Read Car_Nicobarese T. LŪKÖS 2 Bible Online

T. LŪKÖS 2 - Car_Nicobarese bible

T. LŪKÖS 2

¹Ngaich hē e ök chöngö ṙāmā-ang in Kaisöör Òköstös, hinôtö në taṙòkhöre panam nö kūichö tum taka aṅ kūö.

²Angū-ö an raneh kinūichö tum taka, ṙamā-ang in Kurēnias, hē ò nö mākūö Sīriā.

³Ngaich ṙòkngöre cha-a nö kö chuh panamre, nö kūichö tum taka.

⁴Chuh inrē, ang Yôsĕf nö ṙā-ang Kelelī, nö aṅ ök panam Nāsaret, nö chuh Yūtā, ngam panam Tāvit; ngam tö Petlihem invëka; pò ò nö ṙamā-angrit in Tāvit;

⁵Nö holten Mariā, nö kūichö tum taka, ök tö mikahayö tö ò, ngaich nö röhnyen finötö.

⁶Ṙòngmö in e cha-a, ngaich teungtökūö sakāmö hē finötö ò;

⁷Fötnyö ök lanòh kikōnyö ngaich anga-aṅ lömhang anga-aṅ tö ngam nyīö nö el hilā; ngaich haṙōlngen Ò, nö ël ök chūökkūö nuā; pòn öt chūöku cha-a, nö ël ök patī hameūheure.

⁸Ngaich yik umuh amahtö pököre im panam, aṅtö nuk pököre tö el hatööm nö höngngöh, nö i chūökre nö ha-aṅhaṅl u.

⁹Ngaich ök ma-ahānga ṙamā-ang im Mā Tēv, nöng sökhaka nö in cha; ngaich havīlöng cha-a, tö hanātö kanôlò ngam Mā Tēv; ngaich pa-ekūö cha-a.

¹⁰Uh yin pa-ekūö, ngö ṙô ngam ma-ahānga tö cha; Yĕh meuk, tö chu öich kumtö tölöök inhānga ṙanāmölōn taṙòkhöre tarik.

¹¹Kūö yīö, ap umuh nyīö töfötnyuvö tö taheui i panam Tāvit; ap Mā Kristū, Mahayööken.

¹²Ngih ön minkahngökūö yīö, Kôtökūö yin min tö ap nyīö, nöng lömtöhëich nö el hilā, nöng ṙōlhaka nö el chūökkūö nuā.

¹³Ilööṙen yip tömaṙôngö aṅ el halīöngö nö holtö ap ma-ahānga, na ha-öiny ngam Tēv, nö ngö ṙô:

¹⁴Kanôlò ngam Tēv yēḵ nö el halīöngö kumchikṙen nö el tumlat, hanāngenlōn nö i tarik.

¹⁵Chuhhë më ma-ahānga nö ṙāngen cha, nö chuh el halīöngö ngaich yik amahtö pököre nö ngö ṙô tö höö, Tā-a, töi chuh Petlihem, öi ngëichkö ngih ṙô töngatī; ngam ṙô ngam Mā Tēv nö mikahtölōn hī.

¹⁶Feus cha-a ngaich nö ka-eūiyen ngaich kôtökūö tö nā Mariā, nā Yôsĕf, höng ṙōlhaka ngam nyīö nö el chūökkūö nuā.

¹⁷Höng meuktöre cha-a tö Ò, ngaich ve-eny nuk vine-eny nangre tökūö ngam Nyīö.

¹⁸Ngaich ṙòkhöre yik hamang nö pingangkūö tö vine-eny nangre, tö yik amahtö pököre.

¹⁹Ngaich pöri ang Mariā nöng ellōnre lōn nö fēken u.

²⁰Havantöre ngaich yik amahtö pököre, nöng ha-öiny ngam Tēv; pò nuk ahang cha, nuk maheuṅk cha inrē, nöng sā vine-enyre nö in cha.

²¹Tunyīnyih Anga-aṅ ngaich im hinëvhöre höiny sumkam Ò ngaich ök Mine-eny Ò nö Yēsū invëka; ngam töngatī ṙô ök ma-ahānga urēhĕkūö pinrūkö Ò.

²²Ngaich teungtökūö sakāmö hē cha nö ahetlöre, sā chöngö Môsös, kētuvö Anga-aṅ nö i Yerūsalem, nö hameuktuvö nö i kūö ngam Mā Tēv.

²³Sā kinūichngö e nö im chöngö ngam Mā Tēv, Vē lanòh kikōnyö hōtu nö töhet nö im Tēv.

²⁴Ane inrē kamëtö nup tökētu, nup ṙô ngam chöngö ngam Mā Tēv, Hĕng tahôl nup nyö-öṅ, hēkpī nët nòng kūön pumpa.

²⁵Hĕng taka ök umuh tarik i Yerūsalem, Sumōn ök minënyö ò; tötmichūṙen ök anga-aṅ, ane inrē tö pa-ekūö tö ngam Tēv hamöngkökūö öp inṙamlōn Israĕl; īnu anga-aṅ tö ngam Töhet Fanöinylö.

²⁶Ngaich anga-aṅ nö hameukhumat tö ngam Töhet Fanöinylö, töre nö öt hōḵ nö kapah, yē ò nö öl nö meukkūö ngam Mā Kristū.

²⁷Kuhēthötre anga-aṅ nö ël ök chūök ngam Tēv, hachōḵhötvö tö ngam Töhet Fanöinylö; kēhötvö ök nyīö Yēsū tö nak yöngre, pòn hōtu nö sā fālngen ngam chöngö tī cha-a tö Ò;

²⁸Kētam anga-aṅ tö Ò nö eltī re, ngaich ha-öiny ngam Tēv anga-aṅ, nö ngö ṙô:

²⁹Ō Mā, sā ṙô Meh kilēḵngôre; ngatī tī, tīnngörit ngòh kūönre töngamuh im kumchikṙen;

³⁰Tön kôtö mat chin, öich meukkūö ngam inyööken aṅ in Meh;

³¹Ngam halēnken Meh, i kūö vē taṙòkhöre tarik;

³²Hanātö inmeukhömat yip tahëng mihëṅṙö tarik, ane inrē kanôlò vē tarik Meh Israĕl.

³³Ngaich nak yöng Ò, nöng pingangkūö tö minë ṙô inlahen Ò.

³⁴Ngaich ang Sumōn nö hakôlò cha; ngö ṙô an tö Mariā ök yöng Ò, Yĕh meuk ngòh nyīö nö töhōtu nö lökngen fanukngö ane inrē löklen chanôhòl i yip tömaṙôngö i Isarĕl; ane inrē minkahngö nö tö sōḵovö;

³⁵(Fël ap min tö tafūnikūö tö ngam nômö meh;) hòṅ hameuknyuvö nup lōn vē tömaṙôngö.

³⁶Hĕng taka ök umuh inrē Anna, pròfĕt nö kikānö, kūön Fënu-el ök, ṙamā-angrit Asēr, köiny ök nö ngaich, sat samyeūheu anga-aṅ nö ik pihöre, hētentö ök rinëlö ò.

³⁷Tö hëvhöre anāi fën tumhang samyeūheu anga-aṅ nö tafīösi; ök töng öt ṙamāngö ngam chūök ngam Tēv, lamök la-en ngam Tēv hĕnghöre ahik, ane inrē peuheū harap ṙô nö ve-elkui tömaṙôngö.

³⁸Yih anga-aṅ tök hēre nö ha-öiny ngam Tēv; ngaich ve-eny inlahen Ò anga-aṅ nö i yik tömaṙôngö, hamöngkūö ṙinānyö Yerūsalem.

³⁹Keuheūthëṙen cha-a tö mīnë la-enre, nö sā ngam chöngö ngam Mā Tēv; havantöre cha-a ngaich nö i Këlelī, ik panam cha Nāsaret.

⁴⁰Ngaich ngam nyīö nö pōyö, nö kalēḵ alaha, sööḵngö tö mikah; ane inrē īnu tö ngam inlōnti tī ngam Tēv.

⁴¹Ngaich minā yöng Ò nö örhĕnghang samyeūheu röön, nö chuh Yerūsalem hē ap paratīn paska.

⁴²Ngaich hē Ò nö nët sīön höiny samyeūheu, ngaich chuh in e cha-a, sā falngen ngam paratīn.

⁴³Keuheūthëṙen cha-a, ngaich havantöre, höngngöh ök Nyīö Yēsū nö i Yerūsalem; höng öt akahalōn minā yöng Ò tö e.

⁴⁴Höng i yik ṙôngö cha pöri Anga-aṅ, tö lōn cha, ngaich cha-a nö hĕnghang sumkam nö kiröönngöre. Ngaich chöhan cha-a nö i yik holre, yik hanöngkisānö cha inrē.

⁴⁵Öt kôtökūö cha-a tö Ò, maichtöng havantöre nö i Yerūsalem, nö chöhan.

⁴⁶Ngaich lūöihang sumkam möl cha-a nö kôtökūö tö Ò, nö ël ök chūök ngam Tēv, ūichhaka nö i yik mahaköpti, hĕnghöre hang ṙô cha, ane inrē hatönö cha.

⁴⁷Ngaich yik hamangṙô Ò nö pingangkūö tö mikah Ò, ane inrē huneū-euṅ ṙô Ò nö sapṙô.

⁴⁸Pingangkūö inrē minā yöng Ò tö matre nö meūkan ngö ṙô ök yöng Ò kikānö tö Ò; Kakūönö, pò yòh Öm ngati tī tö ai. Yĕh meūkö ai, höng haṙīvölōn ai chöhö Meh.

⁴⁹Ngaich ngö ṙô Anga-aṅ tö cha, Sitih an chöhö Chu? Röh an akahalōn tö Chu mi-i la-en ngam Yöng re?

⁵⁰Ngaich öt akaha elnang cha-a tö ṙô Ò nö in cha.

⁵¹Kiröönngöre ngaich Anga-aṅ nö hol cha, chuh Nāsaret; ngaich hang ṙô cha Anga-aṅ. Ngaich ngam yöng Ò kikānö nö höng haköpngö minë ṙô Ò nö ellōnre.

⁵²Ngaich Ang Yēsū nö ṙuhölre mikah, ane inrē ṙūhölre ṙôkö, hanghuṙen tö ngam Tēv, tarik inrē.