Read Car_Nicobarese T. LŪKÖS 9 Bible Online

T. LŪKÖS 9 - Car_Nicobarese bible

T. LŪKÖS 9

¹Have-eti Anga-aṅ tö yik tö nët sīön taka, nö ṙòkhöre ngaich kē-ĕkūö cha tö kanô-òṅ ane inrē minhôiṅyö tö sī-ö, ane inrē inlanken invah.

²Tīnirit cha-a ngaich tö Ò, nö mumkahten tö ngam pūlngö ngam Tēv, ane inrē halanken tövahavö.

³Ngaich ngö ṙô Ò, tö cha, Ui kahëkuvö öi im kinṙönngöre un rēhĕn tinkung, un rēhĕn inyul, un rēhĕn nya-aṅ, un rēhĕn rupīö, ui rēhĕn nëtö inyut.

⁴Ngaich yē nup töyô-òv patī chūök yīö kuhēthötre, in e ngaich höngngöh; ngaich hēk kiröönngöre.

⁵Ngaich yē ṙôngö yip samôḵen yīö yē yīö pöchö kiröönngöre ṙāngö ngam panam, pitōngngö pitung kunröönre pöichö, minkahngö cha.

⁶Kiröönngöre cha-a, ngaich lök i nup tuhēt, mumkahten tö ngam tölöök inhānga, ane inrē keuheūt chūökre nö halanken tövahavö.

⁷Hang nup töngaichngen ang Hērôt ök kun rācha, ngaich pa-ekūö anga-aṅ; pòn rēvre yik tö ngö ṙô, tö Yôhan nö havanlöre, nö ṙā-ang yik tökapah.

⁸Rēvre töng ṙô, tö Ēlaicha nö meūkö; rēvre yik tahëng tö ngö ṙô, Hĕng taka An aṅ i yip höteh pròfĕt mahavanlöre.

⁹Ngaich töngö ṙô Hērôt röki likeun ök Yôhan tö chu. Achīö angvö ngòh, ngam ahang inlahen chu tö töngatī. Ngaich hòṅ meukkūö Ò anga-aṅ.

¹⁰Ngaich yik tanīnöṙô, tö invantöre, nö vë-eny nang Ò tö nuk tö ngaich ngen la-en re kē-ĕyö ngaich cha-a tö Ò, nö ṙuhöyö nö ip panam Petsĕitā.

¹¹Akaha lōn pöri yik tömaṙôngö ngaich tömrit Ò; ha-öinytu yanihi cha-a ngaich tö Ò; ngaich vënyu nang cha-a tö ngam pūlngö ngam Tēv, ngaich yik tö hòṅ halankaṙen, nö halankaṙen tö Ò.

¹²Ngaich ngam sakāmö nö hòṅ harap. Yihtöre ngaich yik tö nët sīön taka, nö ngö ṙô tö Ò, Tīnngörit më tömaṙôngö; hòṅ cha nö chuh tuhēt, tavat inrē tö röhta; nö chūökuvö, kēḵ nya-aṅkūöre inrē; tön el-inchōn ön ngih chūök hī ihih.

¹³Ngaich ngö ṙô Anga-aṅ tö cha, Kētö nya-aṅkūö cha yin yī-ö. Ngaich ngö ṙô cha-a, Öt sinṙaklukūö nun në in ih, töng tamneui ròtī, ma-anët nòng kāḵ, yē ih öt kiröönngöre öi havah nya-aṅkūö më tö maṙôngö tarik.

¹⁴Pò cha nö taneui köṅny tum taka. Ngaich ngö ṙô Anga-aṅ tö yik mahaköp, Ha-ūichngen cha nö kö taneui anāi i töhĕng mūl.

¹⁵Ngaich ngatī cha-a, nö ha-ūichngen cha nö ṙòkhöre.

¹⁶Kētam Anga-aṅ tö minë tö taneui ròtī, minë tönët nòng kāḵ inrē ngaich môklökūöre nö el halīöngö, hakôlò u Anga-aṅ; ngaich tikāchö u, ngaich kē-ĕti nö i yik mahaköp nö kē-ĕkūö yik tömaṙôngö.

¹⁷Nyā ngaich cha-a, ngaich ṙòkhöre nö tööḵngen, ngaich kē-ĕ nuk chööḵkūö cha, nuk töng laköla, nët sīön kumvôkö.

¹⁸Ngaich hē Ò nöng hĕng taka nö ve-ekūötēv, hōlu. Anga-aṅ tö yik mahaköp, ngaich hatönö cha Anga-aṅ nö ngö ṙô, Achīö öich kan, tö ṙô vē tömaṙôngö?

¹⁹Ngaich ngö ṙô cha-a, nö sapṙô Ò, Yôhan Öp Vamôk; rēvre pöri yip tö ngö ṙô, Ēlaicha; hēk yip tahëng tö ngö ṙô, Hĕng taka ap aṅ i yip höteh pròfĕt, mahavanlöre.

²⁰Ngaich ngö ṙô Anga-aṅ tö cha, Achīö öich rih Chu-ö tö ṙô yīö? Ngaich ang Pītör nö sapṙô Ò nö ngö ṙô, Kristū ngam Tēv Man.

²¹Ve-evkūö ngaich cha-a tö Ò, nö sōtu nö ve-eny e nö i tarik.

²²Nö ngö ṙô, Pōyen kanihngen ön min ngòh Kūön Tarik: sōḵovö ön min tö yip mākūö, yip kūönṙô, yip kamūich inrē; fëli ngaich; im linūöi sumkam nö hachohlöngö.

²³Ngaich ngö ṙô Anga-aṅ tö cha nö ṙòkhöre, Yē ngòh tarik tö hòṅ yihtöre nö tömrit Chu, hökngen ò nö hayëḵngenre, nö kēḵ ngam töhakālö örheūheu, ngaich tömrit Chu.

²⁴Pò ngòh tö hòṅ hayööken nômöre, nö ötteūngen min tö e; ngòh tö-ötteūngen pöri tö nômöre min, tö pòkūö Chu, anga-aṅ min mahayööken e.

²⁵Asuh ap öre kanôlò ngòh tarik, yē ò nö teūngen töng taṙòkhöre panam; ngaich pöri nö ötteūngen tö nômöre, nö ötinkôlò?

²⁶Pò ngòh tösirōngkūö min tö Chu, tö në ṙô Chu inrē; anga-aṅ min tösumrōngikūö tö ngòh Kūön Tarik, yē Ò nö yihtöre nö ip kanôlòre, kanôlò ngam Yöng inrē, yip töhet ma-ahānga inrē.

²⁷Tökô-ò ṙô Chin tö yīö, Rēvre yip samökhaka in yīö nö ihih, yip tö öthōḵ nö kapah hanöng saha mat cha nö meuk ngam pūlngö ngam Tēv.

²⁸Ngaich hëvhöre hang sumkam, tökinheūṅten në ṙô, ngaich Anga-aṅ nö holten Pītör, Yôhan, ane inrē Yāköp, nö yônlö nö i kui rôngö, nö ve-ekūötēv.

²⁹Ngaich hē Ò nö ṙòngmö ve-ekūötēv, ngaich haṙī-ingre ök kūö Ò nö isoh, pachālamat inrē.

³⁰Ngaich nët taka nak tarik vame-eṅkūö Ò, nā Môsös, nā Ēlaicha;

³¹Nak tömeūkö nö im kanôlò; nö ve-ekūö Ò tök kinpaha Ò, ök keuheūtngen Ò nö i Yerūsalem.

³²Ngaich ang Pītör, nak hol ò inrē, nö kalēḵ ĕmat nö haṙòh. Ngaich hē cha nö aṅhen takô, ngaich meuk kanôlò Ò cha-a nak tö nët taka inrē tarik hol Ò nö sökhaka.

³³Ngaich ik chanuhu cha nö ṙāngen Ò, ngö ṙô ang Pītör tö Yēsū, Mahaköphöti; kuchīken in öre öi ihih. Ta-a, töi lūöyö vahī tö inrūkui; hēngö inrūkui Me-eṅ, hēngö inrūkui Môsös, hēngö inrūkui Ēlaicha; nöng öt akahalōn tö ṙôre.

³⁴Ṙònghöichṙô anga-aṅ tö u, chalôḵ ngaich ök taṙul, ngaich hanyattökui cha. Ngaich pa-ekūö cha-a, tö inlahenre nö ël ök taṙul.

³⁵Ngaich hĕng ök ṙô lamöktö ël ök taṙul, töngö, Kūön Chu Ön ngòh, katöllö Chu; hang ṙô Ò yin.

³⁶Keuheūthëṙen ngam ṙô, ngaich Yēsū nöng hĕng tit taka. Höng öt ṙô-òv cha-a, ngaich öt vahënyu nang tö tarik inrē hē-e, tö nuk töngaichngen maheuṅk cha.

³⁷Ngaich im tahëngngöre sumkam, hē cha nö yônti, nö ṙā-ang kui ap ṙôngö; höngökūö Anga-aṅ ngaich tö yik tömaṙôngö tarik.

³⁸Ngaich hĕng taka ök tarik i më tömaṙôngö, töngö ṙô, Mahaköphöti; ve-ekūö Meh chin, Öm ngëichkö ngòh kūön chu; tön töng humeng maneuk ön, nö kūön chu.

³⁹Ngaich kē-ĕyö anga-aṅ tök sī-ö, ngaich hönglūk anga-aṅ nö hūḵa; pilönö anga-aṅ tö ò, ngaich atēngakūö; kihngen chanuhu anga-aṅ nö ṙā-ngen Ò, ngaich pōihangentī tö ò nö taleuich.

⁴⁰Ve-ekūö më mahaköp chin nö in Meh taheui, nö kēḵngen ò; ngaich rö-ö cha-a nö kô.

⁴¹Ngaich sapṙô ò Yēsū nö ngö ṙô, Ō tötmikahavö tūmö tövāchöku-ö; i rô-òten Öich min holtöṙah yīö? I rô-òten manöiyö Öich min in yīö? Kētö ngam kūönre man ihih.

⁴²Ṙòngmöng yihtöre anga-aṅ, ngaich ngam sī-ö nö afukngen ò, ane inrē pilönan nö kalē-ĕtī. Vëka pöri ngam tötlöök sī-ö tö Yēsū; ngaich lööken ngam nyīö, ngaich kētuvö tö Ò nö ik yöngre. Ngaich cha-a nö ṙòkhöre nö pingangkūö tö kanôlò ngam Tēv.

⁴³Ngaich ṙòngmöng pingangkūö cha-a tö nuk tī Ò, ngaich ngö ṙô Anga-aṅ tö yik mahaköp,

⁴⁴Hökngen në ṙô yin nö meuthöt nö elnang yīö; pò ngòh Kūön Tarik min nö kētuvö nö eltī tarik.

⁴⁵Öt akaha el nang pöri cha-a tö ṙô Ò; hayūni ök nö in cha; lökten cha nö öt kô nö meukö e; ngaich pa-ekūö cha-a nö hatönan tö e.

⁴⁶Ap yòh ap vö min töpōyö tö cha ngö lōn cha-a nö in re.

⁴⁷Ngaich hē Yēsū nö meuk ngam lōn cha, hĕng tak kahëḵ Anga-aṅ tö kun nyīö, ngaich ha-ūichlöngö tö Ò nö i taseū Ò.

⁴⁸Ngaich ngö ṙô Ò tö cha, Yē ngòh hamôḵòṅ ngòh kun nyīö min, nö i Mine-eny Chu, ngaich hamôḵen Chu. Ngòh hamôḵen Chu min, ngaich hamô-òṅ ngam tamin ngen Chu. Pò ngòh tökūöṅnö nö in yīö ṙòkhöre, anga-aṅ tö pōyö.

⁴⁹Ngaich ngö ṙô Yôhan nö sapṙô Ò, Mahaköphöti; hĕng taka ök maheuṅk ih, maha-ōngö sī-ö nö i Minënyö Meh. Ngaich sōtu anga-aṅ tö ih, pò ò nö öt tömrit ih.

⁵⁰Ngö ṙô pöri Yēsū tö ò, Un sōtu ap; tön ngòh tötmirëich tö yīö, anga-aṅ an lamā in yīö.

⁵¹Ngaich hē ranöhta yanihih sakāmö Ò, nö kēḵlöngö; hachip kū-öre Anga-aṅ nö chuh Yesūsalem.

⁵²Ngaich tīnngö ma-ahānga nö urēhĕkūö Ò. Kiröönngöre cha-a ngaich, ngaich kuhēthötre nö i tuhēt yik aṅ Samariā, nö halēnken yanihih Ò.

⁵³Ngaich öt hōḵovö Anga-aṅ tö cha, pò Ò nöng sā tö kū-ötö Yerūsalem nö kiröönngöre.

⁵⁴Höng meuktöre nak mahaköp nāṅ Yôhan, nāṅ Yāköp, tö e, ngaich ngö ṙô cha-a tö Ò, Mā, hōḵ Öm öre tö ih tölṙô tameūyö öp ṙamā-ang el halīöngö, nö famöngngen cha; sā tī Ēlaicha

⁵⁵Havöölökūöre Anga-aṅ, ngaich vëken cha; ngaich ngö ṙô Ò, Rö-ö yin akahalōn tö fanöinylö löknyö yīö öi havëkö e.

⁵⁶Pò ngòh Kūön Tarik nö öt yamih nö famël, mahayööken unhôṅmö tarik pöri. Ngaich cha-a nö chuh ik tahëng tuhēt.

⁵⁷Ngaich hē cha nö ṙòngmö kiröönngöre nö el talöökö, ngaich hĕng taka ök tarik töngö ṙô tö Ò, Mā hòṅ tömrit Meh chin, yē öp töng kū-ö Meh kiröönngöre.

⁵⁸Ngaich ngö ṙô Yēsū tö ò, Kilmīṙu nun në am aṅ el-inchōn; fônguvö në chehechōn; ötrēhĕn pöri ngòh Kūön Tarik nö chūöku ṙanôlngö kui.

⁵⁹Ngaich ngö ṙô Ò tök tahëng taka, Tömrit Chu man. Ngö ṙô pöri anga-aṅ, Mā; hökngen chu, urĕh kiröönngöre, öich ulngö öp yöngre.

⁶⁰Ngaich ngö ṙô Anga-aṅ tö ò, Hökngen yip tökapah nö ulngö kupahre. Kiröönngöre pöri me-eṅ, kuṙòh; ahangkö ngam pūlngö ngam Tēv, i tömaṙôngö.

⁶¹Hĕng taka ök tö ngö ṙô inrē. Mā; hòṅ tömrit Meh chin; hökngen chu pöri urĕh, öich have-engritre i yip aṅ patī chu.

⁶²Ngaich ngö ṙô Yēsū tö ò, Öt tarīkuvö kamëkö sanapre nö eltīre, ngaich tēk unôch, nö töhōḵovö nö im pūlngö ngam Tēv.