Read Car_Nicobarese T. LŪKÖS 5 Bible Online

T. LŪKÖS 5 - Car_Nicobarese bible

T. LŪKÖS 5

¹Ngaich hē më tömaṙôngö nö singtöre nö in Ò, nö hang ṙô ngam Tēv; höng sökhaka Anga-aṅ nö i Kenneseret nö i kūö mak.

²Nët nòng maheuṅk Anga-aṅ tö kupòk töng ngöh nö el ök mak. Öt aṅhaṅv pöri; pò yik yōm kinëḵeṅ kāḵ nö kiröönngöre nö söichmat nuk inhāṅlre.

³Hĕng nòng chūök Anga-aṅ ngaich nö yôklö nö el ök kupòk Sīmōn; ngaich ve-ekūö ò Anga-aṅ nö rahëch höinytī nö ṙuhöinyre. Ūichngöre Anga-aṅ ngaich, nö mumkahten yik tömaṙôngö nö el ngam kupòk.

⁴Keuhēthë ṙô Anga-aṅ, ngaich ngö ṙô Ò tö Sīmōn, Ṙuhöinyre man im tö-aṙūk; hô-òti tö ngam inhāṅl, öm ahāl kāḵ.

⁵Ngaich ngö ṙô Sīmōn nö sapṙô Ò, Mahaköphöti; hĕng mitööm in amòh harëtnyö elmatre; ngaich höng ötpô-òvö. Ngaich pöri yēḵ i ṙô Meh chin ngaich, hôtö ngih inhāṅl.

⁶Keuheūthëṙen cha-a tö e, ngaich pōyen nuk kāḵ tö ahālhötvö; takaichköṅny ngaich nuk inhāṅl cha.

⁷Have-eti cha-a ngaich tö yik holre me-el tahëng nòng kupòk, pò cha nö hòṅ hōluṙen tö cha, Yihtöre cha-a ngaich, hatööḵöl tö minë kupòkre, ngaich öhngen anū-ö nö lōngti.

⁸Höng meuktöre ang Sīmōn Pītör tö e, ngaich sōntökūöre nö i kūö Yēsū, nö ngö ṙô, Ō Mā, kē-ĕngre Man in chu; tön tököölö fālen chin chu-ö tarik.

⁹Pò ò nö pingangkūö, yik taṙòkhöre hol ò inrē, tö ṙòken nuk pôḵ cha kāḵ.

¹⁰Ngati inrē nāṅ Yāköp, nāṅ Yôhan, nak kūön Sepetī, yik hol Sīmōn. Ngaich ngö ṙô Yēsū tö Sīmōn, Uh man pa-ekūö; töngamuhöten man min öm kamëḵ tarik.

¹¹Tūökhöt cha-a tö nuk kupòkre nö el tanyô, ṙā-ang tö u, ngaich tömrit Ò.

¹²Ngaich hē Ò nö ik tö hĕng panam, hĕng taka ök umuh tarik töpōihangen töyeūnyu, höng meuktöre anga-aṅ tö Yēsū, sōnhöti tö kūöre, nö ve-ekūö Ò, nö ngö ṙô, Me-eṅ Mā, yē Meh lōnuvö, kô-òren Man löökentī tö chu.

¹³Hateuthöiny Yēsū tö këlre, nö lūölken ò, nö ngö ṙô Hōḵ Chin; lööken man yēḵ. Ngaich ilööṙen minë yeūnyö nö ṙāngen ò.

¹⁴Sōtu anga-aṅ ngaich tö Ò, nö ve-enynang tarik; Kiröönngöre pöri me-eṅ, öm hameuktöre ip kūönṙô; kē-ĕti me-eṅ tö nup tökētuvö tökūö lanööken meh, sā hinôtöre tö Môsös; nö inmeukhömat cha.

¹⁵Vaichtö ṙuhöinyre hināngö pöri Anga-aṅ; maṙôngö yik tarik yamihtöre tö hòṅ halankaṙen tö nuk vahre.

¹⁶Havanngöre pöri Anga-aṅ nö el-inchōnngö; ngaich ve-ekūötēv.

¹⁷Ngaich hĕngheuh ik hē u anū-ö sakāmö tö Ò nö mumkahten, ngaich umuh nö ūichhaka yik Feresī ane inrē yik mahaköptö ngam chöngö, yik ṙamā-ang taṙòkhöre panam i Kelelī, i Yūtā, ane inrē i Yerūsalem ngaich ngam kanô-òṅ ngam Mā Tēv nö in Ò, nö halanken tövahavö.

¹⁸Ngaich hĕng taka ök umuh tarik tökētuvö nö el chamamre, ök tölum; ngaich chöh lökhötre cha-a nö kēhöt ò, ane inrē ṙāten ò nö i kūö Yēsū.

¹⁹Ngaich öt maheūṅku cha-a tö lökhötre, pò më tömaṙôngö. Yônlö cha-a ngaich nö i kui ök patī, ngaich löktö i kui e tī cha a nö hôten ò nö ël ök chamamre nö i kūö Yēsū.

²⁰Höng meuktöre Anga-aṅ tö mikah cha, ngaich ngö ṙô Ò, Me-eṅ tarik, aṙēlöng nuk tökööl meh nö ngaich.

²¹Ngaich yik kamūich, yik Feresī in re, nö ngö ṙô nö inrē, Achīö ang ngòh tötmilēḵṙô tö ngam Tēv? Achīö ap tökô nö aṙē-ĕl tökööl, höng humeng taka An, ngam Tēv?

²²Akahtöheichlōn pöri ang Yēsū, tö lōn cha, ngaich ngö ṙô nö sapṙô cha,

²³Asuh ap ellōn yīö öp lōn? Ngam yòh öng tölööṙen nö ṙô? Aṙēlöngö nuk tökööl meh nö ngaich, ane ṙöng, Choholre man kiröönngöre?

²⁴Hòṅ yīö pöri akahalōn tö ngòh Kūön Tarik nö kô nö aṙē-ĕl tökööl nö ing panam, ngö ṙô Ò tö ngam tölum, Ngö ṙô Chin tö meh, Choholre man; kēḵ ngam chamamre. Kuṙòh; chuh patīre.

²⁵Ilööṙen anga-aṅ ngaich nö choholre, nö i kūö cha; kētam tö ök chūökre nö hulalhaka ngaich chuh patīre, nöng ha-öiny ngam Tēv.

²⁶Ngaich pingangkūö më tömarôngö; ngaich cha-a inrē nö ha-öiny ngam Tēv. Hĕnghöre tööḵlö cha-a tö pinhëṅ-eṅkūöre, ngö ṙô, Meuk tötha-eh in tötaheui.

²⁷Keuheūthëṙen anū-ö ngaich kiröönngöre Anga-aṅ. Ngaich hĕng taka ök maheuṅk Ò, mahamūl ṙāi kinëhöt chehen, Lēvī ök mine-eny ò; höng ūichhaka anga-aṅ nö i chūök inmūlö ṙāi kinëhöt chehen, ngaich ngö ṙô Yēsū tö ò, Ta-a tömrit Chu man.

²⁸Ṙā-ang anga-aṅ tö nuk taṙòkhöre, ngaich tömrit Ò.

²⁹Ngaich pōyentī anga-aṅ nö halanṙen nya-aṅkūö Ò nö i patīre. Ngaich maṙôngö yik mahamūl ṙāi kinëhöt chehen, yik tahëng inrē, amūichhaka nö holkūö cha nö nyā.

³⁰Ngaich yik Feresī, yik kamūich inrē, nö vahëkuvö nö i yik mahaköp nö in Ò, nö ngö ṙô, Kūö yòh öi yī-ö nyā, òk inrē, öi holkūö mahamūl ṙāi kinëhöt chehen, tököölö fālen inrē?

³¹Ngaich Yēsū nö sapṙô cha, nö ngö ṙô, vē tölööken rö-ö yin nö hòṅ lamë-evṙen; höng vē tö vahav pöri.

³²Rö-ö Chin yamih öich havëkö vē tötmichūṙen; mahavëkö vē tököölö fālen pöri, nö havöötö ellōnre.

³³Ngaich ngö ṙô cha-a tö Ò, Ṙöpen yip mahaköp nö in Yôhan nö ahik, ve-ekūötēv inrē; ngatī inrē yip mahaköp nö i yip Feresī. Ngaich pöri më mahaköp nö in Meh, nöng nyā hĕnghöre òk inrē.

³⁴Ngaich ngö ṙô Yēsū tö cha Kò-òren öi tī-ivö tö më hamòl ngam töhapihö nö ahik, yē ò nö ṙòngmöng in cha?

³⁵Tösakāmu yanihih öp min, hē ngam töhapihö nö kē-ĕyö nö ṙā-ang in cha; ngaich möl cha-a min nö ahik hē e.

³⁶Ngaich hĕng ök inchōḵoṙô Ò nö in cha; Öt tarīkuvö tumkaichlö tufömngöre hilā ngaich chōktö e nö i hötṙeh hilā, pòn takaich min ngam tufömngöre, öthōḵen höö anū-ö inrē min tö ngam hötṙeh töm tuföm ngöre.

³⁷Öt tarīkuvö inrē ma-asëhöt tufömngöre vāin, nö ël nup hötṙeh uk. Yē ò nö ngatī, ngaich ngam tufömngöre vāin min nö lakukköṅnykūö tö ngam uk; ngaich aṙösi min angū-ö, ngaich ötkôlò inrē min ngam uk.

³⁸Në tufömngöre pöri vāin asëhötvö nö ël tufömngöre uk; ngaich kö kôlò nyöre anū-ö.

³⁹Ane inrē öt tarīkuvö tö hòṅ òk tufömngöre vāin, yĕn ngaichkūö tö ngam hōtṙeh; pò ò nö ngö ṙô, Ngam hötṙeh an tölöök.