Read Car_Nicobarese T. LŪKÖS 15 Bible Online

T. LŪKÖS 15 - Car_Nicobarese bible

T. LŪKÖS 15

¹Ngaich ṙòkhöre yik mahamūl ṙāi kinehet chehen, yik tököölö fālen inrē, nö ṙūötöre nö hòṅ hang ṙô Ò.

²Ngaich ngö ṙô yik Feresī, yik kamūich inrē nö vëken Ò, Hōḵen tököölö fālen ön ngòh tarik; nya-aṅvkūö inrē nö holkūö cha.

³Ngaich ngö ṙô Anga-aṅ tö cha, tö ngih inchōḵoṙô,

⁴Achīö ap öre tö yīö öp tö hēngòng pököre; ngaich hĕng nòng öp töchatngen; öp tötṙamāngö nup tömachūötör anāi machūötör nö el-inchōn, ngaich chöh ngam töchatngen hanöng saha kanôtökūö ò.

⁵Ngaich yē ò nö kôtökūö, tayūkö ngaich tö ò nö elranôṙö ò nö ṙāmōlön.

⁶Chalô anga-aṅ nö i patīre, have-eti tö yip holre hanöngkisānöre inrē; ngaich ngö ṙô anga-aṅ tö cha, Hanôltö ṙanāmölōnre yin in chu; tön kôtökūö chin tö ngòh pököre chu, ngòh töchatngen.

⁷Ngö ṙô chin tö yīö, Ngatī ṙanāmölōn min nö el halīöngö i ngòh töhĕng taka tököölö fālen, mahavöötö ellōnre; mööḵlö tö yip tö machūötör anāi machūötör tölöök tarik, yip tö rö-öv nö hòṅ havöötö ellōnre.

⁸Hēk achīö ap öre kikānö, tö söm tāk rupīö, ngaich hĕng hang tāk öp töchatngen; öp töt tamôttökūö ëṅāvö; ngaich fòh ël ngam patī, haṙēmngenre nö chöh, hanöng saha kanôtökūö ò tö e.

⁹Maichtöng kôtökūö anga-aṅ tö e, have-eti ngaich tö yip holre, hanöngkisānöre; nö ngö ṙô, Hanôlò ṙanāmölōnre yin in chu; tön kôtökūö chin tö ngih töchatngen rupīö.

¹⁰Ngö ṙô chin tö yīö ngati ap ṙanāmölōn i kūö yip ma-ahānga ngam Tēv, i ngòh tö hĕng tak tököölö fālen mahavöötö-ellōnre.

¹¹Ngaich ngö ṙô Anga-aṅ, Hēng taka öp tarik tö nët tak kūön.

¹²Ngaich ngö ṙô öp manāngö töp yöngre, Kayöngö; kē-ĕkūö chu man, tö nup mine-eny chu chehen. Ngaich anga-aṅ nö katölhökūö cha tö nup chehenre.

¹³Ölu nö ṙōlhang sumkam, hē ngam manāngö nö halēnnup chehen, kiröönngöre ngaich nö chuh tö marôvat panam. In e anga-aṅ ngaich nö mëichngö nup chehen, nöng ötlēnen.

¹⁴Keuheūthëtī anga-aṅ tö u, chalôḵ ngaich ök yöng inyāichö im panam; ngaich anga-aṅ nö ötkôlò.

¹⁵Feus anga-aṅ ngaich, nö hamūltöre nö hĕngkangchūök nö i yik aṅ ngam panam; tīni anga-aṅ ngaich tö ò, nö ha-òk ha-un.

¹⁶Ngaich anga-aṅ nö hòṅ nyā nuk nya-aṅkūö ha-un; ngaich rö-övö nö kame-eṅvkūö.

¹⁷Ngaich hē ò nö fē-ĕlre, ngaich ngö ṙô ò, Ām tak yip kūönkūö öp yöng chu, ngaich kô-òngkūö nö nyā, chöḵ-övkūö inrē; ngaich chu-ö höng ihih hòṅ kapah tö kinpahare.

¹⁸Hòṅ choholre, chin, öich chuh ip yöngre, öich ngö ṙô min tö ò, Kayöngö, köölö fālen chin ngaich im halīöngö, i kūö meh inrē;

¹⁹Rö-ö chin ngaich kô öich kūön meh invëka; vīten chu man sā yip kūönkūö meh.

²⁰Ngaich choholre anga-aṅ, ngaich yihtöre nö ik yöngre. Ṙòngmö marôvat anga-aṅ, ngaich meūkö tök yöngre; ngaich anga-aṅ nö aheūkö ellōn, faltöre ngaich, sarālöre nö elranôṙö ò, ngaich hāmkūö ò.

²¹Ngaich ngö ṙô ngam kūön ò, Kayöngö; köölö fālen chin ngaich im halīöngö, i kūö meh inrē; rö-ö chin ngaich kô öich kūön meh invëka.

²²Ngö ṙô pöri ngam yöng ò tö yik kamūönkūöre, Ka-eūyen yin; kētö ap tölöök inyut, hayutlö e in ò; kalonghöt kuntī ò inrē tö kinlong; kunröplö kunröön ò inrē tö kunröpö.

²³Kētö ap tö alahav kun nuā inrē ṙatnyö likeun ò; ta-a, töi nya-aṅvkūö, öi ṙāmölōn.

²⁴Pò ngòh kūön chu nö tö kapah, ngaich aṅlö nö hēk; tö chatngen an, ngaich kôti. Ngaich cha-a nö ṙāmölōn.

²⁵Ngaich ök maṙöinylö kūön ò nö elkahôyö. Yihtöre anga-aṅ ngaich, nö haröhtöre nö im patī; ngaich anga-aṅ nö hang ṙô ranöng, kumṙīön inrē.

²⁶Hĕng tak havëti anga-aṅ ngaich tö yik kamūönkūö, ngaich hatönan töp tö taṙōlaṙen.

²⁷Ngaich ngö ṙô anga-aṅ tö ò, yih ap kòl kahëm meh; ngaich ap yöng meh nö ṙatnyö likeun tö-alahav kun nuā; pò ò nö teūngen tö ò nö lööken.

²⁸Ngaich līn anga-aṅ, öt hòṅ kuhēthötre; kunyī-inyre ngaich ök yöng ò, ngaich ve-ekūö ò.

²⁹Ngaich ngö ṙô ò nö sap ṙô ök yöng re, Yĕh meuk tum samyeūheu chu halanṙen meh; öthĕngheuh öich öthang chöngö meh. Ngaich me-eṅ öthĕngheuh kē-ĕkūö chu tö kun pököre; hòṅ chu öre haṙamlōnre holtö holre.

³⁰Chalôḵhë ngòh kūön meh, ngòh kumheūṅtngö nup chehen meh nö i tötkôlò kikānö, ngaich me-eṅ ṙatnyö likeun kā ò tö tö-alahavö kun nuā.

³¹Ngaich ngö ṙô anga-aṅ tö ò, Kakūönö; töng örheūheu man in chu; chehen meh nun në taṙòkhöre chehen chu.

³²Kô in tö hòṅ ṙāmölōn; pò ngòh kahëm meh nö tökapah, ngaich hēk nö aṅ; töchatngen an ngaich kôti.