Read Car_Nicobarese T. MĀKÖS 6 Bible Online

T. MĀKÖS 6 - Car_Nicobarese bible

T. MĀKÖS 6

¹Kiröönngöre ngaich Ang-aṅ, nö ṙā-ang in e, ngaich yih nö ip panamre; īnu inrē tö yik haköptöre,

²Chalô ngaich ngam töhet sakāmö, ngaich haköphöti Anga-aṅ nö el chūök vine-eṅkūötēv. Ngaich maṙôngö yik töpingangkūö, hamang; ngö ṙô cha-a, Aṅ yih ön në i ngòh tarik? Asuh öng ngam mikah, tö kētu nö in Ò? Në töngati minhôiṅyö inrē la-en, kahëken Ò?

³Röh Ang nö ngòh töhuveū nö vī chōn ngòh kūön Mariā, mëm Yāköp, Yūtā, Sīmōn inrē? Röh yip kanānö Ò nö hol hī nö ihih? Ngaich cha-a nö ötmiṙūötṙen tö Ò.

⁴Ngaich Yēsū nö ngö ṙô tö cha, Tömilēkaṙen ön ngòh pròfĕt; höng i panamre pöri nö rö-ö, i hanöngkisānö, i patīre inrē.

⁵Öt kô Anga-aṅ inrē nö la-evṙen nö umuh tö minhôiṅyö; höng ngih ṙinātö eltīre nö i yip tö harohtum tak tövahavö; nö halanken cha.

⁶A Ngaich Anga-aṅ nö pingangkūö tö ötmikah cha. b Ngaich keuheūtkūö tuhēt Anga-aṅ, nö haköphöti.

⁷Have-eti Anga-aṅ tö yik tö nët sīön tak, nö in Ò; ngaich tīngen cha nö kö anët tak; ngaich kē-ĕkūö cha tö chöngö nö i tötlöök sī-ö.

⁸Sōten cha Anga-aṅ nö kahëkuvö nö im kinröönngöre, höng tinkung; öt nya-aṅvö, öt tasīluvö, öt rupīöṙuvö nö el inmöpṙatre.

⁹Höng kunröpuvö; un innëtuvö inyut.

¹⁰Ngaich ngö ṙô Anga-aṅ tö cha, Ip töng lööṙö yīö patī, höngngöh yī-ö in e; hanöng saha chanuhu yīö, ṙāngö e.

¹¹Ngaich yē chūök yip töthamôḵen yīö, yip töthamang ṙô yīö inrē; yē yīö pöchö kiröönngöre, ṙāngö e, pitōngngö pitung röönre yī-ö, nö minkahngö cha.

¹²Ngaich kiröönngöre cha-a; ngaich haköptö tarik nö havöötö ellōnre.

¹³Maṙôngö ahōngö tö sī-ö cha-a; maṙôngö hacham alaha inrē, tö tavī-i, tö tövahavö; ngaich halanken cha.

¹⁴Ngaich ök rācha Hērôt nö hāngö e, pò ök Minënyö Ò nö ngaich nö akahaiṙen. Ngaich ngö ṙô anga-aṅ, Choholre ap Yôhan ap Vamôk, nö ṙā-ang yip tökapah; lökten Ò nö hameuktö minhôiṅyö la-en.

¹⁵Ngö ṙô pöri yik tahëng, Ēlaicha An; Pròfĕt An, ngö yik tahëng; töhĕng tak aṅ i yik pròfĕt.

¹⁶Hē Hērôt pöri nö hang, ngaich ngö ṙô. Choholre ap Yôhan nö hēk, ök rahökngö likeun chu.

¹⁷Pò Hērôt nö tīnngö kameḵeṅ Yôhan; nyëkngen ò ngaich nö el kinlōngö, tö pòkūö Hērôti, ök pīhö ök kahëm ò Filip; pòn pīhöten ò anga-aṅ.

¹⁸Pò Yôhan nö ngö ṙô tö Hērôt, Rö-ö man kô pīhötö pīhö ngam kahëmre.

¹⁹Ngaich ang Hērôti nö kunyahaṅelmat tö ò; ngaich nö hòṅ fëlngen ò; öt kô pöri.

²⁰Pò Hērôt nö pa-ekūö tö Yôhan; pòn akahalōn tö ò nö tölöök, töhet inrē, nö tarik; ngaich nöng lākan. Ngaich hē ò nö hang ṙô ò, ngaich ṙamölōn nöng hang ṙô ò.

²¹Ngaich ik hē sakāmö nö sölta, ang Hērôt nö ha-aṅhaṅl yik mā, ik hēnyöre sakāmö, yik yöngṙen kumyung, yik yöngṙen inrē aṅ Kelelī.

²²Ngaich hē ök kūön Hērôti kikānö nö kuhēthötre nö kiṙīöm; ngaich ṙāmölōn ang Hērôt, tötī ò, yik holkūö ò inrē nö nyā. Ngaich ngö ṙô ngam rācha tö ngam nyīö kikānö, Ve-ekūö chu man yēḵ, tö töng lōnre. Ngaich kē-ĕkūö meh chu-ö min tö e.

²³Ngaich chūökuṙô anga-aṅ tö ò, nö ngö ṙô, Öp töng havëkö meh in chu, ngaich kētö e chu-ö min in meh, pòrô nö ròngti ngih pūlngö chu.

²⁴Ngaich kunyi-inyre anga-aṅ, ngaich ngö ṙô tök yöngre kikānö, Asuh ap min havëkö chu? Ngaich ngö ṙô anga-aṅ, Ap kui Yôhan ap vamôk.

²⁵Kuhēthötre ngaich anga-aṅ nö ka-eūyen, nöng löö im rācha; ngaich havë-a nö ngö ṙô, Hōten meh chin, ilööṙen kētö ap kui Yôhan ap Vamôk, nö ël pingāṅl.

²⁶Ngaich ngam rācha nö pōyen miṙīvlōn; kūö ök ṙô ò pöri, yik holkūö ò inrē nö nyā, anga-aṅ nö öt sōten ò.

²⁷Ilööṙen ngaich ngam rācha nö hĕng tak tahīnngö, tök aṅ in re kumyung; ngaich chönguvö tök kui Yôhan nö kētu.

²⁸Kiröönngöre ngaich anga-aṅ; ngaich rökngö likeun ò, nö el kinlōngö. Kētu ngaich ök kui ò nö ël pingāṅl; ngaich kētu nö ik nyīö kikānö; ngaich ök nyīö kikānö nö kētö e nö ik yöngre.

²⁹Ngaich hē yik haköptö ò nö hāngö e, yihtöre cha-a ngaich, nö kēḵ ök alaha ò; ngaich ulngö e.

³⁰Hamūlöre ngaich yik tanīnöṙô, ngaich yihtöre nö in Yēsū; ngaich keuheūtnyöre ṙô nö ve-eny nang Ò, tö nuk tī cha, tö nuk ṙô cha inrē nö haköphöti.

³¹Ngaich ngö ṙô Anga-aṅ tö cha, Haköhngenre yin el-inchōn; rahëchtaṙen heūheure. Pòn maṙôngö yik yamih, chamuh inrē; ngaich cha-a nöng öt löktukūö nö nyā.

³²Lök ël kupòk cha-a ngaich, nö chuh ik tököhngen chūök.

³³Ngaich yik tarik nö meuk chanuhu cha; maṙôngö yik tö-akahalōn inrē. Ngaich cha-a nöng fal nö kiröön, ṙā-ang i nup panam; ngaich urĕh tö cha.

³⁴Yôkti ngaich Anga-aṅ, ngaich meuk yik tömaṙôngö. Aṙē-ĕlōn ngaich Anga-aṅ tö cha; pò cha nöng sā pököre tötyōmuvö. Kaknyöre ngaich Anga-aṅ nö marô-òtô nö haköpten cha.

³⁵Ngaich ngam sakāmö nö hòṅ harap; yihtöre ngaich yik haköptö Ò nö in Ò, ngaich ngö ṙô, El-inchōnngö ön ngih chūökö; ngaich ngam sakāmö nö hòṅ harap.

³⁶Tīnngen cha Man ngaich; hòṅ cha nö chuh i tavat, i nup panam inrē, nö havah nya-aṅkūöre.

³⁷Ngö ṙô pöri Yēsū tö cha, Kētö nya-aṅkūö cha yin yī-ö. Ngaich ngö ṙô cha-a tö Ò, Kô-òṙen öi kiröönngöre, öi havah nya-aṅkūö cha, tö tö nëtòng ṙāi tö rupīö; hòṅ ih ha-aṅlen cha.

³⁸Ngaich ngö ṙô Anga-aṅ tö cha, Kuṙòh, ngëcha yin āṅmö aṅ in öi tö ròtī? Ngaich ngö ṙô cha-a, hē cha nö ngaich nö akahalōn, Taneui; nët nòng kāḵ inrē.

³⁹Ngaich hōten cha Ang Yēsū nö ha ūichngen cha nö i kui nuk tingūyö, nö kahĕng kiteūm.

⁴⁰Ngaich hatöökö cha-a nö ha-ūchi, hēngòng, taneui anāi inrē, i töhĕng kiteūm.

⁴¹Kēḵtam Anga-aṅ tö nuk tö taneui ròtī, nuk tö nët nòng kāḵ inrē; môklökūöre ngaich nö el halīöngö, ngaich hakôlò u Anga-aṅ; ngaich fòk nuk ròtī. Kē-ĕkūö yik haköptöre ngaich Anga-aṅ, nö ṙātö u nö i kūö cha, Katölö cha-a inrē tö Ò, nö ṙòkhöre, tö nuk tö nët nòng kāk.

⁴²Ṙòkhöre cha-a ngaich nö nyā; ngaich tööḵngen.

⁴³Ngaich chap nuk fòktit cha-a, nët sīön kumvôkö; tö nuk kāḵ inrē.

⁴⁴Taneui köṅny yik tarik nyamā nuk ròtī.

⁴⁵Ilööṙen ngaich Anga-aṅ nö hōtö yik haköptöre nö yôklö nö el kupòk; ngaich urĕh nö havāngngöre ip tahëng lā, i Petsĕitā; tösaha Ò nö ṙònghöichṙen nö tīnngörit yik tarik.

⁴⁶Keuheūthëṙen Anga-aṅ nö salāmngörit cha, Yônlö ngaich Anga-aṅ nö i kui rung, nö ve-ekūötēv.

⁴⁷Aṙū ngaich nö hatööm, ngaich ngam kupòk nö ellōn ngam mai; höng hĕngtit taka Anga-aṅ nö el tanyô

⁴⁸Ngaich meuk kanihngen cha Anga-aṅ, nö keūtöre; pò ngam kuföt nö asaha cha. Yihtöre ngaich Anga-aṅ nö in cha, nöng kiröönngöre nö el mai, ik finën heuh inahaṅti tö hatööm. Ngaich sā tö hòṅ chööḵngen cha Anga-aṅ.

⁴⁹Hē cha pöri nö meūkan nö kiröönngöre nö el mai; huḵa cha-a ngaich, pò Ò nö ma-alaha tö lōn cha;

⁵⁰Pòn ṙòkhöre cha-a nö meūkan; ngaich pa-ekūö. Ilööṙen pöri Anga-aṅ nö ve-ekūö cha, nö ngö ṙô tö cha, Hangëḵ alahare; ui pa-ekūö; Chu-ö Chini.

⁵¹Ngaich chuh in cha Anga-aṅ, nö el kupòk. Ṙātöre ngaich ök kuföt. Ngaich cha-a nö pōyen pinngangkūö;

⁵²Pò cha nö öt akahalōn tö inlahen nuk ròtī; ngëḵngöre nuk ellōn cha.

⁵³Ngaich hē cha nö ngaich nö vāngngö, löö ik panam cha-a ngaich Keneseret; ngaich kapòkngöre nö i kuyāyö.

⁵⁴Ngaich hē cha nö yôkti, nö ṙā-ang el kupòk; iṙūö akahakūö yik tarik ngaich tö Ò.

⁵⁵Falngöre ngaich nö keuheūt chīṙö; ngaich keuntö yik tövahavö nö el chamamre nö i chūök ahang cha tö kamngö Ò.

⁵⁶Ngaich i nuk töng tuhēt chūök Ò nö kuhēt, elpanam, tavat inrē; ṙātö yik tövahavö cha-a nö i chūök mi-inyih ngaich ve-ekūtö Ò, nöng hòṅ lūölkö taseū hilā Ò. Ngaich lööken yik lamūölken Ò nö ṙòkhöre.