Read Car_Nicobarese T. LŪKÖS 23 Bible Online

T. LŪKÖS 23 - Car_Nicobarese bible

T. LŪKÖS 23

¹Ṙòkhöre ngaich yik tömaṙôngö nö choholre, ngaich kēten Ò nö i kūö Pailĕt.

²Ngaich ve-eny fālen Ò, nö ngö ṙô, Kôtökūö in, tö ngòh tarik mahalō-ongkūö vē tarik ih, samôtö kinëtö ṙāi chūök, nö in Kaisöör; ngaich Anga-aṅ nö Kristū tö ṙôre; nö Rācha.

³Ngaich Pailĕt nö hatönan nö ngö ṙô, Rācha vē Yahūti Öm Me-eṅ? Ngaich sapṙô ò Anga-aṅ, nö ngö ṙô, Chū-ö Chin ṙô meh.

⁴Ngaich ngö ṙô Pailĕt tö yik mākūö kūönṙô, yik tömaṙôngö inrē, Rö-ö chin kanôtukūö tö falngen i ngòh tarik.

⁵Ṙuhöl alaha vē tarik An, keuheūt chūökre An nö haköphöti nö i Yūtā, rĕhtenre nö i Kelēli, ihih inrē.

⁶Höng hangtöre ang Pailĕt tö e, ngaich hatönö cha anga-aṅ, yē ngam tarik nö aṅ Kelelī,

⁷Ngaich hē ò nö akahalōn tö Ò nö aṅ panam Hēròt, ngaich tīnngen Ò anga-aṅ nö in Herôt, ök mī-i Yerūsalem inrē hē e.

⁸Höng meuktöre ang Herôt, ngaich pōyen ṙanāmölōn anga-aṅ: pò ò nö tömarô-òten nö hòṅ meukkūö Ò, pò ò nö hāngan, ane inrē hòṅ meuk tī Ò tö minkahngö.

⁹Ṙōlö ṙô anga-aṅ nö hatönan; ngaich pöri Anga-aṅ nöng öt sapṙô ò.

¹⁰Söklöre yik mākūö kūönṙô yik kamūich inrē, nö kalē-ĕ ṙô nö vënyen Ò.

¹¹Ngaich Herôt, yik kumyung inrē, nö hayāichngen Ò, hayëḵngen Ò, hayutlen Ò inrē tö ök tövai inyut. Ngaich tīnngen Ò nö hēk nö in Pailĕt.

¹²Ngaich nāṅ Herôt, nāṅ Pailĕt nö holre hē e; pò cha sin nö urĕh nö tökunyahaṅel mat tö höö.

¹³Ngaich Pailĕt nö havëtö yik mākūö kūönṙô yik yöngṙen ane inrē yik tömaṙôngö;

¹⁴Ngaich ngö ṙô tö cha, Kētu Ön ngòh tarik tö yīö, nö sā mahalō-ongkūö vē tarik. Yĕh meuk; ngaich yi chu-ö kalahan i kūö yīö. Öt kôtökūö tö falngen i ngòh tarik, i nup ṙô yīö vënyen Ò,

¹⁵Rö-övö, ötrēhĕn Herôt, pò ò yin nö hēk nö tīnten Ò nö in hī. Yĕh meuk; höng rö-övö An nö tī-ivö tö nup kinpahangvah.

¹⁶Lökten chin höng fohan, ngaich ṙāngen Ò.

¹⁷Töhĕng tak ṙahānyi anga-aṅ tö tökē-ĕ, hē el paratīn.

¹⁸Ṙòkhöre ṙô pöri cha-a, nö ngö ṙô, Kēḵngö ngòh tarik, Ṙānyen Pārapas pöri, nö in ih.

¹⁹Öt kūö tinṙōlen nö im panam, kūö finël tarik inrē, nö kalonghötvö nö el kinlōngö.

²⁰Ngaich ve-ekūö cha ang Pailĕt nö hēk, nö hòṅ ṙānyen Yēsū.

²¹Ngaich pöri cha-a nö hūḵa, nö ngö ṙô, Harāten Ò; harāten Ò.

²²Ngaich ngö ṙô anga-aṅ tö cha; im linūöi heuh, Kūöyòh? Asuh ap tötlöök tī ngòh tarik? Rö-ö chin kanôtukūö töp lökngen kinpaha, nö in Ò, Lökten chin höng hòṅ fohan; ngaich ṙāngen Ò.

²³Höng iṙuhöṙô pöri cha-a nö pōitô nö ve-ekūö ò tö inrātö Ò. Ngaich cha-a nö teūngen ṙô, yik mākūö kūönṙô inrē.

²⁴Ngaich Pailĕt nö chöngu ṙô, tö ap ṙô cha nö hōtu nö kēkaṙen.

²⁵Ngaich anga-aṅ nö ṙānyen ò, ök kūö tinṙōlen ane inrē finël tarik, nö kalonghötvö nö el kinlōngö, ök havëkö cha, kētu pöri ang Yēsū nö i lōn cha.

²⁶Ngaich hē cha nö kēḵngen Ò; ngaich kē-ĕ Sīmōn cha-a ök aṅ Kurĕnī, ṙamā-ang i tavat, hakeunlöng anga-aṅ tö ngam töhakālö, nö unôichrit Yēsū, nö keūnan.

²⁷Ngaich maṙôngö yik tamömrit Ò tarik, kikānö inrē, kamôköre, maharāman inrē.

²⁸Havöötökūöre ang Yēsū nö in cha, nö ngö ṙô, Yī-ö kikānö kūön aṅ Yerūsalem; ui peūnyö Chu; peūnyöre pöri, peuiny yip kūönre inrē.

²⁹Tön yih nup min sakāmö, nup hē ṙô cha min nö ngö ṙô; Tökôlò yin vē töt kūönuvö kikānö, vē tötaṅhaṅv chūök kanūönö, nup teh inrē tötmahapō.

³⁰Ngaich cha-a min nö ngö ṙô tö minë rôngö, Afukkui ih; tö minë rung inrē. Hayunngen ih.

³¹Yē cha nö ngati tī tö u, nö i ngòh tö-ayal chōn, sitih ang min ngòh tönyangngö?

³²Ngaich nët taka nak tahëng nak tötlöökö la-en, hol Ò nö kumpahaivah.

³³Chalôḵ cha-a ngaich nö ik chūök, tö Këlverī invëka; in e cha-a nö harāten Ò, nak tötlöökö la-en inrē, hĕng taka ök lahāmö, lātavē ök tahëng taka.

³⁴Ngaich ngö ṙô ang Yēsū, Kayöngö, aṙēlen cha, tön rö-ö yih nö akahalōn tö tīre. Ngaich katölhökūö höö cha-a tö nuk hilā Ò, nö kalah taneūngenre.

³⁵Sökhak yik tömaṙôngö tarik nö ngëicha, ngaich yik yöngṙen nö hayëḵṙôre tö Ò, nö ngö ṙô, Mahayööken tahëng An; hökngen Ò nö hayöökenre, yē Ò nö Kristū ngam Tēv, nö katöllö Ò.

³⁶Ngaich yik kumyung inrē nö hayëḵngen Ò yihtöre nö in Ò, nö kē-ĕkūö Ò tö ök töhikīölhu vāin;

³⁷Ngaich ngö ṙô cha-a, Hayöökenre Man, yē Meh Rāchakūö vē Yahūti.

³⁸Ngaich i kui Ò ök tökūichi tö ngö, Rāchakūö Yahūti Ön ngòh.

³⁹Ngaich hĕng tak ök tötlöökö la-en ök töharātu, nö ötlēkôre tö Ò, nö ngö ṙô, Kristū Öm Me-eṅ;; hayöökenre Man yĕh; hayööken ai inrē.

⁴⁰Ngaich ngam tahëng nö sapṙô ò, nö vëken ò, nö ngö ṙô, Höng rö-ö öm me-eṅ rēhĕn pa-ekūö tö ngam Tēv; tö meh me-eṅ inrē öm ngatī ötinkôlò.

⁴¹Kô an ayā-a teūngen tö nuk la-enre; öt törahëichyen falngen pöri ngòh tarik.

⁴²Ngaich ngö ṙô anga-aṅ tö Yēsū, Mā; köpölōn pömchö tö chu, yē meh yih im pūlngöre.

⁴³Ngaich ngö ṙô Ang-aṅ tö ò, Tökô-ò ṙô Chin tö meh. Tötaheui man min hol Chu el Peretāis.

⁴⁴Ngaich lohten nö nët sīön köṅny ṙô chalôḵ ngaich ök yöng singūlö, nö i minë taṙòkhöre panam, söl i tö lūöi köṅny ṙô; öt mātu ngam tavūöi.

⁴⁵Ngaich ök tananglö ël ök töhet chūök nö takāichi ṙat.

⁴⁶Ngaich hē Yēsū nö pōitô nö ngö ṙô, Kayöngö eltī Meh tī Chin kētö ngòh ma-alahare. Keuheūthëṙô Anga-aṅ tö e, ngaich kapah.

⁴⁷Ngaich hē mat ngam yöngṙen kumyung nö meuk töngati, ngaich ha-öiny ngam. Tēv anga-aṅ, nö ngö ṙô, Kò Ön ngòh tarik nö tökô-en.

⁴⁸Ngaich ṙòkhöre yik tömaṙôngö yik yamihtöre nö meuk, hē mat cha nö meūkö u, nö havantöre, ngaich nöng kōköre.

⁴⁹Ṙòkhöre yik mikahkūö Ò, yik kikānö inrē hol Ò ṙamā-ang Këleli, nö marôvat nö sökhaka, ngaich meūkö u.

⁵⁰Ngaich hĕng tak ök tarik, Yôhsĕf ök mine-eny ò, ök yöngṙen, tölöök ök nö tarik, tökô-en inrē;

⁵¹Samôḵòṅ ṙô yik holre, la-en cha inrē; aṅ Arimatiā, ök panam yik Yahūti; mameūkkö ngam pūlngö ngam Tēv.

⁵²Anga-aṅ tarik chamuh in Pailĕt nö havëkö ök alaha Yēsū.

⁵³Kē-ĕ ngaich angū-ö; ngaich haṙūngiyö nö el hilā; ngaich ṙātuvö nö ël ök ök anūlö ök tö vīlöngö nö el ihong, tö-öluvö nö hĕng tak aṅ tö tarik.

⁵⁴Ngaich angū-ö nö sakāmö inlēnken; ngaich röhten ngam töhet sakāmö.

⁵⁵Ngaich yik kikānö, yik hol Ò ṙamā-ang Këlelī, nö holröön ò ngaich meuk ök anūlö, meuk ṙinātö ök alaha Ò inrē.

⁵⁶Havantöre cha-a ngaich; ngaich halēnken tötahūsa tavi-i. Heūheure cha-a ngaich im töhet sakāmö, nö sā ngam chöngö.