Read Car_Nicobarese T. MĀKÖS 16 Bible Online

T. MĀKÖS 16 - Car_Nicobarese bible

T. MĀKÖS 16

¹Keuheūthë ngam töhet sakāmö, ngaich hēḵ Mariā aṅ Mektelā, Mariā yöng Yāköp, Salōmī inrē, nö havah tötahūsa; pòn hòṅ yihtöre cha-a nö hacham alaha Ò.

²Ka-euilökūö ngaich im raneh sakāmö minë tö sat sumkam, ngaich cha-a nö ik anūlö, hē ngam tavūöi nö meutlö.

³Ngö ṙô cha-a tö höö, Achīö öp min pumlönngö ap ihong nö i kūö ap anūlö?

⁴Môklökūöre cha-a, ngaich meuk ök ihong nö ngaich nö pilëôngi; tökiröng ök nö ihong.

⁵Kuhēthötre cha-a ngaich nö ël ök anūlö; ngaich hĕng tak ök ṙāl tarik tö-isōho inyut maheuṅk cha, ūichhaka nö lahāmö. Ngaich rötlö cha-a.

⁶Ngaich ngö ṙô anga-aṅ tö cha, Ui pa-ekūö; chamöhö Yēsū yin, öp aṅ Nāsaret, ök töharātu. Choholre ök nö ngaich; öt ihih öku. Yĕh ngëichkö ngam chūök tī cha tö Ò.

⁷Kuṙòh; ve-eny nang yip haköptö Ò, Pītör inrē; urēhĕkūö yīö Ök nö ngaich nö chuh Keleli; in e yin min meukkūö Ò; sā ṙô Ò tö yīö.

⁸Kunyī-inyre cha-a ngaich; ngaich falngöre nö ṙāngö ök anūlö, Ötṙô-òv cha-a nö i inrē; pò cha nöng kichëyöre, pingangkūö inrē; nö pa-ekūö.

⁹Hē Ò ngaich nö choholre, nö ka-euilökūö im raneh sakāmö minë tö sat sumkam; urĕh Anga-aṅ nö meūkö tö Mariā aṅ Mektelā, ök tö ahōṙi aṅin tö yik tö sat tak sī-ö.

¹⁰Kiröönngöre anga-aṅ ngaich, nö ve-eny nang yik mi-in Ò, i saha cha nöng haṙīvölōn, peuiny inrē.

¹¹Ngaich hē cha nö hāngan nö aṅ, tö Ò inrē nö meūkö tö ò, öt ṙātö ellōnre cha-a.

¹²Unôichrit u Anga-aṅ nö tahëngö inlahen nö hameuktöre, nö i nak tö nët tak aṅin cha, hē cha nö kiröönngöre nö chaṙūöi.

¹³Ngaich kiröönngöre cha-a nö ve-eny nang yik holre, öt rēhĕn cha-a nö ṙātö ellōnre tö ṙô cha.

¹⁴Unôichngöre Anga-aṅ nö meūkö tö yik tö kahuksīön taka, hē cha nö ūichhak nö nyā; ngaich Anga-aṅ nö vëkö ötmikah cha, nganëḵeṅ ellōn cha inrē; pò cha nö öt ṙātö ellōnre tö ṙô yik mameūkan, unôichrit chanôhòl Ò.

¹⁵Ngö ṙô Anga-aṅ tö cha; Kuṙòh; chuh i në taṙòkhöre yin panam, mumkahten taṙòkhöre tarik tö ngih tölöök inhānga.

¹⁶Ngòh ṙāmātö ellōnre ngaich vōkö, ngaich hayöökaṙen anga-aṅ min. Ngòh töt ṙāmātö ellōnre, ngaich öthakôlòngṙô min.

¹⁷Në nun min minkahngö mi-in cha yip ṙamātö ellōnre, ahōngö sī-ö yip min i Mine-eny Chu; huveū-eu ṙô yip min tö tufömngöre ṙô;

¹⁸Kēḵ pēch yip min, ane inrē yē cha nö òk tökapahukūö ngaich öt chökhukūö angū-ö tö cha, ṙātö eltīre min cha-a nö i tövahavö, ngaich lööken cha-a.

¹⁹Ngaich ngam Mā Yēsū nö kēḵlöngö nö el halīöngö, tö kinheūṅtö ṙô Ò tö cha; ngaich ūichngöre nö lahāmö ngam Tēv.

²⁰Kiröönngöre cha-a, ngaich keuheūt chūökre, nö mumkahten; la-evṙen ngam Mā nö in cha, ane inrē hangëkö ngam ṙô, lökten i nup minkahngö mi-in e.