Read Car_Nicobarese T. LŪKÖS 18 Bible Online

T. LŪKÖS 18 - Car_Nicobarese bible

T. LŪKÖS 18

¹Ngaich hēngö ṙô Anga-aṅ nö in cha, tö inchōḵoṙô; nö ve-ekūötēv; sōtu nö uhā-en.

²Ngö ṙô Anga-aṅ, Hĕng taka ök kamhôṅka ik tö hĕng panam, ök tötpa-ekūö tö ngam Tēv, öt töchumkūöṙen tö tarik.

³Ngaich hĕng tak ök umuh tafīösi im panam. Ṙōlvan anga-aṅ nö yihtöre, nö in ò, nö ngö ṙô, Kahôklökui chu man i ngòh tökunyahaṅelmat tö chu.

⁴Ngaich sōḵ sin anga-aṅ; unôichngöre pöri anga-aṅ, nö ngö ṙô töre, Pòrô chin tötpa-ekūö tö ngam Tēv, öt töchumkūöṙen tö tarik;

⁵Ngaich pò ngòh tafīösi nö hakihten chu, hòṅ kahòklökui ò chin; hòṅ ò min nö öt mu-uhāngen chu, nöng iṙuhö yanihih.

⁶Ngaich ngö ṙô ngam Mā, Hangihtöre sitih ṙô ngam Mā tömichūṙen kamhôṅka.

⁷Röh ang min ngam Tēv nö kahòklökui vē katöllöre, vē vame-eṅkūö Ò nö peuheū harap ṙô. Pò ò nö tömarô-òtö manöiyö nö in cha.

⁸Ngö ṙô Chin tö yīö, ka-eūyen An min nö kahòklö kui cha. Hē ngòh Kūön Tarik pöri nö yih, kôtökūö Ang min tö mikah nö ing panam?

⁹Ngih ön inrē ṙô Ò inchōḵoṙô nö i yip tölöök tölōnre, ngaich nöng töng rö-öv yip tahëng.

¹⁰Nët tak nak tarik chamuh el ngam töhet chūök ngam Tēv, nö ve-ekūötēv; hĕng taka ök Feresī, mahamūl ṙāi kinëḵhöt chehen ök tahëng taka.

¹¹Söklöre ngaich ngam Feresī nö ngö ṙô, nö kahngenre nö ve-ekūötēv, Ō Tēv, ha-öinyö Meh chin, pò chu öt sā yip tahëng tarik, kamil, tömichūṙen, ma-asĕhha; ötrēhĕn chin sā ngòh mahamūl ṙāi kinëhet chehen.

¹²Nët heuh chin ha-ik i tö sat sumkam; hĕnghata chin i tö söm, öich kē-ĕti, i nuptaneūngen chu.

¹³Ngaich ngam mahamūl ṙāi kinëhet chehen, nö marôvat nö sökhaka, ötrēhĕn nö hòṅ môklökūöre nö el halīöngö; kōk elngòhre pöri anga-aṅ nö ngö ṙô, Ō Tēv, aheukölōn Man tö chu, chu-ö tököölö fālen.

¹⁴Ngö ṙô Chin tö yīö, tö ngòh tarik nö chuh patīre nö holtö inṙē-ĕlre, ĕhten tö ngam tahëng. Pò ngòh mahapōilöre min nö hayāichiyö; ngòh mahayāichngöre pöri min nö hapōilöngö.

¹⁵Ngaich cha-a nö kētö yik kun nyīö nö in Ò; pò Ò nö hōtu nö lūölken cha. Ngaich hē mat yik mahaköp nö meūkö e, ngaich vëken cha.

¹⁶Havëtu pöri cha-a tö Yēsū nö in Ò, nö ngö ṙô, Hökngen më nyīö nö yihtöre nö in Chu; un sōtu; tön töngatī an ngam pūlngö ngam Tēv.

¹⁷Tökô-ò ṙô Chin tö yīö, Ngòh tötkamëḵ ngam pūlngö ngam Tēv min, nö sā kun nyīö, ötkô min anga-aṅ nö kuhēthötre nö in e.

¹⁸Ngaich hĕng tak ök mākūö yahūti mahatönan nö ngö ṙô, Tölöök Mahaköphöti; asuh ap min la-en chu, hòṅ chu amīnuvö tö ngam nômö tö-örheūheu-aṅ?

¹⁹Ngaich ngö ṙô Yēsū tö ò, Pò yòh öm tölöök ngö ṙô, öm havëken Chu? Öt tölöökuvö höng humeng ngam Tēv.

²⁰Huveū-eu ṙô öm tö nup chöngö. Um asĕhha. Um fël tarik. Um ulāiyö. Um sūöchkö töng tarik. Milēḵṙen tö minā yöngre.

²¹Ngaich ngö ṙô anga-aṅ, Lök in u chin nö ṙòkhöre hēten chu ṙòngmö kūöṅnö.

²²Höng hangtöre ang Yēsūtö e, ngö ṙô Anga-aṅ tö ò, Hĕng ap töhāṅten nö in meh; inyihngö nup taṙòkhöre man chehenre; öm katölhökūö yāich; ngaich me-eṅ min kanôluṙô el halīöngö. Ngaich ta-a tömrit Chu.

²³Höng hangtöre anga-aṅ tö u, ngaich pōyen miṙivlōn; pò ò nö tökôlò takô.

²⁴Höng meuktöre Yēsū tö ò, ngaich ngö ṙô, Sitih kahnihngen aich vē tökôlò nö kuhēthötre nö im pūlngö ngam Tēv.

²⁵Lööṙen kunhēthöt ön ngòh ūṅt nö el manëngö rit charum, lööṙen tö kunhēthöt ngòh tökôlò tarik nö im pūlngö ngam Tēv.

²⁶Ngaich ngö ṙô yik hamang, Achīö öp pökeh tökô-òren nö hayöökaṙen?

²⁷Ngö ṙô pöri Anga-aṅ, Në tötkanô-òṅvö nö i tarik, tökô nö i ngam Tēv.

²⁸Ngaich ngö ṙô Pītör, Yĕh meuk; ṙāngö inlānenre in īhö; ngaich tömrit Meh.

²⁹Ngaich ngö ṙô Anga-aṅ tö cha, Tökô-ò ṙô Chin tö yīö, Öt tarīkuvö ṙamā-ang patīre, pihöre, hanöngkisānöre, yöngre, kūönre, töpòkūö ngam pūlngö ngam, Tēv.

³⁰Öp tö-ötteūngen min tö töpōyen i ngih panam, im töyihivö panam inrē ngam nômö tö-örheūheu-aṅ.

³¹Ngô-òṅ yik tö nët sīön taka tö Ò, ngaich ngö ṙô Anga-aṅ tö cha, Yĕh meuk; chuh Yerūsalem in. Ngaich ṙòkhöre nup tökūichiyö tö yik pròfĕt min nö keuheūtiṙen nö i ngòh Kūön Tarik.

³²Pò Ò min nö kē-ĕyö nö i yip tahëng mihëṅṙö, ngaich hayëḵe min, ane inrē sumrōngikūö, köösi elmat inrē.

³³Fōho min Anga-aṅ tö cha; fëli inrē im linūöi sumkam pöri min Anga-aṅ nö havanlöre nö aṅ.

³⁴Ngaich cha-a nö öt akaha elnang tö u; hayunngöre nun nö in cha; öt meuk minë ṙô cha-a.

³⁵Ngaich röhta Anga-aṅ nö i Yerikō, hĕng taka ök tötmeuk tarik, amūichhaka nö i taseū talöökö, nöng havë-a.

³⁶Ngaich hang ṙô röön yik tömaṙôngö, ngaich hatöntöre anga-aṅ tö e.

³⁷Ngaich ngö ṙô cha-a tö ò, Yēsū An ngam aṅ Nāsaret kumröönngöre.

³⁸Ngaich hūḵa anga-aṅ, nö ngö ṙô, Yēsū Me-eṅ Kūön Tāvit; aheūkölōn tö chu.

³⁹Ngaich yik mu-urĕh nö vëken ò, pò ò nö hōtu nö ṙāngôre. Vaichtö ṙūönyöṙôre anga-aṅ nö pōitô nö ngö, Me-eṅ Kūön Tāvit; aheūkölōn tö chu.

⁴⁰Sökngöre ngaich Ang Yēsū, ngaich hōten ò nö kētu nö in Ò. Ngaich hē ò nö röhta, ngaich hatönö tö Ò, nö ngö ṙô,

⁴¹Asuh ap lōn meh, la-en chu in meh? Ngaich ngö ṙô anga-aṅ, Mā; hòṅ meuk chin.

⁴²Ngaich ngö ṙô Yēsū tö ò, Meuk man yēḵ ngaich. Ngam mikah meh an tölöökentī tö meh.

⁴³Ilööṙen ngaich anga-aṅ nö meuk; tömrit Ò ngaich, nöng ha-öiny ngam Tēv. Ha-öiny ngam Tēv inrē yik tömaṙôngö tarik, hē mat cha nö meūkö e.