Read Car_Nicobarese T. MĀKÖS 13 Bible Online

T. MĀKÖS 13 - Car_Nicobarese bible

T. MĀKÖS 13

¹Ngaich hē Yēsū nö kunyi-inyre, nö ṙā-ang el ök töhet chūök; ngaich hĕng tak ök haköptö Ò, tö ngö ṙô tö Ò, Mahaköphöti; yĕh meuk tö Sitih ön në ihong, Sitih vinīlö öng inrē!

²Ngaich Yēsū nö ngö ṙô tö ò, Meuk në öm yöng tövīlöngö? Öt hĕng tit min ihong ihih töṙā-ayö nö hachaphen höö, öp töt tiṙöli min.

³Ngaich hē Ò nö ūichhaka nö i kui Rôngö Òliv, nö kū-ötö ök töhet chūök; ngaich hatönan hēḵ Pītör Yāköp, Yôhan, Antaru inrē, nö ulāikenre,

⁴Ve-eny nang ih Man, ĕhē ön min anū-ö? Asuh ap min minkahngö hē u nö sölta?

⁵Kaknyöre ngaich Yēsū, nö ngö ṙô tö cha, Haṙēmngenre yin, hòṅ yīö öt halō-oikūö tö tarik.

⁶Maṙôngö yip yamih min nö i Mine-eny Chu, nö ngö ṙô, Chu-ö Chin Kristū; ngaich maṙôngö halō-ongkūö min.

⁷Yē yīö mīnö hang kinyūngö ineūkö kinyūngö inrē; ui pa-ekūö; tö hòṅ ngatī nun anū-ö öl pöri öp manāngen.

⁸Pò vē tarik min nö choholre nö lā-al höö, pūlngö inrē nö lā-al höö; ṙōlkang chūök min kumyeūnö; inyāichö min inrē. Anū-ö nun ranehtö chanökö kinyôḵò.

⁹Hīnöre pöri yī-ö. Tön kēten yīö yip min, nö i kinṙôka; fōho yin min inrē, el chūök vine-eṅkūötēv, i kūö kamhôṅka yin min, rācha inrē, öi sökhaka, tö pòkūö Chu; nö inmeukhömat cha.

¹⁰Hòṅ urĕh pöri sin, ngam tölöök inhānga nö ahangka, nö i vē taṙòkhöre tarik.

¹¹Yē cha nö hachōten yīö im kinṙôka, nö kēḵngen yīö inrē, ui urĕh piṙūtköṙôre min; yē öp töng kinëḵeṅkūö yīö pöri hē e, angū-ö ngaich ṙô yīö; tön rö-ö yin yīö tö ṙô-òv, tön ngam Töhet Fanöinylö.

¹²Kēḵngen höö mīnö tö mëmre, nö im kinpaha kēḵngö kūönre inrē ngam yöng; choholre inrē nyīö min nö lā-al yöngre, ngaich hōten cha nö kumpaha.

¹³Surīkhu yin min tö taṙòkhöre tarik, töpòkūö ngam Mine-eny Chu. Ngòh pamītnyöre nö söl ip manā-aṅ, anga-aṅ min töhayöökaṙen.

¹⁴Yē yīö pöri min meuk ngam inyëḵngen ötinkôlò, ṙô ök pròfĕt Tanīĕl, sökhaka i chūökre nö rö-ö, (akaha elnang an yēḵ ngam vame-eṅkūö;) hökngen cha yip mi-i Yūtā nö meutngö nö i kui rôngö;

¹⁵Hökngen ngòh mi-ikui patī un yônti nö kuhēthötre nö kēḵ chehenre nö el ngam patīre;

¹⁶Un havantöre ngam me-el panô-òṅ nö kē-ĕrö tökiröng inyutre.

¹⁷Ötkô takô yip puyōsö, yip mahapōḵ kūönre, hē u anū-ö sakāmö.

¹⁸Ve-ekūötēv pöichö, hòṅ e nö öt hē el kumṙah.

¹⁹Pò u min anū-ö sakāmö nö yöng kanihngen, öt töngatī-ivö hē ranehlö tī ngam Tēv nö vī-il taṙòkhöre, söl ing töngamuh; öt hēk nö môkö.

²⁰Yē ngam Mā Tēv öre nö öt hacheūḵngö minë sakāmö, öt hĕng tak öre töhayöökaṙen. Tön pòkūö yip katöllö Ò, Anga-aṅ nö hacheūḵngö në sakāmö.

²¹Ngaich yĕn tarīku min tö ngö ṙô tö yīö, Yĕh meuk, ihī-a ap yih Kristū, hēk Umū-aṅ, ui ṙātö ellōnre;

²²Tön töminyôinyaṅ yip min Kristū, töminyôinyaṅ pròfĕt inrē; hameuktö minkahngö yip min, pinngangkūö inrē; pò cha nö hòṅ halō-ongkūö yip tökatöllöng; yĕn kô.

²³Hīnöre yin; yĕh meuk, ngaich Chin mu-urĕhnyôre tö yīö.

²⁴Ip hē u pöri anū-ö sakāmö, unôichrit öp kanihngen; sangulkötimat min ngam tavūöi; öt yāngömat min ngam chingëṅt;

²⁵Suktöre min në taneūsömat, nö ṙā-ang el halīöngö; ṙòkhöre min nup kanôlò el halīöngö nö kayīna.

²⁶Ngaich möl cha-a min nö meuk ngòh Kūön Tarik nö löktö el taṙul nö yih, nö holtö minhôiṅyö, kanôlò inrē.

²⁷Ngaich Anga-aṅ min nö tīnngö yip ma-ahānga; ngaich hamūl yip tökatöllöng nö ṙā-ang i në tö fën lā kuföt, ṙā-ang i manā-angkūö ngih panam, söl i manā-angkūö ngam halīöngö.

²⁸Haköp ngam inchōḵoṙô yin i ngam anychīr chōn. Yē ngam pak ò nö ayalnyöre, ngaich sīöpnyöre rōi inrē; akahalōn yī-ö ngaich, töm sikehngö nö röhta.

²⁹Ngatī yī-ö yēḵ akahalōn, yē yīö meuk yanihih në, tö u ngaich nö röhta, nöng i kūö inkūp,

³⁰Tökô-ò ṙô Chin tö yīö, Öl min ngih tūmö nö ngaichngen hanöng saha sanölta u nö ṙòkhöre.

³¹Chuhngöre an min ngam halīöngö, ngam tumlat inrē; öt chanūhuvṙen pöri min në ṙô Chu.

³²Öt hĕng tak pöri tö-akalōn tö e angū-ö sakāmö, ṙētak inrē; öt akahalōn yip ma-ahānga el halīöngö, öt rēhĕn ngòh Kūön, höng ngam Yöng,

³³Hīnöre yī-ö; aṅhaṅtī, ve-ekūötēv inrē; tön öt akahalōn yin tö hē öp ṙētak.

³⁴Sā öp tarik an chamuh tahëng panam, öp ṙamā-ang patīre, ngaich halēnngen yip kūönkūöre, nö kö i la-enre; tölṙô öp yōm inkūp inrē nö aṅhaṅti.

³⁵Aṅhaṅti lökten; tön öt akahalōn yin tö hē yanihih ngam mā tö patī-ivö, yĕn chūöl hatööm yĕn ṙô hayöm yĕn peuheū;

³⁶Hòṅ ò nö öt kôtökūö tö yīö haṙòh, yē ò nö yih nönglūk.

³⁷Ngam ṙô Chu tö yīö, ṙô Chu an tö taṙòkhöre, Aṅhaṅti.