Read Car_Nicobarese T. LŪKÖS 14 Bible Online

T. LŪKÖS 14 - Car_Nicobarese bible

T. LŪKÖS 14

¹Ngaich hē Ò nö chuh el patī ök töhĕng tak Feresī, nö nyā, hē el töhet sakāmö; ngaich cha-a nöng hayūnan.

²Ngaich hĕng tak ök tarik i kūö Ò tö aṅhaṅ alaha.

³Ngaich ngö ṙô ang Yēsū tö yik mahaköp tö chöngö yik Feresī inrē, Töhuveū-en öng ngih inlanken tövahavö hē ël töhet sakāmö? Rö-ö ṙöng?

⁴Ngaich pöri cha-a nöng öt ṙô-òvö. Kētam Anga-aṅ tö ò, ngaich halanken ò, ngaich hökiṙen nö kiröönngöre.

⁵Ngaich ngö ṙô Anga-aṅ tö cha, Achiāp öre tö hĕng nòng köttö, hēk nuā inrē, töp tö suktöre nö el mak; ngaich rö-övö nö ilööṙen nö tūöklen ò, hē el töhet sakāmö?

⁶Ngaich cha-a nö öt kô nö sāpö u.

⁷Ngaich hĕng ök ṙô Ò, inchōḵöṙô i yik töhavëtukūö nö nyā; hē Ò nö ngëichkö tī cha nö kēḵ chūökre tö nup lamākūö; ngö ṙô Anga-aṅ tö cha,

⁸Yē meh havëtu tö töng tarik i inlānen inpīhö, um ūichngöre ël nup lamākūö anūchö; tön lohten ap tömööḵlö kanôlò tö meh, nö havëtu tö ò inrē;

⁹Ngaich min ngam mahavëten nāṅ, nö yih töre, nö ngö ṙô tö meh, Kētö chūök ngòh man tarik; ngaich me-eṅ holtö sumrōngkūöre kēḵ anūchö lā-uk.

¹⁰Yē meh pöri havëtu, kuṙòh, ūichngöre man lā-uk. Ngaich yĕn yihtöre ngam mahavëten meh, lohten anga-aṅ nö ngö ṙô tö meh, Hol chu, ṙuhöinyre man; ngaich me-eṅ min ineūṅeuṅvö öm i kūö yip taṙòkhöre amūichhak nyamā nö hol meh.

¹¹Pòn ṙòkhöre vē mahapōilöre nö hayāichi min; ane inrē vē mahayāichngöre, nö hapōilöng.

¹²Ngaich ngö ṙô Anga-aṅ tö ök mahavëten Ò inrē, Yē meh vī nya-aṅkūö, uh man havëkö holre, un rēhĕn yip hanöngkisānö meh, un rēhĕn yip mëm meh, kahëm meh inrē, un rēhĕn yip tökôlò ranghö meh, tön hēk cha-a lohten min nö havëten meh; ngaich me-eṅ havahlöngö.

¹³Yē meh pöri vī nya-aṅkūö, havëkö yip yāich, yip tötkôlò alaha, tökaròk, tötmeuk inrē.

¹⁴Ngaich me-eṅ min tökôlò; pò cha cha-a nö öt kô nö havahlen meh. Pò meh min havahlöngö ip invanlö yip tölöök.

¹⁵Ngaich hĕng tak ök mi-in cha, amūichhak nö nyā nö hol Ò, nö hang në ṙô Ò, ngaich ngö ṙô anga-aṅ tö Ò, Tökôlò öp min nyamā nö im pūlngö ngam Tēv.

¹⁶Ngö ṙô pöri Anga-aṅ tö ò, Hĕng taka ök tarik, töpōyen vahī tö nya-aṅkūö, ngaich maṙôngö havëka.

¹⁷Tīnhang anga-aṅ ngaich tö kūönre hē el nyina-aṅ nö havëkö yip töhavëka, Ta-a lēnen nup nya-aṅkūö nö ngaich.

¹⁸Ngaich ṙòkhöre cha-a nö hĕngrenlōn tö ve-eny lökngenre nö öt kô. Ngö ṙô ngam mu-urĕh tö ò. Hĕng ap havah chu panam; hòṅ kiröönngöre chu-ö öich ngëichkö e. Aṙēten chu maṅ yēḵ.

¹⁹Ngaich ngö ṙô ap tahëng taka, Söm nòng nup havah chu, kōiny nuā; hòṅ kiröönngöre chu-ö, öich kalahten u. Aṙēten chu man yēḵ.

²⁰Hēk ngö ṙô ap tahëng taka. Hapihö chin chu-ö; lökten chu öt kô yih.

²¹Yihtöre ngaich ök kūön, ngaich ve-eny nang ök yöngre tö u. Ngaich līn ök tö patī-ivö ngaich ngö ṙô tök kūönre, Kuṙòh; ka-eūyen man chuh el tökiröng talöökö, el tökūöṅnö inrē, im panam; ngôṅtö yip yāich nö ihih, yip tötkôlò alaha, tötmeuk, ane inrē tökaròk.

²²Ngaich ngö ṙô ngam kūön ò, Mā; ngaich chin teūngen tap hinôtöre tö meh. Ngaich sönen nö ōtre chūökö.

²³Ngaich ngö ṙô ngam mā töm kūönre, Chuh el talöökö man, kuṙòh; elkatòh chōn inrē; tölṙô cha nö yih, hòn tööḵlö ngih patī chu.

²⁴Tön ngö ṙô chin tö yīö. Tö yip tarik töhavëkamin man nö öt hĕng taka kamlah ngih nya-aṅkūö chu.

²⁵Ngaich maṙôngö yik hamòl Ò, havööhöl Anga-aṅ tökūöre, ngaich ngö ṙô tö cha,

²⁶Yĕn tarīku yamihtöre nö in Chu, ngaich öt sumrīk tö pīhöre, kūönre, hanöngkisānöre, ngam nômöre inrē, öt kô anga-aṅ nö mahaköp nö in chu.

²⁷Yē ngòh tötkameun ngam töhakālö, nö tömrit Chu, öt kô nö mahaköp nö in Chu.

²⁸Achīö ap öre tö yīö töhòṅ vīlö ihong patī, öp töt urĕh nö ūichngöre, nö kaheuk ṙôken ṙāi, yē ò nö kô nö keuheūtngen e?

²⁹Hòṅ ò yē ò nö ngaich nö ul tö rööntö machööḵlö, ngaich rö-ö nö kô nö keuheūten; ngaich hayīöli min anga-aṅ tö yip taṙòkhöre mameuk:

³⁰Nö ngö ṙô, Vamī-il patī ön ngòh tarik; ngaich ötkô nö keuheūtngen e.

³¹Hēk achīö ap öre rācha, öp kumröönngöre nö kiyung tahëng rācha, öp töt urĕh nö ūichngöre, nö halēnöre yē ò nö kô nö holtö tö söm köṅny kumyung, nö lā-al yip yamih tö kahuk michöömö köṅny kumyung.

³²Hēk yē ngam tahëng nö ṙòngmö marôvat, tīnhang anga-aṅ tö tarik, vame-eṅkūö ò tö lanöökö,

³³Lökten yē ngòh mi-in yīö tötṙamā-ang inlānenre, öt kô anga-aṅ nö mahaköp nö in Chu.

³⁴Tölöök ön ngih sāl; yē e pöri nö öt ngöhören inṙeihu, isuh ap min kumchik e?

³⁵Ötrēhĕn an nö kôlòkūö tö panam, ötrēhĕn tö chūök sôḵ nuā; kavāli an tö tarik. Ngòh tö elnānguvö nö hang, hökngen ò nö hang.