Read Car_Nicobarese T. MĀKÖS 9 Bible Online

T. MĀKÖS 9 - Car_Nicobarese bible

T. MĀKÖS 9

¹Ngaich ngö ṙô Anga-aṅ tö cha, Tökô-òṙô chin tö yīö, Rēvre yip ihih tösökhak, tö-öl min nö kapah, hanöng saha mat cha nö meuk ngam pūlngö ngam Tēv nö yih nö holtö minhôiṅyö.

²Unôichrit tö tafūöl sumkam, Ang Yēsū nö ngô-òṅ Pītör, Yāköp, Yôhan inrē; ngaich hayihten cha nö i kui ap tömarô-òlkui rôngö: köhngen cha-a. Ngaich haṙī-ingre Anga-aṅ nö i kūö cha.

³Ngaich nuk hilā Ò nö pachālamat, isoh takô; öt tökô-òv samöich hilā ing panam, nö mi-isohoiny u.

⁴Ngaich meūkö tö cha nāṅ Ēlaicha, nāṅ Môsös; ve-ekūö Yēsū cha-a.

⁵Ngaich Pītör nö ngö ṙô tö Yēsū, Rappī; lööken in ihih. Yē hökngen ih lūöyö vahī tö inrūkui; hĕng inrūkui Meh, hĕng Môsös, hĕng Ēlaicha.

⁶Pò ò nö öt akahalōn tö ṙôre lang; pò cha nö pa-ekūö takô,

⁷Ngaich teungtöre ök taṙul nö hanyattökui cha; ngaich hĕng ök ṙô lamöktö el ök taṙul, tö ngö, Hanāngen Chu Ön ngòh nö Kūön Chu; hang ṙô Ò yin.

⁸Ngaich iṙūö havīngömatre cha-a nö ngëcha, ngaich öt hĕngtit tak maheuṅk, höng Yēsū nö hol cha.

⁹Ngaich hē yanôntö cha, nö ṙā-ang kui ngam ṙôngö, ngaich sōten cha Anga-aṅ nö vahënyu nang tö tarik tö nuk maheuṅk cha, höng yē ngam Kūön Tarik nö ngaich nö choholre nö hēk, nö ṙā-ang yip tökapah.

¹⁰Ngaich haköpngö ngam ṙô cha-a; hatönöre tö manah ngam chinôhòlre nö ṙā-ang yip tökapah.

¹¹Ngaich hatönan cha-a, nö ngö ṙô, Sitih yip kamūich nö ngö ṙô, tö Ēlaicha nö mu-urĕh tö yihih?

¹²Ngaich ngö ṙô Anga-aṅ tö cha, Kô ap Ēlaicha nö urĕh tö yihih, ngaich halēn taṙòkhöre. Ngaich Sitih kinūichngö ngòh Kūön Tarik, tö Ò nö ötkôn rö-ö nö pōiyen kanihngen, sōḵovö inrē?

¹³Ngö ṙô pöri Chu-ö tö yīö, Ngaich ap Ēlaicha nö yih ngaich ngaich tī cha-a tö ò, ip töng lōnre; sā ṙô ngam töhet līpöre tö ò.

¹⁴Ngaich hē cha nö yihtöre nö i yik mahaköp, ngaich meuk yik tömaṙôngö cha-a nö havīlen cha; ve-ekūö cha inrē yik kamūich.

¹⁵Ngaich hē yik tömaṙôngö nö meūkan, ngaich uṙeh alaha cha-a; ngaich iṙūö faltöre nö salāman.

¹⁶Ngaich hatön yik kamūich Anga-aṅ, nö ngö ṙô, Asuh ap ṙô yīö, ve-ekūö cha?

¹⁷Ngaich hĕng tak ök aṅ i yik tömaṙôngö, tö ngö ṙô tö Ò, Mahaköphöti; kētö ngòh kūönre chin, ngòh tö īnu tö sī-ö tötkô nö ṙô-òv.

¹⁸Afukngen ò ap, yē ò nöng yihtöre nö in ò; pēhĕv elvāng anga-aṅ, kap kui kanapre inrē; ngaich an nöng lëvngö. Ngaich chu-ö ve-ekūö më haköptö Meh, nö ahōngen ò; ngaich öt kô cha-a.

¹⁹Ngaich ngö ṙô Anga-aṅ tö cha, Ō yī-ö tötakaha tūmö; irô-òten Öich min in yīö? Irô-òtö manööyö Öich min in yīö? Kēten ò in Chu.

²⁰Ngaich kēten ò cha-a nö in Ò. Ngaich hē ngam nyīö nö meūkö Yēsū, iṙūö hangihire tī ngaich ngam sī-ö tö ò, nö pōihangen; fukngö ngaich nö el tumlat, pilönöre, nöng pēhĕv elvāng.

²¹Ngaich hatön ök yöng ò Yēsū, nö ngö ṙô, I ṙô-òten ang nö ngaich tök hētö yanihih e nö in ò? Ngaich ngö ṙô anga-aṅ, Hētentö ò nö ṙòngmö nyīö.

²²Ṙōlheuh an nö hòṅ fëlngen ò. Yē Meh pöri kô, aheūkölōn Man yēḵ tö ih, holṙen ih.

²³Ngaich Yēsū nö ngö ṙô tö ò, Yē meh kô; tökô nun në taṙòkhöre nö i ngòh ṙamātö ellōnre.

²⁴Ngaich iṙūö peuiny ök yöng ök nyīö, nö ngö ṙô, Ṙātö ellōnre chin. Meukṙen hanāṅten mikah chu.

²⁵Ngaich hē Yēsū nö meuk yik tömaṙôngö nö hufālö nö yihtöre; ngaich Anga-aṅ nö vëkö ök tötlöök sī-ö, nö ngö ṙô, Me-eṅ tötkô ṙô-òv, töthang inrē sī-ö; Chu-ö Chin tamölṙô meh, Meutnyi, ṙā-ang in ò; um hēk meuthöt in ò.

²⁶Keuheūthëṙen nö hūḵa, ngaich hangihire tī tö ò, nö pōihangen; meutnyi ngaich, nö ṙā-ang in ò, ngaich ngam nyīö nö sā kupah; lökten nö maṙôngö yik tö ngö ṙô, kapah an.

²⁷Kēḵ kël ò pöri Yēsū, ngaich hachohlen ò; ngaich choholre anga-aṅ.

²⁸Ngaich hē Ò nö yòhlö nö el patī. Ngaich yik haköptö Ò nö ulāikôre nö hatönan, nö ngö ṙô, Kūöyòh öi ihö öt kô ahōngen ò?

²⁹Ngaich anga-aṅ nö ngö ṙô tö cha, Öt anhôngen ön ngòh töngati sī-ö, höng lökten i vine-eṅkūötēv, inhīkö inrē.

³⁰Kiröönngöre ngaich cha-a nö ṙā-ang umuh, ngaich lök i Kelelī; ngaich sōtö tarik Anga-aṅ nö akahalōn tö e.

³¹Pò Ò nö haköptö yik haköptöre, nö ngö ṙô tö cha, Kētu Ön min ngòh Kūön Tārik, nö eltī tarik; ngaich fëlngen Ò min cha-a. Keuheūthëṙen finëlngö min Anga-aṅ, ngaich choholre hēk, unôichrit tö lūöi sumkam.

³²Ngaich pöri cha-a nö öt akaha elnang tö ngam ṙô; pa-ekūö inrē nö hatönan.

³³Chalô cha-a ngaich nö i Kafarnahum. Ngaich hē Ò nö yòhlö nö el patī, ngaich hatönö cha Anga-aṅ, nö ngö ṙô, Asuh ök ṙô yīö taheui ve-ekūöre, eltalöökö?

³⁴Ngaich pöri cha-a nö öt ṙô-òv; pò cha nö ve-ekūö höö, nö el talöökö, töp töpōyö tö cha.

³⁵Ūichngöre ngaich Anga-aṅ, ngaich havëtö yik tö nët sīön tak; ngaich ngö ṙô tö cha, Yē ngòh tö hòṅ urĕh tarik, manā-angkūö taṙòkhöre min anga-aṅ, mameukṙen taṙòkhöre inrē.

³⁶Kētam Anga-aṅ tök kun nyīö, ngaich asöklen ò nö ellōn cha. Ngaich fullen ò Anga-aṅ;

³⁷Ngaich ngö ṙô tö cha, Ngòh tö hĕng tak ahōḵo tö töngatī kun nyīö, nö i Mine-eny Chu, hamôḵen Chu anga-aṅ. Ngòh hamôḵen Chu, öt höng hamôḵen Chu anga-aṅ; hamôḵòṅ ngam taminten Chu pöri.

³⁸Ngaich Yôhan nö ngö ṙô tö Ò. Mahaköphöti, hĕng taka ök maheuṅk ih ma-ahōngö sī-ö nö i Mine-eny Meh; ngaich tahngen ò īhö, pò ò nö öt tömrit ih.

³⁹Ngö ṙô pöri Yēsū,, Un tāhaiyö ap; tön rö-övö nö tarīku töla-evṙen min tö minhôiṅyö nö i Mine-eny Chu, öp tökô-òren nö iṙūö ötlöökö ṙô tö Chu.

⁴⁰Pòn hol hī ngam töt lā-al hī.

⁴¹Yĕn hĕng tak min kamëtö òk yīö tö mak, nö pò yīö aṅ in Kristū; tökô-òṙô Chin tö yīö, Öt hōḵ öp min nö löhlö tö raneushöre.

⁴²Ngaich yē ngòh tö hĕng tak pòkūö tö vē kunkūöṅnö nö palā-aiṙen, vē ṙamātö ellōnre nö in Chu; ĕhten öp öre misī, yĕn kapòktu likeun tö tökiröng ihong, ngaich sūmi nö el mai.

⁴³Ngaich yē ngam kël meh nö pô-òvkūö tö meh palā-aiṙen, rökngö e. Lahëḵ man min höng kurong, öm kuhēthötre imnômö; ĕhten tö meh yē meh āṅngöre lā kël, chuh el chūök ötinkôlò, i kūö öp töthannyangngen tameūyö;

⁴⁴I chūök nup kamlökö nö öt kapah; öt nyangngö öp tameūyö inrē.

⁴⁵Yē ngam kalröön meh nö pô-òvkūö tö meh palā-aiṙen, rökngö e. Lahëḵ man min höng karòk, öm kuhēthötre im nômö; ĕhten tö meh yē meh āṅngöre lā kalröön öm kavāli el chūök ötinkôlò;

⁴⁶I chūök nup kamlökö nö öt kapah; öt nyangngö öp tameūiyö inrē.

⁴⁷Yē ngam mat meh nö pô-òvkūö tö meh palā-aiṙen, pëôknyö e. Lahëḵ man min höng hēngö mat, öm kuhēthötre in pūlngö ngam Tēv; ĕhten tö meh yē meh āṅngöre lā mat, kavāli el chūök ötinkôlò;

⁴⁸I chūök nup kamlökö nö öt kapah; öt nyangngö öp tameūyö inrē.

⁴⁹Pòi ṙòkhöre min kö asāli töp sāl,

⁵⁰Tölöök ön ngih sāl. Yē e pöri nö öt ngöhöre inṙeihu, Sitih tī öi min kumchiklö e? Sālu in yin yēḵ; ngaich kö kuchīken in höö.