Read Car_Nicobarese T. LŪKÖS 11 Bible Online

T. LŪKÖS 11 - Car_Nicobarese bible

T. LŪKÖS 11

¹Ngaich hē Ò nö ve-ekūötēv, nö hĕngkang chūök; keuheūthëṙen Anga-aṅ, hĕng taka ök mahaköp tö ngö ṙô tö Ò, Mā; haköpten ih Man tö vine-ekūötēv, sā Yôhan inrē nö haköptö yik mahaköp nö in ò.

²Ngaich ngö ṙô Anga-aṅ tö cha, Ngö ṙô yin yĕi ve-ekūötēv, Kayöngö aṅ el halīöngö; töhet an yēk ngam Minënyö Meh: yih an yēḵ ngam pūlngö Meh; sā ngam lōn Meh nö ngaich nö el halīöngö, ngati hökngen e yēḵ ing panam inrē.

³Kē-ĕti tö taheui, nup tö örheūheu nya-aṅkūö ih.

⁴Aṙē-ĕl tökööl ih, sā ih īhö inrē aṙē-ĕl yip töhötehevö nö in ih. Uh öi kētu im kinlaha: ṙānyen ih pöri ṙā-ang im tötlöök.

⁵Ngaich ngö ṙô Anga-aṅ tö cha, Achīö ap öre töhĕng tak hol tö yīö, ngaich yihtöre nö in ò tö chūöl hatööm, nö ngö ṙô tö ò, Hol chu, lūöi hata man haṙūönghökūö chu tö ròtī.

⁶Tön yamihiv chin töholre, mi-ip kinröönngöre: ngaich öich öt huveū-en meukṙen ò.

⁷Ngaich löknyö lātuhēt ṙô anga-aṅ, nö sapṙô ò, nö ngö ṙô, Uh chin asānkaṙen, löphakkūö an ngam inkūp; holtuṙah chin inrē tö vē nyīö, öich el chamamre. Öt kô chin choholre, öich kē-ĕkūö Meh.

⁸Ngö ṙô Chin tö yīö, pòrô anga-aṅ nö ötkô nö choholre nö kē-ĕkūö ò, pò ò nö hol ò; ngaich pò ò nöng iṙuhöṙô nö have-a, ngaich choholre anga-aṅ, nö kē-ĕkūö ò, sā tūmö lōn ò.

⁹Ngö ṙô Chin inrē tö yīö, Havë-a, ngaich kē-ĕvkūö min yī-ö; lūka, ngaich teūngen min yī-ö; kuröngkökūö inkūp, ngaich löpnyukūö min yī-ö.

¹⁰Pò ngòh mahavë-a nö teūngen; ngòh lamūka inrē, nö kôtökūö: ngòh kumröngkökūö inkūp inrē, nö löpnyukūö.

¹¹Achiāp öre tö yīö yī-ö inyöngö, öp tö havëkakūö tö kūönre tö ròtī, ngaich kē-ĕkūö ò tö ihong?

¹²Hēk yĕn havëkö kāḵ, ngaich anga-aṅ nö kē-ĕkūö ò tö pēch nö ṙënngen ngam kāḵ? Hēk yē ò nö havëkö uhöö, kô-òren ang nö kē-ĕkūö ò tö tökanaptöritre?

¹³Yē yīö yī-ö yih, tö-ötlanöökuvö, öi akahalōn tö tölöök kahëtöre i më kūön yīö; i ṙôkhöltī ang öre ngam aṅ el halīöngö Yöng yīö, nö kētö ngam Töhet Fanöinylö nö i yip mahavë-a nö in Ò.

¹⁴Ngaich ahōngö sī-ö Anga-aṅ nö ik tötkô nö ṙô-òv. Ngaich chuhhë ngam sī-ö, ngaich ngam tarik tötkô nö ṙô-òvö, nö kahôka, Ngaich më tömaṙôngö nö pingangkūö.

¹⁵Rēvre pöri yik aṅ in cha, tö ngö ṙô, Pĕ-elsipūl an ngam mākūö vē sī ö, aṅtī Ò nö ahōngö sī-ö.

¹⁶Ngaich tahëng yik kamlahan, ve-ekūö Ò tö min kahngö aṅ el halīöngö.

¹⁷Akahalōn pöri Anga-aṅ tö ellōn cha, ngaich ngö ṙô tö cha. Ötkôlò nun në pūlngö tö tīre, yē u nö surīkhen höö.

¹⁸Yē ngòh Sātān nöng surīkhöre, sitih höng nganöhö öng ngam pūlngö ò. Pò yīö ṙô-òv tö Chu, Öich lökten Pĕ-elsipūl tī ahōngö sī-ö.

¹⁹Yē Chu, lökten Pĕ-elsipūl tī Öich ahōngö sī-ö; lökten in chīö tī yip kūön yīö nö ahōngen cha? Lökten yip min nö kamhôkken yīö.

²⁰Yē Chu pöri aṅtī tö kuntī ngam Tēv Öich ahōngö sī-ö; ngaich ngam pūlngö ngam Tēv nö yih nö in yīö.

²¹Yē ap tökalēḵ tarik nö aṅhaṅv eltī nö aṅtö patīre, ngaich kuchīken minë inlānen ò.

²²Yihtöre pöri ap tökalēḵ tö ò, nö in ò, ngaich mihôiṅ tö ò, kē-ĕyö ngaich nö ṙòkhöre nup aṅtī ò, nup chūök ò nö hayönglenre; katölhukūö cha-a ngaich tö nup chehen tö ò.

²³Ngòh töt mi-in Chu, tö sumrīk tö Chu; ngòh tötmahamūltöre nö in Chu, töng parāta.

²⁴Yē ngam tötlöök sī-ö nö kunyī-inyre nö ṙā-ang i tarik, ngaich lök ël ap chūök tötmākuvö, chöh chūökre nö heūheure. Ngaich öt kanôtukūö, ngaich ngö ṙô; Hòṅ havantöre chin ip patīre ṙahāngö chu.

²⁵Chalôhë anga-aṅ, ngaich kôtökūö tö e, nö fôhòh hanyötö inrē.

²⁶Ngaich kiröönngöre anga-aṅ, sat tak kahëḵ tö tahëng holre tö yip tömööḵlö ötlanöökö sī-ö tö ò; kuhēthötre cha-a ngaich nö iyöng in e. Ngaich ngam manā-aṅ inlahen ngam tarik, nö mööḵngöre ötkanôlò tö ngam mu-urĕh.

²⁷Ngaich hē ṙô Ò tö u, hĕng tak ök kikānö aṅ i yik tömaṙôngö, hamūḵa nö ngö ṙô tö Ò, Tökôlò ap chūökkanūönö, ap chūök Meh; nup pahōḵ Meh inrē teh.

²⁸Ngö ṙô pöri Anga-aṅ, Hôṅ kô; tökôlò yin vē hamang ṙô ngam Tēv, ngaich haköpö e.

²⁹Ngaich hē yik tömaṙôngö nö hamūlöre nö in Ò, ngaich rĕhnyôre Anga-aṅ nö ngö ṙô, Tötlöök ön ngih tūmö; chöh minkahngö ön; öt kē-ĕvkūö pöri angū-ö min tö minkahngö Yôna.

³⁰Pòn sā Yôna nö ngaich nö minkahngö, nö i yik aṅ Ninēvē, ngatī min inrē ngòh Kūön Tarik nö i ngih tūmö.

³¹Ngam rānī aṅ lā lòhngö choholre min, nö im kinṙôka, nö hol vē tarik ngih tūmö, ngaich öthakôlò cha min; pò ò nö yihtöre nö ṙā-ang ip manā-ang kūö ngih panam, nö hang mikah Sòlòmön; yĕh meuk, ngòh ihih tömööḵlö ṙôkö tö Sòlòmön.

³²Sök löre min yip tarik aṅ Ninēvē nö hol ngih tūmö, ngaich öthakôlò e min; pò cha nö havöötö ellōnre nö i ṙô Yôna nö mumkahten; yĕh meuk, ngòh ihih tömööḵlö ṙôkö tö Yôna.

³³Öt tarīkuvö tamôttökūö eāṅvö, ngaich ṙātö e nö i chūökre nö öt maneūken, ötrēhĕn nö elkatòh kuvôkö; i kui ngam tösökhak pöri, hòṅ vē kumhēthötre nö meuk ngam hanātö.

³⁴Ngam mat meh an eāṅvö ngam alaha meh. Yē ngam mat meh nö hēngö maheuṅk, ngaich ṙòkhöre ngam alaha meh nö hat. Yē e pöri nö ötkôlò, ngaich ṙòkhöre ngam alaha meh nö sangūla.

³⁵Ngëicha man lökten, yē ngam hanātö in meh nö öt sinngūlö,

³⁶Lökten yē ngam alaha meh nö ṙòkhöre nö hat, nö öt sinngūluvö, ṙòkhöre min angū-ö nö hat; sā kūö ngam töhūkūö eāṅvö nö kētö hanātö mat meh.

³⁷Hē Ò na ṙòngmö ṙô-òvö, hĕng taka ök Feresī mahavëken Ò nö nyā nö holkūö ò. Kuhēthötre Anga-aṅ ngaich, ngaich ūichngöre nö nyā.

³⁸Höng meuktöre ngam Feresī tö e, uṙeh anga-aṅ ngaich tö Ò, nö öt urĕh nö söichlöre, urēhĕkūö ngam nyina-aṅ.

³⁹Ngaich ngö ṙô ngam Mā tö ò, Yi-ö Feresī ma-ahet lö uk chūökkūö amòk, ane inrē pingāṅl; tööḵlö pöri ap lamātuhēt yīö, tö kinīlö ane inrē ötlanöökö.

⁴⁰Yī-ö tötakaha, röh ang ngam vamī ngam lā-uk nö vī ngam lā ël inrē?

⁴¹Kētö nup lamā tuhēt pöri nö inlōnti; yĕh meuk ṙòkhöre nun në chehen nö het nö in yīö.

⁴²Tötkôlò yin yī-ö Feresī, pò yīö hĕnghata i nup tö söm tötahūsa, tö angu-övö inrē, nup töṙōlkangen rōichōn inrē; ngaich yī-ö chööḵngö kui tötmichūṙen kinṙôka, ane inrē hanāngenlōn ngam Tēv. Anū-ö pöri öre la-en yīö; un ṙā-ai minë tahëng.

⁴³Tötkôlò yin yī-ö Feresī, pò yīö hāngenlōn hòṅ ël nup lamākūö anūchö el chūök vine-eṅkūötēv, ane inrē tö hòṅ salāmö el talöökö.

⁴⁴Tötkôlò yin yī-ö, pò yīö sā nup kuikupah nup tötmeūkö, ngaich vē tarik lamök kui u, nö öt akahalōn.

⁴⁵Ngaich hĕng taka ök mi-i yik mahaköptö chöngö samap ṙô Ò, nö ngö ṙô, Mahaköpti; sumrōngökūö ih Man inrē īhö, in e angū-ö ṙô Meh.

⁴⁶Ngaich ngö ṙô Ò, Tötkôlò yin yī-ö inrē, mahaköptö chöngö; pò yīö tötkaneūnen; ngaich yi-ö ötrēhĕn lūölkö u, öi hĕng nòng kuntī.

⁴⁷Tötkôlò yin yī-ö; pò yī-ö vī-il nup kui yik pròfĕt yik fahëlngö yik yöng yīö.

⁴⁸Lökten yin yī-ö mameuk ane inrē hamôḵòṅ nuk la-en yik yöng yīö; pò cha cha-a nö fëlngen cha, ngaich yī-ö vī-il nup kui cha.

⁴⁹Lökten inrē nö ngö ṙô ngam mikah ngam Tēv, Tīntö pròfĕt Chin min in cha, ane inrē tanīnöṙô; ngaich rēvre yip töfëli min tö cha ane inrē töthakôlöngṙô.

⁵⁰Hòṅ nup mahām yip taṙòkhöre pròfĕt nuk tö kitaktu i ranehlö ngih panam, nö havëka nö i ngih tūmö.

⁵¹Ranehten tök mahām Apĕl, söl ik mahām Sakariā, ök tö kapah nö i hôi ök chūök tökētuvö tö ngam patī ngam Tēv. Tökô-ò ṙô Chin tö yīö, I ngih ap min tūmö nö havëka.

⁵²Tötkôlò yin yī-ö, mahaköptö chöngö, pò yīö kēḵngö ngam tinkīök ap mikah, ngaich rö-ö yī-ö kuhēthötre, ngaich yip tö hòṅ kuhēthötre nö asānkaṙen tö yīö.

⁵³Kunyī-inyre ngaich Anga-aṅ nö ṙā-ang in e, ngaich yik kamūich, yik Feresī inrē, nö kalēḵĕṙô nö hōten Ò, nö harunnyö ṙô Ò nö hēk nö pōyen ṙô;

⁵⁴Pò cha nö hòṅ löknyuṙô; hayūnan cha-a inrē, pòn hòṅ kēḵ nup ṙô lamöknyö elvāng Ò.