Read Car_Nicobarese T. LŪKÖS 4 Bible Online

T. LŪKÖS 4 - Car_Nicobarese bible

T. LŪKÖS 4

¹Tööḵlö ang Yēsū tö ngam Töhet Fanöinylö; ngaich havantöre nö i Yôtön, hachōḵoiṙen ngaich tö ngam Töhet Fanöinylö nö el-inchōn.

²Kalaha Anga-aṅ nö fën anāi tum sumkam tö ngam sī-ö; höng öt nya-aṅvkūö Anga-aṅ hē e. Keuheūthëṙen angū-ö, ngaich kapahare Anga-aṅ.

³Ngaich ngö ṙô ngam sī-ö tö Ò, Yē Meh Öm Kūön ngam Tēv, hachöngten ngòh ihong Man yĕh, nö vīngöre nö ròtī.

⁴Ngaich ngö ṙô Yēsū nö sapṙô ò, Töngaichngen kinūichngö an, tö tarik nö ötkô nöng kūö ròtī nö aṅ; höng kūö nup ṙô ngam Tēv pöri.

⁵Ngaich hachōḵoiṙen Anga-aṅ nö ip tömarô-òlkui rôngö, nö hameukhumat tö në pūlngö ngih panam, nöng öt rô-òtuṙen.

⁶Ngaich ngam sī-ö nö ngö ṙô tö Ò, Kē-ĕkūö Meh chin min, tö në chöngö ane inrē kanôlò u; pò u nö kētu nö in chu misī; ngaich kô-òren chu-ö höng meuk kahë-ekūöre.

⁷Lökten yē Meh sōntökūöre i kūö chu, ngaich anu-ö min nö ṙòkhöre nö amin Meh.

⁸Ngaich ngö ṙô Yēsū nö sapṙô ò, Me-eṅ Sātān, heūlngöre man lā-uk Chu; tön töngö kinūichngö an, Im Mā Tēvre man sōntökūöre; höng Anga-aṅ lahök la-en meh.

⁹Hachōḵoiṙen Anga-aṅ tö ò nö hēk, nö i Yerūsalem, ngaich asöklöngö nö i kui ök chūök ngam Tēv, ngaich ngö ṙô Ò, Yē Meh Öm Kūön ngam Tēv, sū-ungre Man yĕh, Öm ṙā-ang hih,

¹⁰Tön töngö kinūichngö an, Tīntö yip ma-ahāngare An min, nö mameukṙen Meh, ane inrē amahten Meh;

¹¹Ane inrē kô-òren cha-a nö aṅtī tö eltīre nö tāyö Meh; hòṅ Mēh ötpalā-aiṙen kunröön tökūö ihong.

¹²Ngaich ngö ṙô Yēsū nö sap ṙô ò, Töngö öp yih ṙô, Uh man kalah ngam Mā Tēv.

¹³Keuheūthëṙen ngam sī-ö tö nup kinlaha; ṙāngen Ò ngaich anga-aṅ, nö rahëchhangkūö.

¹⁴Ngaich Yēsū nö havantöre nö i Këleli, aṅhaṅv-in tö kanô-òṅ ngam Töhet Fanöinylö. Ngaich keuheūtngöre chūök hināngö Anga-aṅ tö yik töng ranghöre.

¹⁵Mumkahten Anga-aṅ ngaich nö el chūök cha nö ve-ekūötēv, ngaich hakūyiṙen tö taṙòkhöre.

¹⁶Yihtöre ngaich Anga-aṅ nö i Nāsaret, i chūök inruklö Ò; ngaich sāre Anga-aṅ nö kuhēthötre nö el chūök vine-eṅkūötēv, he el töhet sakāmö, söklöre ngaich Anga-aṅ nö ve-ekūö līpöre.

¹⁷Kētu ngaich ök līpöre ngam pròfĕt Isayā, nö in Ò; feheny Anga-aṅ tö mat e, ngaich kôtökūö tö chūök ngam tö ngö kinūichngö:

¹⁸Aṅhaṅv-in Chin tö ngam Töhet Fanöinylö ngam Mā Tēv; pò Ò nö vīten Chu Öich mumkahten vē yāich, tö ngih tölöök inhānga; tīnngen Chu An, Öich ve-eny ṙinānyö vē tökē-ĕ, ane inrē yip tötmeuk nö hēk nö meuk; ṙamānyö yip töhanyahka;

¹⁹Ve-eny ngam samyeūheu töhōḵovö tö ngam Mā Tēv.

²⁰Öphang Anga-aṅ tö kūö ngam līpöre, ngaich kētö e nö hēk nö ik yōm e; ngaich ūichngöre. Ngaich yik tömaṙôngö me-el ngam chūök vine-eṅkūötēv nöng hatīönan.

²¹Ngaich ngö ṙô Anga-aṅ tö cha nö rĕhnyôre, Tötaheui ön ngih töhet līpöre nö teungtökūö nö el nang yīö.

²²Ngaich cha-a nö ṙòkhöre mat nö ngëichken Ò, ngaich pingangkūö tö nuk ṙô lamöknyö elvāng Ò. Ngaich ngö ṙô cha-a, Röh Angah nö kūön Yôsĕf?

²³Ngaich ngö ṙô Anga-aṅ tö cha, Tö hòṅ ngö ṙô yin tö Chu tö ngih inchōḵoṙô, Lame-en tövahavö, kahngenre Man, halankenre; sā tīre Man yĕh i ngih panam Meh, tö nup töpōyen ahang ih, la-en Meh i Kafarnahum.

²⁴Ngaich ngö ṙô Anga-aṅ, Tökô-ò ṙô Chin tö yīö, öt hĕng tak pròfĕt töhōḵovö nö i panamre

²⁵Tökô-ò ṙô Chin tö yīö, maṙôngö yik misī tafīösi nö i Israĕl, hē ngam halīöngö nö öp ngörekūö nö lūöi samyeūheu tafūöl chumngëṅtö, hē yanihih ök yöng inyāichö nö im panam.

²⁶Ngaich höng humengkang chūök tinīnngö anga-aṅ, höng in Sarefat, ip panam Sītōn.

²⁷Hēk pōyen misī yik töyeūnyu nö i Israĕl, hē ök pròfĕt Ēlaisa; ngaich öthĕng taka tö-ahetlöng tö ò, höng Nāman ök aṅ Sīria.

²⁸Ngaich yik aṅ ël ngam chūök vine-eṅkūötēv, nö ṙòkhöre nö līn, hē cha nö hāngö u;

²⁹Choholre cha-a ngaich, nö ha-ōnyen Ò nö ël ök panam, ane inrē hachōḵngen Ò nö i kui rung, i chūök vinīlö ök panam cha; pò cha nö hòṅ kuringten Ò.

³⁰Ngaich pöri Anga-aṅ nöng lök el ṙôngö cha, ngaich kiröönngöre.

³¹Ngaich yihtöre Anga-aṅ nö i Kafarnahum, ök panam i Këlelī. Mumkahten cha ngaich Anga-aṅ, hē el töhet sakāmö.

³²Pingangkūö ngaich cha-a tö ṙô Ò, nö mumkahten; pò Ò nö sā ṙô töpōiyen chöngö.

³³Ngaich hĕng taka ök umuh tarik ël ök chūök vine-eṅkūötēv, ök tötlöökö aṅ-in tö sī-ö; pōitô ngaich anga-aṅ nö hūḵa,

³⁴Eh! Sitih fālen öi min ihö, in Meh; Me-eṅ Yēsū aṅ Nāsaret? Yamih Öm fëlngen ih? Akahakūö chin tö Meh, Töhet Man aṅ im Tēv.

³⁵Ngaich ngö ṙô Yēsū nö vëken ò, Ṙāngôre mana; kunyī-inyre öm ṙā-ang in ò. Ngaich hē ngam sī-ö nö afukngen ò, nö el ṙôngö, kunyī-inyre ngaich anga-aṅ nö ṙāngen ò; höng öt chökhuṙen tö ò.

³⁶Pingangkūö ngaich më taṙòkhöre, ngaich ngö ṙô cha-a tö höö, tösitih öng ngih ṙô, tö Ò nö holtö chöngöre nö tölṙô më tötlöök sī-ö, ngaich kunyī-inyre cha-a.

³⁷Hāngö inlahen ngaich Anga-aṅ nö keuheūtngöre chūök i nup töng ranghöre.

³⁸Choholre Anga-aṅ ngaich nö ṙā-ang ël ngam chūök vine-eṅkūötēv; kuhēthötre ngaich nö el patī Sīmōn. Ngaich ök yöng pīhö Sīmōn, nö pōihangen nö vūöl; ve-evkūö ngaich Anga-aṅ tö cha, töpòkūö ò.

³⁹Söklöre ngaich Anga-aṅ nö la kui ò, ngaich vëkö ngam vanūöyö ò; ṙā-ai ngaich anga-aṅ tö e. Ilööṙen ngaich anga-aṅ nö choholre, nö meukṙen cha.

⁴⁰Ngaich hē ël maneutti ngam tavūöi, ṙòkhöre yik töṙōlkangen invah nö kētu nö in Ò. Ṙātö eltīre ngaich Anga-aṅ nö i kui cha, nö halanken cha.

⁴¹Ngaich më sī-ö ṙamā-ang i yik tömaṙôngö nö kunyī-inyre, pōitô nö ngö ṙô, Me-eṅ Man Kristū Öm Kūön ngam Tēv. Ve-evkūö cha-a tö Ò, höng öt halöngnyuṙô nö ṙô-òvö, pò cha nö akahakūö tö Ò nö Kristū. Mikāhaten Yēsū Nö El Chūök Vinë-ekūötēv (Mk 1.35-39)

⁴²Ngaich peuheū-eulre angū-ö, kunyī-inyre Anga-aṅ ngaich chuh ik töhĕngkang chūök, el-inchōn. Höng chöhö Anga-aṅ ngaich tö më tömaṙôngö; yihtöre ngaich cha-a nö in Ò, ngaich hòṅ asökngen Ò lang, nö sōten Ò nö ṙāngen cha.

⁴³Ngaich ngö ṙô Ò tö cha, Hòṅ mumkahten Chin i tahëng panam inrē, tö ngih tölöök inhangkö ngam pūlngö ngam Tēv; pòn angū-ö tinīnngö Chu.

⁴⁴Ngaich mumkahten Anga-aṅ nö el chūök vine-eṅkūötēv nö i Këlelī.