Read Car_Nicobarese T. LŪKÖS 24 Bible Online

T. LŪKÖS 24 - Car_Nicobarese bible

T. LŪKÖS 24

¹Ngaich im mu-urĕh sakāmö ngam sinat sumkam, ka-euilö kūö tö peuheū cha-a nö yihtöre nö ik anūlö, kumtö nuk tötahūsa töhalēnö tö cha.

²Ngaich kôtökūö cha-a tö ök ihong nö piliôngi nö ṙā-ang i kūö ök anūlö.

³Kuhēthötre cha-a ngaich; ngaich öt maheūṅkuvö tö ök alaha ngam Mā Yēsū.

⁴Ngaich ṙònghöichṙen unṙëhe alaha cha-a, nët tak nak tarik samökhaka nö ranghen cha, tö ayānga mat hilā.

⁵Ngaich kūö cha, nö pa-ekūö ngaich sōntökūöre nö el tumlat; ngaich ngö ṙô cha-a tö më kikānö, Kūöyòh öi chöh tö-aṅ öi i vē tökapah?

⁶Öt ihih Ökuh; ngaich Ök nö havanlöre. Köpölōn tö ṙô Ò nö ve-ekūö yīö, hē Ò nö ṙòngmö i Këlelī;

⁷Nö ngö ṙô, Kētu ön min ngòh Kūön Tarik nö eltī yip tököölö fālen tarik, ngaich harātu; im linūöi sumkam ngaich Anga-aṅ min nö hēk nö havanlöre.

⁸Ngaich fē-ĕlre cha-a tö nuk ṙô Ò.

⁹Havantöre ngaich cha-a nö ṙā-ang im anūlö; ngaich ve-eny nang yik tö kahuk sīön taka tö u, yik tahëng taka inrē.

¹⁰Hēḵ Mariā Mektelīn, Yôhana, ane inrē Mariā ök yöng Yāköp; yik tahëng taka inrē kikānö hol cha; nö ve-eny u nö i yik tanīnöṙô.

¹¹Ngaich anū-ö nöng kintūöyöṙô tö lōn cha; ngaich cha-a nö öt haköp ṙô cha.

¹²Choholre ngaich Pītör, ngaich fal nö kū-ö tö ök anūlö, sōnhöti tö kūöre, ngaich ngëichkö lātuhēt; ngaich höng meuk nuk hilā anga-aṅ. Ngaich chuh patīre anga-aṅ, nöng pingangkūö.

¹³Ngaich im hē e angū-ö sakāmö, nët taka nak chamuh ik panam. Ēmīös ök mine-eny e; ök tö sat mail rôvat, nö ṙā-ang Yerūsalem.

¹⁴Ngaich ve-ekūö höö cha-a, tö lāinyngen nuk töngaichngen.

¹⁵Ṙònghöichṙô cha-a nö ve-ekūöre nö hatönö höö inrē; ṙūötöre ngaich ang Yēsū, ngaich holröön cha.

¹⁶Ngaich hakööpi nuk mat cha, pòn sōtu cha-a nö akahakūö tö Ò.

¹⁷Ngaich ngö ṙô Anga-aṅ tö cha, Asuh ön në ṙô nāṅ, an höng ve-ekūö höö tö kinröönngö nāṅ? Sökngöre cha-a ngaich nöng ūnökūö.

¹⁸Ngaich hĕng tak tö cha, Kli-opas ök mine-eny ò, samapṙô Ò nö ngö ṙô, Höng Me-eṅ öm tötakahalōn tö inlahen nuk töngaichngen i në sakāmö?

¹⁹Ngaich ngö ṙô Anga-aṅ tö cha, Asuh nup? Ngaich ngö ṙô cha-a tö Ò, Nuk inlahen Yēsū, ök aṅ Nāsaret, ök pròfĕt tömihôiṅ nö i la-en, i ṙô inrē, nö i kūö ngam Tēv, i kūö tarik inrē.

²⁰Ngaich yip mākūö kūönṙô yip yöngṙen inrē nö kēḵngen Ò, nö öthakôlöngṙô nö kumpaha, ngaich nö harāten Ò.

²¹Höng meūka pöri īhö ngaich tö Ò, nö Anga-aṅ ṙamānyen Israĕl. Ngaich yih inrē nö linūöi sumkam töngamuh i rô-angen e.

²²Hēk rēvre yip kikānö hol ih, pumngangngökūö ih, yip töka-euilökūö nö chuh ip anūlö.

²³Ngaich hē cha nö öt maheūṅkuvö tök alaha Ò, havantöre cha-a ngaich, nö ngö ṙô, tö cha nö meukkūö ma-ahānga, nak vamënyen Ò nö aṅ.

²⁴Ngaich rēvre yip hol ih, chamuh ip anūlö; ngaich kôtökūö tö e, nöng sā ṙô yip kikānö; öt meūkan pöri cha-a.

²⁵Ngaich ngö ṙô Anga-aṅ tö cha, Ō yī-ö tötakaha, tötka-eūyen ellōn öi ṙātö ellōnre i nup ṙô yik pròfĕt.

²⁶Tö sōtu ang Kristū nö ngatī kanihngen tö u, ngaich kuhēthötre nö unôich nö im kanôlòre?

²⁷Ngaich rēhnyôre Anga-aṅ, nö ṙā-ang mat nup līpöre Môsös, yik pròfĕt inrē; nö ve-eny ṙô u nö in cha, tö inlahen Ò nö i nup töhet līpöre.

²⁸Ngaich röhta cha-a nö ik panam, ök chahuhu cha; ngaich Anga-aṅ nö sā tö hòṅ iṙuhöröön.

²⁹Ngaich asökngen Ò cha-a, ngö ṙô, Höngngöh Man in ai; tön ngaich an nö hòṅ harap; meutti min ngam tavūöi nö ngaich. Ngaich anga-aṅ nö chuh in cha, nö höngngöh.

³⁰Ngaich hē Ò nö ūichngöre nö holkūö cha, nö nyā; kētam Anga-aṅ tö ròtī, ngaich hakôlò e, fòkhang ngaich nö kē-ĕkūö cha.

³¹Ngaich möl nuk mat cha nö löpnyörekūö; ngaich cha-a nö akahakūö tö Ò. Chaṙēviṙen Anga-aṅ ngaich, nö ṙā-ang i kūö cha.

³²Ngaich ngö ṙô cha-a tö höö, Röh ön në ellōn hā nö hū nö in hā, hē Ò nö ve-ekūö hā nö el talöökö; hē Ò nö luvë-enykūö minë töhet līpöre nö in hā?

³³Choholre cha-a ngaich hē e, ngaich havantöre nö i Yerūsalem; ngaich kôtökūö tö yik tö kahuk sīön taka nö hamūlöre, tö yik hol cha inrē.

³⁴Ve-eny nang cha ngaich, Kô Ap Mā nö havanlöre. Meūkö Ap nö ngaich tö Sīmōn.

³⁵Ngaich hēk cha-a nö ve-eny nuk inlahenre nö el talöökö; tö Ò nö mikahtökūö cha, i tī Ò nö fòk ròtī.

³⁶Ṙònghöich ṙô cha-a nö kahòkken u, sökhaka Ang Yēsū ngaich nö el ṙôngö cha; ngaich ngö ṙô tö cha, In yīö an yēḵ ngam kumchikṙen.

³⁷Ngaich cha-a nö tarūka alaha, nö pa-ekūö inrē; pò cha nö meuk ma-alaha, tö lōnre.

³⁸Ngaich ngö ṙô Anga-aṅ tö cha, Kūöyòh öi röiyö alaha? Kūöyòh öi katönga ellōn?

³⁹Yĕh meuk eltī Chu, ukröön Chu inrē; tö e nö Chu-ö. Lūölken Chu yēḵ; öi ngëicha; tön ötalahavö ane inrē öt tangë-evö yin vē ma-alaha; nö sā mat yīö, öi meūkö Chu aṅhaṅv-in.

⁴⁰Keuheūthë ṙô Anga-aṅ tö e, ngaich hameuktö eltīre, ukröönre inrē.

⁴¹Ngaich hē cha nö öl nö ṙātö-ellōnre, tökūö ṙanāmölōnre, nöng pingangkūö; ngaich ngö ṙô Anga-aṅ tö cha, Nya-aṅvkūö öyih?

⁴²Ngaich kē-ĕvkūö Anga-aṅ tö cha, tö töharāngö kāḵ, töpachāka inrē.

⁴³Kētam Anga-aṅ tö e; ngaich nyā-aṅvkūö nö i kūö cha.

⁴⁴Ngaich ngö ṙô Anga-aṅ tö cha, Në nun ṙô Chu, ṙahônyö Chu in yīö, hē Chu ṙòngmö in yīö; tö u nö töhōtu nö keuheūtiṙen nup tökūichiyö nö im chöngö Môsös, i nup pròfĕt, ane inrē i nup salmai, nup inlahen Chu.

⁴⁵Löpnyökūö ellōn cha Anga-aṅ ngaich, pòn hōtu cha-a nö akahalōn tö ṙô ngam töhet līpöre.

⁴⁶Ngaich ngö ṙô Anga-aṅ tö cha, Ngö kinūichngö an tö Kristū nö tökihngen; ngaich havanlöre hēk im linūöi sumkam, nö ṙā-ang yip tökapah.

⁴⁷Ngaich hōtu invöötö ellōn, inṙē-ĕl tökööl inrē nö mumkahtuṙen nö i Mine-eny Ò, i vē taṙòkhöre tarik, urĕh nö i Yerūsalem.

⁴⁸Yī-ö yin mameūkö u.

⁴⁹Yĕh meuk; tīntö ngam kinlēḵngô ngam Yöngre Chin nö in yīö. Höngngöh pöri yī-ö im panam, hanöng saha tī Ò nö hayutlen yīö tö minhôiṅyö, ṙamā-ang lātulöng.

⁵⁰Ngaich Anga-aṅ nö hachōḵngen cha, nö kū-ötö Petenī; hanyākhöl Anga-aṅ tö këlre; ngaich hakôlò cha.

⁵¹Ṙònghöichṙen Anga-aṅ nö hakôlò cha, ngaich chaṙēviṙen nö in cha, ngaich kēḵlöng Anga-aṅ nö el halīöngö.

⁵²Ngaich cha-a nö havantöre nö i Yerūsalem, nö holtö ṙanāmölōn.

⁵³Ngaich nöng ngöhören nö ël ngam töhet chūök nöng ha-öiny ngam Tēv.