Read Car_Nicobarese T. LŪKÖS 8 Bible Online

T. LŪKÖS 8 - Car_Nicobarese bible

T. LŪKÖS 8

¹Ngaich ilööṙen nö unôichngöre tö Ò, nö chuh i nup panam, tuhēt inrē, mumkahten ane inrē ahangkö ngam tölöök inhangkö ngam pūlngö ngam halīöngö. Hōlu Anga-aṅ tö yik tö nët sīön taka;

²Ngaich harohtum taka yik kikānö, yik tö ngaich nö halankaṙen tö-aṅhaṅv-in tö tötlöök sī-ö, ane inrē invah, Mariā ök tö Maktelīn nö invëka, ök tö sat tak sī-ö aṅ-in, yik ṙamāngen ò.

³Ane inrē Yôhanna ök pīhö Kūsa ök yōm inlanen Hērôt, Sūsanna inrē, maṙôngö yik tahëng mameukṙen cha.

⁴Ngaich yē yik tömaṙôngö tarik nö hamūl yanihire, ane inrē yik aṅ nuk panam nö yihtöre nö in Ò, hĕng ök ṙô Ò inchōḵo ṙô, nö ngö ṙô.

⁵Kiröönngöre an ngam tameūch nup kulölre. Ngaich hē ò nö teūch, rēvre nup famuk taseū talöökö, ngaich rööntukui anū-ö, yihtöre nup chehechōn inrē nö sòkngö u.

⁶Rēvre nup famuk kui ihong; sīöplöre anū-ö, ngaich nyangngö pò u nö öt nyôp.

⁷Fuk ël nup töchökhukūö nup tahëng; hol u ngaich minë töchökhukūö nö sīöp, ngaich rāingökui tī tö u.

⁸Fuk ël tölöök tumlat nup tahëng, ngaich sīöp, ngaich hēngòng ṙòng. Ngaich ngö ṙô Anga-aṅ, hē ṙô Ò tö u. Ngòh tö elnānguvö hökngen ò nö hang.

⁹Ngaich yik mahaköp nö hatönan tö inlahen ngam inchōḵoṙô.

¹⁰Ngaich ngö ṙô Anga-aṅ, Yī-ö yin tö kē-ĕvkūö pòi hōtu akahalōn tö ngam ötmikahkūö sin inlahen ngam pūlngö ngam Tēv; i yip tahëng tak pöri, höng i inchōḵoṙô; pò cha nöng meuk, ngaich nöng öt akaha el mat; hang yih cha-a, ngaich öt akaha elnang.

¹¹Ngih öng kòl inlahen ngam inchōḵoṙô, Ngam kulöl an, ṙô ngam Tēv.

¹²Nup mi-i taseū talöökö, cha-a yip hamang yihtöre ngaich ngam sī-ö, nö kēḵngö ap ṙô nö ellōn cha; pòn sōtu cha-a nö ṙātö ellōnre, ngaich hayöökaṙen.

¹³Nup mi-i kui ihong, cha-a yip hamang, ngaich ṙāmölōn sin nö hōḵo ngam ṙô, ötṙēhĕvö pöri cha-a; yip töng rahëichtaṙen nö ṙātö ellōnre, ngaich ṙāngenre, hē el kanihngen.

¹⁴Nup famuk ël nup töchökhukūö, cha-a yip hamang, ngaich yē rô-òten cha, ngaich nup kanôlò, lōn ane inrē minyam, nö rāingökui tī tö cha; ngaich öt taneūnguṙen cha-a tö ṙòng.

¹⁵Nup me-el tölöök tumlat, cha-a yip tölöök, tökô-en ellōn, hamang ngam ṙô, haköpngöre ngaich, ip manööyö, ngaich nö ṙônguvö.

¹⁶Öt tarīkuvö tamôttökūö eṅāvö, ngaich ruptökui e tö kuvôkö, hēk öt ṙātö e inrē nö elkatòh chamam. I kui öp tösökhak pöri nö hātömat.

¹⁷Pòn rö-övö nö töhayunkavö öp töthanmeukten min; ötrēhĕn nö tö-ulāikavöṙen, öp töt akahaiṙen, ane inrē tö-ötteungtökūö nö im hanātö.

¹⁸Haṙēmngenre yin lökten, tö nup ahangre; tön ngòh tö-aṅhaṅv-in, ngaich anga-aṅ min tö kē-ĕvkūö; ngòh tötaṅhaṅv-in, ngaich kē-ĕyö min nö in ò öp töng mi-in ò, tö lōn ò.

¹⁹Ngaich yihtöre nö in Ò ök yöng Ò kikānö, yik hanöngkisānö Ò inrē; ngaich öt kô cha-a nö yihtöre nö in Ò, kūö më tömaṙôngö.

²⁰Ngaich ngö vine-eny nang Anga-aṅ, Höng sökhak ap yöng Meh kikānö, yip hanöngkisānö Meh inrē nöng lā-uk, nö hòṅ meukkūö Meh.

²¹Ngaich ngö ṙô Ò nö sap ṙô cha, Ngam yöng Chu kikānö ane inrē yip hanöngkisānö Chu, cha-a yip hamang ṙô ngam Tēv, ngaich haköpngöre.

²²Ngaich hĕng heuh ik hē u anū-ö sakāmö, tö Ò nö yôklö nö el kupòk, nö holtö yik mahaköp; ngaich ngö ṙô Ò tö cha, Ta-a, töi chuh lā mu-aṅ. Ngaich siṙaknyöre cha-a.

²³Ngaich ṙòngmöng kiröönngöre cha-a, ngaich haṙòh Anga-aṅ. Ngaich ök yöng chanôchö kuföt nö ël ök mai; ngaich tööḵlö cha-a tö mak, ngaich nö kihngen.

²⁴Yihtöre cha-a nö in Ò nö kilanglen Ò, nö ngö ṙô: Mahaköhöti, Mahaköphöti, ötkôlò in. Ngaich choholre anga-aṅ, ngaich vëkö ngam kuföt, ngam ëlmai inrē; ngaich ṙāngenre anū-ö, ngaich kalūöng.

²⁵Ngaich ngö ṙô Anga-aṅ tö cha, Isuh ap mikah yīö? Pa-ekūö ngaich cha-a, hĕnghöre pingangkūö; ngaich ngö ṙô cha-a tö höö, Achīö angvö ngòh tamölṙô ngam kuföt, ngam mai inrē ngaich hāngö ṙô.

²⁶Chalôḵ cha-a ngaich nö ik panam Keresēn, ök törònglö nö i Këlelī.

²⁷Ngaich yôkti Anga-aṅ nö el tanyô. Ngaich hĕng tak ök tarik aṅ ök panam, mameūkö Ò, tö sī-u aṅ-in. Tömarô-angen ök nöng öt hilāṙu; öt iyöng patī, höng i kuikupah.

²⁸Höng meuktöre anga-aṅ tö Yēsū, ngaich hūḵa, ane inrē afukngöre nö i kūö Ò, ngaich pōitô nö ngö ṙô, Sitih falngen öich min in Meh, Yēsū, Me-eṅ kūön ngam Tēv Lamātulöng. Ve-ekūö Meh chin, uh chin hakihtuṙen.

²⁹Pò Ò nö tölṙô yik tötlöök sī-ö nö kunyi-inyre nö ṙā-ang ik tarik. Marò-òten an nö in ò; ngaich aṅtuvö anga-aṅ, nö nyanëktö sayōk; ngaich litòknyö u; ahōṙi ngaich tö ngam sī-ö nö el-inchōn.

³⁰Hatönan ang Yēsū, nö ngö ṙô, Achīö ap mine-eny meh? Ngaich ngö ṙô ò. Līkiön chin; pòn maṙôngö yik sī-ö nö in ò.

³¹Ngaich ve-ekūö Ò cha-a, nö sōten Ò nö tölṙô cha nö kiröönngöre nö chuh ël nup tömaṙūnghöti.

³²Tö hĕng mūl nö töpōyen nuk umuh ha-un tö ha-ôkö nö i kui rôngö. Ngaich cha-a nö ve-ekūö Ò, nö hökngen cha nö chuh in u; ngaich hökiṙen cha-a tö Ò.

³³Ngaich kunyi-inyre yik sī-ö nö ṙāngö ngam tarik; ngaich kuhēthötre nö i nuk ha-un. Ngaich anū-ö nö kumöingöre nö i kui panam, ngaich fuk ël mai; ngaich kapah.

³⁴Höng meuktöre yik maha-ôkö u, tö inlahen u, kiröönngöre cha-a ngaich nö ve-eny nö ip panam, i tavat inrē.

³⁵Kiröönngöre cha-a, ngaich, nö ngëichkö inlahen u, nö yihtöre nö in Yēsū, ngaich kôtökūö tök tarik, ök tö-aṅhaṅv-in tö yik sī-ö kumröönngöre, nö ūichhaka nö i kalröön Yēsū, nö ngaich nö inyuttö lanööken ellōn; ngaich pe-ekūö cha-a.

³⁶Ngaich yik mameūkö e, nö ve-eny nang cha tö ök tö-aṅhaṅv-in tö sī-ö, nö lööken.

³⁷Ngaich ṙòkhöre yik tarik aṅ ök panam i Keresēn, nup töng ranghö e inrē, nö ve-ekūö Ò nö kiröönngöre nö ṙāngen cha. Pò cha nö pōyen pinheṅ-eṅkūö. Yôklö Anga-aṅ ngaich nö el kupòk, ngaich havantöre.

³⁸Ve-evkūö pöri Anga-aṅ tö ngam tarik, ngam tö-aṅhaṅv-in tö yik sī-ö kumröönngöre; pò ò nö hòṅ in Ò. Tīnirit pöri anga-aṅ tö Ò, nö ngö ṙô,

³⁹Havantöre man i patīre; ve-eny ṙôken tī ngam Tēv, töpòkūö meh. Ngaich kiröönngöre anga-aṅ; keuheūt ngam panam nö ve-eny ṙôken tī Yēsū, töpòkūö ò.

⁴⁰Ngaich im invantö Yēsū, ha-öinytu yanihih Anga-aṅ tö yik tömaṙôngö; pò cha nö ṙòkhöre nöng hökken Ò,

⁴¹Ngaich hĕng taka ök tarik yamihtöre, Yāirös ök mine-eny ò, mākūö ök chūök vine-eṅkūötēv; afukngöre anga-aṅ nö i kunröön Yēsū, nö ve-ekūö Ò, nö yihtöre nö i patī ò.

⁴²Pò ò nö hĕng tak kūön tö kikānö, ök töng hĕng maneuk, tö nët sīön höiny samyeūheu, tö hòṅ kapah. Ngaich hē Ò nö kiröönngöre, ngaich më tömaṙôngö nöng singngen Ò.

⁴³Ngaich hĕng taka ök kikānö tö nët sīön samyeūheu kunnyahen, tökeuheūtö tī tö nuk nômöre nö i lame-en tövahavö; ngaich nöng öt lanöökuṙen.

⁴⁴Yihtöre nö i uk Ò, ngaich lūölkö hilā Ò. Ngaich ilööṙen ök kunnyahen ò nö nyôklö.

⁴⁵Ngaich ngö ṙô Yēsū, Achīö ap lamūölken Chu? Ngaich ṙòkhöre nöng rö-öv ṙô, ngaich ngö ṙô Pītör, yik hamòl ò inrē, Mahaköphöti; sīngi Man tö vē tömaṙôngö, ane inrē kirāchi.

⁴⁶Ngaich ngö ṙô ang Yēsū, Hĕng taka tal öp lamūölken Chu; tön akahngen ngam kanô-òṅ Chin, nö kiröönngöre nö ṙāngen Chu.

⁴⁷Höng meuktöre ngam kikānö töre nö öt hayunkaṙen, ngaich pa-ekūö anga-aṅ, ve-eny ap löktötīre anga-aṅ nö lūölken Ò, i kūö më tömaṙôngö tarik; tö ò inrē nö lööken.

⁴⁸Ngaich ngö ṙô Ò tö ò, Kakūönö, ap mikah meh ap tölöökentī tö meh. Kumchikngöröönre man kuṙòh kiröönngöre.

⁴⁹Ṙònghöichṙô Anga-aṅ, hĕng tak ngaich ök yamihtöre, nö ṙā-ang patī ngam mākūö chūök vine-eṅkūötēv, nö ngö ṙô, Kapah ök kūön meh nö ngaich; un līptuṙen ngam Mahaköphöti.

⁵⁰Hāngö e pöri Yēsū, ngaich sapṙô ò, Um pa-ekūö; höng ṙātö ellōnre; ngaich lööken min anga-aṅ.

⁵¹Chalôḵ Anga-aṅ nö im patī, ngaich öt hōtö töng tarik nö kuhēthötre nö hol Ò, höng hēḵ Pītör, Yôhan, ane inrē Yāköp, tö nak yöng ngam nyīö kikānö inrē.

⁵²Ṙòkhöre ngaich nö peuiny, ane inrē harāman; ngaich ngö ṙô Ò. Ui peuiny; tön öt kapah an; höng haṙòh pöri

⁵³Ngaich cha-a nöng minônngöre, nö hayīölngen Ò; pò cha nö akahalōn tö ò nö kapah.

⁵⁴Keuheūthëtī Anga-aṅ nö ha-ōnyen cha; kētam Anga-aṅ tö kël ò, havëken ò, nö ngö ṙô, Kun kikānö, choholre man.

⁵⁵Ngaich ök ma-alaha ò nö havantöre, ilööṙen anga-aṅ nö choholre. Ngaich Yēsū nö tölṙô kinëtö nya-aṅkūö ò.

⁵⁶Pingangkūö ngaich minā yöng ò; sōḵoti pöri Anga-aṅ tö vine-eny nang tarik, tö inlahen tī Ò.