Read Car_Nicobarese T. MĀKÖS 2 Bible Online

T. MĀKÖS 2 - Car_Nicobarese bible

T. MĀKÖS 2

¹Ngaich hē Ò nö hēk nö kuhēthötre nö i Kafarnahum, harohtum hang sumkam nö unôich; ngaich hāngö Anga-aṅ nö el patī.

²Ngaich maṙôngö yik mahamūlöre; lökten cha nö öt ōtre chūök, öt rēhĕn nöng i kūö inkūp öre. Ngaich mumkahten cha Anga-aṅ.

³Hĕn taka ök tarik tölum tökētu nö in Ò, fën tak kameun.

⁴Ngaich hē cha nö öt kô nö ṙūötöre nö in Ò, kūö yik tömaṙôngö; ngaich ṙôngtökui ök chūök Ò cha-a. Ngaich hē cha nö mëngö tī tö e, hôtö ök chamam cha-a ngaich; chūök ök tölum nö hulalhaka.

⁵Höng meuktöre Yēsū tö mikah cha, ngaich ngö ṙô tök tölum, Kakūönö; aṙēlöng nup tökööl meh nö ngaich.

⁶Harohtum tak pöri yik kamūich amūichhaka, ngaich nöng ellōnhanga.

⁷Nö ngö, Kūöyòh Ang ngòh tarik nö ngatī ṙô? Ötlēkôre An. Achīö öp tökô nö aṙē-ĕl tökööl, höng humĕng tak, ngam Tēv?

⁸Iṙūö akahalōn Yēsū tö cha nöng ellōnhanga nö inre; ngaich ngö ṙô tö cha, Kūöyòh öi höng ellōnhanga tö u?

⁹Ngam yòh öng tölööṙen ṙô i ngam tölum, Aṙēlöng nup tökööl meh nö ngaich? Ane ṙöng, Choholre; kēḵ ngam chamanre, kiröönngöre?

¹⁰Hòṅ yīö pöri akahalōn tö ngòh Kūön Tarik nö minhôiṅyuvö nö aṙē-ĕl tökööl, nö ing panam,

¹¹Ngö ṙô Anga-aṅ tök tölum, Choholre; kēḵ ngam chamamre; kuṙòh ngaich, chuh patīre; ngö ṙô Chin tö meh.

¹²Choholre ngaich anga-aṅ; ngaich iṙūö kēḵ ök chamamre, ngaich kiröönngöre nö i kūö cha nö ṙòkhöre. Ngaich ṙòkhöre cha-a nö pingangkūö; ngaich ha-öiny ngam Tēv nö ngö ṙô, Öt hĕng heuh in meuk töngatī.

¹³Hēk Ang Yēsū nö chuh kūö mai, ngaich ṙòkhöre yik tömaṙôngö nö chuh in Ò; ngaich haköpten cha Anga-aṅ.

¹⁴Ngaich hē Ò nö kiröönngöre, ngaich meūkö Lēvī Anga-aṅ, ök kūön Alfai, ūichhaka nö i chūök inmūl ṙāi kinëhet chehen. Ngaich ngö ṙô Anga-aṅ tö ò, Ta-a, tömrit Chu. Choholre ngaich anga-aṅ, nö tömrit Ò.

¹⁵Ngaich hē Ò nö ūichhaka nö nyā, nö el patī ò; maṙôngö yik mahamūl ṙāi kinëhet chehen, tököölö fālen inrē, nö ūichhaka nö hol Yēsū, tö yik haköptö Ò inrē, pòn maṙôngö cha-a, nö tömrit Ò.

¹⁶Ngaich hē yik kamūich, yik Feresī inrē, nö meūkan nö nyā nö hol yik tököölö fālen, mahamūl ṙāi kinëhet chehen inrē; ngö ṙô cha-a tö yik haköptö Ò, Sitih Ang nö nyā, òk inrē, nö holkūö mahamūl ṙāi kinëhet chehen, tököölö fālen inrē?

¹⁷Höng hangtöre Yēsū tö e, ngaich ngö ṙô tö cha, Rö-ö yin vē tölööken nö hòṅ lame-evṙen; höng vē tövahavö pöri. Rö-ö Chin yih Öich havëkö tölöök tarik, vē tököölö fālen pöri nö havöötö ellōnre.

¹⁸Ahik yik haköptö Yôhan, yik Feresī inrē. Ngaich yīhiv Anga-aṅ tö yik töngö ṙô, Kūöyòh yip haköptö Yôhan, haköptö yip Feresī inrē, nö ahik; ngaich rö-ö më haköptö Meh nö ahik?

¹⁹Ngaich Yēsū nö ngö ṙô tö cha, Kô-òren aich vē hol ngam töhapihö nö ahik, yē ò nö ṙòngmö in cha? Yē ò nö ṙòngmö ngöh nö in cha, öt kô cha-a nöahik.

²⁰Yih pöri min nup sakāmö hē ngam töhapīhö nö kē-ĕyö nö ṙā-ang in cha. Ngaich möl cha-a min nö ahik, hē e.

²¹Öt tarīkuvö chamôktö tufömngöre hilā nö lanöp höteh. Yē ò nö ngatī; ngaich ngam lanöp e nö ṙuhöinyre tinkāichökūö tö ngam höteh.

²²Öt tarīkuvö ma-asëhöt tufömngöre vāin, nö el höteh uk. Yē ò nö ngatī, ngaich ngam vāin min nö lakukköṅnykūö tö minë uk; ngaich kö ötkôlò nyöre tö ngam vāin tö minë uk inrē. El tufömngöre pöri uk, ngih tufömngöre vāin.

²³Ngaich hē Ò nö kiröönngöre, hē el töhet sakāmö, nö lök el panô-òṅ sāiny. Ngaich yik haköptö Ò nö köich ṙòng nuk sāiny, nöng kiröönngöre.

²⁴Ngaich ngö ṙô yik Feresī tö Ò, Yĕh meuk; kūöyòh aich nö la-evṙen tö ngam tötkô nö la-en hē el töhet sakāmö?

²⁵Ngaich ngö ṙô Anga-aṅ tö cha, Höng öt ve-ekūö inlahen Tāvit öi yī-ö, hē ò nö kapahare, tö yik hol ò inrē?

²⁶Ngaich kuhēthötre anga-aṅ inrē nö el patī ngam Tēv, hē Apīatör nö mākūö kūönṙô; ngaich nyā nuk töhet ròtī, nuk tötkô nö nya-aṅkūö tahëng, höng nya-aṅkūö kūönṙô. Ngaich kē-ĕkūö yik holre inrē.

²⁷Ngaich ngö ṙô Anga-aṅ tö cha, Pòkūö tarik an ngam töhet sakāmö nö vīlöngö; rö-ö nö pòkūö ngam töhet sakāmö nö vīlöngö ngòh tarik.

²⁸Lökten Ön ngòh kūön Tarik nö mākūö ngam töhet sakāmö.