Read Car_Nicobarese T. LŪKÖS 6 Bible Online

T. LŪKÖS 6 - Car_Nicobarese bible

T. LŪKÖS 6

¹Ngaich hē ök töhet sakāmö, Anga-aṅ nö kiröönngöre nö lök ël ök chūök sāiny; ngaich yik mahaköp nö köich ṙòng u; ngaich nya-aṅvkūö; nö kitöinyö u nö eltīre.

²Ngaich rēvre yik töngö ṙô Feresī, Pò yòh öi yī-ö ngatī, yĕn tötkô nö la-en vö hē el töhet sakāmö?

³Ngaich ngö ṙô Yēsū nö sapṙô cha, Höng öt ve-ekūö ngih öi yī-ö, ngam inlahen Tāvit, hē ò nö kapahare, anga-aṅ, tö yik hol ò inrē?

⁴Sitih ang nö kuhēthötre nö ël ök patī ngam Tēv; ngaich kēḵ, hĕnghöre nyā nuk töhet ròtī; ngaich kē-ĕkūö yik holre anga-aṅ inrē; ngam tötkô nö nya-aṅkūö cha, pòn höng nyā-aṅ töng kūönṙô.

⁵Ngaich ngö ṙô Anga-aṅ tö cha, Ngòh Kūön Tarik ön kòl mākūö töhet sakāmö.

⁶Ngaich im tahëngngöre töhet sakāmö, kuhēthötre Anga-aṅ nö el chūök vine-eṅkūötēv, ngaich mumkahten; ngaich hĕng taka ök umuh tarik tölūmö kël tö ök lahāmö.

⁷Ngaich höng ngëichka Anga-aṅ tö yik kamūich, yik Feresī inrē, yē Ò nö hòṅ halanken hē el töhet sakāmö; pò cha nö hòṅ löknyuṙô nö vëken Ò.

⁸Ngaich nöng akahalōn Anga-aṅ tö ellōn cha; ngö ṙô Ò tö ngam tarik, ngam tö lūmö kël, choholre man, söklöre ellōn, Choholre anga-aṅ ngaich, nö sökhaka.

⁹Ngaich ngö ṙô Yēsū tö cha, Hatönö yīö Chin. Kô-òren öi la-evṙen tö tölöök hē el töhet sakāmö, tötlöök ṙöng? Inyööken nômö, ane ṙöng ötinkôlò e?

¹⁰Ngaich havīngö matre Anga-aṅ, nö ngëichkö kūö cha, ngaich ngö ṙô tö ò, Hateutnyökëlre mana. Ngaich ngatī anga-aṅ, ngaich ngam kël ò nö lööken.

¹¹Ngaich tööḵlö cha-a tö kumlō-ovre; ve-ekūö höö yin tö inlaha tīre tö Yēsū.

¹²Ngaich hē u anū-ö sakāmö, Anga-aṅ nö chuh i kui ök rôngö nö ve-ekūötēv; iṙuöhen Anga-aṅ nö hĕng mitööm nö im vine-eṅkūö ngam Tēv.

¹³Peuheū-eulre angu-ö: havë-eti Anga-aṅ tö yik mahaköp; ngaich nët sīön taka katöllö Anga-aṅ, tö yik tö kaheūkö tö Ò, nö tanīnöṙô,

¹⁴Ang Sīmōn, ngam kaheuk Ò nö Pītör Antaru inrē ök kahëm ò; nāṅ Yôhan inrē; nāṅ Filip nāṅ Partòlòmai inrē;

¹⁵Nāṅ Mëtiv nāṅ Tômös inrē; ang Yāköp ök kūön Alfai, ane inrē Sīmōn Sĕlòt,

¹⁶Ang Yūtā ök kūön Yāköp, ane inrē Yūtā Iskaryôt ök mahachīl.

¹⁷Yôntī Anga-aṅ ngaich, nö holten cha; ngaich sökhaka nö ik töṙā-akūö chūök, tö maṙôngö, yik mahaköp, ane inrē maṙôngö yik tarik ṙamā-ang Yūtā, Yerūsalem inrē, ṙamā-ang nup panam töröhnyi nö i kūö mai, i Tūrös Sītōn inrē; yik yamihtöre nö hang ṙô Ò, tö hòṅ halankaṙen vah inrē.

¹⁸Ngaich halankaṙen yik tötkôlò, tö-aṅhaṅv-in tö sī-ö.

¹⁹Ṙòkhöre yik tömaṙôngö tarik nö hòṅ sūöhken Ò; pò ök kanô-òṅ nö löknyö in Ò; ngaich lööken cha-a nö ṙòkhöre.

²⁰Chingôhòl Anga-aṅ tö matre, nö i yik mahaköp, ngaich ngö ṙô; Tökôlò yin yī-ö yāich, pò ngam pūl ngö ngam Tēv nö pūl ngö yīö.

²¹Tökôlò yin yī-ö tökapahare töngamuh; pò yīö min tööḵngen. Tökôlò yin yī-ö pameuny töngamuh; pò yīö, min hayīölkūö.

²²Tökôlò yin yī-ö, yē tarik min nö kunyahaṅelmat tö yīö, yē cha inrē nö harēvngen yīö töre, nö sumrōngngökūö yīö, sā tötlöök, töpòkūö ngòh kūön Tarik.

²³Ṙāmölōn yin i hē e angu-ö, tisôköre inrē tö ṙanāmölōnre. Yĕh meuk, tön pōyen nup raneushö yīö el halīöngö. Pòn töngati tī yik yöng cha tö yik pròfĕt.

²⁴Tötkôlò pöri yī-ö tökôlò; pò yīö ngaich teūngen tö inṙamlōnre.

²⁵Tötkôlò yī-ö tötööḵngen töngamuh; pò yīö kapahare min. Tötkôlò yī-ö mahayīölkūö töngamuh; pò yīö min haṙivlōn, öi peuiny.

²⁶Tötkôlò yī-ö, yē vē tarik nö löökö ṙô tö yīö; pòn töngati tī yik yöng cha tö yik tötkô-en pròfĕt.

²⁷Ngö ṙô pöri Chu-ö tö yīö, yī-ö hamang, Hāngenlōn yin tö yip takunyahaṅelmat tö yīö, löökötī i yip tösumrīk tö yīö;

²⁸Hakôlò yip töt lamëkôre tö yīö; ve-elkui yip tö līn kūö sumrīkre tö yīö.

²⁹Ngòh töhĕng lā tī nö fatāk kūö meh, kētö ngam lā tahëng me-eṅ in ò; ane inrē i ngam kamëḵ ngam tökiröng inyut meh, un ma-iṅhöṅ ngam tö kūöṅnö inyut meh inrē.

³⁰Kē-ĕkūö yip mahavëkökūöre mana; ane inrē i ngam kamëḵ chehen meh, un havëka anū-ö nö hēk.

³¹Ane inrē ṙòkhöre lōn tö tarik, sā lōn yīö hōten cha nö ngatī nö in yīö; ngati tī inrē yī-ö tö cha.

³²Yē yīö öi hāngenlōn tö yip töhāngenlōn tö yīö, asuh ap öre ineū-euṅ yīö? Ngatī yin vē tököölö fālen nö hāngenlōn tö yip töhāngenlōn tö cha.

³³Yē yīö öi hakôlò yip tökôlòtī tö yīö. Asuh ap öre ineū-euṅ yīö? Ngatī yin vē tököölö fālen inrē.

³⁴Yē yīö öi haṙūönghökūö yip chūök yīö öi teūngen, tö lōnre; asuh ap öre ineū-euṅ yīö? Ngatī yin vē tököölö fālen nö haṙūönghökūö tököölö fālen, ngaich sā ṙôken nup töhaṙūöngö taneūngen nö hēk.

³⁵Hāngenlōn pöri yī-ö tö yip tökunyahaṅelmat tö yīö, kôlòtī tö cha; haṙūönghökūö cha, ui uhā-en tö cha, Pōyen nup min raneushö yī-ö; ngaich yīö min kūön ngam Lamātulöng, pò Ò Anga-aṅ nö tö-aheuk tö vē tötameūṅ, ane inrē vë tötlöök.

³⁶Aheukölōn yin yi-ö yēḵ, sā ngam Yöng yīö nö tö-aheukölōn.

³⁷Ui vahëkuvö; ngaich yī-ö min öt vinëkuvö. Ui ötkôlòtī; ngaich yī-ö min inkôlu ṙô. Aṙē-ĕl; ngaich yī-ö min aṙēlöngö.

³⁸Kē-ĕti; ngaich yī-ö min kē-ĕvkūö; löökö ṙôken, tīpö, kilāngö, taṙēchi, kinë-eṅkūö yī-ö min. Pòn sā ṙôken tī yīö, ngaich angu-ö ṙôken kine-eṅkūö yīö min hēk.

³⁹Ngaich hĕng ök inchōḵoṙô Ò tö cha; Kô-òren aich vē tötmeuk nö hachōkūö vē tötmeuk? Röh aich öre nö nëtre taka nö suktöre nö el vëlö?

⁴⁰Rö-ö ön ngòh mahaköp nö pōyö tö ngam mahaköptöre; taṙòkhöre pöri vē tökeuheūt tö haköpre min nö sā ngam mahahöptöre.

⁴¹Pò yòh öm me-eṅ ngëichkö chōnmat ngam holre. Ngaich pöri öm öt meuk ngam yöng chōn el matre me-eṅ?

⁴²Hēk sitih kanô-òṅ öm öre, öm ngö ṙô töm holre. Hol chu: hökngö tī chu man, kēḵngö ngam chōnmat meh; yē meh öm öt meuk ngam tökiröng chōnmatre? Mahanyatkö-elmat man, urĕh man, kēḵngö ngam tökiröng chōn el matre; hòṅ meh löökö mat, yē meh kēḵngö ngam chōnmat ngam holre.

⁴³Pòn rö-övö nö ötkôlò ṙòng në tölöök chōn; hēk rö-övö nö löökö ṙòng në tötlöök chōn

⁴⁴Pò në chōn nö kô-òren nö i nup ṙòngre inkaha. Pò vē tarik nö öt hamūl anychīr nö i ṙòng töchökhukūö; öt hamūl angkūr inrē nö i ṙòng lamāna töchökhukūö.

⁴⁵Ngòh tölöök tarik kēngö tötlöök nö ṙā-ang öp tölöök chehen ellōn ò. Ngòh tötlöök pöri tarik kēngö tötlöök nö ṙā-ang öp tötlöök chehen ellōn ò. Pòn sā ṙôken nup me-ellōn, ngatī ṙô ngam elvāng nö ṙô-òvö.

⁴⁶Pò yòh öi, Mā, Mā ngö ṙô öi havëken Chu; ngaich rö-ö öi la-evṙen tö nup ṙô Chu?

⁴⁷Ngòh yamihtöre nö in Chu, nö hang ṙô Chu, ngaich ngatī la-en inrē; hòṅ hameukhömat yīö Chin töp tö sā ò.

⁴⁸Sā öp tarik an, öp vamī-il patīre öp tö aṙū-utī nö ul: vī-iti tö rööntö machööḵlö nö i kui ihong. Ngaich yĕn ṙööingö, ngaich ngam mak nö pavkö kaha ngam patī; ngaich nö ötkô nö kiyinkö e; pò e nö kôlò inulti.

⁴⁹Ngòh hamang pöri tarik, ngaich rö-ö nö ngatī la-en; höng sā öp tarik an anga-aṅ, öp vamī-il patīre nöng öt chūöku rööntö machööḵlö nö el tumlat. Ngaich pavka kaha angū-ö tö ngam mak, ngaich ilööṙen nö fukngö; ngaich pōihangen ötkanôlò angū-ö patī.