nö hatönan tö e nö hēk.

¹¹Ngaich ngö ṙô Anga-aṅ tö cha, Ngòh tarik ṙāmāngö pihöre min, ngaich pihötö tahëng, ngaich ma-asĕhkö ngam pihöre anga-aṅ.

¹²Ngaich yē ngam kikānö nö anga-aṅ ṙamā-ang pihöre, ngaich pihötö tahëng, ngaich ma-asēha anga-aṅ.

¹³Kētö yik nyīö cha-a nö in Kristū, pòn hōtu Anga-aṅ nö ṙātö eltīre nö i kui cha; ngaich yik haköptö Ò nö vëkö yik kamëten cha.

¹⁴Ngaich pöri Yēsū nö pōyen kumnyahlōn, hē Ò nö meūkö e; ngö ṙô An tö cha Hökngen më kun nyīö nö yihtöre nö in Chu; uh yin nö vëka; tön töngatī aṅkūö an ngam pūlngö ngam Tēv.

¹⁵Tökô-ò ṙô Chin tö yīö, yē ngòh tarik tötkamëḵ ngam pūlngö ngam Tēv min, nö sā ngòh kun nyīö, öt kô anga-aṅ nö kuhēthötre nö in e.

¹⁶Kētam Anga-aṅ tö cha nö eltīre, ṙā-ati tö eltīre nö i kui cha, ngaich hakôlò cha.

¹⁷Ngaich hē Ò nö iṙuhöröön nö kiröönngöre, ngaich hĕng tak ök umuh famaltöre nö in Ò; ngaich simngöre nö ve-ekūö Ò, nö ngö ṙô, Tölöök Mahaköphöti; asuh ap min la-en chu, hòṅ chu amīnuvö tö ngam nômö tö örheūheu-aṅ?

¹⁸Ngaich ngö ṙô Yēsū tö ò, Kūöyòh Öich tölöök, tö ṙô meh? Öt hĕng tak tölöök, höng humeng, ngam Tēv.

¹⁹Akahalōn man tö nup chöngö, Um fël tarik, Um asĕhha, Um ulāiyö, Um sūöicha, Um hachīl, Milēṙen man tö mināṅ yöngre.

²⁰Ngaich ngö ṙô anga-aṅ tö Ò, Mahaköphöti; ṙòkhöre haköp chin ngaich tö u, hētentö chu nyīö.

²¹Ngaich Yēsū nö hatīönken ò, nö hāngenlōn tö ò; ngaich ngö ṙô tö ò, Hĕng öp hanāten meh. Kuṙòh; inyihngö nup inre man, ngaich kē-ĕkūö yāich; ngaich me-eṅ minö el halīöngö chehen. Ngaich ta-a; kēḵ ngam töhakālöre tömrit Chu.

²²Panyimkötikūö ngaich anga-aṅ; kiröönngöre ngaich, nöng haṙīvölōn; pò ò nö töpōyen inlānen.

²³Ngaich Yēsū nö havīngömatre, ngaich ngö ṙô tö yik haköptöre, Iṙën kanihngen aich vē tökôlò nö kuhēthötre nö im pūlngö ngam Tēv!

²⁴Ngaich yik mahaköp nö pingangkūö tö ṙô Ò. Hēk pöri Yēsū nö ngö ṙô tö cha, Yī-ö nyīö; iṙen kanihngen aich cha-a vē mahayönglenre nö i kanôlòre nö kuhēthötre nö im pūlngö ngam Tēv!

²⁵Lööṙen ön ngòh ūṅt nö meuthöt nö i rit charum, tö kunhēthöt ngòh tökôlò tarik nö im pūlngö ngam Tēv.

²⁶Ngaich pōyen pinngangkūö cha-a; ngaich ngö ṙô tö Ò, Achīö öp pökeh tökô nö hayöökaṙen?

²⁷Ngaich ngëichken cha Yēsū, nö ngö ṙô Tötkanô-òṅ an angu-ö nö i tarik, rö-ö pöri nö im Tēv; pò në taṙòkhöre nöng tökô nö im Tēv.

²⁸Kaknyöre ngaich Pītör nö ngö ṙô tö Ò, Yĕh meuk; keuheūtngöre ṙahāngö in īhö ngaich; ngaich öi tömrit Meh.

²⁹Ngaich ngö ṙô Ang Yēsū, Tökô-ò ṙô Chin tö yīö. Öt tarīkuvö öp ṙamā-ang patīre, mëmre, kahëmre, kanānöre, yöngre,pihöre, kūönre, panamre, töpòkūö Chu, pòkūö ngam tölöök inhānga inrē;

³⁰Öp töhēngòng taneūngen min i ngih tūmö, tö patīre, kahëmre, kanānöre, yöngre kūönre, panamre, nö holtö ötinkôlò; ngaich im töyihihvö panam, nö nômuvö tö-örheūheu-aṅ.

³¹Maṙôngö pöri min yip aṅ i yip mu-urĕh, nö unôich; ngatī yip mu-urĕh, nö unôich; ngatī yip aṅ i yip mu-unôich, nö urĕh.

³²Ngaich el talöökö cha-a nö chuh Yerūsalem; ngaich urēhĕkūö cha Ang Yēsū. Ngaich cha-a nöng pingangkūö; pa-ekūö inrē yik mu-unôichrit Ò. Ngaich hēk Anga-aṅ nö ngôṅtö yik tö nët sīön tak; kaknyöre ngaich nö ve-eny nang cha, tö nup lāinyngen Ò min;

³³Nö ngö ṙô, Yĕh meuk; chuh Yerūsalem in; ngaich min ngòh Kūön Tarik nö kēḵtu nö i yip mākūö kūönṙô, yip kamūich inrē. Ngaich cha-a min nö hōten Ò nö kumpaha; ngaich kēten Ò nö i yip tahëng mihëṅṙö.

³⁴Ngaich cha-a min nö hayëḵ an; kösngö elmat Ò, fohan, fëlngen Ò min inrē. Ngaich unôichrit tölūöi sumkam min Anga-aṅ nö choholre nö hēk.

³⁵Ngaich haröhtöre nö in Ò, nāṅ Yāköp, nāṅ Yôhan, nak kūön Sepetī; ngaich ngö ṙô tö Ò, Mahaköphöti; hōten Meh an, Öm kēkö kaha öp töng ṙô ai ve-ekūö Meh.

³⁶Ngaich anga-aṅ nö ngöṙô tö cha, Asuh ap lōn nāṅ kahëkö kaha chu?

³⁷Ngaich ngö ṙô cha-a tö Ò, Kē-ĕti Man hòṅ ai ūichhaka im kanôlò Meh, hĕng tak lahāmö Meh, hĕng tak latavē inrē.

³⁸Ngö ṙô pöri Yēsū tö cha, Öt akah ap havëköre nan. Kô-òren ṙöng an òkkūö öp kulah ahòkkūö Chu min? hēk vōkö tö ngam vinôkö vahōk Chu min?

³⁹Ngaich ngö ṙô cha-a tö Ò. Kô-òren an. Ngaich Yēsū nö ngö ṙô tö cha, Òkkūö öp kulah nan min, ahòkkūö Chu; vōkö inrē tö ngam vinôkö, vahōk Chu min.

⁴⁰Ngam inūichhak pöri lahāmö, latavē Chu inrē, rö-ö an nö kahëtö Chu. Tön kētu an min nö i yip tö höngkaṙen tö e.

⁴¹Ngaich hē yik tö söm tak nö hāngö e, ngaich urĕh sin cha-a nö kunyahanlōn nö in nāṅ Yāköp, nāṅ Yôhan.

⁴²Ngaich havëten cha Yēsū nö in re; ngaich ngö ṙô tö cha. Akahalōn yin tö yip yöngṙen yip tahëng mihëṅṙö, nö hamā-alre cha-a nö in cha; ngaich yip tömööḵlö tö cha, nö hakeū chöngöre nö in cha.

⁴³Rö-ö pöri angū-ö nö ngatī nö in yīö. Ngòh töhòṅ pōyö pöri min nö in yīö, mameukṙen yīö min anga-aṅ.

⁴⁴Ngòh tö hòṅ urĕh nö in yīö, kamūönkūö yīö, min anga-aṅ ṙòkhöre.

⁴⁵Pò ngòh Kūön Tarik nö öt tömeūken nö yih, mameukṙen pöri; kētö nômöre inrē nö ṙāi tömaṙôngö.

⁴⁶Chalô cha-a ngaich nö i Yerikō, Ngaich hē Ò nö kunyī-inyre nö ṙā-ang Yerikō, holtö yik haköptöre, tö yik tömaṙôngö inrē; ūichhak nö i taseū talöökö, nöng have-a, ök kūön Timaiös, ang Partimaiös, ök tötmeuk.

⁴⁷Ngaich hē ò nö hāngan nö Yēsū aṅ Nāsaret; kaknyöre ngaich anga-aṅ nö huḵa nö ngö ṙô, Yēsū, Me-eṅ Kūön Tāvit, aheukölōn tö chu.

⁴⁸Ngaich maṙôngö yik vamëken ò, nö hōten ò nö ṙāngôre. Vaichtö ṙūönyôre pöri anga-aṅ nö hūḵa, nö ngö ṙô, Me-eṅ Kūön Tāvit, Aheūkölōn tö chu.

⁴⁹Sökngöre ngaich Yēsū; ngaich ngö ṙô, Havëten ò yin. Ngaich cha-a nö havëtö ök tötmeuk tarik, ngö ṙô tö ò, Um pa-ekūö; choholre; havëten meh An.

⁵⁰Ngaich anga-aṅ nö ṙāngö ök kinṙumre, choholre ngaich; ngaich yihtöre nö in Yēsū.

⁵¹Ngaich Yēsū nö ngö ṙô tö ò, Asuh ap lōn meh, la-en Chu in meh? Ngaich ngö ṙô ök tötmeuk tarik tö Ò, Rappōni; hòṅ meuk chin.

⁵²Ngaich ngö ṙô Yēsū tö ò Kuṙòh, ngaich man kiröönngöre. Ngam mikah meh an, tölöökentī tö meh. Ilööṙen ngaich anga-aṅ nö meuk, ngaich tömrit Ò nö el talöökö.