Read Car_Nicobarese T. MĀKÖS 7 Bible Online

T. MĀKÖS 7 - Car_Nicobarese bible

T. MĀKÖS 7

¹Ngaich hamūlöre yik Feresī, rēvre yik kamūich inrē yamih nö ṙā-ang Yerūsalem.

²Ngaich rēvre maheuṅk cha-a tö yik haköptö Ò nö nyā, nöng öt halööklöre nöng öt söichlö eltīre.

³Pò vē Feresī, ṙòkhöre Yahūti inrē, nö öt nyā, yĕn öt söichlö eltīre nö keuheūtngöre tī; haköp falngen yik mā misī.

⁴Yih cha-a nö ṙā-ang chūök mi-inyih, ngaich öt nyā, yĕn öt söichöre. Pōiyen nup inrē tahëng tö haköpö tö cha, sinöichö el chūök òk, tanīöyö, neū-euṅ inrē.

⁵Ngaich yik Feresī, tö yik kamūich inrē, nö hatönan, nö ngö ṙô, Kūöyòh aich më haköptö Meh nö öt lök i falngen yik mā misī; ngaich pöri nöng nya-aṅvkūö, nöng ötlöökö eltī?

⁶Ngaich ngö ṙô Anga-aṅ tö cha, Kô-ò ṙô ök pròfĕt Isayā tö yīö yī-ö mahanyatkö elmat, sā kinūichngö e nö ngö, Höng i minuhre milēḵṙen yin vē tarik, tö Chu; marôvat pöri nup ellōn cha tö Chu.

⁷Höng tötöl pöri cha-a nö hayīchö Chu; haköphötī tö fālen tarik nö inköphöti.

⁸Ṙāngö ngam chöngö ngam Tēv yin yih; ngaich haköp fālen tarik.

⁹Ngaich ngö ṙô Anga-aṅ tö cha, Kô-òngrit yin sōḵo chöngö ngam Tēv, pò yīö hòṅ haköp fālenre.

¹⁰Pò Môsös nö ngö ṙô, Milēṙen man tö nap yöngre; ngòh tötlamëkôre tö yöngre, kumpahaiva min anga-aṅ.

¹¹Ngö ṙô pöri yī-ö, Yĕn hĕng tak öp tarik tö ngö ṙô tö yöngre. Kòrpan ök kanôlò meh lang tö tī chu; (ngam tö ngö, Kētu im Tēv;)

¹²Ngaich öt halöngten ò yī-ö nö rahëchhöl nö i mināṅ yöngre.

¹³Höng chanök alaha ngaich ngam ṙô ngam Tēv, Kūö ngam fālen yīö; ngam kahëtö yīö. Pōyen nup töngatī la-en yīö.

¹⁴Havë-eti Anga-aṅ hēk tö yik tömaṙôngö nö in Ò; ngaich ngö ṙô tö cha, Ṙòkhöre yin hangihtöre; akaha elnang inrē.

¹⁵Öt hĕng tötlöökö tī tö nup lamöknyö latunyī nö i tarik. Nup lamöknyö latuhēt pöri nö i tarik tötlöökö tī töm tarik.

¹⁶Hökngen ngòh tö-elnānguvö nö hang.

¹⁷Ngaich hē Ò nö kuhēthötre nö el patī, nö ṙā-ang yik tömaṙôngö; ngaich yik haköptö Ò nö hatönan tö ngam inchōḵoṙô.

¹⁸Ngaich ngö ṙô Anga-aṅ tö cha, Höng ngatī ötmikah el nang öi yī-ö inrē? Öt akaha elmat öi yih tö nup lamökhöt lātunyī nö i tarik, nö ötkô nö ötlöökö tī tö tarik?

¹⁹Pòn öt chuh el kuilōn ò; löö el puhū pöri, ngaich hēk nö meutnyi. Angū-ö ṙô Ò, tö në nya-aṅkūö ṙòkhöre nö tölöök.

²⁰Ngaich ngö ṙô Anga-aṅ, Ap lamöknyö el kuilōn tarik nö meutnyi, angū-ö ap tö-ötlöökö tī tö tarik.

²¹Pòn löknyö lātuhēt, ṙā-ang el kuilōn tarik, nup tötlöök lōn nö meutnyi, chinô-òṅkānö, unlāyö, finël tarik,

²²Insĕhha, yinikhanga, ötlanöökö, inchīlö, ötmīṙē-ĕv, kumnyah elmat; öt linëkô, inkeūlen, ötmikah.

²³Ṙòkhöre nun në tötlöök, nö ṙamā-ang lātuhēt anū-ö nun tötlöökö tī tö tarik.

²⁴Choholre ngaich Anga-aṅ, nö ṙā-ang umuh; ngaich kiröönngöre nö chuh kūöngö Tūrös, Sītōn inrē. Kuhēthötre ngaich Anga-aṅ nö el patī; ngaich sōtö tarik lang nö akahalōn tö e. Öt hanyunngen pöri Anga-aṅ.

²⁵Pòn hĕng taka ök kikānö tö ilööṙen nö hāngan, ök tökūönuvö tök nyīö kikānö, tö īnu tö tötlöök sī-ö; yihtöre ngaich anga-aṅ, ngaich afukngöre nö i röön Ò.

²⁶Tahëng mihëṅṙö ök kikānö, aṅ Suropòinikē. Ngaich ve-ekūö Ò anga-aṅ, nö hōten Ò nö ahōngö ök sī-ö, nö ṙā-ang ik kūön ò.

²⁷Ngaich Anga-aṅ nö ngö ṙô tö ò, Hökngen vē nyīö urĕh nö hatöö-öiṙen tön ötkônun në nya-aṅkūö nyīö nö kavaltuvö nö i am.

²⁸Ngö ṙô pöri ök kikānö tö Ò, Hòṅ; Mā. Ngaich ṙung në am nö nyā pinṙōngökūö nyīö, nö elkatòh mīs.

²⁹Ngaich ngö ṙô Yēsū tö ò, Kūö e angū-ö ṙô meh, kuṙòh ngaich man; ngaich ök sī-ö nö ṙāngö ap kūön meh.

³⁰Kiröönngöre ngaich ök kikānö, nö chuh patīre; ngaich kôtökūö tök nyīö nö ṙōlhaka nö el chamam; ngaich ök sī-ö nö ṙāngen ò.

³¹Ngaich hēk Anga-aṅ nö kiröönngöre, nö ṙā-ang i kūö panam Tūrös, ngaich yihtöre nö ik mai Kelelī, nö lök i Sītōn; lök ellōn kūö panam Tekapòlis inrē.

³²Ngaich cha-a nö hĕng tak kahëti nö in Ò, tök töthang, tösiknyô inrē. Ngaich cha-a nö ve-ekūö Ò nö hōten Ò nö ṙātö eltīre nö in ò.

³³Ngaich kēḵngen ò Anga-aṅ, nö ṙā-ang i yik tömaṙôngö; sëphöt tīre nö elnang ò; kösnyö pēngöre Anga-aṅ; ngaich lūölkö litāk ò.

³⁴Môklö kūöre el halīöngö, uhômlöre Anga-aṅ; ngaich ngö ṙô tö ò, Effata; ngam tö ngö, Löpnyökūöre yēḵ.

³⁵Ngaich lavëköṅnykūö nuk elnang ò; tayōlköṅny nuk inröt litāk ò; ngaich löökö ṙô anga-aṅ nö ṙô-òv.

³⁶Ngaich sōten cha Anga-aṅ nö vahënyu nang tö tarik; ṙūönyôre pöri Anga-aṅ nö sōten cha, ngatī ṙānūönyô cha-a nö ahangkö e.

³⁷Ngaich cha-a nö ngö ṙô, i ṙôken pinngangkūöre, Lööken tī An tö taṙòkhöre; vīten töthang An nö hang, tötkôn ṙô-òv inrē nö ṙô-òv.