Read Car_Nicobarese T. LŪKÖS 19 Bible Online

T. LŪKÖS 19 - Car_Nicobarese bible

T. LŪKÖS 19

¹Kuhēthötre Anga-aṅ ngaich, ngaich lök i Yerikō.

²Hĕng taka ök tarik, maheuṅk ò, Sakkīös ök mine-eny ò; mākūö mahamūl ṙāi kinëhöt chehen ök, nö tökôlò.

³Ngaich anga-aṅ nö hòṅ meūkö Yēsū; ngaich öt kô, kūö më tömaṙôngö; pò ò nö töcheūḵlö.

⁴Fal anga-aṅ ngaich nö urĕh, nö yônlö nö i rōl chōn nö meūkan; pò Ò nö lök in e.

⁵Chalôḵ Yēsū nö i chūök ò, ngaich môklökūöre Anga-aṅ, ngaich ngö ṙô tö ò, Sakkīös, hēṙen man yônti; tön iyöng patī meh Chin tötaheui.

⁶Ka-eūyen ngaich anga-aṅ nö yônti; ngaich hōḵen Ò anga-aṅ nö ṙāmölōn.

⁷Ngaich hē cha nö meūkö e, ṙòkhöre cha-a nöng in re ṙô, nö ngö ṙô, Ngaich An nö iyöng patī ngam tarik tököölö fālen.

⁸Söklöre ngaich Sakkīös, ngaich ngö ṙô tö ngam Mā. Yĕh meuk, Mā; ròngti tī chin kē-ĕkūö yāich tö kanôlòre; ngaich yē chu chōchen i tarik, havantu angū-ö nö fënö ṙënngen.

⁹Ngaich ngö ṙô Yēsū tö ò, Tötaheui ap inyööken nö yih nö i ngih patī; pò ò inrē anga-aṅ nö kūön Aprahām.

¹⁰Pò ngòh Kūön Tarik nö yih nö chöh, ane inrē hayööken töchatngen.

¹¹Ngaich hē cha nö hāngö u, hĕng ök ṙô Ò inchōḵoṙô nö ṙūönyôre; pò Ò nö röhta nö i Yerūsalem, pò ngam pūlngö ngam Tēv inrē nö ka-eūyen mineūkö, tö lōn cha.

¹²Lökten Anga-aṅ nö ngö ṙô, Hĕng taka ök tökôlò tarik chamuh tömarôvat panam, nö kēḵ öp pūlngöre; ngaich hēk havantöre.

¹³Söm tak havë-ti anga-aṅ tö yik kūönre, ngaich söm paôn kinëḵeṅkūö tö rupīö (sunna pësa). Ngaich ngö ṙô tö cha, Havah yin ngaich, ane inrē inyih, hanöng saha yanihih chu.

¹⁴Ngaich yik tarik pöri aṅ ök panam nö kunyahaṅelmat tö ò, ngaich tīnngö tö-akaha tarik nö unôichrit ò, ngö ṙô, Sōḵo ngòh tarik in īhö, nö hayöngö ih.

¹⁵Ngaich hē ò nö havantöre nö hēk, nö ngaich nö teūngen tö ngam pūlngö; ngaich tölṙô invëkö yik kūönre anga-aṅ, yik tö kē-ĕvkūö tö rupīö; pò ò nö hòṅ akahalōn tö taneūngen cha nö i nyih.

¹⁶Yihtöre ngaich ngam mu-urĕh nö i kūö ò, nö ngö ṙô, Mā, ṙuhölre ṙôken an ngam rupīö meh nö söm.

¹⁷Ngaich ngö ṙô anga-aṅ tö ò, Töteūngen man, me-eṅ tö-akaha kūön; pò meh kô-en i tö rahëichyen; chöngu man yēḵ i tö söm panam.

¹⁸Yihtöre ngaich ngam innëtö, ngö ṙô, Mā; ṙuhölre ṙôken an ngam rupīö meh nö taneui.

¹⁹Ngaich ngö ṙô anga-aṅ tö ò inrē, Chöngu man yēḵ i tö taneui panam.

²⁰Yihtöre ngaich ngam tahëng taka, nö ngö ṙô, Mā; yĕh meuk, ngih öng yih rupīö meh, töng haṙūngi tö chu nö el kun hilā.

²¹Pò chu pa-ekūö tö meh pò meh tökësen öm tarik; kamëḵ nup töt ṙahātöre man, ane inrē mahamūl nup töt taheūichre.

²²Ngaich ngö ṙô anga-aṅ tö ò, Löknyö elvāng meh ṙô chin min kahòkken meh; me-eṅ tötlöök kūön. Akahalōn man tö chu tökësen tarik, kamëḵ nup töt taheūichre.

²³Kūöyòh ömeh öt kēḵngö ngam rupīö chu nö el chūök rupīö? Ngaich yih hë chu-ö, ngaich kô-òren öich teūngen tö e, nö holtö ṙāi inṙūöngköre.

²⁴Ngaich ngö ṙô anga-aṅ tö cha yik tösökhaka, Kēḵngö ngam rupīö yin, nö ṙā-ang in ò. Kētö e im tösömö aṅ-in.

²⁵Ngaich ngö ṙô cha-a tö ò, Mā; ngòh ang yih tösömö aṅ-in.

²⁶Ngö ṙô chin tö yīö, Ngòh tö-aṅhaṅv-in ngaich kē-ĕvkūö min; ngòh tötaṅhaṅv-in pöri, ngaich nö kē-ĕyö ap töng mi-in ò min.

²⁷Më tökunyahaṅelmat pöri tö chu, më tö sōḵ nö hayöngö tö chu, kēten cha ihih; fëlngen cha nö i kūö chu.

²⁸Keuheūthë ṙô Anga-aṅ, nö ngatī ṙô, ngaich urĕh nö kiröönngöre nö chuh Yerūsalem.

²⁹Ngaich hē Ò nö röhta nö i Petfēkē, nö i Petenī, i kui ap Rôngö Òliv, nët tak tahīnngö Anga-aṅ tö mahaköp.

³⁰Nö ngö ṙô, Kuṙòh, chuh im tuhēt nan, i kūö nāṅ. In e nā-aṅ min kuhēthötre, ngaich kôtökūö tö ap kūön köttö, tö kapòkhaka, ap tö öölu nö ūichka uk tö tarik. Luhlen ò, ngaich kēten ò.

³¹Yē nāṅ hatönö tö tarik, nö ngö ṙô, Kūöyòh ang nö luhlöng tö nāṅ? Ngö ṙô pancha, Hòṅ īnu ap Mā tö ò.

³²Kiröönngöre ngaich nak tötīni, ngaich kôtökūö nöng sā ṙô Ò tö cha.

³³Ngaich luhlö ök kūön köttö cha-a, ngaich ngö ṙô tö cha yik töchehevṙen, Kūöyòh an luhlö ngam kūön köttö?

³⁴Ngaich ngö ṙô cha-a, Hòṅ īnu ap Mā tö ò,

³⁵Kētu ngaich anga-aṅ nö in Yēsū; afahal cha-a ngaich tö nuk hilāre nö i uk ngam kūön köttö; ha-ūichlöng ngaich Yēsū nö i uk ò.

³⁶Ngaich hē ò nö kiröönngöre, haṙĕhtö hilāre cha-a nö el talöökö.

³⁷Ngaich hē Ò nö röhta nö i paneūṅti ap Rôngö Òliv; ṙòkhöre yik tö maṙôngö mahaköp nö ṙāmölōn, ane inrē ha-öiny ngam Tēv nö pōitô, pò nuk minhôiṅyö la-en Ò, maheuṅk cha; nö ngö ṙô.

³⁸Tökôlò An ngam Rācha ngam yamih nö i Minënyö ngam Mā Tēv. Kumchikṙen el halīöngö; kanôlò lātulöng.

³⁹Rēvre yik Feresī mi-i yik tömaṙôngö tö ngö ṙô tö Ò, Mahaköphöti; vëkö më mahaköp Man.

⁴⁰Ngaich sapṙô Anga-aṅ nö ngö ṙô. Ngö ṙô Chin tö yīö, Yē vē min nö ṙāngôre, kô-òren min në ihong nö ṙô-òv.

⁴¹Ngaich hē Ò nö röhta, ngaich meuk ngam panam Anga-aṅ, ngaich peūinyö e;

⁴²Nö ngö ṙô, Yē meh öre akahalōn i ngih sakāmö me-eṅ takô, tö nup mi-im kumchikṙen meh.

⁴³Hayunngöre pöri anu-ö nö i mat meh. Pòn yih nup hē nö in meh, hē yip tökunyahaṅelmat min tö meh nö tangngö kūö meh nö havīlen meh, nö höngö meh nö keuheūtngöre lā-a;

⁴⁴Ngaich sukten meh min nö el tumlat, yip kūön meh inrē, mi-in meh. Öt ṙahāngu min cha-a tö ihong mahachaphen höö nö in meh; pò meh öt akahalōn tö hē chinöhköre.

⁴⁵Kuhēthötre Anga-aṅ nö el ngam töhet chūök ngam Tēv, ngaich ahōṙi yik mi-inyih tö Ò;

⁴⁶Ngö ṙô An tö cha, Tö ngö kinūch ngö an, Patī vine-eṅkūötēv ap min patī Chu; ngaich pöri yī-ö vīten e nö chūök mu-ulāya.

⁴⁷Ngaich mumkahten Anga-aṅ nö örheūheu nö el ngam töhet chūök. Ngaich yik mākūö kūönṙô yik kamūich inrē, yik yöngṙen yik tarik inrē, nö hòṅ fëlngen Ò;

⁴⁸Ngaich öt kôtökūö cha-a tö tīre; pò më tarik nö havīlen Ò, nö hang ṙô Ò.