Read Car_Nicobarese T. LŪKÖS 3 Bible Online

T. LŪKÖS 3 - Car_Nicobarese bible

T. LŪKÖS 3

¹Im tinneui sīö samyeūheu Tipērias Kaisöör nö hayöng, vīlöngö ang Pòntiös Pailĕt nö mākūö Yūtā, ang Hēròt inrē kun rācha Këlelī, ök kahëm ò inrē Filip kun rācha Itūriā ane inrē Trakônītis, ang Lusaniās inrē kun rācha Apilēnī.

²Hē Annas, Kaifas inrē nö yöng kūönṙô; ngam ṙô ngam Tēv nö yih nö in Yôhan, nö el-inchōn, ök kūön Sakariā.

³Ngaich yihtöre anga-aṅ nö i Yôtön i nup töng ranghö e inrē, mumkahten tö vinôkö invöötö ellōn, nö inṙēlö tökööl.

⁴Sā kinūichngö e, nö i mat līpöre nö ṙô ök pròfĕt Isayā, Ngam ṙô öp hamūḵaṅ el-inchōn, Halēnken talöökö ngam Mā Tēv yin; hachipkö minë kanröönö Ò.

⁵Hatööḵlöngö nup min vëlö; piṙāptukui inrē në rôngö; chip min nup tö kuròk; faṙë cha ël inrē nup talöökö töpisūköre.

⁶Ane inrē ṙòkhöre min tarik nö meuk ngam inyööken aṅ im Tēv.

⁷Lökten ò nö ṙô tö yik tömaṙôngö tarik chamuh in ò, Yī-ö kūön pēch, achīö ap hamôten yīö hatūingöre tö ngam lanīnö yamih?

⁸Lökten yin la-evṙen tö nup la-en ngam invöötö ellōn. Ui hòṅ ngö ṙô tö lōnre, yöngu in tö Aprahām. Tön ngö ṙô chin tö yīö, tö ngam Tēv nö kô-òren nö kēḵ në ihong nö vī-il u nö kūön Aprahām.

⁹Ngaich ap yih hanīöng nö hulalhaka nö i rööntö nup chōn; lökngen nup taṙòkhöre chōn tötlöökö ṙòng nö kūöltuvö, ngaich kavalhötvö nö i kūö tameūyö.

¹⁰Ngaich ngö ṙô më tömaṙôngö tarik tö ò, Sitih inlaha öi pökeh?

¹¹Ngaich sapṙô cha anga-aṅ nö ngö ṙô, Yē ngòh tö nëtö inyut, hökngen ò nö kē-ĕkūö ngam tötaṅhaṅv-in; ngòh tönya-aṅvkūö inrē, hökngen ò nö ngatī.

¹²Ngaich yihtöre nö in ò inrē yik mahamūl ṙāi kinehet chehen, nö hòṅ vōkö; ngaich ngö ṙô cha-a tö ò, Mahaköphöti; sitih inlaha öi pökeh?

¹³Ngaich ngö ṙô anga-aṅ tö cha, Ui harū-ul ṙôken nup hinôtöre kahëḵ yīö.

¹⁴Sitih inlaha öi pökeh ihö? Ngö ṙô yik kumyung tö ò; ngaich ngö ṙô anga-aṅ tö cha, Ui chökhuṙen tö tarik; ui rēhĕn kahë-ev öi ötlöknyu chööḵnyi, höng ngāichölōn tö nup töng raneushöre.

¹⁵Ngaich pò më tarik nö höng meūka, ane inrē më taṙòkhöre tarik nöng ellōnre lōn tö Yôhan, yē ò uvöh nö Kristū.

¹⁶Ngö ṙô Yôhan nö sapṙô cha, Höng vamôkö yīö takô chin chu-ö, öich aṅti tö mak; Öp ihih pöri yamih, tömööḵlö kanô-òṅ tö chu; ötrēhĕn chin kô luhnyö nup rehen kunröpö Ò. Anga-aṅ min vamôkö yīö nö aṅtī tö ngam Töhet Fanöinylö, tameūyö inrē.

¹⁷Öp tö-aṅhaṅv eltī tö haneui, ma-ahetlö ël ap chūökre; föngi pöri min tö ò nup uk nëlö nö i kūö öp töng ötnyangngö tameūyö.

¹⁸Pōyen ṙô an tö nup tahëng, ṙinuhöl alaha më tarik, nö mumkahten tö ngam tölöök inhānga.

¹⁹Ngaich ang Hērôt ap kun rācha kūöre nö ve-evkūö tö ò, pòkūö Hērôti ök pīhö ök kahëm ò, ane inrē pòkūö nup töpōyen tötlöök la-en Hērôt.

²⁰Ṙuhöllōnre anga-aṅ nö hòṅ haköpngökūö ò nö el kinlōngö.

²¹Ngaich hē kinheūṅten vinôkö yik tömaṙôngö tarik, ang Yēsū inrē nö vōkö; ve-ekūötēv, ngaich löpnyörekūö ngam halīöngö.

²²Ngaich ngam Töhet Fanöinylö nö yônti, nö sā tö alahavö nyö-öṅ nö i kui Ò; ngaich löktö el halīöngö ök ṙô yamih, Me-eṅ Man hanāngenlōn Chu, Öm Kūön Chu; in Meh Chin Öich ṙāmölōn takô.

²³Ngaich ang Yēsū nö lūöi anāi samyeūheu, hē ranehten Ò nö mumkahten; nö kūön Yôsĕf (tö lōn), nö kūön Hēlī.

²⁴Nö kūön Mattat, nö kūön Lēvī, nö kūön Melkī, nö kūön Yannai, nö kūön Yôsĕf.

²⁵Nö kūön Mattatiās, nö kūön Amôs, nö kūön Nahom, nö kūön Eslī, nö kūön Nakkai.

²⁶Nö kūön Māt, nö kūön Mattatiās, nö kūön Semëin, nö kūön Yôsĕk, nö kūön Yôta.

²⁷Nö kūön Yôanan, nö kūön Rēsa, nö kūön Sĕrupāpĕl, nö kūön Sialti-ĕl, nö kūön Nērī,

²⁸Nö kūön Melki, nö kūön Atī, nö kūön Kôsam, nö kūön Elmātam, nö kūön Er,

²⁹Nö kūön Yēsū, nö kūön Eli-ēsör, nö kūön Yōrim, nö kūön Mattat, nö kūön Lēvī.

³⁰Nö kūön Sumōn, nö kūön Yūtā, nö kūön Yôsĕf, nö kūön Yônām, nö kūön Ēllīakim,

³¹Nö kūön Melëa, nö kūön Menna, nö kūön Mattatā, nö kūön Natān, nö kūön Tāvit,

³²Nö kūön Yēsi, nö kūön Opĕt, nö kūön Pōas, nö kūön Sāla, nö kūön Nāsön,

³³Nö kūön Aminatap, nö kūön Atmin, nö kūön Arnī, nö kūön Hesròn, nö kūön Pērĕs, nö kūön Yūta,

³⁴Nö kūön Yāköp, nö kūön Isak, nö kūön Aprahām, nö kūön Tīöra, nö kūön Nāhôr.

³⁵Nö kūön Sēruk, nö kūö Rēu nö kūön Pēlĕk, nö kūön Eper, nö kūön Sēla,

³⁶Nö kūön Kāinan, nö kūön Arfaksāt, nö kūön Sem, nö kūön Nō-a, nö kūön Lāmek,

³⁷Nö kūön Matūsala, nö kūön Ēnòk, nö kūön Yāret, nö kūön Mahalëlĕl nö kūön Kāinan,

³⁸Nö kūön Enòs, nö kūön Set, nö kūön Ātöm, nö kūön ngam Tēv.