Read Car_Nicobarese T. LŪKÖS 10 Bible Online

T. LŪKÖS 10 - Car_Nicobarese bible

T. LŪKÖS 10

¹Keuheūthëṙen anū-ö, ngaich ngam Mā nö vīlö yik tahëng tö sat anāi; kö ka-anët taka cha-a nö tīnirit tö Ò, nö urēhĕkūö Ò, nö i nup panam, nup yahihih Ò Anga-aṅ inrē. Ngaich ngö ṙô Ò tö cha.

²Pōyen nun në sāiny; kūöṅnen pöri vē töla-evṙen. Ve-ekūö ngam Mā në sāiny yin lökten, hòṅ Ò nö tīntö töla-evṙen nö i minë sāiny Ò.

³Kiröönngöre yin kuṙòh, yĕh meuk; tīnngen yīö Chin, sā pököre nö el ṙôngö nup aṅ el-inchōn am.

⁴Ui kēḵ rupīö, ui inyūluvö, ui kunröpuvö, ane inrē ui salām tarik el talöökö.

⁵Yē ap töng chūök yīö min patī kuhēthötre, urĕh ngö ṙô, Kumchikṙen yēḵ i ngih patī.

⁶Yĕn aṅhaṅvö angū-ö tö kūön kumchikṙen, ngaich in e tī yī-ö töp kumchikṙen. Yĕn rö-övö pöri, ngaich havantu angū-ö nö hēk nö in yīö.

⁷Höngngöh, in e angū-ö patī. Nya-aṅv kūö, òk inrē, höng sā kine-eṅkūö yīö tö cha; pò ngòh töla-evṙen nö tö hòṅ ṙāyu. Ui kiröönngöre ṙāngö ngam töhĕng patī, öi chuh im tahëng.

⁸Yē öp töng panam chūök yanihih yīö, ngaich hōḵov yī-ö tö cha; nya-aṅvkūö tö nup töng silô tö cha nö i kūö yīö.

⁹Halanken tövahavö yip mi-in e; ngö ṙô tö cha inrē, Röhta yanihih an ngam pūlngö ngam Tēv, nö in yīö.

¹⁰Yē öp töng panam chūök yanihih yīö, ngaich öthōḵov yī-ö tö cha; kiröönngöre yī-ö ngaich el talöököre, öi ngö ṙô,

¹¹Ötrēhĕn nun në pitung ngam panam yīö, nö köp nö i röön ih, chūtngö u in, minkahngö yīö. Akahalōn pöri yē tö ngih, tö ngam pūlngö ngam Tēv nö röhta yanihih nö in yīö.

¹²Ngö ṙô Chin tö yīö, Mööḵlö ṙôkhangen ötkanôlò an min angū-ö panam, tö Sôtöm, ip hē e angū-ö sakāmö.

¹³Tötkôlò man me-eṅ kòrasin, Petsĕitā. Pò nup la-en kanôlò öre nö ngaichngen nö i Tūrös, Sītōn inrē, nup tö ngaichngen nö in yīö; ngaich öre cha-a nö marô-angen nö havöötö ellōnre, ūichhaka nö inyut tö sāk, situm inrē.

¹⁴Mööḵlö ṙôkhāngen ötkanôlò pöri min Tūrös, Sītōn inrē, tö yīö ip hē öp kinṙôka,

¹⁵Me-eṅ inrē Kafarnahum; hapōilöngö öm min el halīöngö? Rö-ö; chuh el kitēlköre man min.

¹⁶Ngòh hamang ṙô yīö, ngaich hang ṙô Chu. Ngòh samôḵen yīö, ngaich samôḵen Chu. Ngòh samôḵen Chu, ngaich samôḵòṅ ngam tamīnngen Chu.

¹⁷Holtö ṙanāmölōnre yik tö sat anāi nö havantöre; ngaich ngö ṙô cha-a, Mā; uroh yip sī-ö nö hang ṙô ih, i Mine-eny Meh.

¹⁸Ngaich ngö ṙô Anga-aṅ tö cha, Meuk ngam sī-ö Chin, nö suktöre, sā hanyālö, nö ṙā-ang el halīöngö.

¹⁹Yĕh meuk; ngaich Chin kē-ĕkūö yīö tö kanô-òṅ yīö rööntökui pēch, tökanaptöritre inrē, ane inrē i kumlēḵ ngòh tökunyahaṅelmat. Öt töchökhuṙenvö min tö yīö.

²⁰Uh pöri öi ṙāmölōn i ngih, tö më sī-ö nö hang ṙô yīö; ṙāmölōn pöri tö kinūichngö nup minënyö yīö nö el halīöngö.

²¹Ik hē e, Anga-aṅ nö ṙāmölōn nö im Töhet Fanöinylö, ngaich ngö ṙô Ò, Ha-öinyö Meh Chin, Ō Kayöngö, Mā ngam halīöngö, ngih tumlat inrē; pò Meh hayunngö në i vē tö-akaha, ane inrē vē tö-akaha-elnang; hameuktu pöri anū-ö, nö i nyīö. Hôṅ, Kayöngö; pò e nö tölöök nö i kūö meh.

²²Ṙòkhöre nun në chehen nö kētuvö nö in Chu, tö ngam Yöng Chu. Ngaich öt hĕng tak tö-akahakūö tö ngam Kūön, höng ngam Yöng; ane inrē öt hĕng tak tö-akahakūö tö ngam Yöng, höng ngam Kūön, ngaich yip töhōḵov tö ngam Kūön nö hameukhumat.

²³Havööhöl Anga-aṅ tö kūöre nö i yik mahaköp, ngaich ngö ṙô Ò, nö ulāikôre, Tökôlò nup mat, nup mameuk në maheuṅk yīö.

²⁴Ngö ṙô Chin tö yīö, Maṙôngö yik misī pròfĕt, tö hòṅ meuk në maheuṅk yīö; ngaich nö öt meūkö u; tö hòṅ hang në ahang yīö inrē ngaich nö öt hāngö u.

²⁵Hĕng taka ök mahaköptö ngam chöngö, samöklöre nö kalah, nö ngö ṙô. Asuh ap min la-en chu hòṅ chu amīnuvö tö ngam tö-örheūheu-aṅ nômö?

²⁶Ngaich ngö ṙô Anga-aṅ tö ò, Asuh ap tökūichiyö nö im chöngö? Sitih ṙô öm ve-ekūö e?

²⁷Ngaich anga-aṅ nö sapṙô Ò, nö ngö ṙô, Hāngenlōn man tö ngam Mā Tēvre, holtö ellōnre, holtö nômöre, holtö kanô-òṅre; holtö kuilōnre; ane inrē hāngenlōn tö holre, sāre töre.

²⁸Ngaich Anga-aṅ nö ngö ṙô tö ò, Huveū-eu ṙô man, sāpö e. Ngatī man yēḵ; ngaich min öm aṅ.

²⁹Ngaich pöri anga-aṅ nö hòṅ halöököre, ngaich ngö ṙô ò tö Yēsū, Achīö ap hol chu?

³⁰Ngaich Yēsū, nö sap ṙô ò nö ngö ṙô, Hĕng taka ök tarik, ṙamā-ang Yerūsalem, nö chuh Yerikō; ngaich kööḵlö anga-aṅ tö yik tötūmu, yik lamuhngö hilā ò, ngaich fëlan; kiröönngöre ngaich, ṙāngen ò nö öhngen nö kapah.

³¹Ngaich i inmahten hĕng taka ök kūönṙô lamök im talöökö; höngmeuktöre anga-aṅ tö ò, ngaich chööḵngen ò, nö hakūnngöre.

³²Ngatī inrē hĕng taka ök kūön Lēvī, hē ò nö yihtöre nö im chūök ò, ngaich meūkan, chööḵngen ò ngaich nö hakūnngöre.

³³Hĕng taka pöri ök aṅ Samariā, hē ò nö kiröönngöre, ngaich lök in ò; höng meuktöre anga-aṅ tö ò, ngaich, aheūkölōn.

³⁴Yih töre ngaich nö in ò, haṙung nuk vah ò ngaich, fòhtukūö anū-ö tö tavī-i, vāin inrē. Ha-ūichlöng anga-aṅ ngaich nö i uk ök chūök ò chehechōn; kētuvö ngaich anga-aṅ, nö ël ap chūök haneūheuṅ patī; ngaich meukṙen ò.

³⁵Im huṙöich anga-aṅ nö nët tāk kahënyi tö rupīö ngaich kētö u nö ik yōm ngam patī, nö ngö ṙô, Meukṙen ò; kē-ĕkūö meh chin min yē meh pōihangen tī, yē chu min hēk havantöre.

³⁶Ök yòh ök tö më tö lūöi taka, lōn meh, hol ò ök tökööḵlö tö tötūmu.

³⁷Ngaich ngö ṙô anga-aṅ, Anga-aṅ ngam tö aheūkölōn tö ò. Ngaich ngö ṙô Yēsū tö ò, Kuṙòh; ngatī man yēḵ me-eṅ.

³⁸Ngaich hē cha nö kiröönngöre, kuhēt ngaich nö ik tö hĕng tuhēt; ngaich hĕng taka ök kikānö, Mārta ök mine-eny ò, hachūöklen Ò anga-aṅ nö i patīre.

³⁹Hĕng taka ök kanānö ò, Mariā ök mine-eny ò, ök töng amūichhaka nö i röön ök Mā, nö hang ṙô Ò.

⁴⁰Ngaich ang Mārta nö rëtnyi elmat nö meukṙen nya-aṅkūö. Ngaich yihtöre nö in Ò, nö ngö ṙô, Mā, rö-ö Öm hòṅ vëkö ngam kahëm chu, tö ò nöng ṙāngen chu hĕng taka, öich meukṙen. Lökten Man yĕh tölṙô ò, hòṅ ò nö holṙen chu.

⁴¹Ngaich ngö ṙô ngam Mā, nö sapṙô ò, Mārta, Mārta; törëtnyi-elmat, ane inrē famëkö tökeuheūttöre chehen.

⁴²Hĕngtöre öp tö hòṅ in meh; ngaich an Mariā nö kēḵ ngam tölöök lā-a, ngam tötkanëḵngen min nö in ò.