Read Car_Nicobarese T. LŪKÖS 13 Bible Online

T. LŪKÖS 13 - Car_Nicobarese bible

T. LŪKÖS 13

¹Rēvre yik mu-umuh hē e vame-enynang Ò tö yik aṅ Këlelī, tö katĕhtu mahām tö Pailĕt, nö i nuk kahëtö cha.

²Ngaich ngö ṙô Anga-aṅ nö sapṙô cha, Tömööḵlö kanöölö fālen aich cha-a, tö cha nö aṅ Këlelī, nö ṙòkhöre tö lōn yīö; pò cha nö ngatī ötkanôlò?

³Ve-enynang yīö Chin, Rö-övö; yē yīö öt havöötö ellōnre, ngati ötkanôlò yin min yī-ö.

⁴Hēk yik tö hëvhöre sīön taka töfukkui tök kaha Sīlōm, ngaich kapahakūö tö cha; kūöre aich cha-a nö tömööḵlö höteh tö yip taṙòkhöre tarik mi-iyöng Yerūsalem, tölōn yīö?

⁵Ve-enynang yīö Chin, Rö-övö, yē yīö öt havöötö ellōnre, ngatī ötkanôlò yin min yī-ö.

⁶Ngaich ngih ṙô Ò inchōḵoṙô, Hĕng taka ök tarik töchōnuvö tö anychīr ök töteūchtuvö nö el ök panô-òṅ angkūr. Yihtöre Anga-aṅ ngaich nö chöhkö ṙòng ò, ngaich öt maheūṅku.

⁷Ngaich ngö ṙô Ò tö ngam yōm panô-òṅ, Yĕh meuk; lūöi samyeūheu chin ngaich yihtöre chöhkö ṙòng ngòh anychīr; ngaich öt maheūṅku. Kūölten ò man; kūöyòh ang inrē nö yëḵngen kūö töng tumlat?

⁸Ngaich anga-aṅ nö sapṙô ò, nö ngö ṙô, Mā; hökngen ò man yĕh i ngih samyeūheu inrē; hanöng saha tī chu ul rööntö ò, öich tūitö sôḵ nuā inrē.

⁹Yē ò nö ṙônguvö min; ngaich yĕn rö-övö, ngaich kūölten ò me-eṅ.

¹⁰Ngaich Anga-aṅ nö mumkahten nö el ök chūök vine-eṅkūötēv, hē ngam töhet sakāmö.

¹¹Ngaich hĕng taka ök kikānö, ök tötkalēḵ alaha, töhëvhöre sīön samyeūheu, tökeuheūtngöre ök nöng singut, öt kanô-òṅvö anga-aṅ nö kahngenre nö hachiplöre.

¹²Höng meuktöre Yēsū tö ò, ve-ekūö ò ngaich Anga-aṅ; nö ngö ṙô tö ò, Me-eṅ kikānö, ṙānyu man ngaich, im ötkumlēḵ.

¹³Ṙātö eltīre Anga-aṅ ngaich nö in ò; ilööṙen anga-aṅ ngaich nö chiplöre; ngaich ha-öiny ngam Tēv.

¹⁴Ngaich ök mākūö ngam chūök vine-ekūötēv, nö līn pò Yēsū nö halanken tövahavö hē el töhet sakāmö, ngö ṙô an nö i yik tömaṙôngö, Tafūöl sumkam nup hē tarik nö la-evṙen, hē u yin yĕh lökten halankaṙen invah; rö-övö pöri nö hē el ngih töhet sakāmö.

¹⁵Ngö ṙô pöri ngam Mā nö sapṙô ò, Yī-ö mahanyatkö-elmat, röh öi yī-ö luhlö nuā ane inrē köttö hē el töhet sakāmö, öi ṙā-ang im chūök u, ngaich hachōḵngö u ip chūök u nö òk mak?

¹⁶Sōtu ang ngòh kikānö ngòh kūön Aprahām, ngòh tönyëki tö ngam Sātān nö hëvhörsīön samyeūheu, nö luhnyuvö hē el töhet sakāmö?

¹⁷Ngaich hē Ò nö ngatī ṙô tö u, ṙòkhöre yik tökunyahaṅelmat tö Ò nö sumrōngikūö; ṙòkhöre pöri yik tömaṙôngö nö ṙāmölōn, töpòkūö nup taṙòkhöre tökôlò tī Ò.

¹⁸Lökten Ò nö ngö ṙô, Sā yòh öng ngih pūlngö ngam Tēv; Sitih tī Öich min asātö e?

¹⁹Sā nup kun kulöl an tö kē-ĕ tö tarik, tūyih ngaich nö el panô-òṅ, sīöp ngaich, ngaich tökiröng nö chōn, iyöngö pak ngaich tö chehechōn.

²⁰Hēk Anga-aṅ nö ngö ṙô, Sitih tī Öich min asātö ngam pūlngö ngam Tēv?

²¹Sā tö-aföhlöng an ròtī, öp tö kē-ĕ tö kikānö, ngaich hayūniyö nö lūöi hang nyanum, hanöng saha e nö ṙòkhöre nö föhlö

²²Kiröönngöre Anga-aṅ ngaich lök i nup panam, tuhēt inrē, mumkahten; nöng kiröönngöre nö chuh Yerūsalem.

²³Ngaich hĕng taka ök tö ngö ṙô tö Ò, Mā; höng harohtumtaka yip kan töhayöökaṙen?

²⁴Ngaich ngö ṙô Anga-aṅ tö cha, Kalah yin kuhēthötre, lökhöt im töcheūkti inkūp. Ngö ṙô Chin tö yīö, maṙôngö yip min chamöh talöököre, nö kuhēthötre nö in e; ngaich rö-ö min nö kô.

²⁵Yĕn hĕng heuh ngam töpatī-ivö nö choholre, nö löptökūö ngam inkūp; ngaich yī-ö sökhaka elkahôiṙen öi kuröngkö uk ngam inkūp, öi ngö ṙô, Mā; löpnyökūö ih. Ngaich ngö ṙô min Anga-aṅ nö sapṙô yīö, Öt akahakūö Chin töp ṙahāngö yīö.

²⁶Ngaich yī-ö hēk ngö ṙô min, Nya-aṅvkūö in misī, ane inrē òk, i kūö Meh. Ngaich Me-eṅ inrē misī mumkahten el talöökö ih.

²⁷Ngaich ngö ṙô Anga-aṅ min, ve-enynang yīö Chin, öt akahakūö Chin töp ṙahāngö yīö kiröönngöre yin ṙāngen chu yī-ö taṙòkhöre töla-evṙen tö tökööl.

²⁸Ngaich min öp pineūinyö ane inrē kinapkui kanap, yē yīö meūkö Aprahām, Isak, ane inrē Yāköp, ṙòkhöre yip pròfĕt inrē, nö im pūlngö ngam Tēv; ngaich yī-ö kavāliyö elkahôiṙen.

²⁹Ngaich cha-a min nö yihtöre nö löktö lā chuhöt, ane inrē lā sūng, löktö lā kapā, ane inrē lā lòhngö; ngaich ūichngöre min nö im pūlngö ngam Tēv.

³⁰Ngaich, yĕh meuk, yip mu-unôich min nö urĕh; ane inrē yip mu-urĕh min nö unôich.

³¹Hē e nö yihtöre yik Feresī, nö ngö ṙô tö Ò, Kē-ĕngre Man; ṙuhöngre, tön hòṅ fëlngen Meh ap Hērôt.

³²Ngaich ngö ṙô Ang-aṅ tö cha; Kuṙòh; ngö ṙô yin tö ngam am aṅ el-inchōn. Yĕh meuk, ahōng sī-ö Chin, ane inrē halanken invah tötaheui, huṙöich inrē im linūöi sumkam Chu-ö min teungten.

³³Kiröönngöre pöri Chu-ö tötaheui, öich kū-ötö kū-öre; huṙöich inrē, ip tamömrit u inrē; pòn öt kô nö hĕng tak pròfĕt, nö öt i Yerūsalem ötinkôlò.

³⁴Ō Yerūsalem, Yerūsalem, famëlngö yik pròfĕt, kumlehe cha yip tötīnyö nö in ò! Ām heuh Öich min hamūl më kūön meh, Öich höng sā yönghayöm nö hamūl kūönre nö elkëlre, ngaich yī-ö sōḵ.

³⁵Yĕh meuk, ṙā-ayö an ngam patī, nöng ötkôlò. Ngö ṙô Chin tö yīö, Öt meūkö Chu yin min hanöng saha ṙô yīö, öi ngö ṙô, Tökôlò Anga-aṅ yamih nö i Mine-eny ngam Mā Tēv.