Read Car_Nicobarese T. MĀKÖS 3 Bible Online

T. MĀKÖS 3 - Car_Nicobarese bible

T. MĀKÖS 3

¹Kuhēthötre hēk Anga-aṅ nö el chūök vine-eṅkūötēv; ngaich hĕng tak ök umuh tarik tölūmö kël.

²Ngaich hayūnan cha-a, yĕn hòṅ halanken ò, hē el töhet sakāmö; pò cha nö hòṅ löknyuṙô nö vënyen Ò.

³Ngaich nö ṙô Anga-aṅ tök tarik, ök tölūmö kël; Söklöre man.

⁴Ngaich ngö ṙô Anga-aṅ tö cha, Töhuveū-en önguh ngam tölöök la-en, el töhet sakāmö, ngam tötlöök ṙöng? Inyööken nômö, finëlngö ṙöng? Ngaich pöri cha-a nöng öt ṙô-òv.

⁵Ngaich hē Ò nö havīngömatre, nö hol tö lanīnö, nö ngëichken cha; pòn haṙivlōn tö ngane-eṅ ellōn cha; ngö ṙô Anga-aṅ tök tarik, Hateutnyö kël re mana. Ngaich hateutnyö e anga-aṅ ngaich lööken ök kël ò.

⁶Ngaich kunyi-inyre yik Feresī, iṙūö ve-ekūö re ngaich tö yik aṅ in Hēròt, töp tīre nö fëlngen Ò.

⁷Ngaich Ang Yēsū nö hol tö yik haköptöre nö ṙuhöngre nö ip mai. Maṙôngö yik tarik tamömrit Ò, nö ṙā-ang Kelelī.

⁸Maṙôngö yik hamang nuk tī Ò, ngaich yihtöre nö in Ò, nö ṙā-ang Yērūsalem, Ētöm, lāmuh tö Yôtön, ṙā-ang i chīṙö Tūrös, Sītōn inrē.

⁹Ngaich ve-ekūö yik haköptöre Anga-aṅ, pòn hōtö tö hĕng nòng kun kupòk hanöng Ò, pò më tömaṙôngö; hòṅ cha nö öt singngen Ò.

¹⁰Pòn maṙôngö halanken Anga-aṅ; ngaich yik ṙôngö yik tövahavö nö singtöre nö in Ò, pòn hòṅ lūölken Ò cha-a.

¹¹Ngaich yik tötlöök sī-ö nö afukngöre nö i kūö Ò, yē cha nö meūkan; ngaich hūḵa nö ngö ṙô, Me-eṅ Man, Kūön ngam Tēv.

¹²Ngaich kësô Anga-aṅ nö sōten cha nö eūken Ò.

¹³Ngaich peūlöre Anga-aṅ nö i kui rung; ngaich havëtö yik lōnre, nö inre; ngaich yihtöre cha-a nö in Ò.

¹⁴Ngaich nët sīön tak vahī-il Anga-aṅ, tö yik tökaheūkö tö Ò nö tanīnöṙô; nö hamòl Ò cha-a, tötīni inrē nö mumkahten.

¹⁵Ane inrē kētu minhôiṅyö nö halanken invah ahōngö sī-ö inrē.

¹⁶Vīlö yik tö nët sīön tak Anga-aṅ; ngaich kaheūkö Sīmōn Anga-aṅ nö Pītör.

¹⁷Yāköp ök kūön Sepetī, Yôhan inrē ök kahëm Yāköp, kaheūkö cha Anga-aṅ nö Pōnērkes, ngam töngö, Kūön kunṙôkö;

¹⁸Antaru, Filip, Partòlòmai, Mëtiv, Tòmös, Yāköp ök kūön Alfai, Tattai, Sīmōn aṅ Kēnen.

¹⁹Yūta Iskaryôt inrē, ök kamëḵngen Ò.

²⁰Yihtöre ngaich Yēsū nö ël ök tö hĕng patī. Ngaich hēk yik tömaṙôngö nö hamūl yanīhihre; ngaich cha-a nöng öt löktukūö nö nyā.

²¹Hē yik hanöng kisānö Ò nö hāngö e, ngaich yihtöre cha-a, nö hòṅ kēḵ An; pô cha nö ngö ṙô, Öt akahngenre An.

²²Ngaich yik kamūich, yik yamih nö ṙā-ang Yerūsalem, nö ngö ṙô, Īnu An tö Pē-elsipul; ngaich ahōngö vē sī-ö Anga-aṅ, nö lökten im mākūö vē sī-ö.

²³Ngaich havëten cha Anga-aṅ nö in Ò ngaich ngö ṙô tö cha, nö inchōḵovṙô, Sitih kanô-òṅ ang ngam Sātān nö ahōngö Sātān?

²⁴Yē ngam pūlngö nö harēvöre, öt kô angu-ö nö köp.

²⁵Yē ngam tö hĕng patī nö harēvöre töre, öt kô angu-ö nö köp.

²⁶Yē ngam Sātān nöng kahngenre nö lā-alre, ngaich harēvöre, öt kô anga-aṅ nö köp, höng tö ngaichngen pöri.

²⁷Öt hĕng tak tö kô nö kuhēthötre nö el patī öp tökalēḵ tarik, nö kēḵ nup chehen ò, höng urĕh nö nyëk ngam tökalēḵ tarik; ngaich möl nö kēḵ nup aṅ ngam patī ò.

²⁸Tökô-ò ṙô Chin tö yīö, Ṙòkhöre nup min tökööl yip kūön tarik, nö aṙēlöngö, nup töng ṙô cha inrē nö ötlēkôre.

²⁹Öt hēṙu pöri nö inṙēlu ngòh tötlamëkôre tö ngam Töhet Fanöinylö: pòn fāluṙen tö ngam tötchanūhuvṙen tökööl.”

³⁰Pò cha nö ngö ṙô. Sī-u aṅ in An.

³¹Ngaich yihtöre ök yöng Ò kikānö, tö yik mëm Ò; ngaich nöng sökhak nö lā uk; ngaich tīnngö mahavëken Ò.

³²Maṙôngö yik umuh mahavīlen Ò nö ūichhaka; ngaich ngö ṙô cha-a tö Ò, Höng chöhö Meh ap yöng Meh kikānö, yip mëm Meh inrē, nöng lā uk.

³³Ngaich ngö ṙô Anga-aṅ nö sap ṙô cha, Achīö öp yöng Chu kikānö, yip mëm Chu inrē.

³⁴Ngaich havīngömatre Anga-aṅ nö i yik amūichhaka, nö havīlen Ò; ngaich ngö ṙô Anga-aṅ, Yĕh meuk, ngam yöng Chu kikānö; vē mëm Chu inrē.

³⁵Pòn mëm Chu, kanānö Chu, yöng Chu kikānö inrē, ngòh töla-evṙen tö lōn ngam Tēv,