Read Car_Nicobarese T. MĀKÖS 12 Bible Online

T. MĀKÖS 12 - Car_Nicobarese bible

T. MĀKÖS 12

¹Kaknyöre ngaich Anga-aṅ nö ve-ekūö cha nö inchōḵovṙô. Hĕng taka ök tarik vamī panô-òṅ angkūr; havīlö e ngaich, nö kalonglö e; ngaich ul chūök kinrān nup angkūr; ngaich vīlö ihong patī; ngaich haṙāyö tö yik yōm panô-òṅ. Kiröönngöre ngaich anga-aṅ i tahëng pumnāmö.

²Ngaich ip ṙētak nö hĕng tak tahīnngö anga-aṅ, tö kamūönkūöre, nö i yik yōm panô-òṅ; pòn hōtu anga-aṅ nö kēḵ nup kintölö ṙòng angkūr, nö i yik yōm panô-òṅ.

³Kēḵ an ngaich cha-a; fohan ngaich; tīnngen ò ngaich nöng öt kūmuṙen.

⁴Ngaich hēk anga-aṅ nö tīnngö tahëng kamūönkūöre nö in cha. Ngaich nyahaṅ elkui anga-aṅ tö tī cha ngaich kēka alaha inrē nö sumrōngngikūö.

⁵Tīnngö tahëng anga-aṅ hēk; ngaich fëlö anga-aṅ tö cha. Maṙôngö yik tahëng; rēvre tö foho, rēvre tö fëlö inrē.

⁶Ṙòngmö hĕngtit tak ök hanāngenlōn kūön ò; anga-aṅ manā-aṅ tahīntö ò nö in cha; nö ngö ṙô, Milēḵṙen yip min tö ngòh kūön chu.

⁷Ngaich pöri yik yōm panô-òṅ nö ngö ṙô töre, Ngòāng yih tö-amīnuvö; ta-a, töi fëlngen ò, hòṅ ngam amin nö ayī-ö min.

⁸Ngaich kēḵ an cha-a, ngaich fëlan; kavalnyen ò ngaich lā-uk kinlōngö.

⁹Sitih tī ap min töpanô-òṅvö? Yih ap min nö fëlngö yip yōm panô-òṅ; ngaich kēḵngö ngam panô-òṅ i yip tahëng.

¹⁰Öt ve-ekūö ngam töhet līpöre öi yī-ö, tö ngö, Ngam ihong tösōḵov tö yip mamānö, ngaich anga-aṅ nö yöngkūö sinkeukngö.

¹¹Ṙamā-ang i ngam Tēv an, pinngangkūö në mat hī?

¹²Ngaich cha-a nö lukkenre nö hòṅ kēḵ An; ngaich pa-ekūö tö yik tömaṙôngö; pò cha nö akahalōn tö Ò nö ṙôten cha tö ngam inchōḵoṙô. Ṙāngen Ò cha-a ngaich, ngaich kiröönngöre.

¹³Ngaich cha-a nö tīntö aṅ i yik Feresī, yik aṅ in Hērôt inrē; pò cha nö hòṅ kēḵ An i nup ṙô Ò.

¹⁴Ngaich hē cha nö yihtöre nö in Ò, ngö ṙô cha-a ngaich tö Ò, Mahaköphöti; akahalōn in tö Meh tökô-en. Rö-ö Man tö hĕng tak ngahëchkökūö; pò Meh öt atöltuṙen tö tarik. Im kanô-en pöri Öm haköptö talöökö ngam Tēv. Töhuveū-en öng ngam kine-eṅkūö Kaisöör tö ṙāi chūökö? Rö-ö ṙöng? Kē-ĕti öi yih? Uh ṙöng?

¹⁵Akahalōn pöri Anga-aṅ tö ngam innyatkö elmat in cha; ngaich ngö ṙô tö cha, Kūöyòh öi kalaha Chu? Hĕng hata tāk yin, kētö rupīö; hòṅ Chu meūkö e.

¹⁶Ngaich kētö e cha-a. Ngaich ngö ṙô Anga-aṅ tö cha, Insā-a chīö öng ngih? Ngam kinūchö inrē? Ngaich ngö ṙô cha-a tö Ò, Insā-a Kaisöör.

¹⁷Ngaich ngö ṙô Yēsū tö cha, Kē-ĕkūö Kaisöör tö nup aṅ in Kaisöör. Kē-ĕkūö ngm Tēv inrē tö nup aṅ im Tēv. Ngaich uṙeh takô cha-a tö Ò.

¹⁸Ngaich yihtöre yik Satukī nö in Ò, yik törö-öv ṙô tö invanlö tökapah. Ngaich hatönan cha-a, nö ngö ṙô,

¹⁹Mahaköphöti ngötī ök Môsös nö kūich, Yĕn hĕngtak ngòh tökapaha mëm, nö ṙòngmö aṅhaṅ pīhö, ngaich nöng öt kūönuvö; ngaich ngam kahëm ò nö kēḵ an nö pīhöre, ngaich hakūöntö kūön ngam mëmre.

²⁰Sat tak yik umuh, mëmre kahëmre. Kēḵ pīhöre ngaich ngam maṙöinylö; ngaich kapah, nöng öt kūönu.

²¹Hēk ngam innëtö nö kē an; ngaich kapah, nöng öt ṙahāngu tö kūönre. Ngatī ngam linūöyö.

²²Satre taka cha-a nö pihövö tö ò; ngaich nöng öt kūönu. Unôichngöre ngaich ngam kikānö nö kapah.

²³Ip invanlö tökapah min, pīhö chīö ang min tö cha? Tön satre taka cha-a nö pīhövö tö ò.

²⁴Ngaich Yēsū nö ngö ṙô tö cha. Röh öng nö angū-ö, lökngen yīö vaich, pò yīö öt akahalōn tö ṙô ngam töhet līpöre, minhôiṅyö ngam Tēv inrē?

²⁵Yē cha min nö choholre nö hēk, nö ṙā-ang yip tökapah, öt pinīhuvö cha-a, öt rēhĕn nö kē-ĕyö nö im inpīhöre; höng sā ma-ahānga pöri nö el halīöngö.

²⁶I inlahen vē tö kapah, tö cha min nö hachohlöngö; öt ve-ekūö öp līpöre Môsös öi, ip el Töyul, tö ṙô ngam Tēv nö ve-ekūö ò, nö ngö ṙô, Chu-ö Chin Tēv Aprahām, Tēv Isak, Tēv Yāköp inrē?

²⁷Rö-ö An nö Tēv vē tö kapah, Tēv vē tö aṅ pöri. Pōihangen yin vaich.

²⁸Ngaich hĕng tak ök aṅ i yik kamūich yamihtöre, ngaich hang ṙô cha nö ve-ekūöre. Ngaich akahalōn inrē tö Ò nö huveū-eu ṙô nö sapṙô cha; hatönan ngaich anga-aṅ, nö ngö ṙô, Öpyòh öp raneh i në chöngö nö ṙòkhöre?

²⁹Ngaich Yēsū nö ngö ṙô, Ngih ön yih raneh i në chöngö nö ṙòkhöre, Ō Israĕl, hangihtöre; ngam Mā An, Tēv hī, höng hĕng tak An ngam Mā.

³⁰Hāngenlōn man tö ngam Mā Tēvre, holtö nômöre, holtö kuilōnre, i tölngöre. Angū-ö an raneh chöngö.

³¹Höng sā, e ngam innëtö, Hāngenlōn man tö holre, sāre töre. Öt tahëngu chöngö, tömööḵlö tö në.

³²Ngaich ngö ṙô ök kamūich tö Ò, Mahaköphöti; huveū-eu ṙô takô Man; tö ngam Tēv nöng hĕng; öt tahënguvö höng Anga-aṅ,

³³Ngaich ngam hanāngen tö Ò, holtö ellōnre, holtö mikah, i tölngöre; ngam hanāngenlōn inrē tö holre, sāre töre; nö mööḵlö tö nup tökeuheūttöre töföngö tökētuvö.

³⁴Ngaich Yēsū nö meuk huneū-euṅ ṙô ò, ngaich ngö ṙô tö ò, Rö-ö man marôvat tö ngam pūlngö ngam Tēv. Hēngen tö e, nö öt tarīku tö hòṅ hēk mahatönan.

³⁵Ngaich ngö ṙô Ang Yēsū, hē Ò nö haköphöti nö el ök töhet chūök, Sitih Ang Kristū nö Kūön Tāvit, tö ṙô yip kamūich?

³⁶Tö Tavit nö ngö ṙô, nö lökten im Töhet Fanöinylö, Ngö ṙô An ngam Mā, tö ngam Mā chu, Ūichngöre Man lahāmö Chu, hanöng saha tī Chu vītö yip tökunyahaṅ elmat tö Meh nö ranöönö röön Meh.

³⁷Yē Tāvit nö Mā ngö, nö havëken Ò, aṅyih Ang nö Kūön ò? Ngaich yik tömaṙôngö nö ṙāmölōn nö hang ṙô Ò.

³⁸Ngaich ngö ṙô Anga-aṅ, nö ik inköphöti, Haṙēmngenre yin tö yip kamūich, yip tö hòṅ aṙū-uti hilā, tö hòṅ salāmö inrē nö chūök mi-inyih.

³⁹Tö hòṅ lākūö anūichö nö el chūök vinë-eṅkūötēv, i nāhaṅl inrē.

⁴⁰Cha-a yin ngameūkngö inlānen tafīösi; ngaich hanyatkö elmat nö marôta ṙô nö ve-ekūötēv. Cha-a yip min töpōyen ötinkôlò.

⁴¹Ūichngöre ngaich Anga-aṅ nö ranghö ök chūök rupīö tökētu; ngaich meuk tī yik tömaṙôngö nö chaphöt rupīö, nö el chūök tökētuvö. Maṙôngö yik tökôlò inrē töpōyen chahaphöt.

⁴²Ngaich hĕng tak ök yāich tafīösi tö nët tāk chaphaphöt tö kun pësa, nö tö hĕng tāk tökiröng pësa.

⁴³Ngaich havëtö yik haköptöre Anga-aṅ nö in Ò; ngaich ngö ṙô tö cha, Pōyen chahaphöt ön ngòh yāich tafīösi, tö cha nö ṙòkhöre më chamaphöt el ngam chūök tökētuvö.

⁴⁴Pò cha cha-a nö ṙòkhöre nö chaplö aṅ i nup töpōyen in re; ngaich pöri ngòh kikānö nöng keuheūthötre tī tö nuk mi-in re, nuk töng nômö ò.