Read Car_Nicobarese T. LŪKÖS 7 Bible Online

T. LŪKÖS 7 - Car_Nicobarese bible

T. LŪKÖS 7

¹Keuheūthë ṙô Anga-aṅ, nö el nang yik tarik, ngaich kuhēthötre Anga-aṅ nö i Kafarnahum.

²Ngaich hĕng taka ök kūön ök yöngṙen tö hēngòng kumyung ök hanāngenlōn ò, vahav nö ngaich, nö hòṅ öhngen nö kapah.

³Höng hangtöre anga-aṅ tö yik mākūö Yahūti nö in Ò; ve-ekūö Ò nö yihtöre nö hayööken ök kūön Ò.

⁴Ngaich cha-a nö yihtöre nö in Yēsū; ngaich kô-òṙô cha-a nö ve-ekūö Ò, nö ngö ṙô: Törôngen öp anga-aṅ nö hayööken Meh;

⁵Pò ò nö töhāngenlōn tö hī; hĕnghölö ap nö vī-il chūök hī ve-ekūötēv.

⁶Ngaich ang Yēsū nö hol röön cha. Ngaich öt marôvat Anga-aṅ tö ngam patī; tīnhang ngam yöngṙen töhēngòng kumyung, tö yik holre nö ngö ṙô tö Ò: Mā; uh Man harëtnyö elmatre, Öm yihtöre i patī chu; tön rö-övö chin tökanô-òṅvö.

⁷Lökten chu ötrēhĕn lōnuvö tö yinihtöre in Meh kūö e. Höng ṙô-òvö Man yĕh; ngaich kô-òren ap kūön chu min nö lööken.

⁸Pò chu chu-ö inrē me-elkatòh chöngö; aṅhaṅv elkatòh inrē chu-ö tö kumyung. Ngaich hĕng taka tahölṙô chu-ö tö ngòh, Kuṙòh, öich ngö; ngaich kô-òren anga-aṅ nö kiröönngöre. Hēk, Ta-ih, ngö tö ngam tahëng taka; ngaich kô-òren anga-aṅ nö yihtöre. Hēk, La-evṙen man, ngö chu-ö tö ngòh kūönre; ngaich kô-òren anga-aṅ nö la-evṙen tö e.

⁹Höng hangtöre Yēsū tö u, ngaich uṙeh Anga-aṅ tö ò; havööhöl Anga-aṅ tökūöre, ngaich ngö ṙô Ò tö yik tömaṙôngö, tamömrit Ò, Ngö ṙô Chin tö yīö, öt kanôtuvökūö Chin tö töngatī ṙôken mikah, höngröö rö-övö nö i Israĕl.

¹⁰Ngaich më tötīni nö havantöre nö im patī; ngaich kôtökūö tö ngam kūön nö lööken.

¹¹Ngaich ilööṙen unôichrit e, tö Ò nö chuh ik panam Nēin, ngaich yik mahaköp nö hol Ò, yik tömaṙôngö inrē tarik.

¹²Ngaich röhta Anga-aṅ nö i kūö inkūp ök panam, ngaich meuk ök tökapah, tökeunnyuvö, töng hĕng maneuk ök, nö kūön ök yöngre, ök tafīösi yöng ò kikānö. Maṙôngö yik tarik aṅ ngam panam nö hol ò.

¹³Höng meuktöre ngam Mā tö ò, ngaich aheukölōn tö ò, ngaich ngö ṙô Anga-aṅ tö ò, Uh man peuiny.

¹⁴Yihtöre Anga-aṅ, nö haröhtöre, ngaich lūölkö ngam chūök ngam tökapah ngaich sökngöre yik kameūnan. Ngaich ngö ṙô Ō, Me-eṅ, tö-ayal tarik, choholre; ngö ṙô Chin tö meh.

¹⁵Ngaich ngam tökapah nö ūchlöre, ngaich kaknyöre nö ṙô-òvö; ngaich kētuvö anga-aṅ tö Ò nö ik yöngre.

¹⁶Ngaich pa-ekūö yik tömaṙôngö; ngaich ngö ṙô cha-a nö ha-öiny ngam Tēv, Hĕng taka ön ngòh yöng pròfĕt mi-in hī; meukṙen vē tarikre An ngam Tēv.

¹⁷Ngaich Anga-aṅ nö hāngö nö i Yūtā, i nup taṙòkhöre ranghöre inrē.

¹⁸Ngaich yik mahaköp nö in Yôhan, nö ve-eny nang ò tö u. Nëttak havëti ngaich ang Yôhan, nö in re tö yik mahaköp;

¹⁹Ngaich tīni cha-a nö im Mā, nö ngö ṙô, Me-eṅ Öm yamih? Höngkökūö tahëng ṙöng öi?

²⁰Chalô minā tarik nö in Ò, ngaich ngö ṙô cha-a, Tīntu an in Meh tö Yôhan öp Vamôk, ai hatönö Meh, Me-eṅ Öm yamih? Höngkökūö tahëng ṙöng öi?

²¹Hē e Anga-aṅ nö halanken yik tö maṙôngö tövahvö, yik töpōihangen, ane inrē tö sī-u alaha; kētö mat yik tömaṙôngö tötmeuk inrē.

²²Ngaich ngö ṙô Anga-aṅ nö sapṙô cha, Kuṙòh, kiröönngöre nan; ve-enynang Yôhan tö nup maheuṅkre, nup ahangre inrē; tö vē tötmeuk nö teūngen tö matre; vē tökaròk nö kiröönngöre; vē töyeūnyu nö lööken; ane inrē vē töthang nö hang; hachohlöng inrē tökapah; mikahtuṙen vē yāich, tö ngam tölöök inhānga.

²³Tökôlò ön ngòh töt uhā-alōn nö in Chu.

²⁴Chuhhë nak tötīntuvö tö Yôhan; ngaich ngö ṙô Ò tö Yôhan, nö i më tömaṙôngö, Asuh ök maheuṅk yīö, öi chuh el-inchōn? Tafūyö ökuh tökalöka tö kūö kuföt?

²⁵Asuh ṙöng ök maheuṅk yīö? Tarik ṙöng ökuh, nö töhilātö tötanyīka? Yĕh meuk yin, tö vē tölöökö hilā, ane inrē tökôlòṙen, nö iyöng i patī rācha.

²⁶Asuh ök pöri maheuṅk yīö? Pròfĕt ṙöng? Hòṅ; ngö ṙô Chin tö yīö, mööḵlö ṙôkö ap tö pròfĕt.

²⁷Anga-aṅ ök töngö kinūichngö, Yĕh meuk; tīnngö ngam ma-ahānga Chin, nö urēhĕkūö Meh, nö mahalēnken talöökö Meh min nö urĕh?

²⁸Ngö ṙô Chin tö yīö, Rö-övö nö töpōyuvö tö Yôhan i tum tak vē fahötnyö kikānö. Sönen pöri öp tökūöṅnö nö im pūlngö ngam halīöngö, nö pōyö tö ò.

²⁹Ngaich më taṙòhöre tarik hē cha nö hang, yik mahamūl ṙāi kinëhöt chehen inrē ngaich akahngen lanöökö ngam Tēv cha-a; pò cha nö tövōkö i ök tī Yôhan vinôkö.

³⁰Ngaich pöri yik Feresī, ane inrē yik mahaköptö ngam chöngö, nö sōḵo ngam tölöök tī ngam Tēv nö in cha; pò cha nö öt vōkö tö ò.

³¹Sitih inlahen tī Öichvö min asā tö vē tarik mi-i ngih tūmö? Sā yòh aichvö?

³²Sā nyīö yin vē amūichhaka nö i chūök mi-inyih, ngaich nöng kö havëken höö; yip töngö ṙô: Föö in yih in yīö; ngaich rö-ö yī-ö kiṙīöm. Harāmöre in yih; ngaich rö-ö yī-ö peuiny.

³³Pò Yôhan ök Vamôk nö yih, ngaich öt nya-aṅvkūö, ötrēhĕn nö òk vāin; ngaich ngö ṙô yī-ö, Sī-u aṅ in an?

³⁴Ngaich ngòh Kūön Tarik nö nya-aṅvkūö, hĕnghöre òk; ngaich ngö ṙô yī-ö, Yĕh meuk, ngòh töpōivat tarik, amòk vāin inrē; hamòl vē mahamūl ṙāi kinëhöt chehen, vē tököölö fālen inrē.

³⁵Akahaiṙen yin vē kūön mikah tö ngam mikah nö tökô-en.

³⁶Ngaich hĕng tak ök Feresī, hamôten Ò nö holkūö ò nö nyā. Kuhēthötre Anga-aṅ ngaich, nö ël ök patī ök Feresī; ngaich ūichngöre nö nyā.

³⁷Ngaich hĕng tak ök kikānö, aṅ im panam, tököölö fālen ök; ngaich akahalōn anga-aṅ tö Ò, nö ūichhaka nö nyā nö el patī ök Feresī, kēhöt anga-aṅ ngaich tö ök tö tā hūsa tavī-i nö el pilön.

³⁸Sökhaka anga-aṅ nö la-uk kunröön Ò, nöng peuiny; ngaich mu-uhôngi kunröön Anga-aṅ tö makmat ò; ngaich chūtö anū-ö tö ò nö aṅtī tö keūyöre; ngaich hāṅmökūö nuk kunröön Ò tö ò; ngaich hachāmö anū-ö tö ök tötahūsa tavī-i.

³⁹Ngaich hē ngam Feresī nö meūkö e, ngam mahavëken Ò, ngaich ngö ṙô anga-aṅ, nöng in re ṙô, Yē ngòh tarik öre nö pròfĕt, ngaich kô-òren nö akahalōn tö inlahen ngam kikānö, ngam lamūölken Ò, nö tököölö fālen.

⁴⁰Ngaich ngö ṙô Yēsū nö sap ṙô ò, Sīmōn; rahëichyen öp ṙô Chu in meh. Ngaich ngö ṙô ò, Mahaköphöti; ṙô-òv Man yĕh.

⁴¹Hĕng taka ök mahaṙūönghökūö ngaich nët tak nak tö hötṙehevö nö in ò. Hĕng taka ök tö taneūyòng hötṙeh, tö rupīö; hĕng taka ök tö taneui anāi hötṙeh.

⁴²Ngaich hē cha nö öt kahëtuvö, ngaich nëtre taka cha-a nö aṙēlöngö tö ò. Ap yòh ap öre tö cha ap tömööḵlö hanāngenlōn tö ò?

⁴³Ngaich ngö ṙô Sīmōn, nö sap ṙô Ò, Ngam töpōilö inṙē-ĕl an, tö lōn chu. Ngaich ngö ṙô Ò tö ò, Huveū-eu elmat man.

⁴⁴Havööhöti tökūöre nö im kikānö. Ngaich ngö ṙô Ò tö Sīmōn, Meuk ngòh öm kikānö. Kuhēthötre Chin el patī meh. Ngaich öt kē-ĕvkūö tö mak, sanöich röönre; ngaich pöri anga-aṅ nö mu-uhòngngö kunröön Chu tö makmatre; ngaich chūti anū-ö tö ò nö aṅtī tö keūyöre.

⁴⁵Yih chū-ö, rö-ö me-eṅ hāmkūö Chu; anga-aṅ pöri hēten tö yanihih Chu, nöng öt ṙākenre nö hām kunröön Chu.

⁴⁶Rö-ö yih me-eṅ hacham elkui Chu tö tavī-i; hachāmö kunröön pöri Chu-ö tö ngam tötahūsa tavī-i.

⁴⁷Lökten Chin ngö ṙô tö meh, Nup tökööl ò, nup töpōyen, nö aṙēḵlöngö; pò ò nö pōyen hanāngenlōn. Ngòh törahëichyen inṙēlö pöri, ngaich rahëichyen hanāngen?

⁴⁸Ngaich ngö ṙô Ò tö ngam kikānö, Aṙēḵlöng nup tökööl meh.

⁴⁹Ngaich yik hamòlkūö Ò nö nyā, nö ngö ṙô nö in re, Achīö ang ngòh tö uroh nö aṙē-ĕl tökööl?

⁵⁰Ngaich ngö ṙô Ò tö ngam kikānö, Ap mikah meh ap mahayööken meh. Kumchik ngöröönre man ngaich kuṙòh kiröönngöre.